| Library / Tipiṭaka / ติปิฎก • Tipiṭaka / สุตฺตนิปาตปาฬิ • Suttanipātapāḷi |
๘. สลฺลสุตฺตํ
8. Sallasuttaṃ
๕๗๙.
579.
อนิมิตฺตมนญฺญาตํ , มจฺจานํ อิธ ชีวิตํ;
Animittamanaññātaṃ , maccānaṃ idha jīvitaṃ;
กสิรญฺจ ปริตฺตญฺจ, ตญฺจ ทุเกฺขน สํยุตํฯ
Kasirañca parittañca, tañca dukkhena saṃyutaṃ.
๕๘๐.
580.
น หิ โส อุปกฺกโม อตฺถิ, เยน ชาตา น มิยฺยเร;
Na hi so upakkamo atthi, yena jātā na miyyare;
ชรมฺปิ ปตฺวา มรณํ, เอวํธมฺมา หิ ปาณิโนฯ
Jarampi patvā maraṇaṃ, evaṃdhammā hi pāṇino.
๕๘๑.
581.
เอวํ ชาตาน มจฺจานํ, นิจฺจํ มรณโต ภยํฯ
Evaṃ jātāna maccānaṃ, niccaṃ maraṇato bhayaṃ.
๕๘๒.
582.
ยถาปิ กุมฺภการสฺส, กตา มตฺติกภาชนา;
Yathāpi kumbhakārassa, katā mattikabhājanā;
๕๘๓.
583.
ทหรา จ มหนฺตา จ, เย พาลา เย จ ปณฺฑิตา;
Daharā ca mahantā ca, ye bālā ye ca paṇḍitā;
สเพฺพ มจฺจุวสํ ยนฺติ, สเพฺพ มจฺจุปรายณาฯ
Sabbe maccuvasaṃ yanti, sabbe maccuparāyaṇā.
๕๘๔.
584.
เตสํ มจฺจุปเรตานํ, คจฺฉตํ ปรโลกโต;
Tesaṃ maccuparetānaṃ, gacchataṃ paralokato;
น ปิตา ตายเต ปุตฺตํ, ญาตี วา ปน ญาตเกฯ
Na pitā tāyate puttaṃ, ñātī vā pana ñātake.
๕๘๕.
585.
เปกฺขตํ เยว ญาตีนํ, ปสฺส ลาลปตํ ปุถุ;
Pekkhataṃ yeva ñātīnaṃ, passa lālapataṃ puthu;
๕๘๖.
586.
เอวมพฺภาหโต โลโก, มจฺจุนา จ ชราย จ;
Evamabbhāhato loko, maccunā ca jarāya ca;
ตสฺมา ธีรา น โสจนฺติ, วิทิตฺวา โลกปริยายํฯ
Tasmā dhīrā na socanti, viditvā lokapariyāyaṃ.
๕๘๗.
587.
ยสฺส มคฺคํ น ชานาสิ, อาคตสฺส คตสฺส วา;
Yassa maggaṃ na jānāsi, āgatassa gatassa vā;
อุโภ อเนฺต อสมฺปสฺสํ, นิรตฺถํ ปริเทวสิฯ
Ubho ante asampassaṃ, niratthaṃ paridevasi.
๕๘๘.
588.
ปริเทวยมาโน เจ, กิญฺจิทตฺถํ อุทพฺพเห;
Paridevayamāno ce, kiñcidatthaṃ udabbahe;
สมฺมูโฬฺห หิํสมตฺตานํ, กยิรา เจ นํ วิจกฺขโณฯ
Sammūḷho hiṃsamattānaṃ, kayirā ce naṃ vicakkhaṇo.
๕๘๙.
589.
น หิ รุเณฺณน โสเกน, สนฺติํ ปโปฺปติ เจตโส;
Na hi ruṇṇena sokena, santiṃ pappoti cetaso;
ภิยฺยสฺสุปฺปชฺชเต ทุกฺขํ, สรีรํ จุปหญฺญติฯ
Bhiyyassuppajjate dukkhaṃ, sarīraṃ cupahaññati.
๕๙๐.
590.
กิโส วิวโณฺณ ภวติ, หิํสมตฺตานมตฺตนา;
Kiso vivaṇṇo bhavati, hiṃsamattānamattanā;
น เตน เปตา ปาเลนฺติ, นิรตฺถา ปริเทวนาฯ
Na tena petā pālenti, niratthā paridevanā.
๕๙๑.
591.
โสกมปฺปชหํ ชนฺตุ, ภิโยฺย ทุกฺขํ นิคจฺฉติ;
Sokamappajahaṃ jantu, bhiyyo dukkhaṃ nigacchati;
๕๙๒.
592.
อเญฺญปิ ปสฺส คมิเน, ยถากมฺมูปเค นเร;
Aññepi passa gamine, yathākammūpage nare;
มจฺจุโน วสมาคมฺม, ผนฺทเนฺตวิธ ปาณิโนฯ
Maccuno vasamāgamma, phandantevidha pāṇino.
๕๙๓.
593.
เยน เยน หิ มญฺญนฺติ, ตโต ตํ โหติ อญฺญถา;
Yena yena hi maññanti, tato taṃ hoti aññathā;
เอตาทิโส วินาภาโว, ปสฺส โลกสฺส ปริยายํฯ
Etādiso vinābhāvo, passa lokassa pariyāyaṃ.
๕๙๔.
594.
อปิ วสฺสสตํ ชีเว, ภิโยฺย วา ปน มาณโว;
Api vassasataṃ jīve, bhiyyo vā pana māṇavo;
ญาติสงฺฆา วินา โหติ, ชหาติ อิธ ชีวิตํฯ
Ñātisaṅghā vinā hoti, jahāti idha jīvitaṃ.
๕๙๕.
595.
ตสฺมา อรหโต สุตฺวา, วิเนยฺย ปริเทวิตํ;
Tasmā arahato sutvā, vineyya paridevitaṃ;
เปตํ กาลงฺกตํ ทิสฺวา, เนโส ลพฺภา มยา อิติฯ
Petaṃ kālaṅkataṃ disvā, neso labbhā mayā iti.
๕๙๖.
596.
เอวมฺปิ ธีโร สปโญฺญ, ปณฺฑิโต กุสโล นโร;
Evampi dhīro sapañño, paṇḍito kusalo naro;
ขิปฺปมุปฺปติตํ โสกํ, วาโต ตูลํว ธํสเยฯ
Khippamuppatitaṃ sokaṃ, vāto tūlaṃva dhaṃsaye.
๕๙๗.
597.
ปริเทวํ ปชปฺปญฺจ, โทมนสฺสญฺจ อตฺตโน;
Paridevaṃ pajappañca, domanassañca attano;
อตฺตโน สุขเมสาโน, อพฺพเห สลฺลมตฺตโนฯ
Attano sukhamesāno, abbahe sallamattano.
๕๙๘.
598.
อพฺพุฬฺหสโลฺล อสิโต, สนฺติํ ปปฺปุยฺย เจตโส;
Abbuḷhasallo asito, santiṃ pappuyya cetaso;
สพฺพโสกํ อติกฺกโนฺต, อโสโก โหติ นิพฺพุโตติฯ
Sabbasokaṃ atikkanto, asoko hoti nibbutoti.
สลฺลสุตฺตํ อฎฺฐมํ นิฎฺฐิตํฯ
Sallasuttaṃ aṭṭhamaṃ niṭṭhitaṃ.
Footnotes:
Related texts:
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / ขุทฺทกนิกาย (อฎฺฐกถา) • Khuddakanikāya (aṭṭhakathā) / สุตฺตนิปาต-อฎฺฐกถา • Suttanipāta-aṭṭhakathā / ๘. สลฺลสุตฺตวณฺณนา • 8. Sallasuttavaṇṇanā
