| Library / Tipiṭaka / ਤਿਪਿਟਕ • Tipiṭaka / ਅਙ੍ਗੁਤ੍ਤਰਨਿਕਾਯ (ਅਟ੍ਠਕਥਾ) • Aṅguttaranikāya (aṭṭhakathā) |
੬. ਸਾਲ਼੍ਹਸੁਤ੍ਤવਣ੍ਣਨਾ
6. Sāḷhasuttavaṇṇanā
੬੭. ਛਟ੍ਠੇ ਮਿਗਾਰਨਤ੍ਤਾਤਿ ਮਿਗਾਰਸੇਟ੍ਠਿਨੋ ਨਤ੍ਤਾ। ਸੇਖੁਨਿਯਨਤ੍ਤਾਤਿ ਸੇਖੁਨਿਯਸੇਟ੍ਠਿਨੋ ਨਤ੍ਤਾ। ਉਪਸਙ੍ਕਮਿਂਸੂਤਿ ਭੁਤ੍ਤਪਾਤਰਾਸਾ ਦਾਸਕਮ੍ਮਕਰਪਰਿવੁਤਾ ਉਪਸਙ੍ਕਮਿਂਸੁ। ਤੇਸਂ ਕਿਰ ਪੁਰੇਭਤ੍ਤੇ ਪੁਬ੍ਬਣ੍ਹਸਮਯੇਯੇવ ਗੇਹੇ ਏਕੋ ਪਞ੍ਹੋ ਸਮੁਟ੍ਠਿਤੋ, ਤਂ ਪਨ ਕਥੇਤੁਂ ਓਕਾਸੋ ਨਾਹੋਸਿ। ਤੇ ‘‘ਤਂ ਪਞ੍ਹਂ ਸੋਸ੍ਸਾਮਾ’’ਤਿ ਥੇਰਸ੍ਸ ਸਨ੍ਤਿਕਂ ਗਨ੍ਤ੍વਾ વਨ੍ਦਿਤ੍વਾ ਤੁਣ੍ਹੀ ਨਿਸੀਦਿਂਸੁ। ਥੇਰੋ ‘‘ਗਾਮੇ ਤਂ ਸਮੁਟ੍ਠਿਤਂ ਪਞ੍ਹਂ ਸੋਤੁਂ ਆਗਤਾ ਭવਿਸ੍ਸਨ੍ਤੀ’’ਤਿ ਤੇਸਂ ਮਨਂ ਞਤ੍વਾ ਤਮੇવ ਪਞ੍ਹਂ ਆਰਭਨ੍ਤੋ ਏਥ ਤੁਮ੍ਹੇ ਸਾਲ਼੍ਹਾਤਿਆਦਿਮਾਹ। ਤਤ੍ਥ ਅਤ੍ਥਿ ਲੋਭੋਤਿ ਲੁਬ੍ਭਨਸਭਾવੋ ਲੋਭੋ ਨਾਮ ਅਤ੍ਥੀਤਿ ਪੁਚ੍ਛਤਿ। ਅਭਿਜ੍ਝਾਤਿ ਖੋ ਅਹਂ ਸਾਲ਼੍ਹਾ ਏਤਮਤ੍ਥਂ વਦਾਮੀਤਿ ਏਤਂ ਲੋਭਸਙ੍ਖਾਤਂ ਅਤ੍ਥਂ ਅਹਂ ‘‘ਅਭਿਜ੍ਝਾ’’ਤਿ વਦਾਮਿ, ‘‘ਤਣ੍ਹਾ’’ਤਿ વਦਾਮੀਤਿ ਸਮੁਟ੍ਠਿਤਪਞ੍ਹਸ੍ਸ ਅਤ੍ਥਂ ਦੀਪੇਨ੍ਤੋ ਆਹ। ਏવਂ ਸਬ੍ਬવਾਰੇਸੁ ਨਯੋ ਨੇਤਬ੍ਬੋ।
67. Chaṭṭhe migāranattāti migāraseṭṭhino nattā. Sekhuniyanattāti sekhuniyaseṭṭhino nattā. Upasaṅkamiṃsūti bhuttapātarāsā dāsakammakaraparivutā upasaṅkamiṃsu. Tesaṃ kira purebhatte pubbaṇhasamayeyeva gehe eko pañho samuṭṭhito, taṃ pana kathetuṃ okāso nāhosi. Te ‘‘taṃ pañhaṃ sossāmā’’ti therassa santikaṃ gantvā vanditvā tuṇhī nisīdiṃsu. Thero ‘‘gāme taṃ samuṭṭhitaṃ pañhaṃ sotuṃ āgatā bhavissantī’’ti tesaṃ manaṃ ñatvā tameva pañhaṃ ārabhanto etha tumhe sāḷhātiādimāha. Tattha atthi lobhoti lubbhanasabhāvo lobho nāma atthīti pucchati. Abhijjhāti kho ahaṃ sāḷhā etamatthaṃ vadāmīti etaṃ lobhasaṅkhātaṃ atthaṃ ahaṃ ‘‘abhijjhā’’ti vadāmi, ‘‘taṇhā’’ti vadāmīti samuṭṭhitapañhassa atthaṃ dīpento āha. Evaṃ sabbavāresu nayo netabbo.
ਸੋ ਏવਂ ਪਜਾਨਾਤੀਤਿ ਸੋ ਚਤ੍ਤਾਰੋ ਬ੍ਰਹ੍ਮવਿਹਾਰੇ ਭਾવੇਤ੍વਾ ਠਿਤੋ ਅਰਿਯਸਾવਕੋ ਸਮਾਪਤ੍ਤਿਤੋ વੁਟ੍ਠਾਯ વਿਪਸ੍ਸਨਂ ਆਰਭਨ੍ਤੋ ਏવਂ ਪਜਾਨਾਤਿ। ਅਤ੍ਥਿ ਇਦਨ੍ਤਿ ਅਤ੍ਥਿ ਦੁਕ੍ਖਸਚ੍ਚਸਙ੍ਖਾਤਂ ਖਨ੍ਧਪਞ੍ਚਕਂ ਨਾਮਰੂਪવਸੇਨ ਪਰਿਚ੍ਛਿਨ੍ਦਿਤ੍વਾ ਪਜਾਨਨ੍ਤੋ ਏਸ ‘‘ਏવਂ ਪਜਾਨਾਤਿ ਅਤ੍ਥਿ ਇਦ’’ਨ੍ਤਿ વੁਤ੍ਤੋ। ਹੀਨਨ੍ਤਿ ਸਮੁਦਯਸਚ੍ਚਂ। ਪਣੀਤਨ੍ਤਿ ਮਗ੍ਗਸਚ੍ਚਂ। ਇਮਸ੍ਸ ਸਞ੍ਞਾਗਤਸ੍ਸ ਉਤ੍ਤਰਿ ਨਿਸ੍ਸਰਣਨ੍ਤਿ ਇਮਸ੍ਸ વਿਪਸ੍ਸਨਾਸਞ੍ਞਾਸਙ੍ਖਾਤਸ੍ਸ ਸਞ੍ਞਾਗਤਸ੍ਸ ਉਤ੍ਤਰਿ ਨਿਸ੍ਸਰਣਂ ਨਾਮ ਨਿਬ੍ਬਾਨਂ, ਤਮਤ੍ਥੀਤਿ ਇਮਿਨਾ ਨਿਰੋਧਸਚ੍ਚਂ ਦਸ੍ਸੇਤਿ। વਿਮੁਤ੍ਤਸ੍ਮਿਂ વਿਮੁਤ੍ਤਮਿਤਿ ਞਾਣਨ੍ਤਿ ਏਕੂਨવੀਸਤਿવਿਧਂ ਪਚ੍ਚવੇਕ੍ਖਣਞਾਣਂ ਕਥਿਤਂ। ਅਹੁ ਪੁਬ੍ਬੇ ਲੋਭੋਤਿ ਪੁਬ੍ਬੇ ਮੇ ਲੋਭੋ ਅਹੋਸਿ। ਤਦਹੁ ਅਕੁਸਲਨ੍ਤਿ ਤਂ ਅਕੁਸਲਂ ਨਾਮ ਅਹੋਸਿ, ਤਦਾ વਾ ਅਕੁਸਲਂ ਨਾਮ ਅਹੋਸਿ। ਇਚ੍ਚੇਤਂ ਕੁਸਲਨ੍ਤਿ ਇਤਿ ਏਤਂ ਕੁਸਲਂ, ਤਸ੍ਸੇવ ਅਕੁਸਲਸ੍ਸ ਨਤ੍ਥਿਭਾવਂ ਕੁਸਲਂ ਖੇਮਨ੍ਤਿ ਸਨ੍ਧਾਯ વਦਤਿ। ਨਿਚ੍ਛਾਤੋਤਿ ਨਿਤ੍ਤਣ੍ਹੋ। ਨਿਬ੍ਬੁਤੋਤਿ ਅਬ੍ਭਨ੍ਤਰੇ ਸਨ੍ਤਾਪਕਰਾਨਂ ਕਿਲੇਸਾਨਂ ਅਭਾવੇਨ ਨਿਬ੍ਬੁਤੋ। ਸੀਤਿਭੂਤੋਤਿ ਸੀਤਲੀਭੂਤੋ। ਸੁਖਪ੍ਪਟਿਸਂવੇਦੀਤਿ ਕਾਯਿਕਚੇਤਸਿਕਸ੍ਸ ਸੁਖਸ੍ਸ ਪਟਿਸਂવੇਦਿਤਾ। ਬ੍ਰਹ੍ਮਭੂਤੇਨਾਤਿ ਸੇਟ੍ਠਭੂਤੇਨ। ਸੇਸਂ ਸਬ੍ਬਤ੍ਥ ਉਤ੍ਤਾਨਤ੍ਥਮੇવਾਤਿ।
Soevaṃ pajānātīti so cattāro brahmavihāre bhāvetvā ṭhito ariyasāvako samāpattito vuṭṭhāya vipassanaṃ ārabhanto evaṃ pajānāti. Atthi idanti atthi dukkhasaccasaṅkhātaṃ khandhapañcakaṃ nāmarūpavasena paricchinditvā pajānanto esa ‘‘evaṃ pajānāti atthi ida’’nti vutto. Hīnanti samudayasaccaṃ. Paṇītanti maggasaccaṃ. Imassa saññāgatassa uttari nissaraṇanti imassa vipassanāsaññāsaṅkhātassa saññāgatassa uttari nissaraṇaṃ nāma nibbānaṃ, tamatthīti iminā nirodhasaccaṃ dasseti. Vimuttasmiṃ vimuttamiti ñāṇanti ekūnavīsatividhaṃ paccavekkhaṇañāṇaṃ kathitaṃ. Ahu pubbe lobhoti pubbe me lobho ahosi. Tadahu akusalanti taṃ akusalaṃ nāma ahosi, tadā vā akusalaṃ nāma ahosi. Iccetaṃ kusalanti iti etaṃ kusalaṃ, tasseva akusalassa natthibhāvaṃ kusalaṃ khemanti sandhāya vadati. Nicchātoti nittaṇho. Nibbutoti abbhantare santāpakarānaṃ kilesānaṃ abhāvena nibbuto. Sītibhūtoti sītalībhūto. Sukhappaṭisaṃvedīti kāyikacetasikassa sukhassa paṭisaṃveditā. Brahmabhūtenāti seṭṭhabhūtena. Sesaṃ sabbattha uttānatthamevāti.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਅਙ੍ਗੁਤ੍ਤਰਨਿਕਾਯ • Aṅguttaranikāya / ੬. ਸਾਲ਼੍ਹਸੁਤ੍ਤਂ • 6. Sāḷhasuttaṃ
ਟੀਕਾ • Tīkā / ਸੁਤ੍ਤਪਿਟਕ (ਟੀਕਾ) • Suttapiṭaka (ṭīkā) / ਅਙ੍ਗੁਤ੍ਤਰਨਿਕਾਯ (ਟੀਕਾ) • Aṅguttaranikāya (ṭīkā) / ੬. ਸਾਲ਼੍ਹਸੁਤ੍ਤવਣ੍ਣਨਾ • 6. Sāḷhasuttavaṇṇanā
