| Library / Tipiṭaka / ཏིཔིཊཀ • Tipiṭaka / པཉྩཔཀརཎ-ཨཊྛཀཐཱ • Pañcapakaraṇa-aṭṭhakathā |
༢. སལཱ༹ཡཏནུཔྤཏྟིཀཐཱཝཎྞནཱ
2. Saḷāyatanuppattikathāvaṇṇanā
༦༩༡-༦༩༢. ཨིདཱནི སལཱ༹ཡཏནུཔྤཏྟིཀཐཱ ནཱམ ཧོཏི། ཏཏྠ ཨུཔཔཏྟེསིཡེན པཊིསནྡྷིཙིཏྟེན སཧེཝ ཨོཔཔཱཏིཀཱནཾ སལཱ༹ཡཏནཾ ཨུཔྤཛྫཏི། གབྦྷསེཡྻཀཱནཾ ཨཛ྄ཛྷཏྟིཀཱཡཏནེསུ མནཱཡཏནཀཱཡཱཡཏནཱནེཝ པཊིསནྡྷིཀྑཎེ ཨུཔྤཛྫནྟི། སེསཱནི ཙཏྟཱརི སཏྟསཏྟཏིརཏྟིམྷི། ཏཱནི ཙ ཁོ ཡེན ཀམྨུནཱ པཊིསནྡྷི གཧིཏཱ, ཏསྶེཝ ཨཉྙསྶ ཝཱ ཀཏཏྟཱཏི ཨཡཾ སཀསམཡེ ཝཱདོ། ཡེསཾ པན ཨེཀཀམྨསམྦྷཝཏྟཱ སམྤནྣསཱཁཱཝིཊཔཱནཾ རུཀྑཱདཱིནཾ ཨཾཀུརོ ཝིཡ བཱིཛམཏྟཾ སལཱ༹ཡཏནཾ མཱཏུཀུཙྪིསྨིཾ པཊིསནྡྷིཀྑཎེཡེཝ ཨུཔྤཛྫཏཱིཏི ལདྡྷི, སེཡྻཐཱཔི པུབྦསེལིཡཱནཾ; ཏེ སནྡྷཱཡ སལཱ༹ཡཏནནྟི པུཙྪཱ སཀཝཱདིསྶ, པཊིཉྙཱ ཨིཏརསྶ། སབྦངྒཔཙྩངྒཱིཏིཨཱདི སལཱ༹ཡཏནེ སཏི ཨེཝརཱུཔོ ཧུཏྭཱ ཨོཀྐམེཡྻཱཏི ཙོདནཏྠཾ ཝུཏྟཾ། མཱཏུཀུཙྪིགཏསྶཱཏི པུཙྪཱ པརཝཱདིསྶ། པརཏོ མཱཏུཀུཙྪིགཏསྶ པཙྪཱ ཀེསཱཏི པུཙྪཱ སཀཝཱདིསྶ། སེསམེཏྠ ཨུཏྟཱནཏྠམེཝཱཏི།
691-692. Idāni saḷāyatanuppattikathā nāma hoti. Tattha upapattesiyena paṭisandhicittena saheva opapātikānaṃ saḷāyatanaṃ uppajjati. Gabbhaseyyakānaṃ ajjhattikāyatanesu manāyatanakāyāyatanāneva paṭisandhikkhaṇe uppajjanti. Sesāni cattāri sattasattatirattimhi. Tāni ca kho yena kammunā paṭisandhi gahitā, tasseva aññassa vā katattāti ayaṃ sakasamaye vādo. Yesaṃ pana ekakammasambhavattā sampannasākhāviṭapānaṃ rukkhādīnaṃ aṃkuro viya bījamattaṃ saḷāyatanaṃ mātukucchismiṃ paṭisandhikkhaṇeyeva uppajjatīti laddhi, seyyathāpi pubbaseliyānaṃ; te sandhāya saḷāyatananti pucchā sakavādissa, paṭiññā itarassa. Sabbaṅgapaccaṅgītiādi saḷāyatane sati evarūpo hutvā okkameyyāti codanatthaṃ vuttaṃ. Mātukucchigatassāti pucchā paravādissa. Parato mātukucchigatassa pacchā kesāti pucchā sakavādissa. Sesamettha uttānatthamevāti.
སལཱ༹ཡཏནུཔྤཏྟིཀཐཱཝཎྞནཱ།
Saḷāyatanuppattikathāvaṇṇanā.
Related texts:
ཏིཔིཊཀ (མཱུལ) • Tipiṭaka (Mūla) / ཨབྷིདྷམྨཔིཊཀ • Abhidhammapiṭaka / ཀཐཱཝཏྠུཔཱལི༹ • Kathāvatthupāḷi / (༡༣༧) ༢. སལཱ༹ཡཏནུཔྤཏྟིཀཐཱ • (137) 2. Saḷāyatanuppattikathā
ཊཱིཀཱ • Tīkā / ཨབྷིདྷམྨཔིཊཀ (ཊཱིཀཱ) • Abhidhammapiṭaka (ṭīkā) / པཉྩཔཀརཎ-མཱུལཊཱིཀཱ • Pañcapakaraṇa-mūlaṭīkā / ༢. སལཱ༹ཡཏནུཔྤཏྟིཀཐཱཝཎྞནཱ • 2. Saḷāyatanuppattikathāvaṇṇanā
ཊཱིཀཱ • Tīkā / ཨབྷིདྷམྨཔིཊཀ (ཊཱིཀཱ) • Abhidhammapiṭaka (ṭīkā) / པཉྩཔཀརཎ-ཨནུཊཱིཀཱ • Pañcapakaraṇa-anuṭīkā / ༢. སལཱ༹ཡཏནུཔྤཏྟིཀཐཱཝཎྞནཱ • 2. Saḷāyatanuppattikathāvaṇṇanā
