| Library / Tipiṭaka / তিপিটক • Tipiṭaka / অপদান-অট্ঠকথা • Apadāna-aṭṭhakathā |
৯. সালপুপ্ফদাযকত্থেরঅপদানৰণ্ণনা
9. Sālapupphadāyakattheraapadānavaṇṇanā
মিগরাজা তদা আসিন্তিআদিকং আযস্মতো সালপুপ্ফদাযকত্থেরস্স অপদানং। অযম্পি পুরিমবুদ্ধেসু কতাধিকারো তত্থ তত্থ ভৰে কতকুসলসঞ্চযো কেনচি কম্মচ্ছিদ্দেন হিমৰন্তে সীহযোনিযং নিব্বত্তো অনেকসীহপরিৰারো ৰিহাসি। তদা সিখী ভগৰা তস্সানুকম্পায হিমৰন্তং অগমাসি। সীহো তং উপগতং দিস্ৰা পসন্নমানসো সাখাভঙ্গেন সকণ্ণিকসালপুপ্ফং গহেত্ৰা পূজেসি। ভগৰা তস্স অনুমোদনং অকাসি।
Migarājātadā āsintiādikaṃ āyasmato sālapupphadāyakattherassa apadānaṃ. Ayampi purimabuddhesu katādhikāro tattha tattha bhave katakusalasañcayo kenaci kammacchiddena himavante sīhayoniyaṃ nibbatto anekasīhaparivāro vihāsi. Tadā sikhī bhagavā tassānukampāya himavantaṃ agamāsi. Sīho taṃ upagataṃ disvā pasannamānaso sākhābhaṅgena sakaṇṇikasālapupphaṃ gahetvā pūjesi. Bhagavā tassa anumodanaṃ akāsi.
৬০. সো তেন পুঞ্ঞেন দেৰমনুস্সেসু সংসরন্তো উভযসম্পত্তিযো অনুভৰিত্ৰা ইমস্মিং বুদ্ধুপ্পাদে একস্মিং কুলগেহে নিব্বত্তো ৰিঞ্ঞুতং পত্ৰা সত্থরি পসন্নো পব্বজিত্ৰা অরহত্তং পত্তো অত্তনো পুব্বকম্মং সরিত্ৰা সোমনস্সজাতো পুব্বচরিতাপদানং পকাসেন্তো মিগরাজা তদা আসিন্তিআদিমাহ। তত্থ মরণং গচ্ছন্তীতি মিগা, অথ ৰা ঘাসং মগ্গন্তি গৰেসন্তীতি মিগা, মিগানং রাজা মিগরাজা। সকলচতুপ্পদানং রাজভাৰে সতিপি গাথাবন্ধসুখত্থং মিগে আদিং কত্ৰা মিগরাজাতি ৰুত্তং। যদা ভগৰন্তং দিস্ৰা সপুপ্ফং সালসাখং ভঞ্জিত্ৰা পূজেসিং, তদা অহং মিগরাজা অহোসিন্তি অত্থো।
60. So tena puññena devamanussesu saṃsaranto ubhayasampattiyo anubhavitvā imasmiṃ buddhuppāde ekasmiṃ kulagehe nibbatto viññutaṃ patvā satthari pasanno pabbajitvā arahattaṃ patto attano pubbakammaṃ saritvā somanassajāto pubbacaritāpadānaṃ pakāsento migarājā tadā āsintiādimāha. Tattha maraṇaṃ gacchantīti migā, atha vā ghāsaṃ magganti gavesantīti migā, migānaṃ rājā migarājā. Sakalacatuppadānaṃ rājabhāve satipi gāthābandhasukhatthaṃ mige ādiṃ katvā migarājāti vuttaṃ. Yadā bhagavantaṃ disvā sapupphaṃ sālasākhaṃ bhañjitvā pūjesiṃ, tadā ahaṃ migarājā ahosinti attho.
৬২. সকোসং পুপ্ফমাহরিন্তি সকণ্ণিকং সালপুপ্ফং আহরিং পূজেসিন্তি অত্থো। সেসং উত্তানত্থমেৰাতি।
62.Sakosaṃ pupphamāharinti sakaṇṇikaṃ sālapupphaṃ āhariṃ pūjesinti attho. Sesaṃ uttānatthamevāti.
সালপুপ্ফদাযকত্থেরঅপদানৰণ্ণনা সমত্তা।
Sālapupphadāyakattheraapadānavaṇṇanā samattā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / অপদানপাল়ি • Apadānapāḷi / ৯. সালপুপ্ফদাযকত্থেরঅপদানং • 9. Sālapupphadāyakattheraapadānaṃ
