| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
৪. সালসুত্তং
4. Sālasuttaṃ
৩৭০. একং সমযং ভগৰা কোসলেসু ৰিহরতি সালায ব্রাহ্মণগামে। তত্র খো ভগৰা ভিক্খূ আমন্তেসি…পে॰… এতদৰোচ –
370. Ekaṃ samayaṃ bhagavā kosalesu viharati sālāya brāhmaṇagāme. Tatra kho bhagavā bhikkhū āmantesi…pe… etadavoca –
‘‘যে তে, ভিক্খৰে, ভিক্খূ নৰা অচিরপব্বজিতা অধুনাগতা ইমং ধম্মৰিনযং, তে ৰো, ভিক্খৰে, ভিক্খূ চতুন্নং সতিপট্ঠানানং ভাৰনায সমাদপেতব্বা নিৰেসেতব্বা পতিট্ঠাপেতব্বা। কতমেসং চতুন্নং? এথ তুম্হে, আৰুসো, কাযে কাযানুপস্সিনো ৰিহরথ আতাপিনো সম্পজানা একোদিভূতা ৰিপ্পসন্নচিত্তা সমাহিতা একগ্গচিত্তা, কাযস্স যথাভূতং ঞাণায; ৰেদনাসু ৰেদনানুপস্সিনো ৰিহরথ আতাপিনো সম্পজানা একোদিভূতা ৰিপ্পসন্নচিত্তা সমাহিতা একগ্গচিত্তা, ৰেদনানং যথাভূতং ঞাণায; চিত্তে চিত্তানুপস্সিনো ৰিহরথ আতাপিনো সম্পজানা একোদিভূতা ৰিপ্পসন্নচিত্তা সমাহিতা একগ্গচিত্তা, চিত্তস্স যথাভূতং ঞাণায; ধম্মেসু ধম্মানুপস্সিনো ৰিহরথ আতাপিনো সম্পজানা একোদিভূতা ৰিপ্পসন্নচিত্তা সমাহিতা একগ্গচিত্তা, ধম্মানং যথাভূতং ঞাণায। যেপি তে, ভিক্খৰে, ভিক্খূ সেখা অপ্পত্তমানসা অনুত্তরং যোগক্খেমং পত্থযমানা ৰিহরন্তি, তেপি কাযে কাযানুপস্সিনো ৰিহরন্তি আতাপিনো সম্পজানা একোদিভূতা ৰিপ্পসন্নচিত্তা সমাহিতা একগ্গচিত্তা , কাযস্স পরিঞ্ঞায; ৰেদনাসু ৰেদনানুপস্সিনো ৰিহরন্তি আতাপিনো সম্পজানা একোদিভূতা ৰিপ্পসন্নচিত্তা সমাহিতা একগ্গচিত্তা, ৰেদনানং পরিঞ্ঞায; চিত্তে চিত্তানুপস্সিনো ৰিহরন্তি আতাপিনো সম্পজানা একোদিভূতা ৰিপ্পসন্নচিত্তা সমাহিতা একগ্গচিত্তা, চিত্তস্স পরিঞ্ঞায; ধম্মেসু ধম্মানুপস্সিনো ৰিহরন্তি আতাপিনো সম্পজানা একোদিভূতা ৰিপ্পসন্নচিত্তা সমাহিতা একগ্গচিত্তা, ধম্মানং পরিঞ্ঞায।
‘‘Ye te, bhikkhave, bhikkhū navā acirapabbajitā adhunāgatā imaṃ dhammavinayaṃ, te vo, bhikkhave, bhikkhū catunnaṃ satipaṭṭhānānaṃ bhāvanāya samādapetabbā nivesetabbā patiṭṭhāpetabbā. Katamesaṃ catunnaṃ? Etha tumhe, āvuso, kāye kāyānupassino viharatha ātāpino sampajānā ekodibhūtā vippasannacittā samāhitā ekaggacittā, kāyassa yathābhūtaṃ ñāṇāya; vedanāsu vedanānupassino viharatha ātāpino sampajānā ekodibhūtā vippasannacittā samāhitā ekaggacittā, vedanānaṃ yathābhūtaṃ ñāṇāya; citte cittānupassino viharatha ātāpino sampajānā ekodibhūtā vippasannacittā samāhitā ekaggacittā, cittassa yathābhūtaṃ ñāṇāya; dhammesu dhammānupassino viharatha ātāpino sampajānā ekodibhūtā vippasannacittā samāhitā ekaggacittā, dhammānaṃ yathābhūtaṃ ñāṇāya. Yepi te, bhikkhave, bhikkhū sekhā appattamānasā anuttaraṃ yogakkhemaṃ patthayamānā viharanti, tepi kāye kāyānupassino viharanti ātāpino sampajānā ekodibhūtā vippasannacittā samāhitā ekaggacittā , kāyassa pariññāya; vedanāsu vedanānupassino viharanti ātāpino sampajānā ekodibhūtā vippasannacittā samāhitā ekaggacittā, vedanānaṃ pariññāya; citte cittānupassino viharanti ātāpino sampajānā ekodibhūtā vippasannacittā samāhitā ekaggacittā, cittassa pariññāya; dhammesu dhammānupassino viharanti ātāpino sampajānā ekodibhūtā vippasannacittā samāhitā ekaggacittā, dhammānaṃ pariññāya.
‘‘যেপি তে, ভিক্খৰে, ভিক্খূ অরহন্তো খীণাসৰা ৰুসিতৰন্তো কতকরণীযা ওহিতভারা অনুপ্পত্তসদত্থা পরিক্খীণভৰসংযোজনা সম্মদঞ্ঞা ৰিমুত্তা, তেপি কাযে কাযানুপস্সিনো ৰিহরন্তি আতাপিনো সম্পজানা একোদিভূতা ৰিপ্পসন্নচিত্তা সমাহিতা একগ্গচিত্তা, কাযেন ৰিসংযুত্তা; ৰেদনাসু ৰেদনানুপস্সিনো ৰিহরন্তি আতাপিনো সম্পজানা একোদিভূতা ৰিপ্পসন্নচিত্তা সমাহিতা একগ্গচিত্তা, ৰেদনাহি ৰিসংযুত্তা; চিত্তে চিত্তানুপস্সিনো ৰিহরন্তি আতাপিনো সম্পজানা একোদিভূতা ৰিপ্পসন্নচিত্তা সমাহিতা একগ্গচিত্তা, চিত্তেন ৰিসংযুত্তা; ধম্মেসু ধম্মানুপস্সিনো ৰিহরন্তি আতাপিনো সম্পজানা একোদিভূতা ৰিপ্পসন্নচিত্তা সমাহিতা একগ্গচিত্তা, ধম্মেহি ৰিসংযুত্তা।
‘‘Yepi te, bhikkhave, bhikkhū arahanto khīṇāsavā vusitavanto katakaraṇīyā ohitabhārā anuppattasadatthā parikkhīṇabhavasaṃyojanā sammadaññā vimuttā, tepi kāye kāyānupassino viharanti ātāpino sampajānā ekodibhūtā vippasannacittā samāhitā ekaggacittā, kāyena visaṃyuttā; vedanāsu vedanānupassino viharanti ātāpino sampajānā ekodibhūtā vippasannacittā samāhitā ekaggacittā, vedanāhi visaṃyuttā; citte cittānupassino viharanti ātāpino sampajānā ekodibhūtā vippasannacittā samāhitā ekaggacittā, cittena visaṃyuttā; dhammesu dhammānupassino viharanti ātāpino sampajānā ekodibhūtā vippasannacittā samāhitā ekaggacittā, dhammehi visaṃyuttā.
‘‘যেপি তে, ভিক্খৰে, ভিক্খূ নৰা অচিরপব্বজিতা অধুনাগতা ইমং ধম্মৰিনযং, তে ৰো, ভিক্খৰে, ভিক্খূ ইমেসং চতুন্নং সতিপট্ঠানানং ভাৰনায সমাদপেতব্বা নিৰেসেতব্বা পতিট্ঠাপেতব্বা’’তি। চতুত্থং।
‘‘Yepi te, bhikkhave, bhikkhū navā acirapabbajitā adhunāgatā imaṃ dhammavinayaṃ, te vo, bhikkhave, bhikkhū imesaṃ catunnaṃ satipaṭṭhānānaṃ bhāvanāya samādapetabbā nivesetabbā patiṭṭhāpetabbā’’ti. Catutthaṃ.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৪. সালসুত্তৰণ্ণনা • 4. Sālasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৪. সালসুত্তৰণ্ণনা • 4. Sālasuttavaṇṇanā
