| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
6. ஸாள்ஹஸுத்தவண்ணனா
6. Sāḷhasuttavaṇṇanā
67. ச²ட்டே² மிகா³ரனத்தாதி மிகா³ரஸெட்டி²னோ நத்தா. ஸேகு²னியனத்தாதி ஸேகு²னியஸெட்டி²னோ நத்தா. உபஸங்கமிங்ஸூதி பு⁴த்தபாதராஸா தா³ஸகம்மகரபரிவுதா உபஸங்கமிங்ஸு. தேஸங் கிர புரேப⁴த்தே புப்³ப³ண்ஹஸமயேயேவ கே³ஹே ஏகோ பஞ்ஹோ ஸமுட்டி²தோ, தங் பன கதே²துங் ஓகாஸோ நாஹோஸி. தே ‘‘தங் பஞ்ஹங் ஸொஸ்ஸாமா’’தி தே²ரஸ்ஸ ஸந்திகங் க³ந்த்வா வந்தி³த்வா துண்ஹீ நிஸீதி³ங்ஸு. தே²ரோ ‘‘கா³மே தங் ஸமுட்டி²தங் பஞ்ஹங் ஸோதுங் ஆக³தா ப⁴விஸ்ஸந்தீ’’தி தேஸங் மனங் ஞத்வா தமேவ பஞ்ஹங் ஆரப⁴ந்தோ ஏத² தும்ஹே ஸாள்ஹாதிஆதி³மாஹ. தத்த² அத்தி² லோபோ⁴தி லுப்³ப⁴னஸபா⁴வோ லோபோ⁴ நாம அத்தீ²தி புச்ச²தி. அபி⁴ஜ்ஜா²தி கோ² அஹங் ஸாள்ஹா ஏதமத்த²ங் வதா³மீதி ஏதங் லோப⁴ஸங்கா²தங் அத்த²ங் அஹங் ‘‘அபி⁴ஜ்ஜா²’’தி வதா³மி, ‘‘தண்ஹா’’தி வதா³மீதி ஸமுட்டி²தபஞ்ஹஸ்ஸ அத்த²ங் தீ³பெந்தோ ஆஹ. ஏவங் ஸப்³ப³வாரேஸு நயோ நேதப்³போ³.
67. Chaṭṭhe migāranattāti migāraseṭṭhino nattā. Sekhuniyanattāti sekhuniyaseṭṭhino nattā. Upasaṅkamiṃsūti bhuttapātarāsā dāsakammakaraparivutā upasaṅkamiṃsu. Tesaṃ kira purebhatte pubbaṇhasamayeyeva gehe eko pañho samuṭṭhito, taṃ pana kathetuṃ okāso nāhosi. Te ‘‘taṃ pañhaṃ sossāmā’’ti therassa santikaṃ gantvā vanditvā tuṇhī nisīdiṃsu. Thero ‘‘gāme taṃ samuṭṭhitaṃ pañhaṃ sotuṃ āgatā bhavissantī’’ti tesaṃ manaṃ ñatvā tameva pañhaṃ ārabhanto etha tumhe sāḷhātiādimāha. Tattha atthi lobhoti lubbhanasabhāvo lobho nāma atthīti pucchati. Abhijjhāti kho ahaṃ sāḷhā etamatthaṃ vadāmīti etaṃ lobhasaṅkhātaṃ atthaṃ ahaṃ ‘‘abhijjhā’’ti vadāmi, ‘‘taṇhā’’ti vadāmīti samuṭṭhitapañhassa atthaṃ dīpento āha. Evaṃ sabbavāresu nayo netabbo.
ஸோ ஏவங் பஜானாதீதி ஸோ சத்தாரோ ப்³ரஹ்மவிஹாரே பா⁴வெத்வா டி²தோ அரியஸாவகோ ஸமாபத்திதோ வுட்டா²ய விபஸ்ஸனங் ஆரப⁴ந்தோ ஏவங் பஜானாதி. அத்தி² இத³ந்தி அத்தி² து³க்க²ஸச்சஸங்கா²தங் க²ந்த⁴பஞ்சகங் நாமரூபவஸேன பரிச்சி²ந்தி³த்வா பஜானந்தோ ஏஸ ‘‘ஏவங் பஜானாதி அத்தி² இத³’’ந்தி வுத்தோ. ஹீனந்தி ஸமுத³யஸச்சங். பணீதந்தி மக்³க³ஸச்சங். இமஸ்ஸ ஸஞ்ஞாக³தஸ்ஸ உத்தரி நிஸ்ஸரணந்தி இமஸ்ஸ விபஸ்ஸனாஸஞ்ஞாஸங்கா²தஸ்ஸ ஸஞ்ஞாக³தஸ்ஸ உத்தரி நிஸ்ஸரணங் நாம நிப்³பா³னங், தமத்தீ²தி இமினா நிரோத⁴ஸச்சங் த³ஸ்ஸேதி. விமுத்தஸ்மிங் விமுத்தமிதி ஞாணந்தி ஏகூனவீஸதிவித⁴ங் பச்சவெக்க²ணஞாணங் கதி²தங். அஹு புப்³பே³ லோபோ⁴தி புப்³பே³ மே லோபோ⁴ அஹோஸி. தத³ஹு அகுஸலந்தி தங் அகுஸலங் நாம அஹோஸி, ததா³ வா அகுஸலங் நாம அஹோஸி. இச்சேதங் குஸலந்தி இதி ஏதங் குஸலங், தஸ்ஸேவ அகுஸலஸ்ஸ நத்தி²பா⁴வங் குஸலங் கே²மந்தி ஸந்தா⁴ய வத³தி. நிச்சா²தோதி நித்தண்ஹோ. நிப்³பு³தோதி அப்³ப⁴ந்தரே ஸந்தாபகரானங் கிலேஸானங் அபா⁴வேன நிப்³பு³தோ. ஸீதிபூ⁴தோதி ஸீதலீபூ⁴தோ. ஸுக²ப்படிஸங்வேதீ³தி காயிகசேதஸிகஸ்ஸ ஸுக²ஸ்ஸ படிஸங்வேதி³தா. ப்³ரஹ்மபூ⁴தேனாதி ஸெட்ட²பூ⁴தேன. ஸேஸங் ஸப்³ப³த்த² உத்தானத்த²மேவாதி.
Soevaṃ pajānātīti so cattāro brahmavihāre bhāvetvā ṭhito ariyasāvako samāpattito vuṭṭhāya vipassanaṃ ārabhanto evaṃ pajānāti. Atthi idanti atthi dukkhasaccasaṅkhātaṃ khandhapañcakaṃ nāmarūpavasena paricchinditvā pajānanto esa ‘‘evaṃ pajānāti atthi ida’’nti vutto. Hīnanti samudayasaccaṃ. Paṇītanti maggasaccaṃ. Imassa saññāgatassa uttari nissaraṇanti imassa vipassanāsaññāsaṅkhātassa saññāgatassa uttari nissaraṇaṃ nāma nibbānaṃ, tamatthīti iminā nirodhasaccaṃ dasseti. Vimuttasmiṃ vimuttamiti ñāṇanti ekūnavīsatividhaṃ paccavekkhaṇañāṇaṃ kathitaṃ. Ahu pubbe lobhoti pubbe me lobho ahosi. Tadahu akusalanti taṃ akusalaṃ nāma ahosi, tadā vā akusalaṃ nāma ahosi. Iccetaṃ kusalanti iti etaṃ kusalaṃ, tasseva akusalassa natthibhāvaṃ kusalaṃ khemanti sandhāya vadati. Nicchātoti nittaṇho. Nibbutoti abbhantare santāpakarānaṃ kilesānaṃ abhāvena nibbuto. Sītibhūtoti sītalībhūto. Sukhappaṭisaṃvedīti kāyikacetasikassa sukhassa paṭisaṃveditā. Brahmabhūtenāti seṭṭhabhūtena. Sesaṃ sabbattha uttānatthamevāti.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 6. ஸாள்ஹஸுத்தங் • 6. Sāḷhasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 6. ஸாள்ஹஸுத்தவண்ணனா • 6. Sāḷhasuttavaṇṇanā
