| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
6. ஸாள்ஹஸுத்தவண்ணனா
6. Sāḷhasuttavaṇṇanā
196. ச²ட்டே² காயத³ள்ஹிப³ஹுலதங் தபதீதி தபோ, அத்தகிலமதா²னுயோக³வஸேன பவத்தங் வீரியங். தேன காயத³ள்ஹிப³ஹுலதானிமித்தஸ்ஸ பாபஸ்ஸ ஜிகு³ச்ச²னங் விரஜ்ஜனங் தபோஜிகு³ச்சா²தி ஆஹ ‘‘து³க்கரகாரிகஸங்கா²தேனா’’திஆதி³. தபோஜிகு³ச்ச²வாதா³திஆதீ³ஸு தபோஜிகு³ச்ச²ங் வத³ந்தி, மனஸாபி தமேவ ஸாரதோ க³ஹெத்வா விசரந்தி, காயேனபி தமேவ அல்லீனா நானப்பகாரங் அத்தகிலமதா²னுயோக³மனுயுத்தா விஹரந்தீதி அத்தோ². அபரிஸுத்³த⁴காயஸமாசாராதி அபரிஸுத்³தே⁴ன பாணாதிபாதாதி³னா காயஸமாசாரேன ஸமன்னாக³தா. அபரிஸுத்³த⁴வசீஸமாசாராதி அபரிஸுத்³தே⁴ன முஸாவாதா³தி³னா வசீஸமாசாரேன ஸமன்னாக³தா. அபரிஸுத்³த⁴மனோஸமாசாராதி அபரிஸுத்³தே⁴ன அபி⁴ஜ்ஜா²தி³னா மனோஸமாசாரேன ஸமன்னாக³தா. காமங் அகுஸலகாயஸமாசாரவசீஸமாசாரப்பவத்திகாலேபி அபி⁴ஜ்ஜா²த³யோ பவத்தந்தியேவ, ததா³ பன தே சேதனாபக்கி²கா வா அப்³போ³ஹாரிகா வாதி, மனோஸமாசாரவாரே ஏவ அபி⁴ஜ்ஜா²தி³வஸேன யோஜனா கதா. அத² வா த்³வாரந்தரே பவத்தானங் பாணாதிபாதாதீ³னங் வசீஸமாசாராதி³பா⁴வாபா⁴வோ விய த்³வாரந்தரே பவத்தானம்பி அபி⁴ஜ்ஜா²தீ³னங் காயஸமாசாராதி³பா⁴வோ அஸித்³தோ⁴, மனோஸமாசாரபா⁴வோ ஏவ பன ஸித்³தோ⁴தி கத்வா மனோஸமாசாரவாரே ஏவ அபி⁴ஜ்ஜா²த³யோ உத்³த⁴டா. ததா² ஹி வுத்தங் –
196. Chaṭṭhe kāyadaḷhibahulataṃ tapatīti tapo, attakilamathānuyogavasena pavattaṃ vīriyaṃ. Tena kāyadaḷhibahulatānimittassa pāpassa jigucchanaṃ virajjanaṃ tapojigucchāti āha ‘‘dukkarakārikasaṅkhātenā’’tiādi. Tapojigucchavādātiādīsu tapojigucchaṃ vadanti, manasāpi tameva sārato gahetvā vicaranti, kāyenapi tameva allīnā nānappakāraṃ attakilamathānuyogamanuyuttā viharantīti attho. Aparisuddhakāyasamācārāti aparisuddhena pāṇātipātādinā kāyasamācārena samannāgatā. Aparisuddhavacīsamācārāti aparisuddhena musāvādādinā vacīsamācārena samannāgatā. Aparisuddhamanosamācārāti aparisuddhena abhijjhādinā manosamācārena samannāgatā. Kāmaṃ akusalakāyasamācāravacīsamācārappavattikālepi abhijjhādayo pavattantiyeva, tadā pana te cetanāpakkhikā vā abbohārikā vāti, manosamācāravāre eva abhijjhādivasena yojanā katā. Atha vā dvārantare pavattānaṃ pāṇātipātādīnaṃ vacīsamācārādibhāvābhāvo viya dvārantare pavattānampi abhijjhādīnaṃ kāyasamācārādibhāvo asiddho, manosamācārabhāvo eva pana siddhoti katvā manosamācāravāre eva abhijjhādayo uddhaṭā. Tathā hi vuttaṃ –
‘‘த்³வாரே சரந்தி கம்மானி, ந த்³வாரா த்³வாரசாரினோ;
‘‘Dvāre caranti kammāni, na dvārā dvāracārino;
தஸ்மா த்³வாரேஹி கம்மானி, அஞ்ஞமஞ்ஞங் வவத்தி²தா’’தி. (த⁴॰ ஸ॰ அட்ட²॰ 1 காமாவசரகுஸலத்³வாரகதா²);
Tasmā dvārehi kammāni, aññamaññaṃ vavatthitā’’ti. (dha. sa. aṭṭha. 1 kāmāvacarakusaladvārakathā);
அபரிஸுத்³தா⁴ஜீவாதி அபரிஸுத்³தே⁴ன வேஜ்ஜகம்மதூ³தகம்மவட்³டி⁴யோகா³தி³னா ஏகவீஸதிஅனேஸனாபே⁴தே³ன ஆஜீவேன ஸமன்னாக³தா. இத³ஞ்ச ஸாஸனே பப்³ப³ஜிதானங்யேவ வஸேன வுத்தங், ‘‘யேபி தே ஸமணப்³ராஹ்மணா’’தி பன வசனதோ பா³ஹிரகவஸேன க³ஹட்ட²வஸேன ச யோஜனா வேதி³தப்³பா³. க³ஹட்டா²னம்பி ஹி ஜாதித⁴ம்மகுலத⁴ம்மதே³ஸத⁴ம்மவிலோமனவஸேன அஞ்ஞதா²பி மிச்சா²ஜீவோ லப்³ப⁴தேவ.
Aparisuddhājīvāti aparisuddhena vejjakammadūtakammavaḍḍhiyogādinā ekavīsatianesanābhedena ājīvena samannāgatā. Idañca sāsane pabbajitānaṃyeva vasena vuttaṃ, ‘‘yepi te samaṇabrāhmaṇā’’ti pana vacanato bāhirakavasena gahaṭṭhavasena ca yojanā veditabbā. Gahaṭṭhānampi hi jātidhammakuladhammadesadhammavilomanavasena aññathāpi micchājīvo labbhateva.
ஞாணத³ஸ்ஸனாயாதி எத்த² ஞாணத³ஸ்ஸனந்தி மக்³க³ஞாணம்பி வுச்சதி ப²லஞாணம்பி ஸப்³ப³ஞ்ஞுதஞ்ஞாணம்பி பச்சவெக்க²ணஞாணம்பி விபஸ்ஸனாஞாணம்பி. ‘‘கிங் நு கோ², ஆவுஸோ, ஞாணத³ஸ்ஸனவிஸுத்³த⁴த்த²ங் ப⁴க³வதி ப்³ரஹ்மசரியங் வுஸ்ஸதீ’’தி (ம॰ நி॰ 1.257) ஹி எத்த² மக்³க³ஞாணங் ‘‘ஞாணத³ஸ்ஸன’’ந்தி வுத்தங். ‘‘அயமஞ்ஞோ உத்தரிமனுஸ்ஸத⁴ம்மோ அலமரியஞாணத³ஸ்ஸனவிஸேஸோ அதி⁴க³தோ பா²ஸுவிஹாரோ’’தி (ம॰ நி॰ 1.328) எத்த² ப²லஞாணங். ‘‘ப⁴க³வதோபி கோ² ஞாணங் உத³பாதி³ ஸத்தாஹகாலகதோ ஆளாரோ காலாமோ’’தி (மஹாவ॰ 10) எத்த² ஸப்³ப³ஞ்ஞுதஞ்ஞாணங். ‘‘ஞாணஞ்ச பன மே த³ஸ்ஸனங் உத³பாதி³, அகுப்பா மே விமுத்தி, அயமந்திமா ஜாதீ’’தி (ஸங்॰ நி॰ 5.1081; மஹாவ॰ 16; படி॰ ம॰ 2.30) எத்த² பச்சவெக்க²ணஞாணங். ‘‘ஞாணத³ஸ்ஸனாய சித்தங் அபி⁴னீஹரதீ’’தி (தீ³॰ நி॰ 1.234-235) எத்த² விபஸ்ஸனாஞாணங். இத⁴ பன ஞாணத³ஸ்ஸனாயாதி மக்³க³ஞாணங் ‘‘ஞாணத³ஸ்ஸன’’ந்தி வுத்தங். தேனாஹ ‘‘மக்³க³ஞாணஸங்கா²தாய த³ஸ்ஸனாயா’’தி. அவிராதி⁴தங் விஜ்ஜ²தீதி அவிராதி⁴தங் கத்வா விஜ்ஜ²தி. ஸேஸமெத்த² ஸுவிஞ்ஞெய்யமேவ.
Ñāṇadassanāyāti ettha ñāṇadassananti maggañāṇampi vuccati phalañāṇampi sabbaññutaññāṇampi paccavekkhaṇañāṇampi vipassanāñāṇampi. ‘‘Kiṃ nu kho, āvuso, ñāṇadassanavisuddhatthaṃ bhagavati brahmacariyaṃ vussatī’’ti (ma. ni. 1.257) hi ettha maggañāṇaṃ ‘‘ñāṇadassana’’nti vuttaṃ. ‘‘Ayamañño uttarimanussadhammo alamariyañāṇadassanaviseso adhigato phāsuvihāro’’ti (ma. ni. 1.328) ettha phalañāṇaṃ. ‘‘Bhagavatopi kho ñāṇaṃ udapādi sattāhakālakato āḷāro kālāmo’’ti (mahāva. 10) ettha sabbaññutaññāṇaṃ. ‘‘Ñāṇañca pana me dassanaṃ udapādi, akuppā me vimutti, ayamantimā jātī’’ti (saṃ. ni. 5.1081; mahāva. 16; paṭi. ma. 2.30) ettha paccavekkhaṇañāṇaṃ. ‘‘Ñāṇadassanāya cittaṃ abhinīharatī’’ti (dī. ni. 1.234-235) ettha vipassanāñāṇaṃ. Idha pana ñāṇadassanāyāti maggañāṇaṃ ‘‘ñāṇadassana’’nti vuttaṃ. Tenāha ‘‘maggañāṇasaṅkhātāya dassanāyā’’ti. Avirādhitaṃ vijjhatīti avirādhitaṃ katvā vijjhati. Sesamettha suviññeyyameva.
ஸாள்ஹஸுத்தவண்ணனா நிட்டி²தா.
Sāḷhasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 6. ஸாள்ஹஸுத்தங் • 6. Sāḷhasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 6. ஸாள்ஹஸுத்தவண்ணனா • 6. Sāḷhasuttavaṇṇanā
