| Library / Tipiṭaka / တိပိဋက • Tipiṭaka / ပဉ္စပကရဏ-အဋ္ဌကထာ • Pañcapakaraṇa-aṭṭhakathā |
၂. သဠာယတနုပ္ပတ္တိကထာဝဏ္ဏနာ
2. Saḷāyatanuppattikathāvaṇṇanā
၆၉၁-၆၉၂. ဣဒာနိ သဠာယတနုပ္ပတ္တိကထာ နာမ ဟောတိ။ တတ္ထ ဥပပတ္တေသိယေန ပဋိသန္ဓိစိတ္တေန သဟေဝ ဩပပာတိကာနံ သဠာယတနံ ဥပ္ပဇ္ဇတိ။ ဂဗ္ဘသေယ္ယကာနံ အဇ္ဈတ္တိကာယတနေသု မနာယတနကာယာယတနာနေဝ ပဋိသန္ဓိက္ခဏေ ဥပ္ပဇ္ဇန္တိ။ သေသာနိ စတ္တာရိ သတ္တသတ္တတိရတ္တိမ္ဟိ။ တာနိ စ ခော ယေန ကမ္မုနာ ပဋိသန္ဓိ ဂဟိတာ, တသ္သေဝ အညသ္သ ဝာ ကတတ္တာတိ အယံ သကသမယေ ဝာဒော။ ယေသံ ပန ဧကကမ္မသမ္ဘဝတ္တာ သမ္ပန္နသာခာဝိဋပာနံ ရုက္ခာဒီနံ အံကုရော ဝိယ ဗီဇမတ္တံ သဠာယတနံ မာတုကုစ္ဆိသ္မိံ ပဋိသန္ဓိက္ခဏေယေဝ ဥပ္ပဇ္ဇတီတိ လဒ္ဓိ, သေယ္ယထာပိ ပုဗ္ဗသေလိယာနံ; တေ သန္ဓာယ သဠာယတနန္တိ ပုစ္ဆာ သကဝာဒိသ္သ, ပဋိညာ ဣတရသ္သ။ သဗ္ဗင္ဂပစ္စင္ဂီတိအာဒိ သဠာယတနေ သတိ ဧဝရူပော ဟုတ္ဝာ ဩက္ကမေယ္ယာတိ စောဒနတ္ထံ ဝုတ္တံ။ မာတုကုစ္ဆိဂတသ္သာတိ ပုစ္ဆာ ပရဝာဒိသ္သ။ ပရတော မာတုကုစ္ဆိဂတသ္သ ပစ္ဆာ ကေသာတိ ပုစ္ဆာ သကဝာဒိသ္သ။ သေသမေတ္ထ ဥတ္တာနတ္ထမေဝာတိ။
691-692. Idāni saḷāyatanuppattikathā nāma hoti. Tattha upapattesiyena paṭisandhicittena saheva opapātikānaṃ saḷāyatanaṃ uppajjati. Gabbhaseyyakānaṃ ajjhattikāyatanesu manāyatanakāyāyatanāneva paṭisandhikkhaṇe uppajjanti. Sesāni cattāri sattasattatirattimhi. Tāni ca kho yena kammunā paṭisandhi gahitā, tasseva aññassa vā katattāti ayaṃ sakasamaye vādo. Yesaṃ pana ekakammasambhavattā sampannasākhāviṭapānaṃ rukkhādīnaṃ aṃkuro viya bījamattaṃ saḷāyatanaṃ mātukucchismiṃ paṭisandhikkhaṇeyeva uppajjatīti laddhi, seyyathāpi pubbaseliyānaṃ; te sandhāya saḷāyatananti pucchā sakavādissa, paṭiññā itarassa. Sabbaṅgapaccaṅgītiādi saḷāyatane sati evarūpo hutvā okkameyyāti codanatthaṃ vuttaṃ. Mātukucchigatassāti pucchā paravādissa. Parato mātukucchigatassa pacchā kesāti pucchā sakavādissa. Sesamettha uttānatthamevāti.
သဠာယတနုပ္ပတ္တိကထာဝဏ္ဏနာ။
Saḷāyatanuppattikathāvaṇṇanā.
Related texts:
တိပိဋက (မူလ) • Tipiṭaka (Mūla) / အဘိဓမ္မပိဋက • Abhidhammapiṭaka / ကထာဝတ္ထုပာဠိ • Kathāvatthupāḷi / (၁၃၇) ၂. သဠာယတနုပ္ပတ္တိကထာ • (137) 2. Saḷāyatanuppattikathā
ဋီကာ • Tīkā / အဘိဓမ္မပိဋက (ဋီကာ) • Abhidhammapiṭaka (ṭīkā) / ပဉ္စပကရဏ-မူလဋီကာ • Pañcapakaraṇa-mūlaṭīkā / ၂. သဠာယတနုပ္ပတ္တိကထာဝဏ္ဏနာ • 2. Saḷāyatanuppattikathāvaṇṇanā
ဋီကာ • Tīkā / အဘိဓမ္မပိဋက (ဋီကာ) • Abhidhammapiṭaka (ṭīkā) / ပဉ္စပကရဏ-အနုဋီကာ • Pañcapakaraṇa-anuṭīkā / ၂. သဠာယတနုပ္ပတ္တိကထာဝဏ္ဏနာ • 2. Saḷāyatanuppattikathāvaṇṇanā
