| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
4. ஸாலஸுத்தங்
4. Sālasuttaṃ
370. ஏகங் ஸமயங் ப⁴க³வா கோஸலேஸு விஹரதி ஸாலாய ப்³ராஹ்மணகா³மே. தத்ர கோ² ப⁴க³வா பி⁴க்கூ² ஆமந்தேஸி…பே॰… ஏதத³வோச –
370. Ekaṃ samayaṃ bhagavā kosalesu viharati sālāya brāhmaṇagāme. Tatra kho bhagavā bhikkhū āmantesi…pe… etadavoca –
‘‘யே தே, பி⁴க்க²வே, பி⁴க்கூ² நவா அசிரபப்³ப³ஜிதா அது⁴னாக³தா இமங் த⁴ம்மவினயங், தே வோ, பி⁴க்க²வே, பி⁴க்கூ² சதுன்னங் ஸதிபட்டா²னானங் பா⁴வனாய ஸமாத³பேதப்³பா³ நிவேஸேதப்³பா³ பதிட்டா²பேதப்³பா³. கதமேஸங் சதுன்னங்? ஏத² தும்ஹே, ஆவுஸோ, காயே காயானுபஸ்ஸினோ விஹரத² ஆதாபினோ ஸம்பஜானா ஏகோதி³பூ⁴தா விப்பஸன்னசித்தா ஸமாஹிதா ஏகக்³க³சித்தா, காயஸ்ஸ யதா²பூ⁴தங் ஞாணாய; வேத³னாஸு வேத³னானுபஸ்ஸினோ விஹரத² ஆதாபினோ ஸம்பஜானா ஏகோதி³பூ⁴தா விப்பஸன்னசித்தா ஸமாஹிதா ஏகக்³க³சித்தா, வேத³னானங் யதா²பூ⁴தங் ஞாணாய; சித்தே சித்தானுபஸ்ஸினோ விஹரத² ஆதாபினோ ஸம்பஜானா ஏகோதி³பூ⁴தா விப்பஸன்னசித்தா ஸமாஹிதா ஏகக்³க³சித்தா, சித்தஸ்ஸ யதா²பூ⁴தங் ஞாணாய; த⁴ம்மேஸு த⁴ம்மானுபஸ்ஸினோ விஹரத² ஆதாபினோ ஸம்பஜானா ஏகோதி³பூ⁴தா விப்பஸன்னசித்தா ஸமாஹிதா ஏகக்³க³சித்தா, த⁴ம்மானங் யதா²பூ⁴தங் ஞாணாய. யேபி தே, பி⁴க்க²வே, பி⁴க்கூ² ஸேகா² அப்பத்தமானஸா அனுத்தரங் யோக³க்கே²மங் பத்த²யமானா விஹரந்தி, தேபி காயே காயானுபஸ்ஸினோ விஹரந்தி ஆதாபினோ ஸம்பஜானா ஏகோதி³பூ⁴தா விப்பஸன்னசித்தா ஸமாஹிதா ஏகக்³க³சித்தா , காயஸ்ஸ பரிஞ்ஞாய; வேத³னாஸு வேத³னானுபஸ்ஸினோ விஹரந்தி ஆதாபினோ ஸம்பஜானா ஏகோதி³பூ⁴தா விப்பஸன்னசித்தா ஸமாஹிதா ஏகக்³க³சித்தா, வேத³னானங் பரிஞ்ஞாய; சித்தே சித்தானுபஸ்ஸினோ விஹரந்தி ஆதாபினோ ஸம்பஜானா ஏகோதி³பூ⁴தா விப்பஸன்னசித்தா ஸமாஹிதா ஏகக்³க³சித்தா, சித்தஸ்ஸ பரிஞ்ஞாய; த⁴ம்மேஸு த⁴ம்மானுபஸ்ஸினோ விஹரந்தி ஆதாபினோ ஸம்பஜானா ஏகோதி³பூ⁴தா விப்பஸன்னசித்தா ஸமாஹிதா ஏகக்³க³சித்தா, த⁴ம்மானங் பரிஞ்ஞாய.
‘‘Ye te, bhikkhave, bhikkhū navā acirapabbajitā adhunāgatā imaṃ dhammavinayaṃ, te vo, bhikkhave, bhikkhū catunnaṃ satipaṭṭhānānaṃ bhāvanāya samādapetabbā nivesetabbā patiṭṭhāpetabbā. Katamesaṃ catunnaṃ? Etha tumhe, āvuso, kāye kāyānupassino viharatha ātāpino sampajānā ekodibhūtā vippasannacittā samāhitā ekaggacittā, kāyassa yathābhūtaṃ ñāṇāya; vedanāsu vedanānupassino viharatha ātāpino sampajānā ekodibhūtā vippasannacittā samāhitā ekaggacittā, vedanānaṃ yathābhūtaṃ ñāṇāya; citte cittānupassino viharatha ātāpino sampajānā ekodibhūtā vippasannacittā samāhitā ekaggacittā, cittassa yathābhūtaṃ ñāṇāya; dhammesu dhammānupassino viharatha ātāpino sampajānā ekodibhūtā vippasannacittā samāhitā ekaggacittā, dhammānaṃ yathābhūtaṃ ñāṇāya. Yepi te, bhikkhave, bhikkhū sekhā appattamānasā anuttaraṃ yogakkhemaṃ patthayamānā viharanti, tepi kāye kāyānupassino viharanti ātāpino sampajānā ekodibhūtā vippasannacittā samāhitā ekaggacittā , kāyassa pariññāya; vedanāsu vedanānupassino viharanti ātāpino sampajānā ekodibhūtā vippasannacittā samāhitā ekaggacittā, vedanānaṃ pariññāya; citte cittānupassino viharanti ātāpino sampajānā ekodibhūtā vippasannacittā samāhitā ekaggacittā, cittassa pariññāya; dhammesu dhammānupassino viharanti ātāpino sampajānā ekodibhūtā vippasannacittā samāhitā ekaggacittā, dhammānaṃ pariññāya.
‘‘யேபி தே, பி⁴க்க²வே, பி⁴க்கூ² அரஹந்தோ கீ²ணாஸவா வுஸிதவந்தோ கதகரணீயா ஓஹிதபா⁴ரா அனுப்பத்தஸத³த்தா² பரிக்கீ²ணப⁴வஸங்யோஜனா ஸம்மத³ஞ்ஞா விமுத்தா, தேபி காயே காயானுபஸ்ஸினோ விஹரந்தி ஆதாபினோ ஸம்பஜானா ஏகோதி³பூ⁴தா விப்பஸன்னசித்தா ஸமாஹிதா ஏகக்³க³சித்தா, காயேன விஸங்யுத்தா; வேத³னாஸு வேத³னானுபஸ்ஸினோ விஹரந்தி ஆதாபினோ ஸம்பஜானா ஏகோதி³பூ⁴தா விப்பஸன்னசித்தா ஸமாஹிதா ஏகக்³க³சித்தா, வேத³னாஹி விஸங்யுத்தா; சித்தே சித்தானுபஸ்ஸினோ விஹரந்தி ஆதாபினோ ஸம்பஜானா ஏகோதி³பூ⁴தா விப்பஸன்னசித்தா ஸமாஹிதா ஏகக்³க³சித்தா, சித்தேன விஸங்யுத்தா; த⁴ம்மேஸு த⁴ம்மானுபஸ்ஸினோ விஹரந்தி ஆதாபினோ ஸம்பஜானா ஏகோதி³பூ⁴தா விப்பஸன்னசித்தா ஸமாஹிதா ஏகக்³க³சித்தா, த⁴ம்மேஹி விஸங்யுத்தா.
‘‘Yepi te, bhikkhave, bhikkhū arahanto khīṇāsavā vusitavanto katakaraṇīyā ohitabhārā anuppattasadatthā parikkhīṇabhavasaṃyojanā sammadaññā vimuttā, tepi kāye kāyānupassino viharanti ātāpino sampajānā ekodibhūtā vippasannacittā samāhitā ekaggacittā, kāyena visaṃyuttā; vedanāsu vedanānupassino viharanti ātāpino sampajānā ekodibhūtā vippasannacittā samāhitā ekaggacittā, vedanāhi visaṃyuttā; citte cittānupassino viharanti ātāpino sampajānā ekodibhūtā vippasannacittā samāhitā ekaggacittā, cittena visaṃyuttā; dhammesu dhammānupassino viharanti ātāpino sampajānā ekodibhūtā vippasannacittā samāhitā ekaggacittā, dhammehi visaṃyuttā.
‘‘யேபி தே, பி⁴க்க²வே, பி⁴க்கூ² நவா அசிரபப்³ப³ஜிதா அது⁴னாக³தா இமங் த⁴ம்மவினயங், தே வோ, பி⁴க்க²வே, பி⁴க்கூ² இமேஸங் சதுன்னங் ஸதிபட்டா²னானங் பா⁴வனாய ஸமாத³பேதப்³பா³ நிவேஸேதப்³பா³ பதிட்டா²பேதப்³பா³’’தி. சதுத்த²ங்.
‘‘Yepi te, bhikkhave, bhikkhū navā acirapabbajitā adhunāgatā imaṃ dhammavinayaṃ, te vo, bhikkhave, bhikkhū imesaṃ catunnaṃ satipaṭṭhānānaṃ bhāvanāya samādapetabbā nivesetabbā patiṭṭhāpetabbā’’ti. Catutthaṃ.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 4. ஸாலஸுத்தவண்ணனா • 4. Sālasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 4. ஸாலஸுத்தவண்ணனா • 4. Sālasuttavaṇṇanā
