| Library / Tipiṭaka / တိပိဋက • Tipiṭaka / မဇ္ဈိမနိကာယ • Majjhimanikāya |
၈. သလ္လေခသုတ္တံ
8. Sallekhasuttaṃ
၈၁. ဧဝံ မေ သုတံ – ဧကံ သမယံ ဘဂဝာ သာဝတ္ထိယံ ဝိဟရတိ ဇေတဝနေ အနာထပိဏ္ဍိကသ္သ အာရာမေ။ အထ ခော အာယသ္မာ မဟာစုန္ဒော သာယန္ဟသမယံ ပဋိသလ္လာနာ ဝုဋ္ဌိတော ယေန ဘဂဝာ တေနုပသင္ကမိ; ဥပသင္ကမိတ္ဝာ ဘဂဝန္တံ အဘိဝာဒေတ္ဝာ ဧကမန္တံ နိသီဒိ။ ဧကမန္တံ နိသိန္နော ခော အာယသ္မာ မဟာစုန္ဒော ဘဂဝန္တံ ဧတဒဝောစ – ‘‘ယာ ဣမာ, ဘန္တေ, အနေကဝိဟိတာ ဒိဋ္ဌိယော လောကေ ဥပ္ပဇ္ဇန္တိ – အတ္တဝာဒပဋိသံယုတ္တာ ဝာ လောကဝာဒပဋိသံယုတ္တာ ဝာ – အာဒိမေဝ နု ခော, ဘန္တေ, ဘိက္ခုနော မနသိကရောတော ဧဝမေတာသံ ဒိဋ္ဌီနံ ပဟာနံ ဟောတိ, ဧဝမေတာသံ ဒိဋ္ဌီနံ ပဋိနိသ္သဂ္ဂော ဟောတီ’’တိ?
81. Evaṃ me sutaṃ – ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Atha kho āyasmā mahācundo sāyanhasamayaṃ paṭisallānā vuṭṭhito yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho āyasmā mahācundo bhagavantaṃ etadavoca – ‘‘yā imā, bhante, anekavihitā diṭṭhiyo loke uppajjanti – attavādapaṭisaṃyuttā vā lokavādapaṭisaṃyuttā vā – ādimeva nu kho, bhante, bhikkhuno manasikaroto evametāsaṃ diṭṭhīnaṃ pahānaṃ hoti, evametāsaṃ diṭṭhīnaṃ paṭinissaggo hotī’’ti?
၈၂. ‘‘ယာ ဣမာ, စုန္ဒ, အနေကဝိဟိတာ ဒိဋ္ဌိယော လောကေ ဥပ္ပဇ္ဇန္တိ – အတ္တဝာဒပဋိသံယုတ္တာ ဝာ လောကဝာဒပဋိသံယုတ္တာ ဝာ – ယတ္ထ စေတာ ဒိဋ္ဌိယော ဥပ္ပဇ္ဇန္တိ ယတ္ထ စ အနုသေန္တိ ယတ္ထ စ သမုဒာစရန္တိ တံ ‘နေတံ မမ, နေသောဟမသ္မိ, န မေ သော အတ္တာ’တိ – ဧဝမေတံ ယထာဘူတံ သမ္မပ္ပညာ ပသ္သတော ဧဝမေတာသံ ဒိဋ္ဌီနံ ပဟာနံ ဟောတိ, ဧဝမေတာသံ ဒိဋ္ဌီနံ ပဋိနိသ္သဂ္ဂော ဟောတိ။
82. ‘‘Yā imā, cunda, anekavihitā diṭṭhiyo loke uppajjanti – attavādapaṭisaṃyuttā vā lokavādapaṭisaṃyuttā vā – yattha cetā diṭṭhiyo uppajjanti yattha ca anusenti yattha ca samudācaranti taṃ ‘netaṃ mama, nesohamasmi, na me so attā’ti – evametaṃ yathābhūtaṃ sammappaññā passato evametāsaṃ diṭṭhīnaṃ pahānaṃ hoti, evametāsaṃ diṭṭhīnaṃ paṭinissaggo hoti.
‘‘ဌာနံ ခော ပနေတံ, စုန္ဒ, ဝိဇ္ဇတိ ယံ ဣဓေကစ္စော ဘိက္ခု ဝိဝိစ္စေဝ ကာမေဟိ ဝိဝိစ္စ အကုသလေဟိ ဓမ္မေဟိ သဝိတက္ကံ သဝိစာရံ ဝိဝေကဇံ ပီတိသုခံ ပဌမံ ဈာနံ ဥပသမ္ပဇ္ဇ ဝိဟရေယ္ယ။ တသ္သ ဧဝမသ္သ – ‘သလ္လေခေန ဝိဟရာမီ’တိ။ န ခော ပနေတေ, စုန္ဒ, အရိယသ္သ ဝိနယေ သလ္လေခာ ဝုစ္စန္တိ။ ဒိဋ္ဌဓမ္မသုခဝိဟာရာ ဧတေ အရိယသ္သ ဝိနယေ ဝုစ္စန္တိ။
‘‘Ṭhānaṃ kho panetaṃ, cunda, vijjati yaṃ idhekacco bhikkhu vivicceva kāmehi vivicca akusalehi dhammehi savitakkaṃ savicāraṃ vivekajaṃ pītisukhaṃ paṭhamaṃ jhānaṃ upasampajja vihareyya. Tassa evamassa – ‘sallekhena viharāmī’ti. Na kho panete, cunda, ariyassa vinaye sallekhā vuccanti. Diṭṭhadhammasukhavihārā ete ariyassa vinaye vuccanti.
‘‘ဌာနံ ခော ပနေတံ, စုန္ဒ, ဝိဇ္ဇတိ ယံ ဣဓေကစ္စော ဘိက္ခု ဝိတက္ကဝိစာရာနံ ဝူပသမာ အဇ္ဈတ္တံ သမ္ပသာဒနံ စေတသော ဧကောဒိဘာဝံ အဝိတက္ကံ အဝိစာရံ သမာဓိဇံ ပီတိသုခံ ဒုတိယံ ဈာနံ ဥပသမ္ပဇ္ဇ ဝိဟရေယ္ယ။ တသ္သ ဧဝမသ္သ – ‘သလ္လေခေန ဝိဟရာမီ’တိ။ န ခော ပနေတေ, စုန္ဒ, အရိယသ္သ ဝိနယေ သလ္လေခာ ဝုစ္စန္တိ။ ဒိဋ္ဌဓမ္မသုခဝိဟာရာ ဧတေ အရိယသ္သ ဝိနယေ ဝုစ္စန္တိ။
‘‘Ṭhānaṃ kho panetaṃ, cunda, vijjati yaṃ idhekacco bhikkhu vitakkavicārānaṃ vūpasamā ajjhattaṃ sampasādanaṃ cetaso ekodibhāvaṃ avitakkaṃ avicāraṃ samādhijaṃ pītisukhaṃ dutiyaṃ jhānaṃ upasampajja vihareyya. Tassa evamassa – ‘sallekhena viharāmī’ti. Na kho panete, cunda, ariyassa vinaye sallekhā vuccanti. Diṭṭhadhammasukhavihārā ete ariyassa vinaye vuccanti.
‘‘ဌာနံ ခော ပနေတံ, စုန္ဒ, ဝိဇ္ဇတိ ယံ ဣဓေကစ္စော ဘိက္ခု ပီတိယာ စ ဝိရာဂာ ဥပေက္ခကော စ ဝိဟရေယ္ယ, သတော စ သမ္ပဇာနော သုခဉ္စ ကာယေန ပဋိသံဝေဒေယ္ယ, ယံ တံ အရိယာ အာစိက္ခန္တိ – ‘ဥပေက္ခကော သတိမာ သုခဝိဟာရီ’တိ တတိယံ ဈာနံ ဥပသမ္ပဇ္ဇ ဝိဟရေယ္ယ။ တသ္သ ဧဝမသ္သ – ‘သလ္လေခေန ဝိဟရာမီ’တိ။ န ခော ပနေတေ, စုန္ဒ, အရိယသ္သ ဝိနယေ သလ္လေခာ ဝုစ္စန္တိ။ ဒိဋ္ဌဓမ္မသုခဝိဟာရာ ဧတေ အရိယသ္သ ဝိနယေ ဝုစ္စန္တိ။
‘‘Ṭhānaṃ kho panetaṃ, cunda, vijjati yaṃ idhekacco bhikkhu pītiyā ca virāgā upekkhako ca vihareyya, sato ca sampajāno sukhañca kāyena paṭisaṃvedeyya, yaṃ taṃ ariyā ācikkhanti – ‘upekkhako satimā sukhavihārī’ti tatiyaṃ jhānaṃ upasampajja vihareyya. Tassa evamassa – ‘sallekhena viharāmī’ti. Na kho panete, cunda, ariyassa vinaye sallekhā vuccanti. Diṭṭhadhammasukhavihārā ete ariyassa vinaye vuccanti.
‘‘ဌာနံ ခော ပနေတံ, စုန္ဒ, ဝိဇ္ဇတိ ယံ ဣဓေကစ္စော ဘိက္ခု သုခသ္သ စ ပဟာနာ ဒုက္ခသ္သ စ ပဟာနာ ပုဗ္ဗေဝ သောမနသ္သဒောမနသ္သာနံ အတ္ထင္ဂမာ အဒုက္ခမသုံ ဥပေက္ခာသတိပာရိသုဒ္ဓိံ စတုတ္ထံ ဈာနံ ဥပသမ္ပဇ္ဇ ဝိဟရေယ္ယ။ တသ္သ ဧဝမသ္သ – ‘သလ္လေခေန ဝိဟရာမီ’တိ။ န ခော ပနေတေ, စုန္ဒ, အရိယသ္သ ဝိနယေ သလ္လေခာ ဝုစ္စန္တိ။ ဒိဋ္ဌဓမ္မသုခဝိဟာရာ ဧတေ အရိယသ္သ ဝိနယေ ဝုစ္စန္တိ။
‘‘Ṭhānaṃ kho panetaṃ, cunda, vijjati yaṃ idhekacco bhikkhu sukhassa ca pahānā dukkhassa ca pahānā pubbeva somanassadomanassānaṃ atthaṅgamā adukkhamasuṃ upekkhāsatipārisuddhiṃ catutthaṃ jhānaṃ upasampajja vihareyya. Tassa evamassa – ‘sallekhena viharāmī’ti. Na kho panete, cunda, ariyassa vinaye sallekhā vuccanti. Diṭṭhadhammasukhavihārā ete ariyassa vinaye vuccanti.
‘‘ဌာနံ ခော ပနေတံ, စုန္ဒ, ဝိဇ္ဇတိ ယံ ဣဓေကစ္စော ဘိက္ခု သဗ္ဗသော ရူပသညာနံ သမတိက္ကမာ, ပဋိဃသညာနံ အတ္ထင္ဂမာ, နာနတ္တသညာနံ အမနသိကာရာ, ‘အနန္တော အာကာသော’တိ အာကာသာနဉ္စာယတနံ ဥပသမ္ပဇ္ဇ ဝိဟရေယ္ယ။ တသ္သ ဧဝမသ္သ – ‘သလ္လေခေန ဝိဟရာမီ’တိ။ န ခော ပနေတေ, စုန္ဒ, အရိယသ္သ ဝိနယေ သလ္လေခာ ဝုစ္စန္တိ။ သန္တာ ဧတေ ဝိဟာရာ အရိယသ္သ ဝိနယေ ဝုစ္စန္တိ။
‘‘Ṭhānaṃ kho panetaṃ, cunda, vijjati yaṃ idhekacco bhikkhu sabbaso rūpasaññānaṃ samatikkamā, paṭighasaññānaṃ atthaṅgamā, nānattasaññānaṃ amanasikārā, ‘ananto ākāso’ti ākāsānañcāyatanaṃ upasampajja vihareyya. Tassa evamassa – ‘sallekhena viharāmī’ti. Na kho panete, cunda, ariyassa vinaye sallekhā vuccanti. Santā ete vihārā ariyassa vinaye vuccanti.
‘‘ဌာနံ ခော ပနေတံ, စုန္ဒ, ဝိဇ္ဇတိ ယံ ဣဓေကစ္စော ဘိက္ခု သဗ္ဗသော အာကာသာနဉ္စာယတနံ သမတိက္ကမ္မ ‘အနန္တံ ဝိညာဏ’န္တိ ဝိညာဏဉ္စာယတနံ ဥပသမ္ပဇ္ဇ ဝိဟရေယ္ယ။ တသ္သ ဧဝမသ္သ – ‘သလ္လေခေန ဝိဟရာမီ’တိ။ န ခော ပနေတေ, စုန္ဒ, အရိယသ္သ ဝိနယေ သလ္လေခာ ဝုစ္စန္တိ။ သန္တာ ဧတေ ဝိဟာရာ အရိယသ္သ ဝိနယေ ဝုစ္စန္တိ။
‘‘Ṭhānaṃ kho panetaṃ, cunda, vijjati yaṃ idhekacco bhikkhu sabbaso ākāsānañcāyatanaṃ samatikkamma ‘anantaṃ viññāṇa’nti viññāṇañcāyatanaṃ upasampajja vihareyya. Tassa evamassa – ‘sallekhena viharāmī’ti. Na kho panete, cunda, ariyassa vinaye sallekhā vuccanti. Santā ete vihārā ariyassa vinaye vuccanti.
‘‘ဌာနံ ခော ပနေတံ, စုန္ဒ, ဝိဇ္ဇတိ ယံ ဣဓေကစ္စော ဘိက္ခု သဗ္ဗသော ဝိညာဏဉ္စာယတနံ သမတိက္ကမ္မ ‘နတ္ထိ ကိဉ္စီ’တိ အာကိဉ္စညာယတနံ ဥပသမ္ပဇ္ဇ ဝိဟရေယ္ယ။ တသ္သ ဧဝမသ္သ – ‘သလ္လေခေန ဝိဟရာမီ’တိ။ န ခော ပနေတေ, စုန္ဒ, အရိယသ္သ ဝိနယေ သလ္လေခာ ဝုစ္စန္တိ။ သန္တာ ဧတေ ဝိဟာရာ အရိယသ္သ ဝိနယေ ဝုစ္စန္တိ။
‘‘Ṭhānaṃ kho panetaṃ, cunda, vijjati yaṃ idhekacco bhikkhu sabbaso viññāṇañcāyatanaṃ samatikkamma ‘natthi kiñcī’ti ākiñcaññāyatanaṃ upasampajja vihareyya. Tassa evamassa – ‘sallekhena viharāmī’ti. Na kho panete, cunda, ariyassa vinaye sallekhā vuccanti. Santā ete vihārā ariyassa vinaye vuccanti.
‘‘ဌာနံ ခော ပနေတံ, စုန္ဒ, ဝိဇ္ဇတိ ယံ ဣဓေကစ္စော ဘိက္ခု သဗ္ဗသော အာကိဉ္စညာယတနံ သမတိက္ကမ္မ နေဝသညာနာသညာယတနံ ဥပသမ္ပဇ္ဇ ဝိဟရေယ္ယ။ တသ္သ ဧဝမသ္သ – ‘သလ္လေခေန ဝိဟရာမီ’တိ ။ န ခော ပနေတေ, စုန္ဒ, အရိယသ္သ ဝိနယေ သလ္လေခာ ဝုစ္စန္တိ။ သန္တာ ဧတေ ဝိဟာရာ အရိယသ္သ ဝိနယေ ဝုစ္စန္တိ။
‘‘Ṭhānaṃ kho panetaṃ, cunda, vijjati yaṃ idhekacco bhikkhu sabbaso ākiñcaññāyatanaṃ samatikkamma nevasaññānāsaññāyatanaṃ upasampajja vihareyya. Tassa evamassa – ‘sallekhena viharāmī’ti . Na kho panete, cunda, ariyassa vinaye sallekhā vuccanti. Santā ete vihārā ariyassa vinaye vuccanti.
၈၃. ‘‘ဣဓ ခော ပန ဝော, စုန္ဒ, သလ္လေခော ကရဏီယော။ ‘ပရေ ဝိဟိံသကာ ဘဝိသ္သန္တိ, မယမေတ္ထ အဝိဟိံသကာ ဘဝိသ္သာမာ’တိ သလ္လေခော ကရဏီယော။ ‘ပရေ ပာဏာတိပာတီ ဘဝိသ္သန္တိ, မယမေတ္ထ ပာဏာတိပာတာ ပဋိဝိရတာ ဘဝိသ္သာမာ’တိ သလ္လေခော ကရဏီယော။ ‘ပရေ အဒိန္နာဒာယီ ဘဝိသ္သန္တိ, မယမေတ္ထ အဒိန္နာဒာနာ ပဋိဝိရတာ ဘဝိသ္သာမာ’တိ သလ္လေခော ကရဏီယော။ ‘ပရေ အဗ္ရဟ္မစာရီ ဘဝိသ္သန္တိ, မယမေတ္ထ ဗ္ရဟ္မစာရီ ဘဝိသ္သာမာ’တိ သလ္လေခော ကရဏီယော။ ‘ပရေ မုသာဝာဒီ ဘဝိသ္သန္တိ, မယမေတ္ထ မုသာဝာဒာ ပဋိဝိရတာ ဘဝိသ္သာမာ’တိ သလ္လေခော ကရဏီယော။ ‘ပရေ ပိသုဏဝာစာ 1 ဘဝိသ္သန္တိ, မယမေတ္ထ ပိသုဏာယ ဝာစာယ ပဋိဝိရတာ ဘဝိသ္သာမာ’တိ သလ္လေခော ကရဏီယော။ ‘ပရေ ဖရုသဝာစာ 2 ဘဝိသ္သန္တိ, မယမေတ္ထ ဖရုသာယ ဝာစာယ ပဋိဝိရတာ ဘဝိသ္သာမာ’တိ သလ္လေခော ကရဏီယော။ ‘ပရေ သမ္ဖပ္ပလာပီ ဘဝိသ္သန္တိ, မယမေတ္ထ သမ္ဖပ္ပလာပာ ပဋိဝိရတာ ဘဝိသ္သာမာ’တိ သလ္လေခော ကရဏီယော။ ‘ပရေ အဘိဇ္ဈာလူ ဘဝိသ္သန္တိ, မယမေတ္ထ အနဘိဇ္ဈာလူ ဘဝိသ္သာမာ’တိ သလ္လေခော ကရဏီယော။ ‘ပရေ ဗ္ယာပန္နစိတ္တာ ဘဝိသ္သန္တိ, မယမေတ္ထ အဗ္ယာပန္နစိတ္တာ ဘဝိသ္သာမာ’တိ သလ္လေခော ကရဏီယော။ ‘ပရေ မိစ္ဆာဒိဋ္ဌီ ဘဝိသ္သန္တိ, မယမေတ္ထ သမ္မာဒိဋ္ဌီ ဘဝိသ္သာမာ’တိ သလ္လေခော ကရဏီယော။ ‘ပရေ မိစ္ဆာသင္ကပ္ပာ ဘဝိသ္သန္တိ, မယမေတ္ထ သမ္မာသင္ကပ္ပာ ဘဝိသ္သာမာ’တိ သလ္လေခော ကရဏီယော။ ‘ပရေ မိစ္ဆာဝာစာ ဘဝိသ္သန္တိ, မယမေတ္ထ သမ္မာဝာစာ ဘဝိသ္သာမာ’တိ သလ္လေခော ကရဏီယော။ ‘ပရေ မိစ္ဆာကမ္မန္တာ ဘဝိသ္သန္တိ, မယမေတ္ထ သမ္မာကမ္မန္တာ ဘဝိသ္သာမာ’တိ သလ္လေခော ကရဏီယော။ ‘ပရေ မိစ္ဆာအာဇီဝာ ဘဝိသ္သန္တိ, မယမေတ္ထ သမ္မာအာဇီဝာ ဘဝိသ္သာမာ’တိ သလ္လေခော ကရဏီယော။ ‘ပရေ မိစ္ဆာဝာယာမာ ဘဝိသ္သန္တိ, မယမေတ္ထ သမ္မာဝာယာမာ ဘဝိသ္သာမာ’တိ သလ္လေခော ကရဏီယော။ ‘ပရေ မိစ္ဆာသတီ ဘဝိသ္သန္တိ, မယမေတ္ထ သမ္မာသတီ ဘဝိသ္သာမာ’တိ သလ္လေခော ကရဏီယော။ ‘ပရေ မိစ္ဆာသမာဓိ ဘဝိသ္သန္တိ, မယမေတ္ထ သမ္မာသမာဓီ ဘဝိသ္သာမာ’တိ သလ္လေခော ကရဏီယော။ ‘ပရေ မိစ္ဆာဉာဏီ ဘဝိသ္သန္တိ, မယမေတ္ထ သမ္မာဉာဏီ ဘဝိသ္သာမာ’တိ သလ္လေခော ကရဏီယော။ ‘ပရေ မိစ္ဆာဝိမုတ္တီ ဘဝိသ္သန္တိ, မယမေတ္ထ သမ္မာဝိမုတ္တီ ဘဝိသ္သာမာ’တိ သလ္လေခော ကရဏီယော။
83. ‘‘Idha kho pana vo, cunda, sallekho karaṇīyo. ‘Pare vihiṃsakā bhavissanti, mayamettha avihiṃsakā bhavissāmā’ti sallekho karaṇīyo. ‘Pare pāṇātipātī bhavissanti, mayamettha pāṇātipātā paṭiviratā bhavissāmā’ti sallekho karaṇīyo. ‘Pare adinnādāyī bhavissanti, mayamettha adinnādānā paṭiviratā bhavissāmā’ti sallekho karaṇīyo. ‘Pare abrahmacārī bhavissanti, mayamettha brahmacārī bhavissāmā’ti sallekho karaṇīyo. ‘Pare musāvādī bhavissanti, mayamettha musāvādā paṭiviratā bhavissāmā’ti sallekho karaṇīyo. ‘Pare pisuṇavācā 3 bhavissanti, mayamettha pisuṇāya vācāya paṭiviratā bhavissāmā’ti sallekho karaṇīyo. ‘Pare pharusavācā 4 bhavissanti, mayamettha pharusāya vācāya paṭiviratā bhavissāmā’ti sallekho karaṇīyo. ‘Pare samphappalāpī bhavissanti, mayamettha samphappalāpā paṭiviratā bhavissāmā’ti sallekho karaṇīyo. ‘Pare abhijjhālū bhavissanti, mayamettha anabhijjhālū bhavissāmā’ti sallekho karaṇīyo. ‘Pare byāpannacittā bhavissanti, mayamettha abyāpannacittā bhavissāmā’ti sallekho karaṇīyo. ‘Pare micchādiṭṭhī bhavissanti, mayamettha sammādiṭṭhī bhavissāmā’ti sallekho karaṇīyo. ‘Pare micchāsaṅkappā bhavissanti, mayamettha sammāsaṅkappā bhavissāmā’ti sallekho karaṇīyo. ‘Pare micchāvācā bhavissanti, mayamettha sammāvācā bhavissāmā’ti sallekho karaṇīyo. ‘Pare micchākammantā bhavissanti, mayamettha sammākammantā bhavissāmā’ti sallekho karaṇīyo. ‘Pare micchāājīvā bhavissanti, mayamettha sammāājīvā bhavissāmā’ti sallekho karaṇīyo. ‘Pare micchāvāyāmā bhavissanti, mayamettha sammāvāyāmā bhavissāmā’ti sallekho karaṇīyo. ‘Pare micchāsatī bhavissanti, mayamettha sammāsatī bhavissāmā’ti sallekho karaṇīyo. ‘Pare micchāsamādhi bhavissanti, mayamettha sammāsamādhī bhavissāmā’ti sallekho karaṇīyo. ‘Pare micchāñāṇī bhavissanti, mayamettha sammāñāṇī bhavissāmā’ti sallekho karaṇīyo. ‘Pare micchāvimuttī bhavissanti, mayamettha sammāvimuttī bhavissāmā’ti sallekho karaṇīyo.
‘‘‘ပရေ ထီနမိဒ္ဓပရိယုဋ္ဌိတာ ဘဝိသ္သန္တိ, မယမေတ္ထ ဝိဂတထီနမိဒ္ဓာ ဘဝိသ္သာမာ’တိ သလ္လေခော ကရဏီယော ။ ‘ပရေ ဥဒ္ဓတာ ဘဝိသ္သန္တိ, မယမေတ္ထ အနုဒ္ဓတာ ဘဝိသ္သာမာ’တိ သလ္လေခော ကရဏီယော။ ‘ပရေ ဝိစိကိစ္ဆီ 5 ဘဝိသ္သန္တိ, မယမေတ္ထ တိဏ္ဏဝိစိကိစ္ဆာ ဘဝိသ္သာမာ’တိ သလ္လေခော ကရဏီယော။ ‘ပရေ ကောဓနာ ဘဝိသ္သန္တိ, မယမေတ္ထ အက္ကောဓနာ ဘဝိသ္သာမာ’တိ သလ္လေခော ကရဏီယော။ ‘ပရေ ဥပနာဟီ ဘဝိသ္သန္တိ, မယမေတ္ထ အနုပနာဟီ ဘဝိသ္သာမာ’တိ သလ္လေခော ကရဏီယော။ ‘ပရေ မက္ခီ ဘဝိသ္သန္တိ , မယမေတ္ထ အမက္ခီ ဘဝိသ္သာမာ’တိ သလ္လေခော ကရဏီယော။ ‘ပရေ ပဠာသီ ဘဝိသ္သန္တိ, မယမေတ္ထ အပဠာသီ ဘဝိသ္သာမာ’တိ သလ္လေခော ကရဏီယော။ ‘ပရေ ဣသ္သုကီ ဘဝိသ္သန္တိ, မယမေတ္ထ အနိသ္သုကီ ဘဝိသ္သာမာ’တိ သလ္လေခော ကရဏီယော။ ‘ပရေ မစ္ဆရီ ဘဝိသ္သန္တိ, မယမေတ္ထ အမစ္ဆရီ ဘဝိသ္သာမာ’တိ သလ္လေခော ကရဏီယော။ ‘ပရေ သဌာ ဘဝိသ္သန္တိ, မယမေတ္ထ အသဌာ ဘဝိသ္သာမာ’တိ သလ္လေခော ကရဏီယော။ ‘ပရေ မာယာဝီ ဘဝိသ္သန္တိ, မယမေတ္ထ အမာယာဝီ ဘဝိသ္သာမာ’တိ သလ္လေခော ကရဏီယော။ ‘ပရေ ထဒ္ဓာ ဘဝိသ္သန္တိ, မယမေတ္ထ အတ္ထဒ္ဓာ ဘဝိသ္သာမာ’တိ သလ္လေခော ကရဏီယော။ ‘ပရေ အတိမာနီ ဘဝိသ္သန္တိ, မယမေတ္ထ အနတိမာနီ ဘဝိသ္သာမာ’တိ သလ္လေခော ကရဏီယော။ ‘ပရေ ဒုဗ္ဗစာ ဘဝိသ္သန္တိ, မယမေတ္ထ သုဝစာ ဘဝိသ္သာမာ’တိ သလ္လေခော ကရဏီယော။ ‘ပရေ ပာပမိတ္တာ ဘဝိသ္သန္တိ, မယမေတ္ထ ကလ္ယာဏမိတ္တာ ဘဝိသ္သာမာ’တိ သလ္လေခော ကရဏီယော။ ‘ပရေ ပမတ္တာ ဘဝိသ္သန္တိ, မယမေတ္ထ အပ္ပမတ္တာ ဘဝိသ္သာမာ’တိ သလ္လေခော ကရဏီယော။ ‘ပရေ အသ္သဒ္ဓာ ဘဝိသ္သန္တိ, မယမေတ္ထ သဒ္ဓာ ဘဝိသ္သာမာ’တိ သလ္လေခော ကရဏီယော။ ‘ပရေ အဟိရိကာ ဘဝိသ္သန္တိ, မယမေတ္ထ ဟိရိမနာ ဘဝိသ္သာမာ’တိ သလ္လေခော ကရဏီယော။ ‘ပရေ အနောတ္တာပီ 6 ဘဝိသ္သန္တိ, မယမေတ္ထ ဩတ္တာပီ ဘဝိသ္သာမာ’တိ သလ္လေခော ကရဏီယော။ ‘ပရေ အပ္ပသ္သုတာ ဘဝိသ္သန္တိ, မယမေတ္ထ ဗဟုသ္သုတာ ဘဝိသ္သာမာ’တိ သလ္လေခော ကရဏီယော။ ‘ပရေ ကုသီတာ ဘဝိသ္သန္တိ, မယမေတ္ထ အာရဒ္ဓဝီရိယာ ဘဝိသ္သာမာ’တိ သလ္လေခော ကရဏီယော။ ‘ပရေ မုဋ္ဌသ္သတီ ဘဝိသ္သန္တိ, မယမေတ္ထ ဥပဋ္ဌိတသ္သတီ ဘဝိသ္သာမာ’တိ သလ္လေခော ကရဏီယော။ ‘ပရေ ဒုပ္ပညာ ဘဝိသ္သန္တိ, မယမေတ္ထ ပညာသမ္ပန္နာ ဘဝိသ္သာမာ’တိ သလ္လေခော ကရဏီယော။ ‘ပရေ သန္ဒိဋ္ဌိပရာမာသီ အာဓာနဂ္ဂာဟီ ဒုပ္ပဋိနိသ္သဂ္ဂီ ဘဝိသ္သန္တိ, မယမေတ္ထ အသန္ဒိဋ္ဌိပရာမာသီ အနာဓာနဂ္ဂာဟီ သုပ္ပဋိနိသ္သဂ္ဂီ ဘဝိသ္သာမာ’တိ သလ္လေခော ကရဏီယော။
‘‘‘Pare thīnamiddhapariyuṭṭhitā bhavissanti, mayamettha vigatathīnamiddhā bhavissāmā’ti sallekho karaṇīyo . ‘Pare uddhatā bhavissanti, mayamettha anuddhatā bhavissāmā’ti sallekho karaṇīyo. ‘Pare vicikicchī 7 bhavissanti, mayamettha tiṇṇavicikicchā bhavissāmā’ti sallekho karaṇīyo. ‘Pare kodhanā bhavissanti, mayamettha akkodhanā bhavissāmā’ti sallekho karaṇīyo. ‘Pare upanāhī bhavissanti, mayamettha anupanāhī bhavissāmā’ti sallekho karaṇīyo. ‘Pare makkhī bhavissanti , mayamettha amakkhī bhavissāmā’ti sallekho karaṇīyo. ‘Pare paḷāsī bhavissanti, mayamettha apaḷāsī bhavissāmā’ti sallekho karaṇīyo. ‘Pare issukī bhavissanti, mayamettha anissukī bhavissāmā’ti sallekho karaṇīyo. ‘Pare maccharī bhavissanti, mayamettha amaccharī bhavissāmā’ti sallekho karaṇīyo. ‘Pare saṭhā bhavissanti, mayamettha asaṭhā bhavissāmā’ti sallekho karaṇīyo. ‘Pare māyāvī bhavissanti, mayamettha amāyāvī bhavissāmā’ti sallekho karaṇīyo. ‘Pare thaddhā bhavissanti, mayamettha atthaddhā bhavissāmā’ti sallekho karaṇīyo. ‘Pare atimānī bhavissanti, mayamettha anatimānī bhavissāmā’ti sallekho karaṇīyo. ‘Pare dubbacā bhavissanti, mayamettha suvacā bhavissāmā’ti sallekho karaṇīyo. ‘Pare pāpamittā bhavissanti, mayamettha kalyāṇamittā bhavissāmā’ti sallekho karaṇīyo. ‘Pare pamattā bhavissanti, mayamettha appamattā bhavissāmā’ti sallekho karaṇīyo. ‘Pare assaddhā bhavissanti, mayamettha saddhā bhavissāmā’ti sallekho karaṇīyo. ‘Pare ahirikā bhavissanti, mayamettha hirimanā bhavissāmā’ti sallekho karaṇīyo. ‘Pare anottāpī 8 bhavissanti, mayamettha ottāpī bhavissāmā’ti sallekho karaṇīyo. ‘Pare appassutā bhavissanti, mayamettha bahussutā bhavissāmā’ti sallekho karaṇīyo. ‘Pare kusītā bhavissanti, mayamettha āraddhavīriyā bhavissāmā’ti sallekho karaṇīyo. ‘Pare muṭṭhassatī bhavissanti, mayamettha upaṭṭhitassatī bhavissāmā’ti sallekho karaṇīyo. ‘Pare duppaññā bhavissanti, mayamettha paññāsampannā bhavissāmā’ti sallekho karaṇīyo. ‘Pare sandiṭṭhiparāmāsī ādhānaggāhī duppaṭinissaggī bhavissanti, mayamettha asandiṭṭhiparāmāsī anādhānaggāhī suppaṭinissaggī bhavissāmā’ti sallekho karaṇīyo.
၈၄. ‘‘စိတ္တုပ္ပာဒမ္ပိ ခော အဟံ, စုန္ဒ, ကုသလေသု ဓမ္မေသု ဗဟုကာရံ 9 ဝဒာမိ, ကော ပန ဝာဒော ကာယေန ဝာစာယ အနုဝိဓီယနာသု! တသ္မာတိဟ, စုန္ဒ, ‘ပရေ ဝိဟိံသကာ ဘဝိသ္သန္တိ, မယမေတ္ထ အဝိဟိံသကာ ဘဝိသ္သာမာ’တိ စိတ္တံ ဥပ္ပာဒေတဗ္ဗံ။ ‘ပရေ ပာဏာတိပာတီ ဘဝိသ္သန္တိ, မယမေတ္ထ ပာဏာတိပာတာ ပဋိဝိရတာ ဘဝိသ္သာမာ’တိ စိတ္တံ ဥပ္ပာဒေတဗ္ဗံ။‘ပရေ သန္ဒိဋ္ဌိပရာမာသီ အာဓာနဂ္ဂာဟီ ဒုပ္ပဋိနိသ္သဂ္ဂီ ဘဝိသ္သန္တိ, မယမေတ္ထ အသန္ဒိဋ္ဌိပရာမာသီ အနာဓာနဂ္ဂာဟီ သုပ္ပဋိနိသ္သဂ္ဂီ ဘဝိသ္သာမာ’တိ စိတ္တံ ဥပ္ပာဒေတဗ္ဗံ။
84. ‘‘Cittuppādampi kho ahaṃ, cunda, kusalesu dhammesu bahukāraṃ 10 vadāmi, ko pana vādo kāyena vācāya anuvidhīyanāsu! Tasmātiha, cunda, ‘pare vihiṃsakā bhavissanti, mayamettha avihiṃsakā bhavissāmā’ti cittaṃ uppādetabbaṃ. ‘Pare pāṇātipātī bhavissanti, mayamettha pāṇātipātā paṭiviratā bhavissāmā’ti cittaṃ uppādetabbaṃ…‘pare sandiṭṭhiparāmāsī ādhānaggāhī duppaṭinissaggī bhavissanti, mayamettha asandiṭṭhiparāmāsī anādhānaggāhī suppaṭinissaggī bhavissāmā’ti cittaṃ uppādetabbaṃ.
၈၅. ‘‘သေယ္ယထာပိ, စုန္ဒ, ဝိသမော မဂ္ဂော အသ္သ, တသ္သ 11 အညော သမော မဂ္ဂော ပရိက္ကမနာယ; သေယ္ယထာ ဝာ ပန, စုန္ဒ, ဝိသမံ တိတ္ထံ အသ္သ, တသ္သ အညံ သမံ တိတ္ထံ ပရိက္ကမနာယ; ဧဝမေဝ ခော, စုန္ဒ, ဝိဟိံသကသ္သ ပုရိသပုဂ္ဂလသ္သ အဝိဟိံသာ ဟောတိ ပရိက္ကမနာယ, ပာဏာတိပာတိသ္သ ပုရိသပုဂ္ဂလသ္သ ပာဏာတိပာတာ ဝေရမဏီ ဟောတိ ပရိက္ကမနာယ, အဒိန္နာဒာယိသ္သ ပုရိသပုဂ္ဂလသ္သ အဒိန္နာဒာနာ ဝေရမဏီ ဟောတိ ပရိက္ကမနာယ, အဗ္ရဟ္မစာရိသ္သ ပုရိသပုဂ္ဂလသ္သ အဗ္ရဟ္မစရိယာ ဝေရမဏီ ဟောတိ ပရိက္ကမနာယ , မုသာဝာဒိသ္သ ပုရိသပုဂ္ဂလသ္သ မုသာဝာဒာ ဝေရမဏီ ဟောတိ ပရိက္ကမနာယ, ပိသုဏဝာစသ္သ ပုရိသပုဂ္ဂလသ္သ ပိသုဏာယ ဝာစာယ ဝေရမဏီ ဟောတိ ပရိက္ကမနာယ, ဖရုသဝာစသ္သ ပုရိသပုဂ္ဂလသ္သ ဖရုသာယ ဝာစာယ ဝေရမဏီ ဟောတိ ပရိက္ကမနာယ, သမ္ဖပ္ပလာပိသ္သ ပုရိသပုဂ္ဂလသ္သ သမ္ဖပ္ပလာပာ ဝေရမဏီ ဟောတိ ပရိက္ကမနာယ, အဘိဇ္ဈာလုသ္သ ပုရိသပုဂ္ဂလသ္သ အနဘိဇ္ဈာ ဟောတိ ပရိက္ကမနာယ, ဗ္ယာပန္နစိတ္တသ္သ ပုရိသပုဂ္ဂလသ္သ အဗ္ယာပာဒော ဟောတိ ပရိက္ကမနာယ, မိစ္ဆာဒိဋ္ဌိသ္သ ပုရိသပုဂ္ဂလသ္သ သမ္မာဒိဋ္ဌိ ဟောတိ ပရိက္ကမနာယ, မိစ္ဆာသင္ကပ္ပသ္သ ပုရိသပုဂ္ဂလသ္သ သမ္မာသင္ကပ္ပော ဟောတိ ပရိက္ကမနာယ, မိစ္ဆာဝာစသ္သ ပုရိသပုဂ္ဂလသ္သ သမ္မာဝာစာ ဟောတိ ပရိက္ကမနာယ, မိစ္ဆာကမ္မန္တသ္သ ပုရိသပုဂ္ဂလသ္သ သမ္မာကမ္မန္တော ဟောတိ ပရိက္ကမနာယ, မိစ္ဆာအာဇီဝသ္သ ပုရိသပုဂ္ဂလသ္သ သမ္မာအာဇီဝော ဟောတိ ပရိက္ကမနာယ, မိစ္ဆာဝာယာမသ္သ ပုရိသပုဂ္ဂလသ္သ သမ္မာဝာယာမော ဟောတိ ပရိက္ကမနာယ, မိစ္ဆာသတိသ္သ ပုရိသပုဂ္ဂလသ္သ သမ္မာသတိ ဟောတိ ပရိက္ကမနာယ, မိစ္ဆာသမာဓိသ္သ ပုရိသပုဂ္ဂလသ္သ သမ္မာသမာဓိ ဟောတိ ပရိက္ကမနာယ, မိစ္ဆာဉာဏိသ္သ ပုရိသပုဂ္ဂလသ္သ သမ္မာဉာဏံ ဟောတိ ပရိက္ကမနာယ, မိစ္ဆာဝိမုတ္တိသ္သ ပုရိသပုဂ္ဂလသ္သ သမ္မာဝိမုတ္တိ ဟောတိ ပရိက္ကမနာယ။
85. ‘‘Seyyathāpi, cunda, visamo maggo assa, tassa 12 añño samo maggo parikkamanāya; seyyathā vā pana, cunda, visamaṃ titthaṃ assa, tassa aññaṃ samaṃ titthaṃ parikkamanāya; evameva kho, cunda, vihiṃsakassa purisapuggalassa avihiṃsā hoti parikkamanāya, pāṇātipātissa purisapuggalassa pāṇātipātā veramaṇī hoti parikkamanāya, adinnādāyissa purisapuggalassa adinnādānā veramaṇī hoti parikkamanāya, abrahmacārissa purisapuggalassa abrahmacariyā veramaṇī hoti parikkamanāya , musāvādissa purisapuggalassa musāvādā veramaṇī hoti parikkamanāya, pisuṇavācassa purisapuggalassa pisuṇāya vācāya veramaṇī hoti parikkamanāya, pharusavācassa purisapuggalassa pharusāya vācāya veramaṇī hoti parikkamanāya, samphappalāpissa purisapuggalassa samphappalāpā veramaṇī hoti parikkamanāya, abhijjhālussa purisapuggalassa anabhijjhā hoti parikkamanāya, byāpannacittassa purisapuggalassa abyāpādo hoti parikkamanāya, micchādiṭṭhissa purisapuggalassa sammādiṭṭhi hoti parikkamanāya, micchāsaṅkappassa purisapuggalassa sammāsaṅkappo hoti parikkamanāya, micchāvācassa purisapuggalassa sammāvācā hoti parikkamanāya, micchākammantassa purisapuggalassa sammākammanto hoti parikkamanāya, micchāājīvassa purisapuggalassa sammāājīvo hoti parikkamanāya, micchāvāyāmassa purisapuggalassa sammāvāyāmo hoti parikkamanāya, micchāsatissa purisapuggalassa sammāsati hoti parikkamanāya, micchāsamādhissa purisapuggalassa sammāsamādhi hoti parikkamanāya, micchāñāṇissa purisapuggalassa sammāñāṇaṃ hoti parikkamanāya, micchāvimuttissa purisapuggalassa sammāvimutti hoti parikkamanāya.
‘‘ထီနမိဒ္ဓပရိယုဋ္ဌိတသ္သ ပုရိသပုဂ္ဂလသ္သ ဝိဂတထိနမိဒ္ဓတာ ဟောတိ ပရိက္ကမနာယ, ဥဒ္ဓတသ္သ ပုရိသပုဂ္ဂလသ္သ အနုဒ္ဓစ္စံ ဟောတိ ပရိက္ကမနာယ, ဝိစိကိစ္ဆိသ္သ ပုရိသပုဂ္ဂလသ္သ တိဏ္ဏဝိစိကိစ္ဆတာ ဟောတိ ပရိက္ကမနာယ, ကောဓနသ္သ ပုရိသပုဂ္ဂလသ္သ အက္ကောဓော ဟောတိ ပရိက္ကမနာယ, ဥပနာဟိသ္သ ပုရိသပုဂ္ဂလသ္သ အနုပနာဟော ဟောတိ ပရိက္ကမနာယ, မက္ခိသ္သ ပုရိသပုဂ္ဂလသ္သ အမက္ခော ဟောတိ ပရိက္ကမနာယ, ပဠာသိသ္သ ပုရိသပုဂ္ဂလသ္သ အပဠာသော ဟောတိ ပရိက္ကမနာယ , ဣသ္သုကိသ္သ ပုရိသပုဂ္ဂလသ္သ အနိသ္သုကိတာ ဟောတိ ပရိက္ကမနာယ, မစ္ဆရိသ္သ ပုရိသပုဂ္ဂလသ္သ အမစ္ဆရိယံ ဟောတိ ပရိက္ကမနာယ, သဌသ္သ ပုရိသပုဂ္ဂလသ္သ အသာဌေယ္ယံ ဟောတိ ပရိက္ကမနာယ, မာယာဝိသ္သ ပုရိသပုဂ္ဂလသ္သ အမာယာ 13 ဟောတိ ပရိက္ကမနာယ, ထဒ္ဓသ္သ ပုရိသပုဂ္ဂလသ္သ အတ္ထဒ္ဓိယံ ဟောတိ ပရိက္ကမနာယ, အတိမာနိသ္သ ပုရိသပုဂ္ဂလသ္သ အနတိမာနော ဟောတိ ပရိက္ကမနာယ, ဒုဗ္ဗစသ္သ ပုရိသပုဂ္ဂလသ္သ သောဝစသ္သတာ ဟောတိ ပရိက္ကမနာယ, ပာပမိတ္တသ္သ ပုရိသပုဂ္ဂလသ္သ ကလ္ယာဏမိတ္တတာ ဟောတိ ပရိက္ကမနာယ, ပမတ္တသ္သ ပုရိသပုဂ္ဂလသ္သ အပ္ပမာဒော ဟောတိ ပရိက္ကမနာယ, အသ္သဒ္ဓသ္သ ပုရိသပုဂ္ဂလသ္သ သဒ္ဓာ ဟောတိ ပရိက္ကမနာယ, အဟိရိကသ္သ ပုရိသပုဂ္ဂလသ္သ ဟိရီ ဟောတိ ပရိက္ကမနာယ, အနောတ္တာပိသ္သ ပုရိသပုဂ္ဂလသ္သ ဩတ္တပ္ပံ ဟောတိ ပရိက္ကမနာယ, အပ္ပသ္သုတသ္သ ပုရိသပုဂ္ဂလသ္သ ဗာဟုသစ္စံ ဟောတိ ပရိက္ကမနာယ, ကုသီတသ္သ ပုရိသပုဂ္ဂလသ္သ ဝီရိယာရမ္ဘော ဟောတိ ပရိက္ကမနာယ, မုဋ္ဌသ္သတိသ္သ ပုရိသပုဂ္ဂလသ္သ ဥပဋ္ဌိတသ္သတိတာ ဟောတိ ပရိက္ကမနာယ, ဒုပ္ပညသ္သ ပုရိသပုဂ္ဂလသ္သ ပညာသမ္ပဒာ ဟောတိ ပရိက္ကမနာယ , သန္ဒိဋ္ဌိပရာမာသိ-အာဓာနဂ္ဂာဟိ-ဒုပ္ပဋိနိသ္သဂ္ဂိသ္သ ပုရိသပုဂ္ဂလသ္သ အသန္ဒိဋ္ဌိပရာမာသိအနာဓာနဂ္ဂာဟိ-သုပ္ပဋိနိသ္သဂ္ဂိတာ ဟောတိ ပရိက္ကမနာယ။
‘‘Thīnamiddhapariyuṭṭhitassa purisapuggalassa vigatathinamiddhatā hoti parikkamanāya, uddhatassa purisapuggalassa anuddhaccaṃ hoti parikkamanāya, vicikicchissa purisapuggalassa tiṇṇavicikicchatā hoti parikkamanāya, kodhanassa purisapuggalassa akkodho hoti parikkamanāya, upanāhissa purisapuggalassa anupanāho hoti parikkamanāya, makkhissa purisapuggalassa amakkho hoti parikkamanāya, paḷāsissa purisapuggalassa apaḷāso hoti parikkamanāya , issukissa purisapuggalassa anissukitā hoti parikkamanāya, maccharissa purisapuggalassa amacchariyaṃ hoti parikkamanāya, saṭhassa purisapuggalassa asāṭheyyaṃ hoti parikkamanāya, māyāvissa purisapuggalassa amāyā 14 hoti parikkamanāya, thaddhassa purisapuggalassa atthaddhiyaṃ hoti parikkamanāya, atimānissa purisapuggalassa anatimāno hoti parikkamanāya, dubbacassa purisapuggalassa sovacassatā hoti parikkamanāya, pāpamittassa purisapuggalassa kalyāṇamittatā hoti parikkamanāya, pamattassa purisapuggalassa appamādo hoti parikkamanāya, assaddhassa purisapuggalassa saddhā hoti parikkamanāya, ahirikassa purisapuggalassa hirī hoti parikkamanāya, anottāpissa purisapuggalassa ottappaṃ hoti parikkamanāya, appassutassa purisapuggalassa bāhusaccaṃ hoti parikkamanāya, kusītassa purisapuggalassa vīriyārambho hoti parikkamanāya, muṭṭhassatissa purisapuggalassa upaṭṭhitassatitā hoti parikkamanāya, duppaññassa purisapuggalassa paññāsampadā hoti parikkamanāya , sandiṭṭhiparāmāsi-ādhānaggāhi-duppaṭinissaggissa purisapuggalassa asandiṭṭhiparāmāsianādhānaggāhi-suppaṭinissaggitā hoti parikkamanāya.
၈၆. ‘‘သေယ္ယထာပိ, စုန္ဒ, ယေ ကေစိ အကုသလာ ဓမ္မာ သဗ္ဗေ တေ အဓောဘာဂင္ဂမနီယာ 15, ယေ ကေစိ ကုသလာ ဓမ္မာ သဗ္ဗေ တေ ဥပရိဘာဂင္ဂမနီယာ 16, ဧဝမေဝ ခော, စုန္ဒ, ဝိဟိံသကသ္သ ပုရိသပုဂ္ဂလသ္သ အဝိဟိံသာ ဟောတိ ဥပရိဘာဂာယ 17, ပာဏာတိပာတိသ္သ ပုရိသပုဂ္ဂလသ္သ ပာဏာတိပာတာ ဝေရမဏီ ဟောတိ ဥပရိဘာဂာယ။ပေ.။ သန္ဒိဋ္ဌိပရာမာသိ-အာဓာနဂ္ဂာဟိ-ဒုပ္ပဋိနိသ္သဂ္ဂိသ္သ ပုရိသပုဂ္ဂလသ္သ အသန္ဒိဋ္ဌိပရာမာသိ-အနာဓာနဂ္ဂာဟိ-သုပ္ပဋိနိသ္သဂ္ဂိတာ ဟောတိ ဥပရိဘာဂာယ။
86. ‘‘Seyyathāpi, cunda, ye keci akusalā dhammā sabbe te adhobhāgaṅgamanīyā 18, ye keci kusalā dhammā sabbe te uparibhāgaṅgamanīyā 19, evameva kho, cunda, vihiṃsakassa purisapuggalassa avihiṃsā hoti uparibhāgāya 20, pāṇātipātissa purisapuggalassa pāṇātipātā veramaṇī hoti uparibhāgāya…pe… sandiṭṭhiparāmāsi-ādhānaggāhi-duppaṭinissaggissa purisapuggalassa asandiṭṭhiparāmāsi-anādhānaggāhi-suppaṭinissaggitā hoti uparibhāgāya.
၈၇. ‘‘သော ဝတ, စုန္ဒ, အတ္တနာ ပလိပပလိပန္နော ပရံ ပလိပပလိပန္နံ ဥဒ္ဓရိသ္သတီတိ နေတံ ဌာနံ ဝိဇ္ဇတိ။ သော ဝတ, စုန္ဒ, အတ္တနာ အပလိပပလိပန္နော ပရံ ပလိပပလိပန္နံ ဥဒ္ဓရိသ္သတီတိ ဌာနမေတံ ဝိဇ္ဇတိ။ သော ဝတ, စုန္ဒ, အတ္တနာ အဒန္တော အဝိနီတော အပရိနိဗ္ဗုတော ပရံ ဒမေသ္သတိ ဝိနေသ္သတိ ပရိနိဗ္ဗာပေသ္သတီတိ နေတံ ဌာနံ ဝိဇ္ဇတိ။ သော ဝတ , စုန္ဒ, အတ္တနာ ဒန္တော ဝိနီတော ပရိနိဗ္ဗုတော ပရံ ဒမေသ္သတိ ဝိနေသ္သတိ ပရိနိဗ္ဗာပေသ္သတီတိ ဌာနမေတံ ဝိဇ္ဇတိ။ ဧဝမေဝ ခော, စုန္ဒ, ဝိဟိံသကသ္သ ပုရိသပုဂ္ဂလသ္သ အဝိဟိံသာ ဟောတိ ပရိနိဗ္ဗာနာယ, ပာဏာတိပာတိသ္သ ပုရိသပုဂ္ဂလသ္သ ပာဏာတိပာတာ ဝေရမဏီ ဟောတိ ပရိနိဗ္ဗာနာယ။ အဒိန္နာဒာယိသ္သ ပုရိသပုဂ္ဂလသ္သ အဒိန္နာဒာနာ ဝေရမဏီ ဟောတိ ပရိနိဗ္ဗာနာယ။ အဗ္ရဟ္မစာရိသ္သ ပုရိသပုဂ္ဂလသ္သ အဗ္ရဟ္မစရိယာ ဝေရမဏီ ဟောတိ ပရိနိဗ္ဗာနာယ။ မုသာဝာဒိသ္သ ပုရိသပုဂ္ဂလသ္သ မုသာဝာဒာ ဝေရမဏီ ဟောတိ ပရိနိဗ္ဗာနာယ။ ပိသုဏဝာစသ္သ ပုရိသပုဂ္ဂလသ္သ ပိသုဏာယ ဝာစာယ ဝေရမဏီ ဟောတိ ပရိနိဗ္ဗာနာယ။ ဖရုသဝာစသ္သ ပုရိသပုဂ္ဂလသ္သ ဖရုသာယ ဝာစာယ ဝေရမဏီ ဟောတိ ပရိနိဗ္ဗာနာယ။ သမ္ဖပ္ပလာပိသ္သ ပုရိသပုဂ္ဂလသ္သ သမ္ဖပ္ပလာပာ ဝေရမဏီ ဟောတိ ပရိနိဗ္ဗာနာယ။ အဘိဇ္ဈာလုသ္သ ပုရိသပုဂ္ဂလသ္သ အနဘိဇ္ဈာ ဟောတိ ပရိနိဗ္ဗာနာယ။ ဗ္ယာပန္နစိတ္တသ္သ ပုရိသပုဂ္ဂလသ္သ အဗ္ယာပာဒော ဟောတိ ပရိနိဗ္ဗာနာယ။ မိစ္ဆာဒိဋ္ဌိသ္သ ပုရိသပုဂ္ဂလသ္သ သမ္မာဒိဋ္ဌိ ဟောတိ ပရိနိဗ္ဗာနာယ။ မိစ္ဆာသင္ကပ္ပသ္သ ပုရိသပုဂ္ဂလသ္သ သမ္မာသင္ကပ္ပော ဟောတိ ပရိနိဗ္ဗာနာယ။ မိစ္ဆာဝာစသ္သ ပုရိသပုဂ္ဂလသ္သ သမ္မာဝာစာ ဟောတိ ပရိနိဗ္ဗာနာယ။ မိစ္ဆာကမ္မန္တသ္သ ပုရိသပုဂ္ဂလသ္သ သမ္မာကမ္မန္တော ဟောတိ ပရိနိဗ္ဗာနာယ။ မိစ္ဆာအာဇီဝသ္သ ပုရိသပုဂ္ဂလသ္သ သမ္မာအာဇီဝော ဟောတိ ပရိနိဗ္ဗာနာယ။ မိစ္ဆာဝာယာမသ္သ ပုရိသပုဂ္ဂလသ္သ သမ္မာဝာယာမော ဟောတိ ပရိနိဗ္ဗာနာယ။ မိစ္ဆာသတိသ္သ ပုရိသပုဂ္ဂလသ္သ သမ္မာသတိ ဟောတိ ပရိနိဗ္ဗာနာယ။ မိစ္ဆာသမာဓိသ္သ ပုရိသပုဂ္ဂလသ္သ သမ္မာသမာဓိ ဟောတိ ပရိနိဗ္ဗာနာယ။ မိစ္ဆာဉာဏိသ္သ ပုရိသပုဂ္ဂလသ္သ သမ္မာဉာဏံ ဟောတိ ပရိနိဗ္ဗာနာယ။ မိစ္ဆာဝိမုတ္တိသ္သ ပုရိသပုဂ္ဂလသ္သ သမ္မာဝိမုတ္တိ ဟောတိ ပရိနိဗ္ဗာနာယ။
87. ‘‘So vata, cunda, attanā palipapalipanno paraṃ palipapalipannaṃ uddharissatīti netaṃ ṭhānaṃ vijjati. So vata, cunda, attanā apalipapalipanno paraṃ palipapalipannaṃ uddharissatīti ṭhānametaṃ vijjati. So vata, cunda, attanā adanto avinīto aparinibbuto paraṃ damessati vinessati parinibbāpessatīti netaṃ ṭhānaṃ vijjati. So vata , cunda, attanā danto vinīto parinibbuto paraṃ damessati vinessati parinibbāpessatīti ṭhānametaṃ vijjati. Evameva kho, cunda, vihiṃsakassa purisapuggalassa avihiṃsā hoti parinibbānāya, pāṇātipātissa purisapuggalassa pāṇātipātā veramaṇī hoti parinibbānāya. Adinnādāyissa purisapuggalassa adinnādānā veramaṇī hoti parinibbānāya. Abrahmacārissa purisapuggalassa abrahmacariyā veramaṇī hoti parinibbānāya. Musāvādissa purisapuggalassa musāvādā veramaṇī hoti parinibbānāya. Pisuṇavācassa purisapuggalassa pisuṇāya vācāya veramaṇī hoti parinibbānāya. Pharusavācassa purisapuggalassa pharusāya vācāya veramaṇī hoti parinibbānāya. Samphappalāpissa purisapuggalassa samphappalāpā veramaṇī hoti parinibbānāya. Abhijjhālussa purisapuggalassa anabhijjhā hoti parinibbānāya. Byāpannacittassa purisapuggalassa abyāpādo hoti parinibbānāya. Micchādiṭṭhissa purisapuggalassa sammādiṭṭhi hoti parinibbānāya. Micchāsaṅkappassa purisapuggalassa sammāsaṅkappo hoti parinibbānāya. Micchāvācassa purisapuggalassa sammāvācā hoti parinibbānāya. Micchākammantassa purisapuggalassa sammākammanto hoti parinibbānāya. Micchāājīvassa purisapuggalassa sammāājīvo hoti parinibbānāya. Micchāvāyāmassa purisapuggalassa sammāvāyāmo hoti parinibbānāya. Micchāsatissa purisapuggalassa sammāsati hoti parinibbānāya. Micchāsamādhissa purisapuggalassa sammāsamādhi hoti parinibbānāya. Micchāñāṇissa purisapuggalassa sammāñāṇaṃ hoti parinibbānāya. Micchāvimuttissa purisapuggalassa sammāvimutti hoti parinibbānāya.
‘‘ထီနမိဒ္ဓပရိယုဋ္ဌိတသ္သ ပုရိသပုဂ္ဂလသ္သ ဝိဂတထိနမိဒ္ဓတာ ဟောတိ ပရိနိဗ္ဗာနာယ။ ဥဒ္ဓတသ္သ ပုရိသပုဂ္ဂလသ္သ အနုဒ္ဓစ္စံ ဟောတိ ပရိနိဗ္ဗာနာယ။ ဝိစိကိစ္ဆိသ္သ ပုရိသပုဂ္ဂလသ္သ တိဏ္ဏဝိစိကိစ္ဆတာ ဟောတိ ပရိနိဗ္ဗာနာယ။ ကောဓနသ္သ ပုရိသပုဂ္ဂလသ္သ အက္ကောဓော ဟောတိ ပရိနိဗ္ဗာနာယ။ ဥပနာဟိသ္သ ပုရိသပုဂ္ဂလသ္သ အနုပနာဟော ဟောတိ ပရိနိဗ္ဗာနာယ။ မက္ခိသ္သ ပုရိသပုဂ္ဂလသ္သ အမက္ခော ဟောတိ ပရိနိဗ္ဗာနာယ။ ပဠာသိသ္သ ပုရိသပုဂ္ဂလသ္သ အပဠာသော ဟောတိ ပရိနိဗ္ဗာနာယ။ ဣသ္သုကိသ္သ ပုရိသပုဂ္ဂလသ္သ အနိသ္သုကိတာ ဟောတိ ပရိနိဗ္ဗာနာယ။ မစ္ဆရိသ္သ ပုရိသပုဂ္ဂလသ္သ အမစ္ဆရိယံ ဟောတိ ပရိနိဗ္ဗာနာယ။ သဌသ္သ ပုရိသပုဂ္ဂလသ္သ အသာဌေယ္ယံ ဟောတိ ပရိနိဗ္ဗာနာယ။ မာယာဝိသ္သ ပုရိသပုဂ္ဂလသ္သ အမာယာ ဟောတိ ပရိနိဗ္ဗာနာယ။ ထဒ္ဓသ္သ ပုရိသပုဂ္ဂလသ္သ အတ္ထဒ္ဓိယံ ဟောတိ ပရိနိဗ္ဗာနာယ။ အတိမာနိသ္သ ပုရိသပုဂ္ဂလသ္သ အနတိမာနော ဟောတိ ပရိနိဗ္ဗာနာယ။ ဒုဗ္ဗစသ္သ ပုရိသပုဂ္ဂလသ္သ သောဝစသ္သတာ ဟောတိ ပရိနိဗ္ဗာနာယ။ ပာပမိတ္တသ္သ ပုရိသပုဂ္ဂလသ္သ ကလ္ယာဏမိတ္တတာ ဟောတိ ပရိနိဗ္ဗာနာယ။ ပမတ္တသ္သ ပုရိသပုဂ္ဂလသ္သ အပ္ပမာဒော ဟောတိ ပရိနိဗ္ဗာနာယ။ အသ္သဒ္ဓသ္သ ပုရိသပုဂ္ဂလသ္သ သဒ္ဓာ ဟောတိ ပရိနိဗ္ဗာနာယ။ အဟိရိကသ္သ ပုရိသပုဂ္ဂလသ္သ ဟိရီ ဟောတိ ပရိနိဗ္ဗာနာယ။ အနောတ္တာပိသ္သ ပုရိသပုဂ္ဂလသ္သ ဩတ္တပ္ပံ ဟောတိ ပရိနိဗ္ဗာနာယ။ အပ္ပသ္သုတသ္သ ပုရိသပုဂ္ဂလသ္သ ဗာဟုသစ္စံ ဟောတိ ပရိနိဗ္ဗာနာယ။ ကုသီတသ္သ ပုရိသပုဂ္ဂလသ္သ ဝီရိယာရမ္ဘော ဟောတိ ပရိနိဗ္ဗာနာယ။ မုဋ္ဌသ္သတိသ္သ ပုရိသပုဂ္ဂလသ္သ ဥပဋ္ဌိတသ္သတိတာ ဟောတိ ပရိနိဗ္ဗာနာယ။ ဒုပ္ပညသ္သ ပုရိသပုဂ္ဂလသ္သ ပညာသမ္ပဒာ ဟောတိ ပရိနိဗ္ဗာနာယ။ သန္ဒိဋ္ဌိပရာမာသိ-အာဓာနဂ္ဂာဟိ-ဒုပ္ပဋိနိသ္သဂ္ဂိသ္သ ပုရိသပုဂ္ဂလသ္သ အသန္ဒိဋ္ဌိပရာမာသိ-အနာဓာနဂ္ဂာဟိ-သုပ္ပဋိနိသ္သဂ္ဂိတာ ဟောတိ ပရိနိဗ္ဗာနာယ။
‘‘Thīnamiddhapariyuṭṭhitassa purisapuggalassa vigatathinamiddhatā hoti parinibbānāya. Uddhatassa purisapuggalassa anuddhaccaṃ hoti parinibbānāya. Vicikicchissa purisapuggalassa tiṇṇavicikicchatā hoti parinibbānāya. Kodhanassa purisapuggalassa akkodho hoti parinibbānāya. Upanāhissa purisapuggalassa anupanāho hoti parinibbānāya. Makkhissa purisapuggalassa amakkho hoti parinibbānāya. Paḷāsissa purisapuggalassa apaḷāso hoti parinibbānāya. Issukissa purisapuggalassa anissukitā hoti parinibbānāya. Maccharissa purisapuggalassa amacchariyaṃ hoti parinibbānāya. Saṭhassa purisapuggalassa asāṭheyyaṃ hoti parinibbānāya. Māyāvissa purisapuggalassa amāyā hoti parinibbānāya. Thaddhassa purisapuggalassa atthaddhiyaṃ hoti parinibbānāya. Atimānissa purisapuggalassa anatimāno hoti parinibbānāya. Dubbacassa purisapuggalassa sovacassatā hoti parinibbānāya. Pāpamittassa purisapuggalassa kalyāṇamittatā hoti parinibbānāya. Pamattassa purisapuggalassa appamādo hoti parinibbānāya. Assaddhassa purisapuggalassa saddhā hoti parinibbānāya. Ahirikassa purisapuggalassa hirī hoti parinibbānāya. Anottāpissa purisapuggalassa ottappaṃ hoti parinibbānāya. Appassutassa purisapuggalassa bāhusaccaṃ hoti parinibbānāya. Kusītassa purisapuggalassa vīriyārambho hoti parinibbānāya. Muṭṭhassatissa purisapuggalassa upaṭṭhitassatitā hoti parinibbānāya. Duppaññassa purisapuggalassa paññāsampadā hoti parinibbānāya. Sandiṭṭhiparāmāsi-ādhānaggāhi-duppaṭinissaggissa purisapuggalassa asandiṭṭhiparāmāsi-anādhānaggāhi-suppaṭinissaggitā hoti parinibbānāya.
၈၈. ‘‘ဣတိ ခော, စုန္ဒ, ဒေသိတော မယာ သလ္လေခပရိယာယော, ဒေသိတော စိတ္တုပ္ပာဒပရိယာယော, ဒေသိတော ပရိက္ကမနပရိယာယော, ဒေသိတော ဥပရိဘာဂပရိယာယော, ဒေသိတော ပရိနိဗ္ဗာနပရိယာယော။ ယံ ခော, စုန္ဒ, သတ္ထာရာ ကရဏီယံ သာဝကာနံ ဟိတေသိနာ အနုကမ္ပကေန အနုကမ္ပံ ဥပာဒာယ, ကတံ ဝော တံ မယာ။ ‘ဧတာနိ, စုန္ဒ, ရုက္ခမူလာနိ, ဧတာနိ သုညာဂာရာနိ, ဈာယထ, စုန္ဒ, မာ ပမာဒတ္ထ, မာ ပစ္ဆာဝိပ္ပဋိသာရိနော အဟုဝတ္ထ’ – အယံ ခော အမ္ဟာကံ အနုသာသနီ’’တိ။
88. ‘‘Iti kho, cunda, desito mayā sallekhapariyāyo, desito cittuppādapariyāyo, desito parikkamanapariyāyo, desito uparibhāgapariyāyo, desito parinibbānapariyāyo. Yaṃ kho, cunda, satthārā karaṇīyaṃ sāvakānaṃ hitesinā anukampakena anukampaṃ upādāya, kataṃ vo taṃ mayā. ‘Etāni, cunda, rukkhamūlāni, etāni suññāgārāni, jhāyatha, cunda, mā pamādattha, mā pacchāvippaṭisārino ahuvattha’ – ayaṃ kho amhākaṃ anusāsanī’’ti.
ဣဒမဝောစ ဘဂဝာ။ အတ္တမနော အာယသ္မာ မဟာစုန္ဒော ဘဂဝတော ဘာသိတံ အဘိနန္ဒီတိ။
Idamavoca bhagavā. Attamano āyasmā mahācundo bhagavato bhāsitaṃ abhinandīti.
စတုတ္တာလီသပဒာ ဝုတ္တာ၊ သန္ဓယော ပဉ္စ ဒေသိတာ။
Catuttālīsapadā vuttā, sandhayo pañca desitā;
သလ္လေခော နာမ သုတ္တန္တော၊ ဂမ္ဘီရော သာဂရူပမောတိ။
Sallekho nāma suttanto, gambhīro sāgarūpamoti.
သလ္လေခသုတ္တံ နိဋ္ဌိတံ အဋ္ဌမံ။
Sallekhasuttaṃ niṭṭhitaṃ aṭṭhamaṃ.
Footnotes:
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / မဇ္ဈိမနိကာယ (အဋ္ဌကထာ) • Majjhimanikāya (aṭṭhakathā) / ၈. သလ္လေခသုတ္တဝဏ္ဏနာ • 8. Sallekhasuttavaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / မဇ္ဈိမနိကာယ (ဋီကာ) • Majjhimanikāya (ṭīkā) / ၈. သလ္လေခသုတ္တဝဏ္ဏနာ • 8. Sallekhasuttavaṇṇanā
