| Library / Tipiṭaka / ติปิฎก • Tipiṭaka / อปทานปาฬิ • Apadānapāḷi |
๑๐. สฬลปุปฺผิยเตฺถรอปทานํ
10. Saḷalapupphiyattheraapadānaṃ
๓๕.
35.
‘‘จนฺทภาคานทีตีเร , อโหสิํ กินฺนโร ตทา;
‘‘Candabhāgānadītīre , ahosiṃ kinnaro tadā;
ตตฺถทฺทสํ เทวเทวํ, จงฺกมนฺตํ นราสภํฯ
Tatthaddasaṃ devadevaṃ, caṅkamantaṃ narāsabhaṃ.
๓๖.
36.
‘‘โอจินิตฺวาน สฬลํ, ปุปฺผํ พุทฺธสฺสทาสหํ;
‘‘Ocinitvāna saḷalaṃ, pupphaṃ buddhassadāsahaṃ;
อุปสิงฺฆิ มหาวีโร, สฬลํ เทวคนฺธิกํฯ
Upasiṅghi mahāvīro, saḷalaṃ devagandhikaṃ.
๓๗.
37.
‘‘ปฎิคฺคเหตฺวา สมฺพุโทฺธ, วิปสฺสี โลกนายโก;
‘‘Paṭiggahetvā sambuddho, vipassī lokanāyako;
อุปสิงฺฆิ มหาวีโร, เปกฺขมานสฺส เม สโตฯ
Upasiṅghi mahāvīro, pekkhamānassa me sato.
๓๘.
38.
‘‘ปสนฺนจิโตฺต สุมโน, วนฺทิตฺวา ทฺวิปทุตฺตมํ;
‘‘Pasannacitto sumano, vanditvā dvipaduttamaṃ;
อญฺชลิํ ปคฺคเหตฺวาน, ปุน ปพฺพตมารุหิํฯ
Añjaliṃ paggahetvāna, puna pabbatamāruhiṃ.
๓๙.
39.
‘‘เอกนวุติโต กเปฺป, ยํ ปุปฺผมภิปูชยิํ;
‘‘Ekanavutito kappe, yaṃ pupphamabhipūjayiṃ;
ทุคฺคติํ นาภิชานามิ, พุทฺธปูชายิทํ ผลํฯ
Duggatiṃ nābhijānāmi, buddhapūjāyidaṃ phalaṃ.
๔๐.
40.
‘‘ปฎิสมฺภิทา จตโสฺส…เป.… กตํ พุทฺธสฺส สาสนํ’’ฯ
‘‘Paṭisambhidā catasso…pe… kataṃ buddhassa sāsanaṃ’’.
อิตฺถํ สุทํ อายสฺมา สฬลปุปฺผิโย เถโร อิมา คาถาโย อภาสิตฺถาติฯ
Itthaṃ sudaṃ āyasmā saḷalapupphiyo thero imā gāthāyo abhāsitthāti.
สฬลปุปฺผิยเตฺถรสฺสาปทานํ ทสมํฯ
Saḷalapupphiyattherassāpadānaṃ dasamaṃ.
มนฺทารวปุปฺผิยวโคฺค สตฺตติํสติโมฯ
Mandāravapupphiyavaggo sattatiṃsatimo.
ตสฺสุทฺทานํ –
Tassuddānaṃ –
มนฺทารวญฺจ กกฺการุ, ภิสเกสรปุปฺผิโย;
Mandāravañca kakkāru, bhisakesarapupphiyo;
อโงฺกลโก กทมฺพี จ, อุทฺทาลี เอกจมฺปโก;
Aṅkolako kadambī ca, uddālī ekacampako;
ติมิรํ สฬลเญฺจว, คาถา ตาลีสเมว จฯ
Timiraṃ saḷalañceva, gāthā tālīsameva ca.
