| Library / Tipiṭaka / ತಿಪಿಟಕ • Tipiṭaka / ಅಪದಾನ-ಅಟ್ಠಕಥಾ • Apadāna-aṭṭhakathā |
೯. ಸಾಲಪುಪ್ಫದಾಯಕತ್ಥೇರಅಪದಾನವಣ್ಣನಾ
9. Sālapupphadāyakattheraapadānavaṇṇanā
ಮಿಗರಾಜಾ ತದಾ ಆಸಿನ್ತಿಆದಿಕಂ ಆಯಸ್ಮತೋ ಸಾಲಪುಪ್ಫದಾಯಕತ್ಥೇರಸ್ಸ ಅಪದಾನಂ। ಅಯಮ್ಪಿ ಪುರಿಮಬುದ್ಧೇಸು ಕತಾಧಿಕಾರೋ ತತ್ಥ ತತ್ಥ ಭವೇ ಕತಕುಸಲಸಞ್ಚಯೋ ಕೇನಚಿ ಕಮ್ಮಚ್ಛಿದ್ದೇನ ಹಿಮವನ್ತೇ ಸೀಹಯೋನಿಯಂ ನಿಬ್ಬತ್ತೋ ಅನೇಕಸೀಹಪರಿವಾರೋ ವಿಹಾಸಿ। ತದಾ ಸಿಖೀ ಭಗವಾ ತಸ್ಸಾನುಕಮ್ಪಾಯ ಹಿಮವನ್ತಂ ಅಗಮಾಸಿ। ಸೀಹೋ ತಂ ಉಪಗತಂ ದಿಸ್ವಾ ಪಸನ್ನಮಾನಸೋ ಸಾಖಾಭಙ್ಗೇನ ಸಕಣ್ಣಿಕಸಾಲಪುಪ್ಫಂ ಗಹೇತ್ವಾ ಪೂಜೇಸಿ। ಭಗವಾ ತಸ್ಸ ಅನುಮೋದನಂ ಅಕಾಸಿ।
Migarājātadā āsintiādikaṃ āyasmato sālapupphadāyakattherassa apadānaṃ. Ayampi purimabuddhesu katādhikāro tattha tattha bhave katakusalasañcayo kenaci kammacchiddena himavante sīhayoniyaṃ nibbatto anekasīhaparivāro vihāsi. Tadā sikhī bhagavā tassānukampāya himavantaṃ agamāsi. Sīho taṃ upagataṃ disvā pasannamānaso sākhābhaṅgena sakaṇṇikasālapupphaṃ gahetvā pūjesi. Bhagavā tassa anumodanaṃ akāsi.
೬೦. ಸೋ ತೇನ ಪುಞ್ಞೇನ ದೇವಮನುಸ್ಸೇಸು ಸಂಸರನ್ತೋ ಉಭಯಸಮ್ಪತ್ತಿಯೋ ಅನುಭವಿತ್ವಾ ಇಮಸ್ಮಿಂ ಬುದ್ಧುಪ್ಪಾದೇ ಏಕಸ್ಮಿಂ ಕುಲಗೇಹೇ ನಿಬ್ಬತ್ತೋ ವಿಞ್ಞುತಂ ಪತ್ವಾ ಸತ್ಥರಿ ಪಸನ್ನೋ ಪಬ್ಬಜಿತ್ವಾ ಅರಹತ್ತಂ ಪತ್ತೋ ಅತ್ತನೋ ಪುಬ್ಬಕಮ್ಮಂ ಸರಿತ್ವಾ ಸೋಮನಸ್ಸಜಾತೋ ಪುಬ್ಬಚರಿತಾಪದಾನಂ ಪಕಾಸೇನ್ತೋ ಮಿಗರಾಜಾ ತದಾ ಆಸಿನ್ತಿಆದಿಮಾಹ। ತತ್ಥ ಮರಣಂ ಗಚ್ಛನ್ತೀತಿ ಮಿಗಾ, ಅಥ ವಾ ಘಾಸಂ ಮಗ್ಗನ್ತಿ ಗವೇಸನ್ತೀತಿ ಮಿಗಾ, ಮಿಗಾನಂ ರಾಜಾ ಮಿಗರಾಜಾ। ಸಕಲಚತುಪ್ಪದಾನಂ ರಾಜಭಾವೇ ಸತಿಪಿ ಗಾಥಾಬನ್ಧಸುಖತ್ಥಂ ಮಿಗೇ ಆದಿಂ ಕತ್ವಾ ಮಿಗರಾಜಾತಿ ವುತ್ತಂ। ಯದಾ ಭಗವನ್ತಂ ದಿಸ್ವಾ ಸಪುಪ್ಫಂ ಸಾಲಸಾಖಂ ಭಞ್ಜಿತ್ವಾ ಪೂಜೇಸಿಂ, ತದಾ ಅಹಂ ಮಿಗರಾಜಾ ಅಹೋಸಿನ್ತಿ ಅತ್ಥೋ।
60. So tena puññena devamanussesu saṃsaranto ubhayasampattiyo anubhavitvā imasmiṃ buddhuppāde ekasmiṃ kulagehe nibbatto viññutaṃ patvā satthari pasanno pabbajitvā arahattaṃ patto attano pubbakammaṃ saritvā somanassajāto pubbacaritāpadānaṃ pakāsento migarājā tadā āsintiādimāha. Tattha maraṇaṃ gacchantīti migā, atha vā ghāsaṃ magganti gavesantīti migā, migānaṃ rājā migarājā. Sakalacatuppadānaṃ rājabhāve satipi gāthābandhasukhatthaṃ mige ādiṃ katvā migarājāti vuttaṃ. Yadā bhagavantaṃ disvā sapupphaṃ sālasākhaṃ bhañjitvā pūjesiṃ, tadā ahaṃ migarājā ahosinti attho.
೬೨. ಸಕೋಸಂ ಪುಪ್ಫಮಾಹರಿನ್ತಿ ಸಕಣ್ಣಿಕಂ ಸಾಲಪುಪ್ಫಂ ಆಹರಿಂ ಪೂಜೇಸಿನ್ತಿ ಅತ್ಥೋ। ಸೇಸಂ ಉತ್ತಾನತ್ಥಮೇವಾತಿ।
62.Sakosaṃ pupphamāharinti sakaṇṇikaṃ sālapupphaṃ āhariṃ pūjesinti attho. Sesaṃ uttānatthamevāti.
ಸಾಲಪುಪ್ಫದಾಯಕತ್ಥೇರಅಪದಾನವಣ್ಣನಾ ಸಮತ್ತಾ।
Sālapupphadāyakattheraapadānavaṇṇanā samattā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಖುದ್ದಕನಿಕಾಯ • Khuddakanikāya / ಅಪದಾನಪಾಳಿ • Apadānapāḷi / ೯. ಸಾಲಪುಪ್ಫದಾಯಕತ್ಥೇರಅಪದಾನಂ • 9. Sālapupphadāyakattheraapadānaṃ
