| Library / Tipiṭaka / තිපිටක • Tipiṭaka / අපදානපාළි • Apadānapāḷi |
8. සළලපුප්‌ඵියත්‌ථෙරඅපදානං
8. Saḷalapupphiyattheraapadānaṃ
30.
30.
‘‘චන්‌දභාගානදීතීරෙ , අහොසිං කින්‌නරො තදා;
‘‘Candabhāgānadītīre , ahosiṃ kinnaro tadā;
විපස්‌සිං අද්‌දසං බුද්‌ධං, රංසිජාලසමාකුලං.
Vipassiṃ addasaṃ buddhaṃ, raṃsijālasamākulaṃ.
31.
31.
‘‘පසන්‌නචිත්‌තො සුමනො, පරමාය ච පීතියා;
‘‘Pasannacitto sumano, paramāya ca pītiyā;
පග්‌ගය්‌හ සළලං පුප්‌ඵං, විපස්‌සිං ඔකිරිං අහං.
Paggayha saḷalaṃ pupphaṃ, vipassiṃ okiriṃ ahaṃ.
32.
32.
‘‘එකනවුතිතො කප්‌පෙ, යං පුප්‌ඵමභිපූජයිං;
‘‘Ekanavutito kappe, yaṃ pupphamabhipūjayiṃ;
දුග්‌ගතිං නාභිජානාමි, බුද්‌ධපූජායිදං ඵලං.
Duggatiṃ nābhijānāmi, buddhapūjāyidaṃ phalaṃ.
33.
33.
‘‘පටිසම්‌භිදා චතස්‌සො…පෙ.… කතං බුද්‌ධස්‌ස සාසනං’’.
‘‘Paṭisambhidā catasso…pe… kataṃ buddhassa sāsanaṃ’’.
ඉත්‌ථං සුදං ආයස්‌මා සළලපුප්‌ඵියො ථෙරො ඉමා ගාථායො අභාසිත්‌ථාති.
Itthaṃ sudaṃ āyasmā saḷalapupphiyo thero imā gāthāyo abhāsitthāti.
සළලපුප්‌ඵියත්‌ථෙරස්‌සාපදානං අට්‌ඨමං.
Saḷalapupphiyattherassāpadānaṃ aṭṭhamaṃ.
