| Library / Tipiṭaka / திபிடக • Tipiṭaka / ஜாதக-அட்ட²கதா² • Jātaka-aṭṭhakathā |
14. பகிண்ணகனிபாதோ
14. Pakiṇṇakanipāto
[484] 1. ஸாலிகேதா³ரஜாதகவண்ணனா
[484] 1. Sālikedārajātakavaṇṇanā
ஸம்பன்னங் ஸாலிகேதா³ரந்தி இத³ங் ஸத்தா² ஜேதவனே விஹரந்தோ மாதுபோஸகபி⁴க்கு²ங் ஆரப்³ப⁴ கதே²ஸி. பச்சுப்பன்னவத்து² ஸாமஜாதகே (ஜா॰ 2.22.296 ஆத³யோ) ஆவி ப⁴விஸ்ஸதி. ஸத்தா² பன தங் பி⁴க்கு²ங் பக்கோஸாபெத்வா ‘‘ஸச்சங் கிர த்வங் பி⁴க்கு² கி³ஹீ போஸேஸீ’’தி புச்சி²த்வா ‘‘ஸச்சங், ப⁴ந்தே’’தி வுத்தே ‘‘கிங் தே ஹொந்தீ’’தி வத்வா ‘‘மாதாபிதரோ மே, ப⁴ந்தே’’தி வுத்தே ‘‘ஸாது⁴ பி⁴க்கு², போராணகபண்டி³தா திரச்சா²னா ஹுத்வா ஸுவயோனியங் நிப்³ப³த்தித்வாபி ஜிண்ணே மாதாபிதரோ குலாவகே நிபஜ்ஜாபெத்வா முக²துண்ட³கேன கோ³சரங் ஆஹரித்வா போஸேஸு’’ந்தி வத்வா அதீதங் ஆஹரி.
Sampannaṃsālikedāranti idaṃ satthā jetavane viharanto mātuposakabhikkhuṃ ārabbha kathesi. Paccuppannavatthu sāmajātake (jā. 2.22.296 ādayo) āvi bhavissati. Satthā pana taṃ bhikkhuṃ pakkosāpetvā ‘‘saccaṃ kira tvaṃ bhikkhu gihī posesī’’ti pucchitvā ‘‘saccaṃ, bhante’’ti vutte ‘‘kiṃ te hontī’’ti vatvā ‘‘mātāpitaro me, bhante’’ti vutte ‘‘sādhu bhikkhu, porāṇakapaṇḍitā tiracchānā hutvā suvayoniyaṃ nibbattitvāpi jiṇṇe mātāpitaro kulāvake nipajjāpetvā mukhatuṇḍakena gocaraṃ āharitvā posesu’’nti vatvā atītaṃ āhari.
அதீதே ராஜக³ஹே மக³த⁴ராஜா நாம ரஜ்ஜங் காரேஸி. ததா³ நக³ரதோ புப்³பு³த்தரதி³ஸாய ஸாலித்³தி³யோ நாம ப்³ராஹ்மணகா³மோ அஹோஸி. தஸ்ஸ புப்³பு³த்தரதி³ஸாய மக³த⁴கெ²த்தங் அத்தி², தத்த² கோஸியகொ³த்தோ நாம ஸாலித்³தி³யவாஸீ ப்³ராஹ்மணோ ஸஹஸ்ஸகரீஸமத்தங் கெ²த்தங் க³ஹெத்வா ஸாலிங் வபாபேஸி. உட்டி²தே ச பன ஸஸ்ஸே வதிங் தி²ரங் காரெத்வா கஸ்ஸசி பண்ணாஸகரீஸமத்தங், கஸ்ஸசி ஸட்டி²கரீஸமத்தந்தி ஏவங் பஞ்சஸதகரீஸமத்தங் கெ²த்தங் அத்தனோ புரிஸானங்யேவ ஆரக்க²ணத்தா²ய த³த்வா ஸேஸங் பஞ்சஸதகரீஸமத்தங் கெ²த்தங் ப⁴திங் கத்வா ஏகஸ்ஸ ப⁴தகஸ்ஸ அதா³ஸி. ஸோ தத்த² குடிங் கத்வா ரத்திந்தி³வங் வஸதி. கெ²த்தஸ்ஸ பன புப்³பு³த்தரதி³ஸாபா⁴கே³ ஏகஸ்மிங் ஸானுபப்³ப³தே மஹந்தங் ஸிம்ப³லிவனங் அத்தி², தத்த² அனேகானி ஸுவஸதானி வஸந்தி. ததா³ போ³தி⁴ஸத்தோ தஸ்மிங் ஸுவஸங்கே⁴ ஸுவரஞ்ஞோ புத்தோ ஹுத்வா நிப்³ப³த்தி. ஸோ வயப்பத்தோ அபி⁴ரூபோ தா²மஸம்பன்னோ ஸகடனாபி⁴பமாணஸரீரோ அஹோஸி. அத²ஸ்ஸ பிதா மஹல்லககாலே ‘‘அஹங் இதா³னி தூ³ரங் க³ந்துங் ந ஸக்கோமி, த்வங் இமங் க³ணங் பரிஹரா’’தி க³ணங் நிய்யாதே³ஸி. ஸோ புனதி³வஸதோ பட்டா²ய மாதாபிதூனங் கோ³சரத்தா²ய க³ந்துங் நாதா³ஸி, ஸுவக³ணங் பரிஹரந்தோ ஹிமவந்தங் க³ந்த்வா ஸயங்ஜாதஸாலிவனே யாவத³த்த²ங் ஸாலிங் கா²தி³த்வா ஆக³மனகாலே மாதாபிதூனங் பஹோனகங் கோ³சரங் ஆஹரித்வா மாதாபிதரோ போஸேஸி.
Atīte rājagahe magadharājā nāma rajjaṃ kāresi. Tadā nagarato pubbuttaradisāya sāliddiyo nāma brāhmaṇagāmo ahosi. Tassa pubbuttaradisāya magadhakhettaṃ atthi, tattha kosiyagotto nāma sāliddiyavāsī brāhmaṇo sahassakarīsamattaṃ khettaṃ gahetvā sāliṃ vapāpesi. Uṭṭhite ca pana sasse vatiṃ thiraṃ kāretvā kassaci paṇṇāsakarīsamattaṃ, kassaci saṭṭhikarīsamattanti evaṃ pañcasatakarīsamattaṃ khettaṃ attano purisānaṃyeva ārakkhaṇatthāya datvā sesaṃ pañcasatakarīsamattaṃ khettaṃ bhatiṃ katvā ekassa bhatakassa adāsi. So tattha kuṭiṃ katvā rattindivaṃ vasati. Khettassa pana pubbuttaradisābhāge ekasmiṃ sānupabbate mahantaṃ simbalivanaṃ atthi, tattha anekāni suvasatāni vasanti. Tadā bodhisatto tasmiṃ suvasaṅghe suvarañño putto hutvā nibbatti. So vayappatto abhirūpo thāmasampanno sakaṭanābhipamāṇasarīro ahosi. Athassa pitā mahallakakāle ‘‘ahaṃ idāni dūraṃ gantuṃ na sakkomi, tvaṃ imaṃ gaṇaṃ pariharā’’ti gaṇaṃ niyyādesi. So punadivasato paṭṭhāya mātāpitūnaṃ gocaratthāya gantuṃ nādāsi, suvagaṇaṃ pariharanto himavantaṃ gantvā sayaṃjātasālivane yāvadatthaṃ sāliṃ khāditvā āgamanakāle mātāpitūnaṃ pahonakaṃ gocaraṃ āharitvā mātāpitaro posesi.
அத²ஸ்ஸ ஏகதி³வஸங் ஸுவா ஆரோசேஸுங் ‘‘புப்³பே³ இமஸ்மிங் காலே மக³த⁴கெ²த்தே ஸாலி பச்சதி, இதா³னி கிங் நு கோ² ஜாத’’ந்தி? ‘‘தேன ஹி ஜானாதா²’’தி த்³வே ஸுவே பஹிணிங்ஸு. தே க³ந்த்வா மக³த⁴கெ²த்தே ஓதரந்தா தஸ்ஸ ப⁴தியா ரக்க²ணபுரிஸஸ்ஸ கெ²த்தே ஓதரித்வா ஸாலிங் கா²தி³த்வா ஏகங் ஸாலிஸீஸங் ஆதா³ய ஸிம்ப³லிவனங் க³ந்த்வா ஸாலிஸீஸங் மஹாஸத்தஸ்ஸ பாத³மூலே ட²பெத்வா ‘‘தத்த² ஏவரூபோ ஸாலீ’’தி வதி³ங்ஸு. ஸோ புனதி³வஸே ஸுவக³ணபரிவுதோ தத்த² க³ந்த்வா தஸ்மிங் ப⁴தகஸ்ஸ கெ²த்தே ஓதரி. ஸோ பன புரிஸோ ஸுவே ஸாலிங் கா²த³ந்தே தி³ஸ்வா இதோ சிதோ ச தா⁴வித்வா வாரெந்தோபி வாரேதுங் ந ஸக்கோதி. ஸேஸா ஸுவா யாவத³த்த²ங் ஸாலிங் கா²தி³த்வா துச்ச²முகா²வ க³ச்ச²ந்தி. ஸுவராஜா பன ப³ஹூனி ஸாலிஸீஸானி ஏகதோ கத்வா தேஹி பரிவுதோ ஹுத்வா ஆஹரித்வா மாதாபிதூனங் தே³தி. ஸுவா புனதி³வஸதோ பட்டா²ய தத்தே²வ ஸாலிங் கா²தி³ங்ஸு. அத² ஸோ புரிஸோ ‘‘ஸசே இமே அஞ்ஞங் கதிபாஹங் ஏவங் கா²தி³ஸ்ஸந்தி, கிஞ்சி ந ப⁴விஸ்ஸதி, ப்³ராஹ்மணோ ஸாலிங் அக்³கா⁴பெத்வா மய்ஹங் இணங் கரிஸ்ஸதி, க³ந்த்வா தஸ்ஸ ஆரோசெஸ்ஸாமீ’’தி ஸாலிமுட்டி²னா ஸத்³தி⁴ங் ததா²ரூபங் பண்ணாகாரங் க³ஹெத்வா ஸாலித்³தி³யகா³மங் க³ந்த்வா ப்³ராஹ்மணங் பஸ்ஸித்வா வந்தி³த்வா பண்ணாகாரங் த³த்வா ஏகமந்தங் டி²தோ ‘‘கிங், போ⁴ புரிஸ, ஸம்பன்னங் ஸாலிகெ²த்த’’ந்தி புட்டோ² ‘‘ஆம, ப்³ராஹ்மண, ஸம்பன்ன’’ந்தி வத்வா த்³வே கா³தா² அபா⁴ஸி –
Athassa ekadivasaṃ suvā ārocesuṃ ‘‘pubbe imasmiṃ kāle magadhakhette sāli paccati, idāni kiṃ nu kho jāta’’nti? ‘‘Tena hi jānāthā’’ti dve suve pahiṇiṃsu. Te gantvā magadhakhette otarantā tassa bhatiyā rakkhaṇapurisassa khette otaritvā sāliṃ khāditvā ekaṃ sālisīsaṃ ādāya simbalivanaṃ gantvā sālisīsaṃ mahāsattassa pādamūle ṭhapetvā ‘‘tattha evarūpo sālī’’ti vadiṃsu. So punadivase suvagaṇaparivuto tattha gantvā tasmiṃ bhatakassa khette otari. So pana puriso suve sāliṃ khādante disvā ito cito ca dhāvitvā vārentopi vāretuṃ na sakkoti. Sesā suvā yāvadatthaṃ sāliṃ khāditvā tucchamukhāva gacchanti. Suvarājā pana bahūni sālisīsāni ekato katvā tehi parivuto hutvā āharitvā mātāpitūnaṃ deti. Suvā punadivasato paṭṭhāya tattheva sāliṃ khādiṃsu. Atha so puriso ‘‘sace ime aññaṃ katipāhaṃ evaṃ khādissanti, kiñci na bhavissati, brāhmaṇo sāliṃ agghāpetvā mayhaṃ iṇaṃ karissati, gantvā tassa ārocessāmī’’ti sālimuṭṭhinā saddhiṃ tathārūpaṃ paṇṇākāraṃ gahetvā sāliddiyagāmaṃ gantvā brāhmaṇaṃ passitvā vanditvā paṇṇākāraṃ datvā ekamantaṃ ṭhito ‘‘kiṃ, bho purisa, sampannaṃ sālikhetta’’nti puṭṭho ‘‘āma, brāhmaṇa, sampanna’’nti vatvā dve gāthā abhāsi –
1.
1.
‘‘ஸம்பன்னங் ஸாலிகேதா³ரங், ஸுவா பு⁴ஞ்ஜந்தி கோஸிய;
‘‘Sampannaṃ sālikedāraṃ, suvā bhuñjanti kosiya;
படிவேதே³மி தே ப்³ரஹ்மே, ந நே வாரேதுமுஸ்ஸஹே.
Paṭivedemi te brahme, na ne vāretumussahe.
2.
2.
‘‘ஏகோ ச தத்த² ஸகுணோ, யோ நேஸங் ஸப்³ப³ஸுந்த³ரோ;
‘‘Eko ca tattha sakuṇo, yo nesaṃ sabbasundaro;
பு⁴த்வா ஸாலிங் யதா²காமங், துண்டே³னாதா³ய க³ச்ச²தீ’’தி.
Bhutvā sāliṃ yathākāmaṃ, tuṇḍenādāya gacchatī’’ti.
தத்த² ஸம்பன்னந்தி பரிபுண்ணங் அவேகல்லங். ஸாலிகேதா³ரந்தி ஸாலிகெ²த்தங். ஸப்³ப³ஸுந்த³ரோதி ஸப்³பே³ஹி கொட்டா²ஸேஹி ஸுந்த³ரோ ரத்ததுண்டோ³ ஜிஞ்ஜுகஸன்னிப⁴அக்கி² ரத்தபாதோ³ தீஹி ரத்தராஜீஹி பரிக்கி²த்தகீ³வோ மஹாமயூரபமாணோ ஸோ யாவத³த்த²ங் ஸாலிங் கா²தி³த்வா அஞ்ஞங் துண்டே³ன க³ஹெத்வா க³ச்ச²தீதி.
Tattha sampannanti paripuṇṇaṃ avekallaṃ. Sālikedāranti sālikhettaṃ. Sabbasundaroti sabbehi koṭṭhāsehi sundaro rattatuṇḍo jiñjukasannibhaakkhi rattapādo tīhi rattarājīhi parikkhittagīvo mahāmayūrapamāṇo so yāvadatthaṃ sāliṃ khāditvā aññaṃ tuṇḍena gahetvā gacchatīti.
ப்³ராஹ்மணோ தஸ்ஸ கத²ங் ஸுத்வா ஸுவராஜே ஸினேஹங் உப்பாதெ³த்வா கெ²த்தபாலங் புச்சி² ‘‘அம்போ⁴ புரிஸ, பாஸங் ஒட்³டே³துங் ஜானாஸீ’’தி? ‘‘ஆம, ஜானாமீ’’தி. அத² நங் கா³தா²ய அஜ்ஜ²பா⁴ஸி –
Brāhmaṇo tassa kathaṃ sutvā suvarāje sinehaṃ uppādetvā khettapālaṃ pucchi ‘‘ambho purisa, pāsaṃ oḍḍetuṃ jānāsī’’ti? ‘‘Āma, jānāmī’’ti. Atha naṃ gāthāya ajjhabhāsi –
3.
3.
‘‘ஒட்³டெ³ந்து வாலபாஸானி, யதா² ப³ஜ்ஜே²த² ஸோ தி³ஜோ;
‘‘Oḍḍentu vālapāsāni, yathā bajjhetha so dijo;
ஜீவஞ்ச நங் க³ஹெத்வான, ஆனயேஹி மமந்திகே’’தி.
Jīvañca naṃ gahetvāna, ānayehi mamantike’’ti.
தத்த² ஒட்³டெ³ந்தூதி ஒட்³ட³யந்து. வாலபாஸானீதி அஸ்ஸவாலாதி³ரஜ்ஜுமயபாஸானி. ஜீவஞ்ச நந்தி ஜீவந்தங் ஏவ நங். ஆனயேஹீதி ஆனேஹி.
Tattha oḍḍentūti oḍḍayantu. Vālapāsānīti assavālādirajjumayapāsāni. Jīvañca nanti jīvantaṃ eva naṃ. Ānayehīti ānehi.
தங் ஸுத்வா கெ²த்தபாலோ ஸாலிங் அக்³கா⁴பெத்வா இணஸ்ஸ அகதபா⁴வேன துட்டோ² க³ந்த்வா அஸ்ஸவாலே வட்டெத்வா ‘‘அஜ்ஜ இமஸ்மிங் டா²னே ஓதரிஸ்ஸதீ’’தி ஸுவரஞ்ஞோ ஓதரணட்டா²னங் ஸல்லக்கெ²த்வா புனதி³வஸே பாதோவ சாடிபமாணங் பஞ்ஜரங் கத்வா பாஸஞ்ச ஒட்³டெ³த்வா ஸுவானங் ஆக³மனங் ஓலோகெந்தோ குடியங் நிஸீதி³. ஸுவராஜாபி ஸுவக³ணபரிவுதோ ஆக³ந்த்வா அலோலுப்பசாரதாய ஹிய்யோ கா²தி³தட்டா²னே ஒட்³டி³தபாஸே பாத³ங் பவேஸந்தோவ ஓதரி. ஸோ அத்தனோ ப³த்³த⁴பா⁴வங் ஞத்வா சிந்தேஸி ‘‘ஸசாஹங் இதா³னேவ ப³த்³த⁴ரவங் ரவிஸ்ஸாமி, ஞாதகாமே ப⁴யதஜ்ஜிதா கோ³சரங் அக்³க³ஹெத்வாவ பலாயிஸ்ஸந்தி, யாவ ஏதேஸங் கோ³சரக்³க³ஹணங், தாவ அதி⁴வாஸெஸ்ஸாமீ’’தி. ஸோ தேஸங் ஸுஹிதபா⁴வங் ஞத்வா மரணப⁴யதஜ்ஜிதோ ஹுத்வா திக்க²த்துங் ப³த்³த⁴ரவங் ரவி. அத² ஸப்³பே³ தே ஸுவா பலாயிங்ஸு. ஸுவராஜா ‘‘எத்தகேஸு மே ஞாதகேஸு நிவத்தித்வா ஓலோகெந்தோ ஏகோபி நத்தி², கிங் நு கோ² மயா பாபங் கத’’ந்தி விலபந்தோ கா³த²மாஹ –
Taṃ sutvā khettapālo sāliṃ agghāpetvā iṇassa akatabhāvena tuṭṭho gantvā assavāle vaṭṭetvā ‘‘ajja imasmiṃ ṭhāne otarissatī’’ti suvarañño otaraṇaṭṭhānaṃ sallakkhetvā punadivase pātova cāṭipamāṇaṃ pañjaraṃ katvā pāsañca oḍḍetvā suvānaṃ āgamanaṃ olokento kuṭiyaṃ nisīdi. Suvarājāpi suvagaṇaparivuto āgantvā aloluppacāratāya hiyyo khāditaṭṭhāne oḍḍitapāse pādaṃ pavesantova otari. So attano baddhabhāvaṃ ñatvā cintesi ‘‘sacāhaṃ idāneva baddharavaṃ ravissāmi, ñātakāme bhayatajjitā gocaraṃ aggahetvāva palāyissanti, yāva etesaṃ gocaraggahaṇaṃ, tāva adhivāsessāmī’’ti. So tesaṃ suhitabhāvaṃ ñatvā maraṇabhayatajjito hutvā tikkhattuṃ baddharavaṃ ravi. Atha sabbe te suvā palāyiṃsu. Suvarājā ‘‘ettakesu me ñātakesu nivattitvā olokento ekopi natthi, kiṃ nu kho mayā pāpaṃ kata’’nti vilapanto gāthamāha –
4.
4.
‘‘ஏதே பு⁴த்வா பிவித்வா ச, பக்கமந்தி விஹங்க³மா;
‘‘Ete bhutvā pivitvā ca, pakkamanti vihaṅgamā;
ஏகோ ப³த்³தொ⁴ஸ்மி பாஸேன, கிங் பாபங் பகதங் மயா’’தி.
Eko baddhosmi pāsena, kiṃ pāpaṃ pakataṃ mayā’’ti.
கெ²த்தபாலோ ஸுவராஜஸ்ஸ ப³த்³த⁴ரவங் ஸுவானஞ்ச ஆகாஸே பக்க²ந்த³னஸத்³த³ங் ஸுத்வா ‘‘கிங் நு கோ²’’தி குடியா ஓருய்ஹ பாஸாட்டா²னங் க³ந்த்வா ஸுவராஜானங் தி³ஸ்வா ‘‘யஸ்ஸேவ மே பாஸோ ஒட்³டி³தோ, ஸ்வேவ ப³த்³தோ⁴’’தி துட்ட²மானஸோ ஸுவராஜானங் பாஸதோ மோசெத்வா த்³வே பாதே³ ஏகதோ ப³ந்தி⁴த்வா த³ள்ஹங் ஆதா³ய ஸாலித்³தி³யகா³மங் க³ந்த்வா ஸுவராஜங் ப்³ராஹ்மணஸ்ஸ அதா³ஸி. ப்³ராஹ்மணோ ப³லவஸினேஹேன மஹாஸத்தங் உபோ⁴ஹி ஹத்தே²ஹி த³ள்ஹங் க³ஹெத்வா அங்கே நிஸீதா³பெத்வா தேன ஸத்³தி⁴ங் ஸல்லபந்தோ த்³வே கா³தா² அபா⁴ஸி –
Khettapālo suvarājassa baddharavaṃ suvānañca ākāse pakkhandanasaddaṃ sutvā ‘‘kiṃ nu kho’’ti kuṭiyā oruyha pāsāṭṭhānaṃ gantvā suvarājānaṃ disvā ‘‘yasseva me pāso oḍḍito, sveva baddho’’ti tuṭṭhamānaso suvarājānaṃ pāsato mocetvā dve pāde ekato bandhitvā daḷhaṃ ādāya sāliddiyagāmaṃ gantvā suvarājaṃ brāhmaṇassa adāsi. Brāhmaṇo balavasinehena mahāsattaṃ ubhohi hatthehi daḷhaṃ gahetvā aṅke nisīdāpetvā tena saddhiṃ sallapanto dve gāthā abhāsi –
5.
5.
‘‘உத³ரங் நூன அஞ்ஞேஸங், ஸுவ அச்சோத³ரங் தவ;
‘‘Udaraṃ nūna aññesaṃ, suva accodaraṃ tava;
பு⁴த்வா ஸாலிங் யதா²காமங், துண்டே³னாதா³ய க³ச்ச²ஸி.
Bhutvā sāliṃ yathākāmaṃ, tuṇḍenādāya gacchasi.
6.
6.
‘‘கொட்ட²ங் நு தத்த² பூரேஸி, ஸுவ வேரங் நு தே மயா;
‘‘Koṭṭhaṃ nu tattha pūresi, suva veraṃ nu te mayā;
புட்டோ² மே ஸம்ம அக்கா²ஹி, குஹிங் ஸாலிங் நிதா³ஹஸீ’’தி.
Puṭṭho me samma akkhāhi, kuhiṃ sāliṃ nidāhasī’’ti.
தத்த² உத³ரங் நூனாதி அஞ்ஞேஸங் உத³ரங் உத³ரமேவ மஞ்ஞே, தவ உத³ரங் பன அதிஉத³ரங். தத்தா²தி தஸ்மிங் ஸிம்ப³லிவனே. பூரேஸீதி வஸ்ஸாரத்தத்தா²ய பூரேஸி. நிதா³ஹஸீதி நிதா⁴னங் கத்வா ட²பேஸி, ‘‘நிதீ⁴யஸீ’’திபி பாடோ².
Tattha udaraṃ nūnāti aññesaṃ udaraṃ udarameva maññe, tava udaraṃ pana atiudaraṃ. Tatthāti tasmiṃ simbalivane. Pūresīti vassārattatthāya pūresi. Nidāhasīti nidhānaṃ katvā ṭhapesi, ‘‘nidhīyasī’’tipi pāṭho.
தங் ஸுத்வா ஸுவராஜா மது⁴ராய மனுஸ்ஸபா⁴ஸாய ஸத்தமங் கா³த²மாஹ –
Taṃ sutvā suvarājā madhurāya manussabhāsāya sattamaṃ gāthamāha –
7.
7.
‘‘ந மே வேரங் தயா ஸத்³தி⁴ங், கொட்டோ² மய்ஹங் ந விஜ்ஜதி;
‘‘Na me veraṃ tayā saddhiṃ, koṭṭho mayhaṃ na vijjati;
இணங் முஞ்சாமிணங் த³ம்மி, ஸம்பத்தோ கோடஸிம்ப³லிங்;
Iṇaṃ muñcāmiṇaṃ dammi, sampatto koṭasimbaliṃ;
நிதி⁴ம்பி தத்த² நித³ஹாமி, ஏவங் ஜானாஹி கோஸியா’’தி.
Nidhimpi tattha nidahāmi, evaṃ jānāhi kosiyā’’ti.
தத்த² இணங் முஞ்சாமிணங் த³ம்மீதி தவ ஸாலிங் ஹரித்வா இணங் முஞ்சாமி சேவ த³ம்மி சாதி வத³தி. நிதி⁴ம்பீதி ஏகங் தத்த² ஸிம்ப³லிவனே அனுகா³மிகனிதி⁴ம்பி நித³ஹாமி.
Tattha iṇaṃ muñcāmiṇaṃ dammīti tava sāliṃ haritvā iṇaṃ muñcāmi ceva dammi cāti vadati. Nidhimpīti ekaṃ tattha simbalivane anugāmikanidhimpi nidahāmi.
அத² நங் ப்³ராஹ்மணோ புச்சி² –
Atha naṃ brāhmaṇo pucchi –
8.
8.
‘‘கீதி³ஸங் தே இணதா³னங், இணமொக்கோ² ச கீதி³ஸோ;
‘‘Kīdisaṃ te iṇadānaṃ, iṇamokkho ca kīdiso;
நிதி⁴னிதா⁴னமக்கா²ஹி, அத² பாஸா பமொக்க²ஸீ’’தி.
Nidhinidhānamakkhāhi, atha pāsā pamokkhasī’’ti.
தத்த² இணதா³னந்தி இணஸ்ஸ தா³னங். நிதி⁴னிதா⁴னந்தி நிதி⁴னோ நிதா⁴னங்.
Tattha iṇadānanti iṇassa dānaṃ. Nidhinidhānanti nidhino nidhānaṃ.
ஏவங் ப்³ராஹ்மணேன புட்டோ² ஸுவராஜா தஸ்ஸ ப்³யாகரொந்தோ சதஸ்ஸோ கா³தா² அபா⁴ஸி –
Evaṃ brāhmaṇena puṭṭho suvarājā tassa byākaronto catasso gāthā abhāsi –
9.
9.
‘‘அஜாதபக்கா² தருணா, புத்தகா மய்ஹ கோஸிய;
‘‘Ajātapakkhā taruṇā, puttakā mayha kosiya;
தே மங் ப⁴தா ப⁴ரிஸ்ஸந்தி, தஸ்மா தேஸங் இணங் த³தே³.
Te maṃ bhatā bharissanti, tasmā tesaṃ iṇaṃ dade.
10.
10.
‘‘மாதா பிதா ச மே வுத்³தா⁴, ஜிண்ணகா க³தயொப்³ப³னா;
‘‘Mātā pitā ca me vuddhā, jiṇṇakā gatayobbanā;
தேஸங் துண்டே³ன ஹாதூன, முஞ்சே புப்³ப³கதங் இணங்.
Tesaṃ tuṇḍena hātūna, muñce pubbakataṃ iṇaṃ.
11.
11.
‘‘அஞ்ஞேபி தத்த² ஸகுணா, கீ²ணபக்கா² ஸுது³ப்³ப³லா;
‘‘Aññepi tattha sakuṇā, khīṇapakkhā sudubbalā;
தேஸங் புஞ்ஞத்தி²கோ த³ம்மி, தங் நிதி⁴ங் ஆஹு பண்டி³தா.
Tesaṃ puññatthiko dammi, taṃ nidhiṃ āhu paṇḍitā.
12.
12.
‘‘ஈதி³ஸங் மே இணதா³னங், இணமொக்கோ² ச ஈதி³ஸோ;
‘‘Īdisaṃ me iṇadānaṃ, iṇamokkho ca īdiso;
நிதி⁴னிதா⁴னமக்கா²மி, ஏவங் ஜானாஹி கோஸியா’’தி.
Nidhinidhānamakkhāmi, evaṃ jānāhi kosiyā’’ti.
தத்த² ஹாதூனாதி ஹரித்வா. தங் நிதி⁴ந்தி தங் புஞ்ஞகம்மங் பண்டி³தா அனுகா³மிகனிதி⁴ங் நாம கதெ²ந்தி. நிதி⁴னிதா⁴னந்தி நிதி⁴னோ நிதா⁴னங், ‘‘நிதா⁴னநிதி⁴’’ந்திபி பாடோ², அயமேவத்தோ².
Tattha hātūnāti haritvā. Taṃ nidhinti taṃ puññakammaṃ paṇḍitā anugāmikanidhiṃ nāma kathenti. Nidhinidhānanti nidhino nidhānaṃ, ‘‘nidhānanidhi’’ntipi pāṭho, ayamevattho.
ப்³ராஹ்மணோ மஹாஸத்தஸ்ஸ த⁴ம்மகத²ங் ஸுத்வா பஸன்னசித்தோ த்³வே கா³தா² அபா⁴ஸி.
Brāhmaṇo mahāsattassa dhammakathaṃ sutvā pasannacitto dve gāthā abhāsi.
13.
13.
‘‘ப⁴த்³த³கோ வதயங் பக்கீ², தி³ஜோ பரமத⁴ம்மிகோ;
‘‘Bhaddako vatayaṃ pakkhī, dijo paramadhammiko;
ஏகச்சேஸு மனுஸ்ஸேஸு, அயங் த⁴ம்மோ ந விஜ்ஜதி.
Ekaccesu manussesu, ayaṃ dhammo na vijjati.
14.
14.
‘‘பு⁴ஞ்ஜ ஸாலிங் யதா²காமங், ஸஹ ஸப்³பே³ஹி ஞாதிபி⁴;
‘‘Bhuñja sāliṃ yathākāmaṃ, saha sabbehi ñātibhi;
புனாபி ஸுவ பஸ்ஸேமு, பியங் மே தவ த³ஸ்ஸன’’ந்தி.
Punāpi suva passemu, piyaṃ me tava dassana’’nti.
தத்த² பு⁴ஞ்ஜ ஸாலிந்தி இதோ பட்டா²ய நிப்³ப⁴யோ ஹுத்வா பு⁴ஞ்ஜாதி கரீஸஸஹஸ்ஸம்பி தஸ்ஸேவ நிய்யாதெ³ந்தோ ஏவமாஹ. பஸ்ஸேமூதி அத்தனோ ருசியா ஆக³தங் அஞ்ஞேஸுபி தி³வஸேஸு தங் பஸ்ஸெய்யாமாதி.
Tattha bhuñja sālinti ito paṭṭhāya nibbhayo hutvā bhuñjāti karīsasahassampi tasseva niyyādento evamāha. Passemūti attano ruciyā āgataṃ aññesupi divasesu taṃ passeyyāmāti.
ஏவங் ப்³ராஹ்மணோ மஹாஸத்தங் யாசித்வா பியபுத்தங் விய முது³சித்தேன ஓலோகெந்தோ பாத³தோ ப³ந்த⁴னங் மோசெத்வா ஸதபாகதேலேன பாதே³ மக்கெ²த்வா ப⁴த்³த³பீடே² நிஸீதா³பெத்வா கஞ்சனதட்டகே மது⁴லாஜே கா²தா³பெத்வா ஸக்க²ரோத³கங் பாயேஸி. அத²ஸ்ஸ ஸுவராஜா ‘‘அப்பமத்தோ ஹோஹி, ப்³ராஹ்மணா’’தி வத்வா ஓவாத³ங் தெ³ந்தோ ஆஹ –
Evaṃ brāhmaṇo mahāsattaṃ yācitvā piyaputtaṃ viya muducittena olokento pādato bandhanaṃ mocetvā satapākatelena pāde makkhetvā bhaddapīṭhe nisīdāpetvā kañcanataṭṭake madhulāje khādāpetvā sakkharodakaṃ pāyesi. Athassa suvarājā ‘‘appamatto hohi, brāhmaṇā’’ti vatvā ovādaṃ dento āha –
15.
15.
‘‘பு⁴த்தஞ்ச பீதஞ்ச தவஸ்ஸமம்ஹி, ரதீ ச நோ கோஸிய தே ஸகாஸே;
‘‘Bhuttañca pītañca tavassamamhi, ratī ca no kosiya te sakāse;
நிக்கி²த்தத³ண்டே³ஸு த³தா³ஹி தா³னங், ஜிண்ணே ச மாதாபிதரோ ப⁴ரஸ்ஸூ’’தி.
Nikkhittadaṇḍesu dadāhi dānaṃ, jiṇṇe ca mātāpitaro bharassū’’ti.
தத்த² தவஸ்ஸமம்ஹீதி தவ நிவேஸனே. ரதீதி அபி⁴ரதி.
Tattha tavassamamhīti tava nivesane. Ratīti abhirati.
தங் ஸுத்வா ப்³ராஹ்மணோ துட்ட²மானஸோ உதா³னங் உதா³னெந்தோ கா³த²மாஹ –
Taṃ sutvā brāhmaṇo tuṭṭhamānaso udānaṃ udānento gāthamāha –
16.
16.
‘‘லக்கீ² வத மே உத³பாதி³ அஜ்ஜ, யோ அத்³த³ஸாஸிங் பவரங் தி³ஜானங்;
‘‘Lakkhī vata me udapādi ajja, yo addasāsiṃ pavaraṃ dijānaṃ;
ஸுவஸ்ஸ ஸுத்வான ஸுபா⁴ஸிதானி, காஹாமி புஞ்ஞானி அனப்பகானீ’’தி.
Suvassa sutvāna subhāsitāni, kāhāmi puññāni anappakānī’’ti.
தத்த² லக்கீ²தி ஸிரீபி புஞ்ஞம்பி பஞ்ஞாபி.
Tattha lakkhīti sirīpi puññampi paññāpi.
மஹாஸத்தோ ப்³ராஹ்மணேன அத்தனோ தி³ன்னங் கரீஸஸஹஸ்ஸமத்தங் படிக்கி²பித்வா அட்ட²கரீஸமேவ க³ண்ஹி. ப்³ராஹ்மணோ த²ம்பே⁴ நிக²னித்வா தஸ்ஸ கெ²த்தங் நிய்யாதெ³த்வா க³ந்த⁴மாலாதீ³ஹி பூஜெத்வா க²மாபெத்வா ‘‘க³ச்ச² ஸாமி, அஸ்ஸுமுகே² ரோத³மானே மாதாபிதரோ அஸ்ஸாஸேஹீ’’தி வத்வா தங் உய்யோஜேஸி. ஸோ துட்ட²மானஸோ ஸாலிஸீஸங் ஆதா³ய க³ந்த்வா மாதாபிதூனங் புரதோ நிக்கி²பித்வா ‘‘அம்மதாதா, உட்டே²தா²’’தி ஆஹ. தே அஸ்ஸுமுகா² ரோத³மானா உட்ட²ஹிங்ஸு, தாவதே³வ ஸுவக³ணா ஸன்னிபதித்வா ‘‘கத²ங் முத்தோஸி, தே³வா’’தி புச்சி²ங்ஸு. ஸோ தேஸங் ஸப்³ப³ங் வித்தா²ரதோ கதே²ஸி. கோஸியோபி ஸுவரஞ்ஞோ ஓவாத³ங் ஸுத்வா ததோ பட்டா²ய த⁴ம்மிகஸமணப்³ராஹ்மணானங் மஹாதா³னங் பட்ட²பேஸி. தமத்த²ங் பகாஸெந்தோ ஸத்தா² ஓஸானகா³த²மாஹ –
Mahāsatto brāhmaṇena attano dinnaṃ karīsasahassamattaṃ paṭikkhipitvā aṭṭhakarīsameva gaṇhi. Brāhmaṇo thambhe nikhanitvā tassa khettaṃ niyyādetvā gandhamālādīhi pūjetvā khamāpetvā ‘‘gaccha sāmi, assumukhe rodamāne mātāpitaro assāsehī’’ti vatvā taṃ uyyojesi. So tuṭṭhamānaso sālisīsaṃ ādāya gantvā mātāpitūnaṃ purato nikkhipitvā ‘‘ammatātā, uṭṭhethā’’ti āha. Te assumukhā rodamānā uṭṭhahiṃsu, tāvadeva suvagaṇā sannipatitvā ‘‘kathaṃ muttosi, devā’’ti pucchiṃsu. So tesaṃ sabbaṃ vitthārato kathesi. Kosiyopi suvarañño ovādaṃ sutvā tato paṭṭhāya dhammikasamaṇabrāhmaṇānaṃ mahādānaṃ paṭṭhapesi. Tamatthaṃ pakāsento satthā osānagāthamāha –
17.
17.
‘‘ஸோ கோஸியோ அத்தமனோ உத³க்³கோ³, அன்னஞ்ச பானஞ்சபி⁴ஸங்க²ரித்வா;
‘‘So kosiyo attamano udaggo, annañca pānañcabhisaṅkharitvā;
அன்னேன பானேன பஸன்னசித்தோ, ஸந்தப்பயி ஸமணப்³ராஹ்மணே சா’’தி.
Annena pānena pasannacitto, santappayi samaṇabrāhmaṇe cā’’ti.
தத்த² ஸந்தப்பயீதி க³ஹிதக³ஹிதானி பா⁴ஜனானி பூரெந்தோ ஸந்தப்பேஸீதி.
Tattha santappayīti gahitagahitāni bhājanāni pūrento santappesīti.
ஸத்தா² இமங் த⁴ம்மதே³ஸனங் ஆஹரித்வா ‘‘ஏவங் பி⁴க்கு² மாதாபிதூனங் போஸனங் நாம பண்டி³தானங் வங்ஸோ’’தி வத்வா ஸச்சானி பகாஸெத்வா ஜாதகங் ஸமோதா⁴னேஸி, ஸச்சபரியோஸானே ஸோ பி⁴க்கு² ஸோதாபத்திப²லே பதிட்ட²ஹி. ததா³ ஸுவக³ணா பு³த்³த⁴பரிஸா அஹேஸுங், மாதாபிதரோ மஹாராஜகுலானி, கெ²த்தபாலோ ச²ன்னோ, ப்³ராஹ்மணோ ஆனந்தோ³, ஸுவராஜா பன அஹமேவ அஹோஸிந்தி.
Satthā imaṃ dhammadesanaṃ āharitvā ‘‘evaṃ bhikkhu mātāpitūnaṃ posanaṃ nāma paṇḍitānaṃ vaṃso’’ti vatvā saccāni pakāsetvā jātakaṃ samodhānesi, saccapariyosāne so bhikkhu sotāpattiphale patiṭṭhahi. Tadā suvagaṇā buddhaparisā ahesuṃ, mātāpitaro mahārājakulāni, khettapālo channo, brāhmaṇo ānando, suvarājā pana ahameva ahosinti.
ஸாலிகேதா³ரஜாதகவண்ணனா பட²மா.
Sālikedārajātakavaṇṇanā paṭhamā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / ஜாதகபாளி • Jātakapāḷi / 484. ஸாலிகேதா³ரஜாதகங் • 484. Sālikedārajātakaṃ
