| Library / Tipiṭaka / တိပိဋက • Tipiṭaka / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) |
၆. သလ္လသုတ္တဝဏ္ဏနာ
6. Sallasuttavaṇṇanā
၂၅၄. ဆဋ္ဌေ တတ္ရာတိ တေသု ဒ္ဝီသု ဇနေသု။ အနုဝေဓံ ဝိဇ္ဈေယ္ယာတိ တသ္သေဝ ဝဏမုခသ္သ အင္ဂုလန္တရေ ဝာ ဒ္ဝင္ဂုလန္တရေ ဝာ အာသန္နပဒေသေ အနုဂတဝေဓံ။ ဧဝံ ဝိဒ္ဓသ္သ ဟိ သာ အနုဝေဓာ ဝေဒနာ ပဌမဝေဒနာယ ဗလဝတရာ ဟောတိ, ပစ္ဆာ ဥပ္ပဇ္ဇမာနာ ဒောမနသ္သဝေဒနာပိ ဧဝမေဝ ပုရိမဝေဒနာယ ဗလဝတရာ ဟောတိ။ ဒုက္ခာယ ဝေဒနာယ နိသ္သရဏန္တိ ဒုက္ခာယ ဝေဒနာယ ဟိ သမာဓိမဂ္ဂဖလာနိ နိသ္သရဏံ, တံ သော န ဇာနာတိ, ကာမသုခမေဝ နိသ္သရဏန္တိ ဇာနာတိ။ တာသံ ဝေဒနာနန္တိ တာသံ သုခဒုက္ခဝေဒနာနံ။ သညုတ္တော နံ ဝေဒယတီတိ ကိလေသေဟိ သမ္ပယုတ္တောဝ ဟုတ္ဝာ တံ ဝေဒနံ ဝေဒယတိ, န ဝိပ္ပယုတ္တော။ သညုတ္တော ဒုက္ခသ္မာတိ ကရဏတ္ထေ နိသ္သက္ကံ, ဒုက္ခေန သမ္ပယုတ္တောတိ အတ္ထော။ သင္ခာတဓမ္မသ္သာတိ ဝိဒိတဓမ္မသ္သ တုလိတဓမ္မသ္သ။ ဗဟုသ္သုတသ္သာတိ ပရိယတ္တိဗဟုသ္သုတသ္သ ပဋိဝေဓဗဟုသ္သုတသ္သ စ။ သမ္မာ ပဇာနာတိ ဘဝသ္သ ပာရဂူတိ ဘဝသ္သ ပာရံ နိဗ္ဗာနံ ဂတော, တဒေဝ နိဗ္ဗာနံ သမ္မာ ပဇာနာတိ။ ဣမသ္မိမ္ပိ သုတ္တေ အာရမ္မဏာနုသယောဝ ကထိတော။ အရိယသာဝကေသု စ ခီဏာသဝော ဧတ္ထ ဓုရံ, အနာဂာမီပိ ဝဋ္ဋတီတိ ဝဒန္တိ။
254. Chaṭṭhe tatrāti tesu dvīsu janesu. Anuvedhaṃ vijjheyyāti tasseva vaṇamukhassa aṅgulantare vā dvaṅgulantare vā āsannapadese anugatavedhaṃ. Evaṃ viddhassa hi sā anuvedhā vedanā paṭhamavedanāya balavatarā hoti, pacchā uppajjamānā domanassavedanāpi evameva purimavedanāya balavatarā hoti. Dukkhāya vedanāya nissaraṇanti dukkhāya vedanāya hi samādhimaggaphalāni nissaraṇaṃ, taṃ so na jānāti, kāmasukhameva nissaraṇanti jānāti. Tāsaṃ vedanānanti tāsaṃ sukhadukkhavedanānaṃ. Saññutto naṃ vedayatīti kilesehi sampayuttova hutvā taṃ vedanaṃ vedayati, na vippayutto. Saññutto dukkhasmāti karaṇatthe nissakkaṃ, dukkhena sampayuttoti attho. Saṅkhātadhammassāti viditadhammassa tulitadhammassa. Bahussutassāti pariyattibahussutassa paṭivedhabahussutassa ca. Sammā pajānāti bhavassa pāragūti bhavassa pāraṃ nibbānaṃ gato, tadeva nibbānaṃ sammā pajānāti. Imasmimpi sutte ārammaṇānusayova kathito. Ariyasāvakesu ca khīṇāsavo ettha dhuraṃ, anāgāmīpi vaṭṭatīti vadanti.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၆. သလ္လသုတ္တံ • 6. Sallasuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၆. သလ္လသုတ္တဝဏ္ဏနာ • 6. Sallasuttavaṇṇanā
