| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
6. ஸாள்ஹஸுத்தவண்ணனா
6. Sāḷhasuttavaṇṇanā
196. ச²ட்டே² த்³வயேனாதி த்³வீஹி கொட்டா²ஸேஹி. ஓக⁴ஸ்ஸ நித்த²ரணந்தி சதுரோக⁴னித்த²ரணங். தபோஜிகு³ச்சா²ஹேதூதி து³க்கரகாரிகஸங்கா²தேன தபேன பாபஜிகு³ச்ச²னஹேது . அஞ்ஞதரங் ஸாமஞ்ஞங்க³ந்தி ஏகங் ஸமணத⁴ம்மகொட்டா²ஸங். அபரிஸுத்³த⁴காயஸமாசாராதிஆதீ³ஸு புரிமேஹி தீஹி பதே³ஹி காயிகவாசஸிகசேதஸிகஸீலானங் அபரிஸுத்³த⁴தங் த³ஸ்ஸெத்வா பச்சி²மேன பதே³ன அபரிஸுத்³தா⁴ஜீவதங் த³ஸ்ஸேதி. ஞாணத³ஸ்ஸனாயாதி மக்³க³ஞாணஸங்கா²தாய த³ஸ்ஸனாய. அனுத்தராய ஸம்போ³தா⁴யாதி அரஹத்தாய, அரஹத்தஞாணப²ஸ்ஸேன பு²ஸிதுங் அப⁴ப்³பா³தி வுத்தங் ஹோதி. ஸாலலட்டி²ந்தி ஸாலருக்க²ங். நவந்தி தருணங். அகுக்குச்சகஜாதந்தி ‘‘ப⁴வெய்ய நு கோ², ந ப⁴வெய்யா’’தி அஜனேதப்³ப³குக்குச்சங். லேக²ணியா லிகெ²ய்யாதி அவலேக²னமத்தகேன அவலிகெ²ய்ய. தோ⁴வெய்யாதி க⁴ங்ஸெய்ய. அந்தோ அவிஸுத்³தா⁴தி அப்³ப⁴ந்தரே அஸுத்³தா⁴ அபனீதஸாரா.
196. Chaṭṭhe dvayenāti dvīhi koṭṭhāsehi. Oghassanittharaṇanti caturoghanittharaṇaṃ. Tapojigucchāhetūti dukkarakārikasaṅkhātena tapena pāpajigucchanahetu . Aññataraṃ sāmaññaṅganti ekaṃ samaṇadhammakoṭṭhāsaṃ. Aparisuddhakāyasamācārātiādīsu purimehi tīhi padehi kāyikavācasikacetasikasīlānaṃ aparisuddhataṃ dassetvā pacchimena padena aparisuddhājīvataṃ dasseti. Ñāṇadassanāyāti maggañāṇasaṅkhātāya dassanāya. Anuttarāya sambodhāyāti arahattāya, arahattañāṇaphassena phusituṃ abhabbāti vuttaṃ hoti. Sālalaṭṭhinti sālarukkhaṃ. Navanti taruṇaṃ. Akukkuccakajātanti ‘‘bhaveyya nu kho, na bhaveyyā’’ti ajanetabbakukkuccaṃ. Lekhaṇiyā likheyyāti avalekhanamattakena avalikheyya. Dhoveyyāti ghaṃseyya. Anto avisuddhāti abbhantare asuddhā apanītasārā.
ஏவமேவ கோ²தி எத்த² இத³ங் ஓபம்மஸங்ஸந்த³னங் – ஸாலலட்டி² விய ஹி அத்தபா⁴வோ த³ட்ட²ப்³போ³, நதீ³ஸோதங் விய ஸங்ஸாரஸோதங், பாரங் க³ந்துகாமபுரிஸோ விய த்³வாஸட்டி² தி³ட்டி²யோ க³ஹெத்வா டி²தபுரிஸோ, ஸாலலட்டி²யா ப³ஹித்³தா⁴ ஸுபரிகம்மகதகாலோ விய ப³ஹித்³தா⁴ தபசரணங் கா³ள்ஹங் கத்வா க³ஹிதகாலோ, அந்தோ அஸுத்³த⁴காலோ விய அப்³ப⁴ந்தரே ஸீலானங் அபரிஸுத்³த⁴காலோ, ஸாலலட்டி²யா ஸங்ஸீதி³த்வா அதோ⁴க³மனங் விய தி³ட்டி²க³திகஸ்ஸ ஸங்ஸாரஸோதே ஸங்ஸீத³னங் வேதி³தப்³ப³ங்.
Evameva khoti ettha idaṃ opammasaṃsandanaṃ – sālalaṭṭhi viya hi attabhāvo daṭṭhabbo, nadīsotaṃ viya saṃsārasotaṃ, pāraṃ gantukāmapuriso viya dvāsaṭṭhi diṭṭhiyo gahetvā ṭhitapuriso, sālalaṭṭhiyā bahiddhā suparikammakatakālo viya bahiddhā tapacaraṇaṃ gāḷhaṃ katvā gahitakālo, anto asuddhakālo viya abbhantare sīlānaṃ aparisuddhakālo, sālalaṭṭhiyā saṃsīditvā adhogamanaṃ viya diṭṭhigatikassa saṃsārasote saṃsīdanaṃ veditabbaṃ.
பி²யாரித்தங் ப³ந்தெ⁴ய்யாதி பி²யஞ்ச அரித்தஞ்ச யோஜெய்ய. ஏவமேவாதி எத்தா²பி இத³ங் ஓபம்மஸங்ஸந்த³னங் – ஸாலலட்டி² விய அத்தபா⁴வோ, நதீ³ஸோதங் விய ஸங்ஸாரஸோதங், பாரங் க³ந்துகாமபுரிஸோ விய யோகா³வசரோ, ப³ஹித்³தா⁴ ஸுபரிகம்மகதகாலோ விய ச²ஸு த்³வாரேஸு ஸங்வரஸ்ஸ பச்சுபட்டி²தகாலோ, அந்தோ ஸுவிஸோதி⁴தபா⁴வோ விய அப்³ப⁴ந்தரே பரிஸுத்³த⁴ஸீலபா⁴வோ, பி²யாரித்தப³ந்த⁴னங் விய காயிகசேதஸிகவீரியகரணங், ஸொத்தி²னா பாரிமதீரக³மனங் விய அனுபுப்³பே³ன ஸீலங் பூரெத்வா ஸமாதி⁴ங் பூரெத்வா பஞ்ஞங் பூரெத்வா நிப்³பா³னக³மனங் த³ட்ட²ப்³ப³ங்.
Phiyārittaṃ bandheyyāti phiyañca arittañca yojeyya. Evamevāti etthāpi idaṃ opammasaṃsandanaṃ – sālalaṭṭhi viya attabhāvo, nadīsotaṃ viya saṃsārasotaṃ, pāraṃ gantukāmapuriso viya yogāvacaro, bahiddhā suparikammakatakālo viya chasu dvāresu saṃvarassa paccupaṭṭhitakālo, anto suvisodhitabhāvo viya abbhantare parisuddhasīlabhāvo, phiyārittabandhanaṃ viya kāyikacetasikavīriyakaraṇaṃ, sotthinā pārimatīragamanaṃ viya anupubbena sīlaṃ pūretvā samādhiṃ pūretvā paññaṃ pūretvā nibbānagamanaṃ daṭṭhabbaṃ.
கண்ட³சித்ரகானீதி ஸரலட்டி²ஸரரஜ்ஜுஸரபாஸாத³ஸரஸாணிஸரபொக்க²ரணிஸரபது³மானீதி அனேகானி கண்டே³ஹி கத்தப்³ப³சித்ரானி. அத² கோ² ஸோ தீஹி டா²னேஹீதி ஸோ ஏவங் ப³ஹூனி கண்ட³சித்ரகானி ஜானந்தோபி ந ராஜாரஹோ ஹோதி, தீஹியேவ பன டா²னேஹி ஹோதீதி அத்தோ². ஸம்மாஸமாதி⁴ ஹோதீதி மக்³க³ஸமாதி⁴னா ச ப²லஸமாதி⁴னா ச ஸமாஹிதோ ஹோதீதி அயமெத்த² அத்தோ². ஸம்மாதி³ட்டீ²தி மக்³க³ஸம்மாதி³ட்டி²யா ஸமன்னாக³தோ. இத³ங் து³க்க²ந்திஆதீ³ஹி சதூஹி ஸச்சேஹி சத்தாரோ மக்³கா³ தீணி ச ப²லானி கதி²தானி. அயங் பன மக்³கே³னேவ அவிராதி⁴தங் விஜ்ஜ²தி நாமாதி வேதி³தப்³போ³. ஸம்மாவிமுத்தீதி அரஹத்தப²லவிமுத்தியா ஸமன்னாக³தோ. அவிஜ்ஜாக்க²ந்த⁴ங் பதா³லேதீதி அரஹத்தமக்³கே³ன பதா³லேதி நாமாதி வுச்சதி. இமினா ஹி ஹெட்டா² அரஹத்தமக்³கே³ன அவிஜ்ஜாக்க²ந்தோ⁴ பதா³லிதோ , இத⁴ பன பதா³லிதங் உபாதா³ய பதா³லேதீதி வத்துங் வட்டதீதி.
Kaṇḍacitrakānīti saralaṭṭhisararajjusarapāsādasarasāṇisarapokkharaṇisarapadumānīti anekāni kaṇḍehi kattabbacitrāni. Atha kho so tīhi ṭhānehīti so evaṃ bahūni kaṇḍacitrakāni jānantopi na rājāraho hoti, tīhiyeva pana ṭhānehi hotīti attho. Sammāsamādhihotīti maggasamādhinā ca phalasamādhinā ca samāhito hotīti ayamettha attho. Sammādiṭṭhīti maggasammādiṭṭhiyā samannāgato. Idaṃ dukkhantiādīhi catūhi saccehi cattāro maggā tīṇi ca phalāni kathitāni. Ayaṃ pana maggeneva avirādhitaṃ vijjhati nāmāti veditabbo. Sammāvimuttīti arahattaphalavimuttiyā samannāgato. Avijjākkhandhaṃ padāletīti arahattamaggena padāleti nāmāti vuccati. Iminā hi heṭṭhā arahattamaggena avijjākkhandho padālito , idha pana padālitaṃ upādāya padāletīti vattuṃ vaṭṭatīti.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 6. ஸாள்ஹஸுத்தங் • 6. Sāḷhasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 6. ஸாள்ஹஸுத்தவண்ணனா • 6. Sāḷhasuttavaṇṇanā
