| Library / Tipiṭaka / ཏིཔིཊཀ • Tipiṭaka / སཾཡུཏྟནིཀཱཡ • Saṃyuttanikāya |
༨. སལལཱ༹གཱརསུཏྟཾ
8. Salaḷāgārasuttaṃ
༩༠༦. ཨེཀཾ སམཡཾ ཨཱཡསྨཱ ཨནུརུདྡྷོ སཱཝཏྠིཡཾ ཝིཧརཏི སལལཱ༹གཱརེ། ཏཏྲ ཁོ ཨཱཡསྨཱ ཨནུརུདྡྷོ བྷིཀྑཱུ ཨཱམནྟེསི…པེ॰… ཨེཏདཝོཙ – ‘‘སེཡྻཐཱཔི, ཨཱཝུསོ, གངྒཱ ནདཱི པཱཙཱིནནིནྣཱ པཱཙཱིནཔོཎཱ པཱཙཱིནཔབྦྷཱརཱ། ཨཐ མཧཱཛནཀཱཡོ ཨཱགཙྪེཡྻ ཀུདྡཱལཔིཊཀཾ 1 ཨཱདཱཡ – ‘མཡཾ ཨིམཾ གངྒཱནདིཾ པཙྪཱནིནྣཾ ཀརིསྶཱམ པཙྪཱཔོཎཾ པཙྪཱཔབྦྷཱར’ནྟི། ཏཾ ཀིཾ མཉྙཐཱཝུསོ, ཨཔི ནུ སོ མཧཱཛནཀཱཡོ གངྒཱནདིཾ པཙྪཱནིནྣཾ ཀརེཡྻ པཙྪཱཔོཎཾ པཙྪཱཔབྦྷཱར’’ནྟི? ‘‘ནོ ཧེཏཾ, ཨཱཝུསོ’’། ‘‘ཏཾ ཀིསྶ ཧེཏུ’’? ‘‘གངྒཱ, ཨཱཝུསོ, ནདཱི པཱཙཱིནནིནྣཱ པཱཙཱིནཔོཎཱ པཱཙཱིནཔབྦྷཱརཱ། སཱ ན སུཀརཱ པཙྪཱནིནྣཾ ཀཱཏུཾ པཙྪཱཔོཎཾ པཙྪཱཔབྦྷཱརཾ། ཡཱཝདེཝ ཙ པན སོ མཧཱཛནཀཱཡོ ཀིལམཐསྶ ཝིགྷཱཏསྶ བྷཱགཱི ཨསྶཱ’’ཏི།
906. Ekaṃ samayaṃ āyasmā anuruddho sāvatthiyaṃ viharati salaḷāgāre. Tatra kho āyasmā anuruddho bhikkhū āmantesi…pe… etadavoca – ‘‘seyyathāpi, āvuso, gaṅgā nadī pācīnaninnā pācīnapoṇā pācīnapabbhārā. Atha mahājanakāyo āgaccheyya kuddālapiṭakaṃ 2 ādāya – ‘mayaṃ imaṃ gaṅgānadiṃ pacchāninnaṃ karissāma pacchāpoṇaṃ pacchāpabbhāra’nti. Taṃ kiṃ maññathāvuso, api nu so mahājanakāyo gaṅgānadiṃ pacchāninnaṃ kareyya pacchāpoṇaṃ pacchāpabbhāra’’nti? ‘‘No hetaṃ, āvuso’’. ‘‘Taṃ kissa hetu’’? ‘‘Gaṅgā, āvuso, nadī pācīnaninnā pācīnapoṇā pācīnapabbhārā. Sā na sukarā pacchāninnaṃ kātuṃ pacchāpoṇaṃ pacchāpabbhāraṃ. Yāvadeva ca pana so mahājanakāyo kilamathassa vighātassa bhāgī assā’’ti.
‘‘ཨེཝམེཝ ཁོ, ཨཱཝུསོ, བྷིཀྑུཾ ཙཏྟཱརོ སཏིཔཊྛཱནེ བྷཱཝེནྟཾ ཙཏྟཱརོ སཏིཔཊྛཱནེ བཧུལཱིཀརོནྟཾ རཱཛཱནོ ཝཱ རཱཛམཧཱམཏྟཱ ཝཱ མིཏྟཱ ཝཱ ཨམཙྩཱ ཝཱ ཉཱཏཱི ཝཱ སཱལོཧིཏཱ ཝཱ བྷོགེཧི ཨབྷིཧཊྛུཾ པཝཱརེཡྻུཾ – ‘ཨེཧམྦྷོ པུརིས, ཀིཾ ཏེ ཨིམེ ཀཱསཱཝཱ ཨནུདཧནྟི? ཀིཾ མུཎྜོ ཀཔཱལམནུསཉྩརསི? ཨེཧི ཧཱིནཱཡཱཝཏྟིཏྭཱ བྷོགེ ཙ བྷུཉྫསྶུ པུཉྙཱནི ཙ ཀརོཧཱི’’’ཏི།
‘‘Evameva kho, āvuso, bhikkhuṃ cattāro satipaṭṭhāne bhāventaṃ cattāro satipaṭṭhāne bahulīkarontaṃ rājāno vā rājamahāmattā vā mittā vā amaccā vā ñātī vā sālohitā vā bhogehi abhihaṭṭhuṃ pavāreyyuṃ – ‘ehambho purisa, kiṃ te ime kāsāvā anudahanti? Kiṃ muṇḍo kapālamanusañcarasi? Ehi hīnāyāvattitvā bhoge ca bhuñjassu puññāni ca karohī’’’ti.
‘‘སོ ཝཏ, ཨཱཝུསོ, བྷིཀྑུ ཙཏྟཱརོ སཏིཔཊྛཱནེ བྷཱཝེནྟོ ཙཏྟཱརོ སཏིཔཊྛཱནེ བཧུལཱིཀརོནྟོ སིཀྑཾ པཙྩཀྑཱཡ ཧཱིནཱཡཱཝཏྟིསྶཏཱིཏི – ནེཏཾ ཋཱནཾ ཝིཛྫཏི། ཏཾ ཀིསྶ ཧེཏུ? ཡཉྷི ཏཾ, ཨཱཝུསོ, ཙིཏྟཾ དཱིགྷརཏྟཾ ཝིཝེཀནིནྣཾ ཝིཝེཀཔོཎཾ ཝིཝེཀཔབྦྷཱརཾ ཏཾ ཝཏ ཧཱིནཱཡཱཝཏྟིསྶཏཱིཏི – ནེཏཾ ཋཱནཾ ཝིཛྫཏི། ཀཐཉྩཱཝུསོ, བྷིཀྑུ ཙཏྟཱརོ སཏིཔཊྛཱནེ བྷཱཝེཏི, ཙཏྟཱརོ སཏིཔཊྛཱནེ བཧུལཱིཀརོཏཱིཏི? ཨིདྷཱཝུསོ, བྷིཀྑུ ཀཱཡེ ཀཱཡཱནུཔསྶཱི ཝིཧརཏི…པེ॰… ཝེདནཱསུ…པེ॰… ཙིཏྟེ…པེ॰… དྷམྨེསུ དྷམྨཱནུཔསྶཱི ཝིཧརཏི ཨཱཏཱཔཱི སམྤཛཱནོ སཏིམཱ, ཝིནེཡྻ ལོཀེ ཨབྷིཛ྄ཛྷཱདོམནསྶཾ། ཨེཝཾ ཁོ, ཨཱཝུསོ, བྷིཀྑུ ཙཏྟཱརོ སཏིཔཊྛཱནེ བྷཱཝེཏི, ཙཏྟཱརོ སཏིཔཊྛཱནེ བཧུལཱིཀརོཏཱི’’ཏི། ཨཊྛམཾ།
‘‘So vata, āvuso, bhikkhu cattāro satipaṭṭhāne bhāvento cattāro satipaṭṭhāne bahulīkaronto sikkhaṃ paccakkhāya hīnāyāvattissatīti – netaṃ ṭhānaṃ vijjati. Taṃ kissa hetu? Yañhi taṃ, āvuso, cittaṃ dīgharattaṃ vivekaninnaṃ vivekapoṇaṃ vivekapabbhāraṃ taṃ vata hīnāyāvattissatīti – netaṃ ṭhānaṃ vijjati. Kathañcāvuso, bhikkhu cattāro satipaṭṭhāne bhāveti, cattāro satipaṭṭhāne bahulīkarotīti? Idhāvuso, bhikkhu kāye kāyānupassī viharati…pe… vedanāsu…pe… citte…pe… dhammesu dhammānupassī viharati ātāpī sampajāno satimā, vineyya loke abhijjhādomanassaṃ. Evaṃ kho, āvuso, bhikkhu cattāro satipaṭṭhāne bhāveti, cattāro satipaṭṭhāne bahulīkarotī’’ti. Aṭṭhamaṃ.
Footnotes:
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / སཾཡུཏྟནིཀཱཡ (ཨཊྛཀཐཱ) • Saṃyuttanikāya (aṭṭhakathā) / ༨. སལལཱ༹གཱརསུཏྟཝཎྞནཱ • 8. Salaḷāgārasuttavaṇṇanā
