Library / Tipiṭaka / ཏིཔིཊཀ • Tipiṭaka / སཾཡུཏྟནིཀཱཡ • Saṃyuttanikāya

    ༦. སཱུཀརཁཏཝགྒོ

    6. Sūkarakhatavaggo

    ༡. སཱལསུཏྟཾ

    1. Sālasuttaṃ

    ༥༢༡. ཨེཝཾ མེ སུཏཾ – ཨེཀཾ སམཡཾ བྷགཝཱ ཀོསལེསུ ཝིཧརཏི སཱལཱཡ བྲཱཧྨཎགཱམེ། ཏཏྲ ཁོ བྷགཝཱ བྷིཀྑཱུ ཨཱམནྟེསི – ‘‘སེཡྻཐཱཔི, བྷིཀྑཝེ, ཡེ ཀེཙི ཏིརཙྪཱནགཏཱ པཱཎཱ, སཱིཧོ མིགརཱཛཱ ཏེསཾ ཨགྒམཀྑཱཡཏི, ཡདིདཾ – ཐཱམེན ཛཝེན སཱུརེན 1; ཨེཝམེཝ ཁོ, བྷིཀྑཝེ, ཡེ ཀེཙི བོདྷིཔཀྑིཡཱ དྷམྨཱ, པཉྙིནྡྲིཡཾ ཏེསཾ ཨགྒམཀྑཱཡཏི, ཡདིདཾ – བོདྷཱཡ’’།

    521. Evaṃ me sutaṃ – ekaṃ samayaṃ bhagavā kosalesu viharati sālāya brāhmaṇagāme. Tatra kho bhagavā bhikkhū āmantesi – ‘‘seyyathāpi, bhikkhave, ye keci tiracchānagatā pāṇā, sīho migarājā tesaṃ aggamakkhāyati, yadidaṃ – thāmena javena sūrena 2; evameva kho, bhikkhave, ye keci bodhipakkhiyā dhammā, paññindriyaṃ tesaṃ aggamakkhāyati, yadidaṃ – bodhāya’’.

    ‘‘ཀཏམེ ཙ, བྷིཀྑཝེ, བོདྷིཔཀྑིཡཱ དྷམྨཱ? སདྡྷིནྡྲིཡཾ, བྷིཀྑཝེ, བོདྷིཔཀྑིཡོ དྷམྨོ, ཏཾ བོདྷཱཡ སཾཝཏྟཏི; ཝཱིརིཡིནྡྲིཡཾ བོདྷིཔཀྑིཡོ དྷམྨོ, ཏཾ བོདྷཱཡ སཾཝཏྟཏི; སཏིནྡྲིཡཾ བོདྷིཔཀྑིཡོ དྷམྨོ, ཏཾ བོདྷཱཡ སཾཝཏྟཏི; སམཱདྷིནྡྲིཡཾ བོདྷིཔཀྑིཡོ དྷམྨོ, ཏཾ བོདྷཱཡ སཾཝཏྟཏི; པཉྙིནྡྲིཡཾ བོདྷིཔཀྑིཡོ དྷམྨོ, ཏཾ བོདྷཱཡ སཾཝཏྟཏི། སེཡྻཐཱཔི , བྷིཀྑཝེ, ཡེ ཀེཙི ཏིརཙྪཱནགཏཱ པཱཎཱ, སཱིཧོ མིགརཱཛཱ ཏེསཾ ཨགྒམཀྑཱཡཏི, ཡདིདཾ – ཐཱམེན ཛཝེན སཱུརེན; ཨེཝམེཝ ཁོ, བྷིཀྑཝེ, ཡེ ཀེཙི བོདྷིཔཀྑིཡཱ དྷམྨཱ, པཉྙིནྡྲིཡཾ ཏེསཾ ཨགྒམཀྑཱཡཏི, ཡདིདཾ – བོདྷཱཡཱ’’ཏི། པཋམཾ།

    ‘‘Katame ca, bhikkhave, bodhipakkhiyā dhammā? Saddhindriyaṃ, bhikkhave, bodhipakkhiyo dhammo, taṃ bodhāya saṃvattati; vīriyindriyaṃ bodhipakkhiyo dhammo, taṃ bodhāya saṃvattati; satindriyaṃ bodhipakkhiyo dhammo, taṃ bodhāya saṃvattati; samādhindriyaṃ bodhipakkhiyo dhammo, taṃ bodhāya saṃvattati; paññindriyaṃ bodhipakkhiyo dhammo, taṃ bodhāya saṃvattati. Seyyathāpi , bhikkhave, ye keci tiracchānagatā pāṇā, sīho migarājā tesaṃ aggamakkhāyati, yadidaṃ – thāmena javena sūrena; evameva kho, bhikkhave, ye keci bodhipakkhiyā dhammā, paññindriyaṃ tesaṃ aggamakkhāyati, yadidaṃ – bodhāyā’’ti. Paṭhamaṃ.




    Next: ༢. མལླིཀསུཏྟཾ • 2. Mallikasuttaṃ




    Footnotes:
    1. སཱུརིཡེན (སཱི॰ སྱཱ॰ ཀཾ॰)
    2. sūriyena (sī. syā. kaṃ.)



    Related texts:



    ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / སཾཡུཏྟནིཀཱཡ (ཨཊྛཀཐཱ) • Saṃyuttanikāya (aṭṭhakathā) / ༡. སཱལསུཏྟཝཎྞནཱ • 1. Sālasuttavaṇṇanā

    ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / སཾཡུཏྟནིཀཱཡ (ཊཱིཀཱ) • Saṃyuttanikāya (ṭīkā) / ༡. སཱལསུཏྟཝཎྞནཱ • 1. Sālasuttavaṇṇanā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact