| Library / Tipiṭaka / ཏིཔིཊཀ • Tipiṭaka / ཨངྒུཏྟརནིཀཱཡ (ཨཊྛཀཐཱ) • Aṅguttaranikāya (aṭṭhakathā) |
༦. སཱལ༹ྷསུཏྟཝཎྞནཱ
6. Sāḷhasuttavaṇṇanā
༡༩༦. ཚཊྛེ དྭཡེནཱཏི དྭཱིཧི ཀོཊྛཱསེཧི། ཨོགྷསྶ ནིཏྠརཎནྟི ཙཏུརོགྷནིཏྠརཎཾ། ཏཔོཛིགུཙྪཱཧེཏཱུཏི དུཀྐརཀཱརིཀསངྑཱཏེན ཏཔེན པཱཔཛིགུཙྪནཧེཏུ ། ཨཉྙཏརཾ སཱམཉྙངྒནྟི ཨེཀཾ སམཎདྷམྨཀོཊྛཱསཾ། ཨཔརིསུདྡྷཀཱཡསམཱཙཱརཱཏིཨཱདཱིསུ པུརིམེཧི ཏཱིཧི པདེཧི ཀཱཡིཀཝཱཙསིཀཙེཏསིཀསཱིལཱནཾ ཨཔརིསུདྡྷཏཾ དསྶེཏྭཱ པཙྪིམེན པདེན ཨཔརིསུདྡྷཱཛཱིཝཏཾ དསྶེཏི། ཉཱཎདསྶནཱཡཱཏི མགྒཉཱཎསངྑཱཏཱཡ དསྶནཱཡ། ཨནུཏྟརཱཡ སམྦོདྷཱཡཱཏི ཨརཧཏྟཱཡ, ཨརཧཏྟཉཱཎཕསྶེན ཕུསིཏུཾ ཨབྷབྦཱཏི ཝུཏྟཾ ཧོཏི། སཱལལཊྛིནྟི སཱལརུཀྑཾ། ནཝནྟི ཏརུཎཾ། ཨཀུཀྐུཙྩཀཛཱཏནྟི ‘‘བྷཝེཡྻ ནུ ཁོ, ན བྷཝེཡྻཱ’’ཏི ཨཛནེཏབྦཀུཀྐུཙྩཾ། ལེཁཎིཡཱ ལིཁེཡྻཱཏི ཨཝལེཁནམཏྟཀེན ཨཝལིཁེཡྻ། དྷོཝེཡྻཱཏི གྷཾསེཡྻ། ཨནྟོ ཨཝིསུདྡྷཱཏི ཨབྦྷནྟརེ ཨསུདྡྷཱ ཨཔནཱིཏསཱརཱ།
196. Chaṭṭhe dvayenāti dvīhi koṭṭhāsehi. Oghassanittharaṇanti caturoghanittharaṇaṃ. Tapojigucchāhetūti dukkarakārikasaṅkhātena tapena pāpajigucchanahetu . Aññataraṃ sāmaññaṅganti ekaṃ samaṇadhammakoṭṭhāsaṃ. Aparisuddhakāyasamācārātiādīsu purimehi tīhi padehi kāyikavācasikacetasikasīlānaṃ aparisuddhataṃ dassetvā pacchimena padena aparisuddhājīvataṃ dasseti. Ñāṇadassanāyāti maggañāṇasaṅkhātāya dassanāya. Anuttarāya sambodhāyāti arahattāya, arahattañāṇaphassena phusituṃ abhabbāti vuttaṃ hoti. Sālalaṭṭhinti sālarukkhaṃ. Navanti taruṇaṃ. Akukkuccakajātanti ‘‘bhaveyya nu kho, na bhaveyyā’’ti ajanetabbakukkuccaṃ. Lekhaṇiyā likheyyāti avalekhanamattakena avalikheyya. Dhoveyyāti ghaṃseyya. Anto avisuddhāti abbhantare asuddhā apanītasārā.
ཨེཝམེཝ ཁོཏི ཨེཏྠ ཨིདཾ ཨོཔམྨསཾསནྡནཾ – སཱལལཊྛི ཝིཡ ཧི ཨཏྟབྷཱཝོ དཊྛབྦོ, ནདཱིསོཏཾ ཝིཡ སཾསཱརསོཏཾ, པཱརཾ གནྟུཀཱམཔུརིསོ ཝིཡ དྭཱསཊྛི དིཊྛིཡོ གཧེཏྭཱ ཋིཏཔུརིསོ, སཱལལཊྛིཡཱ བཧིདྡྷཱ སུཔརིཀམྨཀཏཀཱལོ ཝིཡ བཧིདྡྷཱ ཏཔཙརཎཾ གཱལ༹ྷཾ ཀཏྭཱ གཧིཏཀཱལོ, ཨནྟོ ཨསུདྡྷཀཱལོ ཝིཡ ཨབྦྷནྟརེ སཱིལཱནཾ ཨཔརིསུདྡྷཀཱལོ, སཱལལཊྛིཡཱ སཾསཱིདིཏྭཱ ཨདྷོགམནཾ ཝིཡ དིཊྛིགཏིཀསྶ སཾསཱརསོཏེ སཾསཱིདནཾ ཝེདིཏབྦཾ།
Evameva khoti ettha idaṃ opammasaṃsandanaṃ – sālalaṭṭhi viya hi attabhāvo daṭṭhabbo, nadīsotaṃ viya saṃsārasotaṃ, pāraṃ gantukāmapuriso viya dvāsaṭṭhi diṭṭhiyo gahetvā ṭhitapuriso, sālalaṭṭhiyā bahiddhā suparikammakatakālo viya bahiddhā tapacaraṇaṃ gāḷhaṃ katvā gahitakālo, anto asuddhakālo viya abbhantare sīlānaṃ aparisuddhakālo, sālalaṭṭhiyā saṃsīditvā adhogamanaṃ viya diṭṭhigatikassa saṃsārasote saṃsīdanaṃ veditabbaṃ.
ཕིཡཱརིཏྟཾ བནྡྷེཡྻཱཏི ཕིཡཉྩ ཨརིཏྟཉྩ ཡོཛེཡྻ། ཨེཝམེཝཱཏི ཨེཏྠཱཔི ཨིདཾ ཨོཔམྨསཾསནྡནཾ – སཱལལཊྛི ཝིཡ ཨཏྟབྷཱཝོ, ནདཱིསོཏཾ ཝིཡ སཾསཱརསོཏཾ, པཱརཾ གནྟུཀཱམཔུརིསོ ཝིཡ ཡོགཱཝཙརོ, བཧིདྡྷཱ སུཔརིཀམྨཀཏཀཱལོ ཝིཡ ཚསུ དྭཱརེསུ སཾཝརསྶ པཙྩུཔཊྛིཏཀཱལོ, ཨནྟོ སུཝིསོདྷིཏབྷཱཝོ ཝིཡ ཨབྦྷནྟརེ པརིསུདྡྷསཱིལབྷཱཝོ, ཕིཡཱརིཏྟབནྡྷནཾ ཝིཡ ཀཱཡིཀཙེཏསིཀཝཱིརིཡཀརཎཾ, སོཏྠིནཱ པཱརིམཏཱིརགམནཾ ཝིཡ ཨནུཔུབྦེན སཱིལཾ པཱུརེཏྭཱ སམཱདྷིཾ པཱུརེཏྭཱ པཉྙཾ པཱུརེཏྭཱ ནིབྦཱནགམནཾ དཊྛབྦཾ།
Phiyārittaṃ bandheyyāti phiyañca arittañca yojeyya. Evamevāti etthāpi idaṃ opammasaṃsandanaṃ – sālalaṭṭhi viya attabhāvo, nadīsotaṃ viya saṃsārasotaṃ, pāraṃ gantukāmapuriso viya yogāvacaro, bahiddhā suparikammakatakālo viya chasu dvāresu saṃvarassa paccupaṭṭhitakālo, anto suvisodhitabhāvo viya abbhantare parisuddhasīlabhāvo, phiyārittabandhanaṃ viya kāyikacetasikavīriyakaraṇaṃ, sotthinā pārimatīragamanaṃ viya anupubbena sīlaṃ pūretvā samādhiṃ pūretvā paññaṃ pūretvā nibbānagamanaṃ daṭṭhabbaṃ.
ཀཎྜཙིཏྲཀཱནཱིཏི སརལཊྛིསརརཛྫུསརཔཱསཱདསརསཱཎིསརཔོཀྑརཎིསརཔདུམཱནཱིཏི ཨནེཀཱནི ཀཎྜེཧི ཀཏྟབྦཙིཏྲཱནི། ཨཐ ཁོ སོ ཏཱིཧི ཋཱནེཧཱིཏི སོ ཨེཝཾ བཧཱུནི ཀཎྜཙིཏྲཀཱནི ཛཱནནྟོཔི ན རཱཛཱརཧོ ཧོཏི, ཏཱིཧིཡེཝ པན ཋཱནེཧི ཧོཏཱིཏི ཨཏྠོ། སམྨཱསམཱདྷི ཧོཏཱིཏི མགྒསམཱདྷིནཱ ཙ ཕལསམཱདྷིནཱ ཙ སམཱཧིཏོ ཧོཏཱིཏི ཨཡམེཏྠ ཨཏྠོ། སམྨཱདིཊྛཱིཏི མགྒསམྨཱདིཊྛིཡཱ སམནྣཱགཏོ། ཨིདཾ དུཀྑནྟིཨཱདཱིཧི ཙཏཱུཧི སཙྩེཧི ཙཏྟཱརོ མགྒཱ ཏཱིཎི ཙ ཕལཱནི ཀཐིཏཱནི། ཨཡཾ པན མགྒེནེཝ ཨཝིརཱདྷིཏཾ ཝིཛ྄ཛྷཏི ནཱམཱཏི ཝེདིཏབྦོ། སམྨཱཝིམུཏྟཱིཏི ཨརཧཏྟཕལཝིམུཏྟིཡཱ སམནྣཱགཏོ། ཨཝིཛྫཱཀྑནྡྷཾ པདཱལེཏཱིཏི ཨརཧཏྟམགྒེན པདཱལེཏི ནཱམཱཏི ཝུཙྩཏི། ཨིམིནཱ ཧི ཧེཊྛཱ ཨརཧཏྟམགྒེན ཨཝིཛྫཱཀྑནྡྷོ པདཱལིཏོ , ཨིདྷ པན པདཱལིཏཾ ཨུཔཱདཱཡ པདཱལེཏཱིཏི ཝཏྟུཾ ཝཊྚཏཱིཏི།
Kaṇḍacitrakānīti saralaṭṭhisararajjusarapāsādasarasāṇisarapokkharaṇisarapadumānīti anekāni kaṇḍehi kattabbacitrāni. Atha kho so tīhi ṭhānehīti so evaṃ bahūni kaṇḍacitrakāni jānantopi na rājāraho hoti, tīhiyeva pana ṭhānehi hotīti attho. Sammāsamādhihotīti maggasamādhinā ca phalasamādhinā ca samāhito hotīti ayamettha attho. Sammādiṭṭhīti maggasammādiṭṭhiyā samannāgato. Idaṃ dukkhantiādīhi catūhi saccehi cattāro maggā tīṇi ca phalāni kathitāni. Ayaṃ pana maggeneva avirādhitaṃ vijjhati nāmāti veditabbo. Sammāvimuttīti arahattaphalavimuttiyā samannāgato. Avijjākkhandhaṃ padāletīti arahattamaggena padāleti nāmāti vuccati. Iminā hi heṭṭhā arahattamaggena avijjākkhandho padālito , idha pana padālitaṃ upādāya padāletīti vattuṃ vaṭṭatīti.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / ཨངྒུཏྟརནིཀཱཡ • Aṅguttaranikāya / ༦. སཱལ༹ྷསུཏྟཾ • 6. Sāḷhasuttaṃ
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / ཨངྒུཏྟརནིཀཱཡ (ཊཱིཀཱ) • Aṅguttaranikāya (ṭīkā) / ༦. སཱལ༹ྷསུཏྟཝཎྞནཱ • 6. Sāḷhasuttavaṇṇanā
