| Library / Tipiṭaka / ਤਿਪਿਟਕ • Tipiṭaka / ਅਙ੍ਗੁਤ੍ਤਰਨਿਕਾਯ • Aṅguttaranikāya |
੬. ਸਾਲ਼੍ਹਸੁਤ੍ਤਂ
6. Sāḷhasuttaṃ
੧੯੬. ਏਕਂ ਸਮਯਂ ਭਗવਾ વੇਸਾਲਿਯਂ વਿਹਰਤਿ ਮਹਾવਨੇ ਕੂਟਾਗਾਰਸਾਲਾਯਂ। ਅਥ ਖੋ ਸਾਲ਼੍ਹੋ ਚ ਲਿਚ੍ਛવਿ ਅਭਯੋ ਚ ਲਿਚ੍ਛવਿ ਯੇਨ ਭਗવਾ ਤੇਨੁਪਸਙ੍ਕਮਿਂਸੁ; ਉਪਸਙ੍ਕਮਿਤ੍વਾ ਭਗવਨ੍ਤਂ ਅਭਿવਾਦੇਤ੍વਾ ਏਕਮਨ੍ਤਂ ਨਿਸੀਦਿਂਸੁ। ਏਕਮਨ੍ਤਂ ਨਿਸਿਨ੍ਨੋ ਖੋ ਸਾਲ਼੍ਹੋ ਲਿਚ੍ਛવਿ ਭਗવਨ੍ਤਂ ਏਤਦવੋਚ –
196. Ekaṃ samayaṃ bhagavā vesāliyaṃ viharati mahāvane kūṭāgārasālāyaṃ. Atha kho sāḷho ca licchavi abhayo ca licchavi yena bhagavā tenupasaṅkamiṃsu; upasaṅkamitvā bhagavantaṃ abhivādetvā ekamantaṃ nisīdiṃsu. Ekamantaṃ nisinno kho sāḷho licchavi bhagavantaṃ etadavoca –
‘‘ਸਨ੍ਤਿ, ਭਨ੍ਤੇ, ਏਕੇ ਸਮਣਬ੍ਰਾਹ੍ਮਣਾ ਦ੍વਯੇਨ ਓਘਸ੍ਸ ਨਿਤ੍ਥਰਣਂ ਪਞ੍ਞਪੇਨ੍ਤਿ – ਸੀਲવਿਸੁਦ੍ਧਿਹੇਤੁ ਚ ਤਪੋਜਿਗੁਚ੍ਛਾਹੇਤੁ ਚ। ਇਧ, ਭਨ੍ਤੇ, ਭਗવਾ ਕਿਮਾਹਾ’’ਤਿ?
‘‘Santi, bhante, eke samaṇabrāhmaṇā dvayena oghassa nittharaṇaṃ paññapenti – sīlavisuddhihetu ca tapojigucchāhetu ca. Idha, bhante, bhagavā kimāhā’’ti?
‘‘ਸੀਲવਿਸੁਦ੍ਧਿਂ ਖੋ ਅਹਂ, ਸਾਲ਼੍ਹ, ਅਞ੍ਞਤਰਂ ਸਾਮਞ੍ਞਙ੍ਗਨ੍ਤਿ વਦਾਮਿ। ਯੇ ਤੇ, ਸਾਲ਼੍ਹ, ਸਮਣਬ੍ਰਾਹ੍ਮਣਾ ਤਪੋਜਿਗੁਚ੍ਛਾવਾਦਾ ਤਪੋਜਿਗੁਚ੍ਛਾਸਾਰਾ ਤਪੋਜਿਗੁਚ੍ਛਾਅਲ੍ਲੀਨਾ વਿਹਰਨ੍ਤਿ, ਅਭਬ੍ਬਾ ਤੇ ਓਘਸ੍ਸ ਨਿਤ੍ਥਰਣਾਯ। ਯੇਪਿ ਤੇ, ਸਾਲ਼੍ਹ, ਸਮਣਬ੍ਰਾਹ੍ਮਣਾ ਅਪਰਿਸੁਦ੍ਧਕਾਯਸਮਾਚਾਰਾ ਅਪਰਿਸੁਦ੍ਧવਚੀਸਮਾਚਾਰਾ ਅਪਰਿਸੁਦ੍ਧਮਨੋਸਮਾਚਾਰਾ ਅਪਰਿਸੁਦ੍ਧਾਜੀવਾ, ਅਭਬ੍ਬਾ ਤੇ ਞਾਣਦਸ੍ਸਨਾਯ ਅਨੁਤ੍ਤਰਾਯ ਸਮ੍ਬੋਧਾਯ।
‘‘Sīlavisuddhiṃ kho ahaṃ, sāḷha, aññataraṃ sāmaññaṅganti vadāmi. Ye te, sāḷha, samaṇabrāhmaṇā tapojigucchāvādā tapojigucchāsārā tapojigucchāallīnā viharanti, abhabbā te oghassa nittharaṇāya. Yepi te, sāḷha, samaṇabrāhmaṇā aparisuddhakāyasamācārā aparisuddhavacīsamācārā aparisuddhamanosamācārā aparisuddhājīvā, abhabbā te ñāṇadassanāya anuttarāya sambodhāya.
‘‘ਸੇਯ੍ਯਥਾਪਿ, ਸਾਲ਼੍ਹ, ਪੁਰਿਸੋ ਨਦਿਂ ਤਰਿਤੁਕਾਮੋ ਤਿਣ੍ਹਂ ਕੁਠਾਰਿਂ 1 ਆਦਾਯ વਨਂ ਪવਿਸੇਯ੍ਯ। ਸੋ ਤਤ੍ਥ ਪਸ੍ਸੇਯ੍ਯ ਮਹਤਿਂ ਸਾਲਲਟ੍ਠਿਂ ਉਜੁਂ ਨવਂ ਅਕੁਕ੍ਕੁਚ੍ਚਕਜਾਤਂ। ਤਮੇਨਂ ਮੂਲੇ ਛਿਨ੍ਦੇਯ੍ਯ; ਮੂਲੇ ਛੇਤ੍વਾ ਅਗ੍ਗੇ ਛਿਨ੍ਦੇਯ੍ਯ; ਅਗ੍ਗੇ ਛੇਤ੍વਾ ਸਾਖਾਪਲਾਸਂ ਸੁવਿਸੋਧਿਤਂ વਿਸੋਧੇਯ੍ਯ; ਸਾਖਾਪਲਾਸਂ ਸੁવਿਸੋਧਿਤਂ વਿਸੋਧੇਤ੍વਾ ਕੁਠਾਰੀਹਿ ਤਚ੍ਛੇਯ੍ਯ; ਕੁਠਾਰੀਹਿ ਤਚ੍ਛੇਤ੍વਾ વਾਸੀਹਿ ਤਚ੍ਛੇਯ੍ਯ; વਾਸੀਹਿ ਤਚ੍ਛੇਤ੍વਾ ਲੇਖਣਿਯਾ ਲਿਖੇਯ੍ਯ; ਲੇਖਣਿਯਾ ਲਿਖਿਤ੍વਾ ਪਾਸਾਣਗੁਲ਼ੇਨ ਧੋવੇਯ੍ਯ 2; ਪਾਸਾਣਗੁਲ਼ੇਨ ਧੋવੇਤ੍વਾ ਨਦਿਂ ਪਤਾਰੇਯ੍ਯ।
‘‘Seyyathāpi, sāḷha, puriso nadiṃ taritukāmo tiṇhaṃ kuṭhāriṃ 3 ādāya vanaṃ paviseyya. So tattha passeyya mahatiṃ sālalaṭṭhiṃ ujuṃ navaṃ akukkuccakajātaṃ. Tamenaṃ mūle chindeyya; mūle chetvā agge chindeyya; agge chetvā sākhāpalāsaṃ suvisodhitaṃ visodheyya; sākhāpalāsaṃ suvisodhitaṃ visodhetvā kuṭhārīhi taccheyya; kuṭhārīhi tacchetvā vāsīhi taccheyya; vāsīhi tacchetvā lekhaṇiyā likheyya; lekhaṇiyā likhitvā pāsāṇaguḷena dhoveyya 4; pāsāṇaguḷena dhovetvā nadiṃ patāreyya.
‘‘ਤਂ ਕਿਂ ਮਞ੍ਞਸਿ, ਸਾਲ਼੍ਹ, ਭਬ੍ਬੋ ਨੁ ਖੋ ਸੋ ਪੁਰਿਸੋ ਨਦਿਂ ਤਰਿਤੁ’’ਨ੍ਤਿ? ‘‘ਨੋ ਹੇਤਂ, ਭਨ੍ਤੇ’’। ‘‘ਤਂ ਕਿਸ੍ਸ ਹੇਤੁ’’? ‘‘ਅਸੁ ਹਿ, ਭਨ੍ਤੇ, ਸਾਲਲਟ੍ਠਿ ਬਹਿਦ੍ਧਾ ਸੁਪਰਿਕਮ੍ਮਕਤਾ ਅਨ੍ਤੋ ਅવਿਸੁਦ੍ਧਾ। ਤਸ੍ਸੇਤਂ ਪਾਟਿਕਙ੍ਖਂ – ਸਾਲਲਟ੍ਠਿ ਸਂਸੀਦਿਸ੍ਸਤਿ, ਪੁਰਿਸੋ ਅਨਯਬ੍ਯਸਨਂ ਆਪਜ੍ਜਿਸ੍ਸਤੀ’’ਤਿ।
‘‘Taṃ kiṃ maññasi, sāḷha, bhabbo nu kho so puriso nadiṃ taritu’’nti? ‘‘No hetaṃ, bhante’’. ‘‘Taṃ kissa hetu’’? ‘‘Asu hi, bhante, sālalaṭṭhi bahiddhā suparikammakatā anto avisuddhā. Tassetaṃ pāṭikaṅkhaṃ – sālalaṭṭhi saṃsīdissati, puriso anayabyasanaṃ āpajjissatī’’ti.
‘‘ਏવਮੇવਂ ਖੋ, ਸਾਲ਼੍ਹ, ਯੇ ਤੇ ਸਮਣਬ੍ਰਾਹ੍ਮਣਾ ਤਪੋਜਿਗੁਚ੍ਛਾવਾਦਾ ਤਪੋਜਿਗੁਚ੍ਛਾਸਾਰਾ ਤਪੋਜਿਗੁਚ੍ਛਾਅਲ੍ਲੀਨਾ વਿਹਰਨ੍ਤਿ, ਅਭਬ੍ਬਾ ਤੇ ਓਘਸ੍ਸ ਨਿਤ੍ਥਰਣਾਯ। ਯੇਪਿ ਤੇ, ਸਾਲ਼੍ਹ, ਸਮਣਬ੍ਰਾਹ੍ਮਣਾ ਅਪਰਿਸੁਦ੍ਧਕਾਯਸਮਾਚਾਰਾ ਅਪਰਿਸੁਦ੍ਧવਚੀਸਮਾਚਾਰਾ ਅਪਰਿਸੁਦ੍ਧਮਨੋਸਮਾਚਾਰਾ ਅਪਰਿਸੁਦ੍ਧਾਜੀવਾ, ਅਭਬ੍ਬਾ ਤੇ ਞਾਣਦਸ੍ਸਨਾਯ ਅਨੁਤ੍ਤਰਾਯ ਸਮ੍ਬੋਧਾਯ।
‘‘Evamevaṃ kho, sāḷha, ye te samaṇabrāhmaṇā tapojigucchāvādā tapojigucchāsārā tapojigucchāallīnā viharanti, abhabbā te oghassa nittharaṇāya. Yepi te, sāḷha, samaṇabrāhmaṇā aparisuddhakāyasamācārā aparisuddhavacīsamācārā aparisuddhamanosamācārā aparisuddhājīvā, abhabbā te ñāṇadassanāya anuttarāya sambodhāya.
‘‘ਯੇ ਚ ਖੋ ਤੇ, ਸਾਲ਼੍ਹ, ਸਮਣਬ੍ਰਾਹ੍ਮਣਾ ਨ ਤਪੋਜਿਗੁਚ੍ਛਾવਾਦਾ ਨ ਤਪੋਜਿਗੁਚ੍ਛਾਸਾਰਾ ਨ ਤਪੋਜਿਗੁਚ੍ਛਾਅਲ੍ਲੀਨਾ વਿਹਰਨ੍ਤਿ, ਭਬ੍ਬਾ ਤੇ ਓਘਸ੍ਸ ਨਿਤ੍ਥਰਣਾਯ। ਯੇਪਿ ਤੇ, ਸਾਲ਼੍ਹ, ਸਮਣਬ੍ਰਾਹ੍ਮਣਾ ਪਰਿਸੁਦ੍ਧਕਾਯਸਮਾਚਾਰਾ ਪਰਿਸੁਦ੍ਧવਚੀਸਮਾਚਾਰਾ ਪਰਿਸੁਦ੍ਧਮਨੋਸਮਾਚਾਰਾ ਪਰਿਸੁਦ੍ਧਾਜੀવਾ, ਭਬ੍ਬਾ ਤੇ ਞਾਣਦਸ੍ਸਨਾਯ ਅਨੁਤ੍ਤਰਾਯ ਸਮ੍ਬੋਧਾਯ।
‘‘Ye ca kho te, sāḷha, samaṇabrāhmaṇā na tapojigucchāvādā na tapojigucchāsārā na tapojigucchāallīnā viharanti, bhabbā te oghassa nittharaṇāya. Yepi te, sāḷha, samaṇabrāhmaṇā parisuddhakāyasamācārā parisuddhavacīsamācārā parisuddhamanosamācārā parisuddhājīvā, bhabbā te ñāṇadassanāya anuttarāya sambodhāya.
‘‘ਸੇਯ੍ਯਥਾਪਿ , ਸਾਲ਼੍ਹ, ਪੁਰਿਸੋ ਨਦਿਂ ਤਰਿਤੁਕਾਮੋ ਤਿਣ੍ਹਂ ਕੁਠਾਰਿਂ ਆਦਾਯ વਨਂ ਪવਿਸੇਯ੍ਯ। ਸੋ ਤਤ੍ਥ ਪਸ੍ਸੇਯ੍ਯ ਮਹਤਿਂ ਸਾਲਲਟ੍ਠਿਂ ਉਜੁਂ ਨવਂ ਅਕੁਕ੍ਕੁਚ੍ਚਕਜਾਤਂ। ਤਮੇਨਂ ਮੂਲੇ ਛਿਨ੍ਦੇਯ੍ਯ; ਮੂਲੇ ਛਿਨ੍ਦਿਤ੍વਾ ਅਗ੍ਗੇ ਛਿਨ੍ਦੇਯ੍ਯ; ਅਗ੍ਗੇ ਛਿਨ੍ਦਿਤ੍વਾ ਸਾਖਾਪਲਾਸਂ ਸੁવਿਸੋਧਿਤਂ વਿਸੋਧੇਯ੍ਯ; ਸਾਖਾਪਲਾਸਂ ਸੁવਿਸੋਧਿਤਂ વਿਸੋਧੇਤ੍વਾ ਕੁਠਾਰੀਹਿ ਤਚ੍ਛੇਯ੍ਯ; ਕੁਠਾਰੀਹਿ ਤਚ੍ਛੇਤ੍વਾ વਾਸੀਹਿ ਤਚ੍ਛੇਯ੍ਯ; વਾਸੀਹਿ ਤਚ੍ਛੇਤ੍વਾ ਨਿਖਾਦਨਂ ਆਦਾਯ ਅਨ੍ਤੋ ਸੁવਿਸੋਧਿਤਂ વਿਸੋਧੇਯ੍ਯ; ਅਨ੍ਤੋ ਸੁવਿਸੋਧਿਤਂ વਿਸੋਧੇਤ੍વਾ ਲੇਖਣਿਯਾ ਲਿਖੇਯ੍ਯ; ਲੇਖਣਿਯਾ ਲਿਖਿਤ੍વਾ ਪਾਸਾਣਗੁਲ਼ੇਨ ਧੋવੇਯ੍ਯ; ਪਾਸਾਣਗੁਲ਼ੇਨ ਧੋવੇਤ੍વਾ ਨਾવਂ ਕਰੇਯ੍ਯ; ਨਾવਂ ਕਤ੍વਾ ਫਿਯਾਰਿਤ੍ਤਂ 5 ਬਨ੍ਧੇਯ੍ਯ; ਫਿਯਾਰਿਤ੍ਤਂ ਬਨ੍ਧਿਤ੍વਾ ਨਦਿਂ ਪਤਾਰੇਯ੍ਯ।
‘‘Seyyathāpi , sāḷha, puriso nadiṃ taritukāmo tiṇhaṃ kuṭhāriṃ ādāya vanaṃ paviseyya. So tattha passeyya mahatiṃ sālalaṭṭhiṃ ujuṃ navaṃ akukkuccakajātaṃ. Tamenaṃ mūle chindeyya; mūle chinditvā agge chindeyya; agge chinditvā sākhāpalāsaṃ suvisodhitaṃ visodheyya; sākhāpalāsaṃ suvisodhitaṃ visodhetvā kuṭhārīhi taccheyya; kuṭhārīhi tacchetvā vāsīhi taccheyya; vāsīhi tacchetvā nikhādanaṃ ādāya anto suvisodhitaṃ visodheyya; anto suvisodhitaṃ visodhetvā lekhaṇiyā likheyya; lekhaṇiyā likhitvā pāsāṇaguḷena dhoveyya; pāsāṇaguḷena dhovetvā nāvaṃ kareyya; nāvaṃ katvā phiyārittaṃ 6 bandheyya; phiyārittaṃ bandhitvā nadiṃ patāreyya.
‘‘ਤਂ ਕਿਂ ਮਞ੍ਞਸਿ, ਸਾਲ਼੍ਹ, ਭਬ੍ਬੋ ਨੁ ਖੋ ਸੋ ਪੁਰਿਸੋ ਨਦਿਂ ਤਰਿਤੁ’’ਨ੍ਤਿ? ‘‘ਏવਂ, ਭਨ੍ਤੇ’’। ‘‘ਤਂ ਕਿਸ੍ਸ ਹੇਤੁ’’? ‘‘ਅਸੁ ਹਿ, ਭਨ੍ਤੇ, ਸਾਲਲਟ੍ਠਿ ਬਹਿਦ੍ਧਾ ਸੁਪਰਿਕਮ੍ਮਕਤਾ, ਅਨ੍ਤੋ ਸੁવਿਸੁਦ੍ਧਾ ਨਾવਾਕਤਾ 7 ਫਿਯਾਰਿਤ੍ਤਬਦ੍ਧਾ। ਤਸ੍ਸੇਤਂ ਪਾਟਿਕਙ੍ਖਂ – ‘ਨਾવਾ ਨ ਸਂਸੀਦਿਸ੍ਸਤਿ, ਪੁਰਿਸੋ ਸੋਤ੍ਥਿਨਾ ਪਾਰਂ ਗਮਿਸ੍ਸਤੀ’’’ਤਿ।
‘‘Taṃ kiṃ maññasi, sāḷha, bhabbo nu kho so puriso nadiṃ taritu’’nti? ‘‘Evaṃ, bhante’’. ‘‘Taṃ kissa hetu’’? ‘‘Asu hi, bhante, sālalaṭṭhi bahiddhā suparikammakatā, anto suvisuddhā nāvākatā 8 phiyārittabaddhā. Tassetaṃ pāṭikaṅkhaṃ – ‘nāvā na saṃsīdissati, puriso sotthinā pāraṃ gamissatī’’’ti.
‘‘ਏવਮੇવਂ ਖੋ , ਸਾਲ਼੍ਹ, ਯੇ ਤੇ ਸਮਣਬ੍ਰਾਹ੍ਮਣਾ ਨ ਤਪੋਜਿਗੁਚ੍ਛਾવਾਦਾ ਨ ਤਪੋਜਿਗੁਚ੍ਛਾਸਾਰਾ ਨ ਤਪੋਜਿਗੁਚ੍ਛਾਅਲ੍ਲੀਨਾ વਿਹਰਨ੍ਤਿ, ਭਬ੍ਬਾ ਤੇ ਓਘਸ੍ਸ ਨਿਤ੍ਥਰਣਾਯ। ਯੇਪਿ ਤੇ, ਸਾਲ਼੍ਹ, ਸਮਣਬ੍ਰਾਹ੍ਮਣਾ ਪਰਿਸੁਦ੍ਧਕਾਯਸਮਾਚਾਰਾ ਪਰਿਸੁਦ੍ਧવਚੀਸਮਾਚਾਰਾ ਪਰਿਸੁਦ੍ਧਮਨੋਸਮਾਚਾਰਾ ਪਰਿਸੁਦ੍ਧਾਜੀવਾ, ਭਬ੍ਬਾ ਤੇ ਞਾਣਦਸ੍ਸਨਾਯ ਅਨੁਤ੍ਤਰਾਯ ਸਮ੍ਬੋਧਾਯ। ਸੇਯ੍ਯਥਾਪਿ, ਸਾਲ਼੍ਹ, ਯੋਧਾਜੀવੋ ਬਹੂਨਿ ਚੇਪਿ ਕਣ੍ਡਚਿਤ੍ਰਕਾਨਿ ਜਾਨਾਤਿ; ਅਥ ਖੋ ਸੋ ਤੀਹਿ ਠਾਨੇਹਿ ਰਾਜਾਰਹੋ ਹੋਤਿ ਰਾਜਭੋਗ੍ਗੋ, ਰਞ੍ਞੋ ਅਙ੍ਗਨ੍ਤੇવ ਸਙ੍ਖਂ ਗਚ੍ਛਤਿ। ਕਤਮੇਹਿ ਤੀਹਿ? ਦੂਰੇਪਾਤੀ ਚ, ਅਕ੍ਖਣવੇਧੀ ਚ, ਮਹਤੋ ਚ ਕਾਯਸ੍ਸ ਪਦਾਲੇਤਾ।
‘‘Evamevaṃ kho , sāḷha, ye te samaṇabrāhmaṇā na tapojigucchāvādā na tapojigucchāsārā na tapojigucchāallīnā viharanti, bhabbā te oghassa nittharaṇāya. Yepi te, sāḷha, samaṇabrāhmaṇā parisuddhakāyasamācārā parisuddhavacīsamācārā parisuddhamanosamācārā parisuddhājīvā, bhabbā te ñāṇadassanāya anuttarāya sambodhāya. Seyyathāpi, sāḷha, yodhājīvo bahūni cepi kaṇḍacitrakāni jānāti; atha kho so tīhi ṭhānehi rājāraho hoti rājabhoggo, rañño aṅganteva saṅkhaṃ gacchati. Katamehi tīhi? Dūrepātī ca, akkhaṇavedhī ca, mahato ca kāyassa padāletā.
‘‘ਸੇਯ੍ਯਥਾਪਿ, ਸਾਲ਼੍ਹ, ਯੋਧਾਜੀવੋ ਦੂਰੇਪਾਤੀ; ਏવਮੇવਂ ਖੋ, ਸਾਲ਼੍ਹ, ਅਰਿਯਸਾવਕੋ ਸਮ੍ਮਾਸਮਾਧਿ ਹੋਤਿ। ਸਮ੍ਮਾਸਮਾਧਿ, ਸਾਲ਼੍ਹ, ਅਰਿਯਸਾવਕੋ ਯਂ ਕਿਞ੍ਚਿ ਰੂਪਂ ਅਤੀਤਾਨਾਗਤਪਚ੍ਚੁਪ੍ਪਨ੍ਨਂ ਅਜ੍ਝਤ੍ਤਂ વਾ ਬਹਿਦ੍ਧਾ વਾ ਓਲ਼ਾਰਿਕਂ વਾ ਸੁਖੁਮਂ વਾ ਹੀਨਂ વਾ ਪਣੀਤਂ વਾ ਯਂ ਦੂਰੇ ਸਨ੍ਤਿਕੇ વਾ ਸਬ੍ਬਂ ਰੂਪਂ ‘ਨੇਤਂ ਮਮ, ਨੇਸੋਹਮਸ੍ਮਿ, ਨ ਮੇਸੋ ਅਤ੍ਤਾ’ਤਿ ਏવਮੇਤਂ ਯਥਾਭੂਤਂ ਸਮ੍ਮਪ੍ਪਞ੍ਞਾਯ ਪਸ੍ਸਤਿ। ਯਾ ਕਾਚਿ વੇਦਨਾ…ਪੇ॰… ਯਾ ਕਾਚਿ ਸਞ੍ਞਾ… ਯੇ ਕੇਚਿ ਸਙ੍ਖਾਰਾ… ਯਂ ਕਿਞ੍ਚਿ વਿਞ੍ਞਾਣਂ ਅਤੀਤਾਨਾਗਤਪਚ੍ਚੁਪ੍ਪਨ੍ਨਂ ਅਜ੍ਝਤ੍ਤਂ વਾ ਬਹਿਦ੍ਧਾ વਾ ਓਲ਼ਾਰਿਕਂ વਾ ਸੁਖੁਮਂ વਾ ਹੀਨਂ વਾ ਪਣੀਤਂ વਾ ਯਂ ਦੂਰੇ ਸਨ੍ਤਿਕੇ વਾ, ਸਬ੍ਬਂ વਿਞ੍ਞਾਣਂ ‘ਨੇਤਂ ਮਮ, ਨੇਸੋਹਮਸ੍ਮਿ, ਨ ਮੇਸੋ ਅਤ੍ਤਾ’ਤਿ ਏવਮੇਤਂ ਯਥਾਭੂਤਂ ਸਮ੍ਮਪ੍ਪਞ੍ਞਾਯ ਪਸ੍ਸਤਿ।
‘‘Seyyathāpi, sāḷha, yodhājīvo dūrepātī; evamevaṃ kho, sāḷha, ariyasāvako sammāsamādhi hoti. Sammāsamādhi, sāḷha, ariyasāvako yaṃ kiñci rūpaṃ atītānāgatapaccuppannaṃ ajjhattaṃ vā bahiddhā vā oḷārikaṃ vā sukhumaṃ vā hīnaṃ vā paṇītaṃ vā yaṃ dūre santike vā sabbaṃ rūpaṃ ‘netaṃ mama, nesohamasmi, na meso attā’ti evametaṃ yathābhūtaṃ sammappaññāya passati. Yā kāci vedanā…pe… yā kāci saññā… ye keci saṅkhārā… yaṃ kiñci viññāṇaṃ atītānāgatapaccuppannaṃ ajjhattaṃ vā bahiddhā vā oḷārikaṃ vā sukhumaṃ vā hīnaṃ vā paṇītaṃ vā yaṃ dūre santike vā, sabbaṃ viññāṇaṃ ‘netaṃ mama, nesohamasmi, na meso attā’ti evametaṃ yathābhūtaṃ sammappaññāya passati.
‘‘ਸੇਯ੍ਯਥਾਪਿ, ਸਾਲ਼੍ਹ, ਯੋਧਾਜੀવੋ ਅਕ੍ਖਣવੇਧੀ; ਏવਮੇવਂ ਖੋ, ਸਾਲ਼੍ਹ, ਅਰਿਯਸਾવਕੋ ਸਮ੍ਮਾਦਿਟ੍ਠਿ ਹੋਤਿ। ਸਮ੍ਮਾਦਿਟ੍ਠਿ , ਸਾਲ਼੍ਹ, ਅਰਿਯਸਾવਕੋ ‘ਇਦਂ ਦੁਕ੍ਖ’ਨ੍ਤਿ ਯਥਾਭੂਤਂ ਪਜਾਨਾਤਿ…ਪੇ॰… ‘ਅਯਂ ਦੁਕ੍ਖਨਿਰੋਧਗਾਮਿਨੀ ਪਟਿਪਦਾ’ਤਿ ਯਥਾਭੂਤਂ ਪਜਾਨਾਤਿ।
‘‘Seyyathāpi, sāḷha, yodhājīvo akkhaṇavedhī; evamevaṃ kho, sāḷha, ariyasāvako sammādiṭṭhi hoti. Sammādiṭṭhi , sāḷha, ariyasāvako ‘idaṃ dukkha’nti yathābhūtaṃ pajānāti…pe… ‘ayaṃ dukkhanirodhagāminī paṭipadā’ti yathābhūtaṃ pajānāti.
‘‘ਸੇਯ੍ਯਥਾਪਿ, ਸਾਲ਼੍ਹ, ਯੋਧਾਜੀવੋ ਮਹਤੋ ਕਾਯਸ੍ਸ ਪਦਾਲੇਤਾ; ਏવਮੇવਂ ਖੋ, ਸਾਲ਼੍ਹ, ਅਰਿਯਸਾવਕੋ ਸਮ੍ਮਾવਿਮੁਤ੍ਤਿ ਹੋਤਿ। ਸਮ੍ਮਾવਿਮੁਤ੍ਤਿ, ਸਾਲ਼੍ਹ, ਅਰਿਯਸਾવਕੋ ਮਹਨ੍ਤਂ ਅવਿਜ੍ਜਾਕ੍ਖਨ੍ਧਂ ਪਦਾਲੇਤੀ’’ਤਿ। ਛਟ੍ਠਂ।
‘‘Seyyathāpi, sāḷha, yodhājīvo mahato kāyassa padāletā; evamevaṃ kho, sāḷha, ariyasāvako sammāvimutti hoti. Sammāvimutti, sāḷha, ariyasāvako mahantaṃ avijjākkhandhaṃ padāletī’’ti. Chaṭṭhaṃ.
Footnotes:
Related texts:
ਅਟ੍ਠਕਥਾ • Aṭṭhakathā / ਸੁਤ੍ਤਪਿਟਕ (ਅਟ੍ਠਕਥਾ) • Suttapiṭaka (aṭṭhakathā) / ਅਙ੍ਗੁਤ੍ਤਰਨਿਕਾਯ (ਅਟ੍ਠਕਥਾ) • Aṅguttaranikāya (aṭṭhakathā) / ੬. ਸਾਲ਼੍ਹਸੁਤ੍ਤવਣ੍ਣਨਾ • 6. Sāḷhasuttavaṇṇanā
ਟੀਕਾ • Tīkā / ਸੁਤ੍ਤਪਿਟਕ (ਟੀਕਾ) • Suttapiṭaka (ṭīkā) / ਅਙ੍ਗੁਤ੍ਤਰਨਿਕਾਯ (ਟੀਕਾ) • Aṅguttaranikāya (ṭīkā) / ੬. ਸਾਲ਼੍ਹਸੁਤ੍ਤવਣ੍ਣਨਾ • 6. Sāḷhasuttavaṇṇanā
