| Library / Tipiṭaka / ਤਿਪਿਟਕ • Tipiṭaka / ਮਜ੍ਝਿਮਨਿਕਾਯ • Majjhimanikāya |
੮. ਸਲ੍ਲੇਖਸੁਤ੍ਤਂ
8. Sallekhasuttaṃ
੮੧. ਏવਂ ਮੇ ਸੁਤਂ – ਏਕਂ ਸਮਯਂ ਭਗવਾ ਸਾવਤ੍ਥਿਯਂ વਿਹਰਤਿ ਜੇਤવਨੇ ਅਨਾਥਪਿਣ੍ਡਿਕਸ੍ਸ ਆਰਾਮੇ। ਅਥ ਖੋ ਆਯਸ੍ਮਾ ਮਹਾਚੁਨ੍ਦੋ ਸਾਯਨ੍ਹਸਮਯਂ ਪਟਿਸਲ੍ਲਾਨਾ વੁਟ੍ਠਿਤੋ ਯੇਨ ਭਗવਾ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍વਾ ਭਗવਨ੍ਤਂ ਅਭਿવਾਦੇਤ੍વਾ ਏਕਮਨ੍ਤਂ ਨਿਸੀਦਿ। ਏਕਮਨ੍ਤਂ ਨਿਸਿਨ੍ਨੋ ਖੋ ਆਯਸ੍ਮਾ ਮਹਾਚੁਨ੍ਦੋ ਭਗવਨ੍ਤਂ ਏਤਦવੋਚ – ‘‘ਯਾ ਇਮਾ, ਭਨ੍ਤੇ, ਅਨੇਕવਿਹਿਤਾ ਦਿਟ੍ਠਿਯੋ ਲੋਕੇ ਉਪ੍ਪਜ੍ਜਨ੍ਤਿ – ਅਤ੍ਤવਾਦਪਟਿਸਂਯੁਤ੍ਤਾ વਾ ਲੋਕવਾਦਪਟਿਸਂਯੁਤ੍ਤਾ વਾ – ਆਦਿਮੇવ ਨੁ ਖੋ, ਭਨ੍ਤੇ, ਭਿਕ੍ਖੁਨੋ ਮਨਸਿਕਰੋਤੋ ਏવਮੇਤਾਸਂ ਦਿਟ੍ਠੀਨਂ ਪਹਾਨਂ ਹੋਤਿ, ਏવਮੇਤਾਸਂ ਦਿਟ੍ਠੀਨਂ ਪਟਿਨਿਸ੍ਸਗ੍ਗੋ ਹੋਤੀ’’ਤਿ?
81. Evaṃ me sutaṃ – ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Atha kho āyasmā mahācundo sāyanhasamayaṃ paṭisallānā vuṭṭhito yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho āyasmā mahācundo bhagavantaṃ etadavoca – ‘‘yā imā, bhante, anekavihitā diṭṭhiyo loke uppajjanti – attavādapaṭisaṃyuttā vā lokavādapaṭisaṃyuttā vā – ādimeva nu kho, bhante, bhikkhuno manasikaroto evametāsaṃ diṭṭhīnaṃ pahānaṃ hoti, evametāsaṃ diṭṭhīnaṃ paṭinissaggo hotī’’ti?
੮੨. ‘‘ਯਾ ਇਮਾ, ਚੁਨ੍ਦ, ਅਨੇਕવਿਹਿਤਾ ਦਿਟ੍ਠਿਯੋ ਲੋਕੇ ਉਪ੍ਪਜ੍ਜਨ੍ਤਿ – ਅਤ੍ਤવਾਦਪਟਿਸਂਯੁਤ੍ਤਾ વਾ ਲੋਕવਾਦਪਟਿਸਂਯੁਤ੍ਤਾ વਾ – ਯਤ੍ਥ ਚੇਤਾ ਦਿਟ੍ਠਿਯੋ ਉਪ੍ਪਜ੍ਜਨ੍ਤਿ ਯਤ੍ਥ ਚ ਅਨੁਸੇਨ੍ਤਿ ਯਤ੍ਥ ਚ ਸਮੁਦਾਚਰਨ੍ਤਿ ਤਂ ‘ਨੇਤਂ ਮਮ, ਨੇਸੋਹਮਸ੍ਮਿ, ਨ ਮੇ ਸੋ ਅਤ੍ਤਾ’ਤਿ – ਏવਮੇਤਂ ਯਥਾਭੂਤਂ ਸਮ੍ਮਪ੍ਪਞ੍ਞਾ ਪਸ੍ਸਤੋ ਏવਮੇਤਾਸਂ ਦਿਟ੍ਠੀਨਂ ਪਹਾਨਂ ਹੋਤਿ, ਏવਮੇਤਾਸਂ ਦਿਟ੍ਠੀਨਂ ਪਟਿਨਿਸ੍ਸਗ੍ਗੋ ਹੋਤਿ।
82. ‘‘Yā imā, cunda, anekavihitā diṭṭhiyo loke uppajjanti – attavādapaṭisaṃyuttā vā lokavādapaṭisaṃyuttā vā – yattha cetā diṭṭhiyo uppajjanti yattha ca anusenti yattha ca samudācaranti taṃ ‘netaṃ mama, nesohamasmi, na me so attā’ti – evametaṃ yathābhūtaṃ sammappaññā passato evametāsaṃ diṭṭhīnaṃ pahānaṃ hoti, evametāsaṃ diṭṭhīnaṃ paṭinissaggo hoti.
‘‘ਠਾਨਂ ਖੋ ਪਨੇਤਂ, ਚੁਨ੍ਦ, વਿਜ੍ਜਤਿ ਯਂ ਇਧੇਕਚ੍ਚੋ ਭਿਕ੍ਖੁ વਿવਿਚ੍ਚੇવ ਕਾਮੇਹਿ વਿવਿਚ੍ਚ ਅਕੁਸਲੇਹਿ ਧਮ੍ਮੇਹਿ ਸવਿਤਕ੍ਕਂ ਸવਿਚਾਰਂ વਿવੇਕਜਂ ਪੀਤਿਸੁਖਂ ਪਠਮਂ ਝਾਨਂ ਉਪਸਮ੍ਪਜ੍ਜ વਿਹਰੇਯ੍ਯ। ਤਸ੍ਸ ਏવਮਸ੍ਸ – ‘ਸਲ੍ਲੇਖੇਨ વਿਹਰਾਮੀ’ਤਿ। ਨ ਖੋ ਪਨੇਤੇ, ਚੁਨ੍ਦ, ਅਰਿਯਸ੍ਸ વਿਨਯੇ ਸਲ੍ਲੇਖਾ વੁਚ੍ਚਨ੍ਤਿ। ਦਿਟ੍ਠਧਮ੍ਮਸੁਖવਿਹਾਰਾ ਏਤੇ ਅਰਿਯਸ੍ਸ વਿਨਯੇ વੁਚ੍ਚਨ੍ਤਿ।
‘‘Ṭhānaṃ kho panetaṃ, cunda, vijjati yaṃ idhekacco bhikkhu vivicceva kāmehi vivicca akusalehi dhammehi savitakkaṃ savicāraṃ vivekajaṃ pītisukhaṃ paṭhamaṃ jhānaṃ upasampajja vihareyya. Tassa evamassa – ‘sallekhena viharāmī’ti. Na kho panete, cunda, ariyassa vinaye sallekhā vuccanti. Diṭṭhadhammasukhavihārā ete ariyassa vinaye vuccanti.
‘‘ਠਾਨਂ ਖੋ ਪਨੇਤਂ, ਚੁਨ੍ਦ, વਿਜ੍ਜਤਿ ਯਂ ਇਧੇਕਚ੍ਚੋ ਭਿਕ੍ਖੁ વਿਤਕ੍ਕવਿਚਾਰਾਨਂ વੂਪਸਮਾ ਅਜ੍ਝਤ੍ਤਂ ਸਮ੍ਪਸਾਦਨਂ ਚੇਤਸੋ ਏਕੋਦਿਭਾવਂ ਅવਿਤਕ੍ਕਂ ਅવਿਚਾਰਂ ਸਮਾਧਿਜਂ ਪੀਤਿਸੁਖਂ ਦੁਤਿਯਂ ਝਾਨਂ ਉਪਸਮ੍ਪਜ੍ਜ વਿਹਰੇਯ੍ਯ। ਤਸ੍ਸ ਏવਮਸ੍ਸ – ‘ਸਲ੍ਲੇਖੇਨ વਿਹਰਾਮੀ’ਤਿ। ਨ ਖੋ ਪਨੇਤੇ, ਚੁਨ੍ਦ, ਅਰਿਯਸ੍ਸ વਿਨਯੇ ਸਲ੍ਲੇਖਾ વੁਚ੍ਚਨ੍ਤਿ। ਦਿਟ੍ਠਧਮ੍ਮਸੁਖવਿਹਾਰਾ ਏਤੇ ਅਰਿਯਸ੍ਸ વਿਨਯੇ વੁਚ੍ਚਨ੍ਤਿ।
‘‘Ṭhānaṃ kho panetaṃ, cunda, vijjati yaṃ idhekacco bhikkhu vitakkavicārānaṃ vūpasamā ajjhattaṃ sampasādanaṃ cetaso ekodibhāvaṃ avitakkaṃ avicāraṃ samādhijaṃ pītisukhaṃ dutiyaṃ jhānaṃ upasampajja vihareyya. Tassa evamassa – ‘sallekhena viharāmī’ti. Na kho panete, cunda, ariyassa vinaye sallekhā vuccanti. Diṭṭhadhammasukhavihārā ete ariyassa vinaye vuccanti.
‘‘ਠਾਨਂ ਖੋ ਪਨੇਤਂ, ਚੁਨ੍ਦ, વਿਜ੍ਜਤਿ ਯਂ ਇਧੇਕਚ੍ਚੋ ਭਿਕ੍ਖੁ ਪੀਤਿਯਾ ਚ વਿਰਾਗਾ ਉਪੇਕ੍ਖਕੋ ਚ વਿਹਰੇਯ੍ਯ, ਸਤੋ ਚ ਸਮ੍ਪਜਾਨੋ ਸੁਖਞ੍ਚ ਕਾਯੇਨ ਪਟਿਸਂવੇਦੇਯ੍ਯ, ਯਂ ਤਂ ਅਰਿਯਾ ਆਚਿਕ੍ਖਨ੍ਤਿ – ‘ਉਪੇਕ੍ਖਕੋ ਸਤਿਮਾ ਸੁਖવਿਹਾਰੀ’ਤਿ ਤਤਿਯਂ ਝਾਨਂ ਉਪਸਮ੍ਪਜ੍ਜ વਿਹਰੇਯ੍ਯ। ਤਸ੍ਸ ਏવਮਸ੍ਸ – ‘ਸਲ੍ਲੇਖੇਨ વਿਹਰਾਮੀ’ਤਿ। ਨ ਖੋ ਪਨੇਤੇ, ਚੁਨ੍ਦ, ਅਰਿਯਸ੍ਸ વਿਨਯੇ ਸਲ੍ਲੇਖਾ વੁਚ੍ਚਨ੍ਤਿ। ਦਿਟ੍ਠਧਮ੍ਮਸੁਖવਿਹਾਰਾ ਏਤੇ ਅਰਿਯਸ੍ਸ વਿਨਯੇ વੁਚ੍ਚਨ੍ਤਿ।
‘‘Ṭhānaṃ kho panetaṃ, cunda, vijjati yaṃ idhekacco bhikkhu pītiyā ca virāgā upekkhako ca vihareyya, sato ca sampajāno sukhañca kāyena paṭisaṃvedeyya, yaṃ taṃ ariyā ācikkhanti – ‘upekkhako satimā sukhavihārī’ti tatiyaṃ jhānaṃ upasampajja vihareyya. Tassa evamassa – ‘sallekhena viharāmī’ti. Na kho panete, cunda, ariyassa vinaye sallekhā vuccanti. Diṭṭhadhammasukhavihārā ete ariyassa vinaye vuccanti.
‘‘ਠਾਨਂ ਖੋ ਪਨੇਤਂ, ਚੁਨ੍ਦ, વਿਜ੍ਜਤਿ ਯਂ ਇਧੇਕਚ੍ਚੋ ਭਿਕ੍ਖੁ ਸੁਖਸ੍ਸ ਚ ਪਹਾਨਾ ਦੁਕ੍ਖਸ੍ਸ ਚ ਪਹਾਨਾ ਪੁਬ੍ਬੇવ ਸੋਮਨਸ੍ਸਦੋਮਨਸ੍ਸਾਨਂ ਅਤ੍ਥਙ੍ਗਮਾ ਅਦੁਕ੍ਖਮਸੁਂ ਉਪੇਕ੍ਖਾਸਤਿਪਾਰਿਸੁਦ੍ਧਿਂ ਚਤੁਤ੍ਥਂ ਝਾਨਂ ਉਪਸਮ੍ਪਜ੍ਜ વਿਹਰੇਯ੍ਯ। ਤਸ੍ਸ ਏવਮਸ੍ਸ – ‘ਸਲ੍ਲੇਖੇਨ વਿਹਰਾਮੀ’ਤਿ। ਨ ਖੋ ਪਨੇਤੇ, ਚੁਨ੍ਦ, ਅਰਿਯਸ੍ਸ વਿਨਯੇ ਸਲ੍ਲੇਖਾ વੁਚ੍ਚਨ੍ਤਿ। ਦਿਟ੍ਠਧਮ੍ਮਸੁਖવਿਹਾਰਾ ਏਤੇ ਅਰਿਯਸ੍ਸ વਿਨਯੇ વੁਚ੍ਚਨ੍ਤਿ।
‘‘Ṭhānaṃ kho panetaṃ, cunda, vijjati yaṃ idhekacco bhikkhu sukhassa ca pahānā dukkhassa ca pahānā pubbeva somanassadomanassānaṃ atthaṅgamā adukkhamasuṃ upekkhāsatipārisuddhiṃ catutthaṃ jhānaṃ upasampajja vihareyya. Tassa evamassa – ‘sallekhena viharāmī’ti. Na kho panete, cunda, ariyassa vinaye sallekhā vuccanti. Diṭṭhadhammasukhavihārā ete ariyassa vinaye vuccanti.
‘‘ਠਾਨਂ ਖੋ ਪਨੇਤਂ, ਚੁਨ੍ਦ, વਿਜ੍ਜਤਿ ਯਂ ਇਧੇਕਚ੍ਚੋ ਭਿਕ੍ਖੁ ਸਬ੍ਬਸੋ ਰੂਪਸਞ੍ਞਾਨਂ ਸਮਤਿਕ੍ਕਮਾ, ਪਟਿਘਸਞ੍ਞਾਨਂ ਅਤ੍ਥਙ੍ਗਮਾ, ਨਾਨਤ੍ਤਸਞ੍ਞਾਨਂ ਅਮਨਸਿਕਾਰਾ, ‘ਅਨਨ੍ਤੋ ਆਕਾਸੋ’ਤਿ ਆਕਾਸਾਨਞ੍ਚਾਯਤਨਂ ਉਪਸਮ੍ਪਜ੍ਜ વਿਹਰੇਯ੍ਯ। ਤਸ੍ਸ ਏવਮਸ੍ਸ – ‘ਸਲ੍ਲੇਖੇਨ વਿਹਰਾਮੀ’ਤਿ। ਨ ਖੋ ਪਨੇਤੇ, ਚੁਨ੍ਦ, ਅਰਿਯਸ੍ਸ વਿਨਯੇ ਸਲ੍ਲੇਖਾ વੁਚ੍ਚਨ੍ਤਿ। ਸਨ੍ਤਾ ਏਤੇ વਿਹਾਰਾ ਅਰਿਯਸ੍ਸ વਿਨਯੇ વੁਚ੍ਚਨ੍ਤਿ।
‘‘Ṭhānaṃ kho panetaṃ, cunda, vijjati yaṃ idhekacco bhikkhu sabbaso rūpasaññānaṃ samatikkamā, paṭighasaññānaṃ atthaṅgamā, nānattasaññānaṃ amanasikārā, ‘ananto ākāso’ti ākāsānañcāyatanaṃ upasampajja vihareyya. Tassa evamassa – ‘sallekhena viharāmī’ti. Na kho panete, cunda, ariyassa vinaye sallekhā vuccanti. Santā ete vihārā ariyassa vinaye vuccanti.
‘‘ਠਾਨਂ ਖੋ ਪਨੇਤਂ, ਚੁਨ੍ਦ, વਿਜ੍ਜਤਿ ਯਂ ਇਧੇਕਚ੍ਚੋ ਭਿਕ੍ਖੁ ਸਬ੍ਬਸੋ ਆਕਾਸਾਨਞ੍ਚਾਯਤਨਂ ਸਮਤਿਕ੍ਕਮ੍ਮ ‘ਅਨਨ੍ਤਂ વਿਞ੍ਞਾਣ’ਨ੍ਤਿ વਿਞ੍ਞਾਣਞ੍ਚਾਯਤਨਂ ਉਪਸਮ੍ਪਜ੍ਜ વਿਹਰੇਯ੍ਯ। ਤਸ੍ਸ ਏવਮਸ੍ਸ – ‘ਸਲ੍ਲੇਖੇਨ વਿਹਰਾਮੀ’ਤਿ। ਨ ਖੋ ਪਨੇਤੇ, ਚੁਨ੍ਦ, ਅਰਿਯਸ੍ਸ વਿਨਯੇ ਸਲ੍ਲੇਖਾ વੁਚ੍ਚਨ੍ਤਿ। ਸਨ੍ਤਾ ਏਤੇ વਿਹਾਰਾ ਅਰਿਯਸ੍ਸ વਿਨਯੇ વੁਚ੍ਚਨ੍ਤਿ।
‘‘Ṭhānaṃ kho panetaṃ, cunda, vijjati yaṃ idhekacco bhikkhu sabbaso ākāsānañcāyatanaṃ samatikkamma ‘anantaṃ viññāṇa’nti viññāṇañcāyatanaṃ upasampajja vihareyya. Tassa evamassa – ‘sallekhena viharāmī’ti. Na kho panete, cunda, ariyassa vinaye sallekhā vuccanti. Santā ete vihārā ariyassa vinaye vuccanti.
‘‘ਠਾਨਂ ਖੋ ਪਨੇਤਂ, ਚੁਨ੍ਦ, વਿਜ੍ਜਤਿ ਯਂ ਇਧੇਕਚ੍ਚੋ ਭਿਕ੍ਖੁ ਸਬ੍ਬਸੋ વਿਞ੍ਞਾਣਞ੍ਚਾਯਤਨਂ ਸਮਤਿਕ੍ਕਮ੍ਮ ‘ਨਤ੍ਥਿ ਕਿਞ੍ਚੀ’ਤਿ ਆਕਿਞ੍ਚਞ੍ਞਾਯਤਨਂ ਉਪਸਮ੍ਪਜ੍ਜ વਿਹਰੇਯ੍ਯ। ਤਸ੍ਸ ਏવਮਸ੍ਸ – ‘ਸਲ੍ਲੇਖੇਨ વਿਹਰਾਮੀ’ਤਿ। ਨ ਖੋ ਪਨੇਤੇ, ਚੁਨ੍ਦ, ਅਰਿਯਸ੍ਸ વਿਨਯੇ ਸਲ੍ਲੇਖਾ વੁਚ੍ਚਨ੍ਤਿ। ਸਨ੍ਤਾ ਏਤੇ વਿਹਾਰਾ ਅਰਿਯਸ੍ਸ વਿਨਯੇ વੁਚ੍ਚਨ੍ਤਿ।
‘‘Ṭhānaṃ kho panetaṃ, cunda, vijjati yaṃ idhekacco bhikkhu sabbaso viññāṇañcāyatanaṃ samatikkamma ‘natthi kiñcī’ti ākiñcaññāyatanaṃ upasampajja vihareyya. Tassa evamassa – ‘sallekhena viharāmī’ti. Na kho panete, cunda, ariyassa vinaye sallekhā vuccanti. Santā ete vihārā ariyassa vinaye vuccanti.
‘‘ਠਾਨਂ ਖੋ ਪਨੇਤਂ, ਚੁਨ੍ਦ, વਿਜ੍ਜਤਿ ਯਂ ਇਧੇਕਚ੍ਚੋ ਭਿਕ੍ਖੁ ਸਬ੍ਬਸੋ ਆਕਿਞ੍ਚਞ੍ਞਾਯਤਨਂ ਸਮਤਿਕ੍ਕਮ੍ਮ ਨੇવਸਞ੍ਞਾਨਾਸਞ੍ਞਾਯਤਨਂ ਉਪਸਮ੍ਪਜ੍ਜ વਿਹਰੇਯ੍ਯ। ਤਸ੍ਸ ਏવਮਸ੍ਸ – ‘ਸਲ੍ਲੇਖੇਨ વਿਹਰਾਮੀ’ਤਿ । ਨ ਖੋ ਪਨੇਤੇ, ਚੁਨ੍ਦ, ਅਰਿਯਸ੍ਸ વਿਨਯੇ ਸਲ੍ਲੇਖਾ વੁਚ੍ਚਨ੍ਤਿ। ਸਨ੍ਤਾ ਏਤੇ વਿਹਾਰਾ ਅਰਿਯਸ੍ਸ વਿਨਯੇ વੁਚ੍ਚਨ੍ਤਿ।
‘‘Ṭhānaṃ kho panetaṃ, cunda, vijjati yaṃ idhekacco bhikkhu sabbaso ākiñcaññāyatanaṃ samatikkamma nevasaññānāsaññāyatanaṃ upasampajja vihareyya. Tassa evamassa – ‘sallekhena viharāmī’ti . Na kho panete, cunda, ariyassa vinaye sallekhā vuccanti. Santā ete vihārā ariyassa vinaye vuccanti.
੮੩. ‘‘ਇਧ ਖੋ ਪਨ વੋ, ਚੁਨ੍ਦ, ਸਲ੍ਲੇਖੋ ਕਰਣੀਯੋ। ‘ਪਰੇ વਿਹਿਂਸਕਾ ਭવਿਸ੍ਸਨ੍ਤਿ, ਮਯਮੇਤ੍ਥ ਅવਿਹਿਂਸਕਾ ਭવਿਸ੍ਸਾਮਾ’ਤਿ ਸਲ੍ਲੇਖੋ ਕਰਣੀਯੋ। ‘ਪਰੇ ਪਾਣਾਤਿਪਾਤੀ ਭવਿਸ੍ਸਨ੍ਤਿ, ਮਯਮੇਤ੍ਥ ਪਾਣਾਤਿਪਾਤਾ ਪਟਿવਿਰਤਾ ਭવਿਸ੍ਸਾਮਾ’ਤਿ ਸਲ੍ਲੇਖੋ ਕਰਣੀਯੋ। ‘ਪਰੇ ਅਦਿਨ੍ਨਾਦਾਯੀ ਭવਿਸ੍ਸਨ੍ਤਿ, ਮਯਮੇਤ੍ਥ ਅਦਿਨ੍ਨਾਦਾਨਾ ਪਟਿવਿਰਤਾ ਭવਿਸ੍ਸਾਮਾ’ਤਿ ਸਲ੍ਲੇਖੋ ਕਰਣੀਯੋ। ‘ਪਰੇ ਅਬ੍ਰਹ੍ਮਚਾਰੀ ਭવਿਸ੍ਸਨ੍ਤਿ, ਮਯਮੇਤ੍ਥ ਬ੍ਰਹ੍ਮਚਾਰੀ ਭવਿਸ੍ਸਾਮਾ’ਤਿ ਸਲ੍ਲੇਖੋ ਕਰਣੀਯੋ। ‘ਪਰੇ ਮੁਸਾવਾਦੀ ਭવਿਸ੍ਸਨ੍ਤਿ, ਮਯਮੇਤ੍ਥ ਮੁਸਾવਾਦਾ ਪਟਿવਿਰਤਾ ਭવਿਸ੍ਸਾਮਾ’ਤਿ ਸਲ੍ਲੇਖੋ ਕਰਣੀਯੋ। ‘ਪਰੇ ਪਿਸੁਣવਾਚਾ 1 ਭવਿਸ੍ਸਨ੍ਤਿ, ਮਯਮੇਤ੍ਥ ਪਿਸੁਣਾਯ વਾਚਾਯ ਪਟਿવਿਰਤਾ ਭવਿਸ੍ਸਾਮਾ’ਤਿ ਸਲ੍ਲੇਖੋ ਕਰਣੀਯੋ। ‘ਪਰੇ ਫਰੁਸવਾਚਾ 2 ਭવਿਸ੍ਸਨ੍ਤਿ, ਮਯਮੇਤ੍ਥ ਫਰੁਸਾਯ વਾਚਾਯ ਪਟਿવਿਰਤਾ ਭવਿਸ੍ਸਾਮਾ’ਤਿ ਸਲ੍ਲੇਖੋ ਕਰਣੀਯੋ। ‘ਪਰੇ ਸਮ੍ਫਪ੍ਪਲਾਪੀ ਭવਿਸ੍ਸਨ੍ਤਿ, ਮਯਮੇਤ੍ਥ ਸਮ੍ਫਪ੍ਪਲਾਪਾ ਪਟਿવਿਰਤਾ ਭવਿਸ੍ਸਾਮਾ’ਤਿ ਸਲ੍ਲੇਖੋ ਕਰਣੀਯੋ। ‘ਪਰੇ ਅਭਿਜ੍ਝਾਲੂ ਭવਿਸ੍ਸਨ੍ਤਿ, ਮਯਮੇਤ੍ਥ ਅਨਭਿਜ੍ਝਾਲੂ ਭવਿਸ੍ਸਾਮਾ’ਤਿ ਸਲ੍ਲੇਖੋ ਕਰਣੀਯੋ। ‘ਪਰੇ ਬ੍ਯਾਪਨ੍ਨਚਿਤ੍ਤਾ ਭવਿਸ੍ਸਨ੍ਤਿ, ਮਯਮੇਤ੍ਥ ਅਬ੍ਯਾਪਨ੍ਨਚਿਤ੍ਤਾ ਭવਿਸ੍ਸਾਮਾ’ਤਿ ਸਲ੍ਲੇਖੋ ਕਰਣੀਯੋ। ‘ਪਰੇ ਮਿਚ੍ਛਾਦਿਟ੍ਠੀ ਭવਿਸ੍ਸਨ੍ਤਿ, ਮਯਮੇਤ੍ਥ ਸਮ੍ਮਾਦਿਟ੍ਠੀ ਭવਿਸ੍ਸਾਮਾ’ਤਿ ਸਲ੍ਲੇਖੋ ਕਰਣੀਯੋ। ‘ਪਰੇ ਮਿਚ੍ਛਾਸਙ੍ਕਪ੍ਪਾ ਭવਿਸ੍ਸਨ੍ਤਿ, ਮਯਮੇਤ੍ਥ ਸਮ੍ਮਾਸਙ੍ਕਪ੍ਪਾ ਭવਿਸ੍ਸਾਮਾ’ਤਿ ਸਲ੍ਲੇਖੋ ਕਰਣੀਯੋ। ‘ਪਰੇ ਮਿਚ੍ਛਾવਾਚਾ ਭવਿਸ੍ਸਨ੍ਤਿ, ਮਯਮੇਤ੍ਥ ਸਮ੍ਮਾવਾਚਾ ਭવਿਸ੍ਸਾਮਾ’ਤਿ ਸਲ੍ਲੇਖੋ ਕਰਣੀਯੋ। ‘ਪਰੇ ਮਿਚ੍ਛਾਕਮ੍ਮਨ੍ਤਾ ਭવਿਸ੍ਸਨ੍ਤਿ, ਮਯਮੇਤ੍ਥ ਸਮ੍ਮਾਕਮ੍ਮਨ੍ਤਾ ਭવਿਸ੍ਸਾਮਾ’ਤਿ ਸਲ੍ਲੇਖੋ ਕਰਣੀਯੋ। ‘ਪਰੇ ਮਿਚ੍ਛਾਆਜੀવਾ ਭવਿਸ੍ਸਨ੍ਤਿ, ਮਯਮੇਤ੍ਥ ਸਮ੍ਮਾਆਜੀવਾ ਭવਿਸ੍ਸਾਮਾ’ਤਿ ਸਲ੍ਲੇਖੋ ਕਰਣੀਯੋ। ‘ਪਰੇ ਮਿਚ੍ਛਾવਾਯਾਮਾ ਭવਿਸ੍ਸਨ੍ਤਿ, ਮਯਮੇਤ੍ਥ ਸਮ੍ਮਾવਾਯਾਮਾ ਭવਿਸ੍ਸਾਮਾ’ਤਿ ਸਲ੍ਲੇਖੋ ਕਰਣੀਯੋ। ‘ਪਰੇ ਮਿਚ੍ਛਾਸਤੀ ਭવਿਸ੍ਸਨ੍ਤਿ, ਮਯਮੇਤ੍ਥ ਸਮ੍ਮਾਸਤੀ ਭવਿਸ੍ਸਾਮਾ’ਤਿ ਸਲ੍ਲੇਖੋ ਕਰਣੀਯੋ। ‘ਪਰੇ ਮਿਚ੍ਛਾਸਮਾਧਿ ਭવਿਸ੍ਸਨ੍ਤਿ, ਮਯਮੇਤ੍ਥ ਸਮ੍ਮਾਸਮਾਧੀ ਭવਿਸ੍ਸਾਮਾ’ਤਿ ਸਲ੍ਲੇਖੋ ਕਰਣੀਯੋ। ‘ਪਰੇ ਮਿਚ੍ਛਾਞਾਣੀ ਭવਿਸ੍ਸਨ੍ਤਿ, ਮਯਮੇਤ੍ਥ ਸਮ੍ਮਾਞਾਣੀ ਭવਿਸ੍ਸਾਮਾ’ਤਿ ਸਲ੍ਲੇਖੋ ਕਰਣੀਯੋ। ‘ਪਰੇ ਮਿਚ੍ਛਾવਿਮੁਤ੍ਤੀ ਭવਿਸ੍ਸਨ੍ਤਿ, ਮਯਮੇਤ੍ਥ ਸਮ੍ਮਾવਿਮੁਤ੍ਤੀ ਭવਿਸ੍ਸਾਮਾ’ਤਿ ਸਲ੍ਲੇਖੋ ਕਰਣੀਯੋ।
83. ‘‘Idha kho pana vo, cunda, sallekho karaṇīyo. ‘Pare vihiṃsakā bhavissanti, mayamettha avihiṃsakā bhavissāmā’ti sallekho karaṇīyo. ‘Pare pāṇātipātī bhavissanti, mayamettha pāṇātipātā paṭiviratā bhavissāmā’ti sallekho karaṇīyo. ‘Pare adinnādāyī bhavissanti, mayamettha adinnādānā paṭiviratā bhavissāmā’ti sallekho karaṇīyo. ‘Pare abrahmacārī bhavissanti, mayamettha brahmacārī bhavissāmā’ti sallekho karaṇīyo. ‘Pare musāvādī bhavissanti, mayamettha musāvādā paṭiviratā bhavissāmā’ti sallekho karaṇīyo. ‘Pare pisuṇavācā 3 bhavissanti, mayamettha pisuṇāya vācāya paṭiviratā bhavissāmā’ti sallekho karaṇīyo. ‘Pare pharusavācā 4 bhavissanti, mayamettha pharusāya vācāya paṭiviratā bhavissāmā’ti sallekho karaṇīyo. ‘Pare samphappalāpī bhavissanti, mayamettha samphappalāpā paṭiviratā bhavissāmā’ti sallekho karaṇīyo. ‘Pare abhijjhālū bhavissanti, mayamettha anabhijjhālū bhavissāmā’ti sallekho karaṇīyo. ‘Pare byāpannacittā bhavissanti, mayamettha abyāpannacittā bhavissāmā’ti sallekho karaṇīyo. ‘Pare micchādiṭṭhī bhavissanti, mayamettha sammādiṭṭhī bhavissāmā’ti sallekho karaṇīyo. ‘Pare micchāsaṅkappā bhavissanti, mayamettha sammāsaṅkappā bhavissāmā’ti sallekho karaṇīyo. ‘Pare micchāvācā bhavissanti, mayamettha sammāvācā bhavissāmā’ti sallekho karaṇīyo. ‘Pare micchākammantā bhavissanti, mayamettha sammākammantā bhavissāmā’ti sallekho karaṇīyo. ‘Pare micchāājīvā bhavissanti, mayamettha sammāājīvā bhavissāmā’ti sallekho karaṇīyo. ‘Pare micchāvāyāmā bhavissanti, mayamettha sammāvāyāmā bhavissāmā’ti sallekho karaṇīyo. ‘Pare micchāsatī bhavissanti, mayamettha sammāsatī bhavissāmā’ti sallekho karaṇīyo. ‘Pare micchāsamādhi bhavissanti, mayamettha sammāsamādhī bhavissāmā’ti sallekho karaṇīyo. ‘Pare micchāñāṇī bhavissanti, mayamettha sammāñāṇī bhavissāmā’ti sallekho karaṇīyo. ‘Pare micchāvimuttī bhavissanti, mayamettha sammāvimuttī bhavissāmā’ti sallekho karaṇīyo.
‘‘‘ਪਰੇ ਥੀਨਮਿਦ੍ਧਪਰਿਯੁਟ੍ਠਿਤਾ ਭવਿਸ੍ਸਨ੍ਤਿ, ਮਯਮੇਤ੍ਥ વਿਗਤਥੀਨਮਿਦ੍ਧਾ ਭવਿਸ੍ਸਾਮਾ’ਤਿ ਸਲ੍ਲੇਖੋ ਕਰਣੀਯੋ । ‘ਪਰੇ ਉਦ੍ਧਤਾ ਭવਿਸ੍ਸਨ੍ਤਿ, ਮਯਮੇਤ੍ਥ ਅਨੁਦ੍ਧਤਾ ਭવਿਸ੍ਸਾਮਾ’ਤਿ ਸਲ੍ਲੇਖੋ ਕਰਣੀਯੋ। ‘ਪਰੇ વਿਚਿਕਿਚ੍ਛੀ 5 ਭવਿਸ੍ਸਨ੍ਤਿ, ਮਯਮੇਤ੍ਥ ਤਿਣ੍ਣવਿਚਿਕਿਚ੍ਛਾ ਭવਿਸ੍ਸਾਮਾ’ਤਿ ਸਲ੍ਲੇਖੋ ਕਰਣੀਯੋ। ‘ਪਰੇ ਕੋਧਨਾ ਭવਿਸ੍ਸਨ੍ਤਿ, ਮਯਮੇਤ੍ਥ ਅਕ੍ਕੋਧਨਾ ਭવਿਸ੍ਸਾਮਾ’ਤਿ ਸਲ੍ਲੇਖੋ ਕਰਣੀਯੋ। ‘ਪਰੇ ਉਪਨਾਹੀ ਭવਿਸ੍ਸਨ੍ਤਿ, ਮਯਮੇਤ੍ਥ ਅਨੁਪਨਾਹੀ ਭવਿਸ੍ਸਾਮਾ’ਤਿ ਸਲ੍ਲੇਖੋ ਕਰਣੀਯੋ। ‘ਪਰੇ ਮਕ੍ਖੀ ਭવਿਸ੍ਸਨ੍ਤਿ , ਮਯਮੇਤ੍ਥ ਅਮਕ੍ਖੀ ਭવਿਸ੍ਸਾਮਾ’ਤਿ ਸਲ੍ਲੇਖੋ ਕਰਣੀਯੋ। ‘ਪਰੇ ਪਲ਼ਾਸੀ ਭવਿਸ੍ਸਨ੍ਤਿ, ਮਯਮੇਤ੍ਥ ਅਪਲ਼ਾਸੀ ਭવਿਸ੍ਸਾਮਾ’ਤਿ ਸਲ੍ਲੇਖੋ ਕਰਣੀਯੋ। ‘ਪਰੇ ਇਸ੍ਸੁਕੀ ਭવਿਸ੍ਸਨ੍ਤਿ, ਮਯਮੇਤ੍ਥ ਅਨਿਸ੍ਸੁਕੀ ਭવਿਸ੍ਸਾਮਾ’ਤਿ ਸਲ੍ਲੇਖੋ ਕਰਣੀਯੋ। ‘ਪਰੇ ਮਚ੍ਛਰੀ ਭવਿਸ੍ਸਨ੍ਤਿ, ਮਯਮੇਤ੍ਥ ਅਮਚ੍ਛਰੀ ਭવਿਸ੍ਸਾਮਾ’ਤਿ ਸਲ੍ਲੇਖੋ ਕਰਣੀਯੋ। ‘ਪਰੇ ਸਠਾ ਭવਿਸ੍ਸਨ੍ਤਿ, ਮਯਮੇਤ੍ਥ ਅਸਠਾ ਭવਿਸ੍ਸਾਮਾ’ਤਿ ਸਲ੍ਲੇਖੋ ਕਰਣੀਯੋ। ‘ਪਰੇ ਮਾਯਾવੀ ਭવਿਸ੍ਸਨ੍ਤਿ, ਮਯਮੇਤ੍ਥ ਅਮਾਯਾવੀ ਭવਿਸ੍ਸਾਮਾ’ਤਿ ਸਲ੍ਲੇਖੋ ਕਰਣੀਯੋ। ‘ਪਰੇ ਥਦ੍ਧਾ ਭવਿਸ੍ਸਨ੍ਤਿ, ਮਯਮੇਤ੍ਥ ਅਤ੍ਥਦ੍ਧਾ ਭવਿਸ੍ਸਾਮਾ’ਤਿ ਸਲ੍ਲੇਖੋ ਕਰਣੀਯੋ। ‘ਪਰੇ ਅਤਿਮਾਨੀ ਭવਿਸ੍ਸਨ੍ਤਿ, ਮਯਮੇਤ੍ਥ ਅਨਤਿਮਾਨੀ ਭવਿਸ੍ਸਾਮਾ’ਤਿ ਸਲ੍ਲੇਖੋ ਕਰਣੀਯੋ। ‘ਪਰੇ ਦੁਬ੍ਬਚਾ ਭવਿਸ੍ਸਨ੍ਤਿ, ਮਯਮੇਤ੍ਥ ਸੁવਚਾ ਭવਿਸ੍ਸਾਮਾ’ਤਿ ਸਲ੍ਲੇਖੋ ਕਰਣੀਯੋ। ‘ਪਰੇ ਪਾਪਮਿਤ੍ਤਾ ਭવਿਸ੍ਸਨ੍ਤਿ, ਮਯਮੇਤ੍ਥ ਕਲ੍ਯਾਣਮਿਤ੍ਤਾ ਭવਿਸ੍ਸਾਮਾ’ਤਿ ਸਲ੍ਲੇਖੋ ਕਰਣੀਯੋ। ‘ਪਰੇ ਪਮਤ੍ਤਾ ਭવਿਸ੍ਸਨ੍ਤਿ, ਮਯਮੇਤ੍ਥ ਅਪ੍ਪਮਤ੍ਤਾ ਭવਿਸ੍ਸਾਮਾ’ਤਿ ਸਲ੍ਲੇਖੋ ਕਰਣੀਯੋ। ‘ਪਰੇ ਅਸ੍ਸਦ੍ਧਾ ਭવਿਸ੍ਸਨ੍ਤਿ, ਮਯਮੇਤ੍ਥ ਸਦ੍ਧਾ ਭવਿਸ੍ਸਾਮਾ’ਤਿ ਸਲ੍ਲੇਖੋ ਕਰਣੀਯੋ। ‘ਪਰੇ ਅਹਿਰਿਕਾ ਭવਿਸ੍ਸਨ੍ਤਿ, ਮਯਮੇਤ੍ਥ ਹਿਰਿਮਨਾ ਭવਿਸ੍ਸਾਮਾ’ਤਿ ਸਲ੍ਲੇਖੋ ਕਰਣੀਯੋ। ‘ਪਰੇ ਅਨੋਤ੍ਤਾਪੀ 6 ਭવਿਸ੍ਸਨ੍ਤਿ, ਮਯਮੇਤ੍ਥ ਓਤ੍ਤਾਪੀ ਭવਿਸ੍ਸਾਮਾ’ਤਿ ਸਲ੍ਲੇਖੋ ਕਰਣੀਯੋ। ‘ਪਰੇ ਅਪ੍ਪਸ੍ਸੁਤਾ ਭવਿਸ੍ਸਨ੍ਤਿ, ਮਯਮੇਤ੍ਥ ਬਹੁਸ੍ਸੁਤਾ ਭવਿਸ੍ਸਾਮਾ’ਤਿ ਸਲ੍ਲੇਖੋ ਕਰਣੀਯੋ। ‘ਪਰੇ ਕੁਸੀਤਾ ਭવਿਸ੍ਸਨ੍ਤਿ, ਮਯਮੇਤ੍ਥ ਆਰਦ੍ਧવੀਰਿਯਾ ਭવਿਸ੍ਸਾਮਾ’ਤਿ ਸਲ੍ਲੇਖੋ ਕਰਣੀਯੋ। ‘ਪਰੇ ਮੁਟ੍ਠਸ੍ਸਤੀ ਭવਿਸ੍ਸਨ੍ਤਿ, ਮਯਮੇਤ੍ਥ ਉਪਟ੍ਠਿਤਸ੍ਸਤੀ ਭવਿਸ੍ਸਾਮਾ’ਤਿ ਸਲ੍ਲੇਖੋ ਕਰਣੀਯੋ। ‘ਪਰੇ ਦੁਪ੍ਪਞ੍ਞਾ ਭવਿਸ੍ਸਨ੍ਤਿ, ਮਯਮੇਤ੍ਥ ਪਞ੍ਞਾਸਮ੍ਪਨ੍ਨਾ ਭવਿਸ੍ਸਾਮਾ’ਤਿ ਸਲ੍ਲੇਖੋ ਕਰਣੀਯੋ। ‘ਪਰੇ ਸਨ੍ਦਿਟ੍ਠਿਪਰਾਮਾਸੀ ਆਧਾਨਗ੍ਗਾਹੀ ਦੁਪ੍ਪਟਿਨਿਸ੍ਸਗ੍ਗੀ ਭવਿਸ੍ਸਨ੍ਤਿ, ਮਯਮੇਤ੍ਥ ਅਸਨ੍ਦਿਟ੍ਠਿਪਰਾਮਾਸੀ ਅਨਾਧਾਨਗ੍ਗਾਹੀ ਸੁਪ੍ਪਟਿਨਿਸ੍ਸਗ੍ਗੀ ਭવਿਸ੍ਸਾਮਾ’ਤਿ ਸਲ੍ਲੇਖੋ ਕਰਣੀਯੋ।
‘‘‘Pare thīnamiddhapariyuṭṭhitā bhavissanti, mayamettha vigatathīnamiddhā bhavissāmā’ti sallekho karaṇīyo . ‘Pare uddhatā bhavissanti, mayamettha anuddhatā bhavissāmā’ti sallekho karaṇīyo. ‘Pare vicikicchī 7 bhavissanti, mayamettha tiṇṇavicikicchā bhavissāmā’ti sallekho karaṇīyo. ‘Pare kodhanā bhavissanti, mayamettha akkodhanā bhavissāmā’ti sallekho karaṇīyo. ‘Pare upanāhī bhavissanti, mayamettha anupanāhī bhavissāmā’ti sallekho karaṇīyo. ‘Pare makkhī bhavissanti , mayamettha amakkhī bhavissāmā’ti sallekho karaṇīyo. ‘Pare paḷāsī bhavissanti, mayamettha apaḷāsī bhavissāmā’ti sallekho karaṇīyo. ‘Pare issukī bhavissanti, mayamettha anissukī bhavissāmā’ti sallekho karaṇīyo. ‘Pare maccharī bhavissanti, mayamettha amaccharī bhavissāmā’ti sallekho karaṇīyo. ‘Pare saṭhā bhavissanti, mayamettha asaṭhā bhavissāmā’ti sallekho karaṇīyo. ‘Pare māyāvī bhavissanti, mayamettha amāyāvī bhavissāmā’ti sallekho karaṇīyo. ‘Pare thaddhā bhavissanti, mayamettha atthaddhā bhavissāmā’ti sallekho karaṇīyo. ‘Pare atimānī bhavissanti, mayamettha anatimānī bhavissāmā’ti sallekho karaṇīyo. ‘Pare dubbacā bhavissanti, mayamettha suvacā bhavissāmā’ti sallekho karaṇīyo. ‘Pare pāpamittā bhavissanti, mayamettha kalyāṇamittā bhavissāmā’ti sallekho karaṇīyo. ‘Pare pamattā bhavissanti, mayamettha appamattā bhavissāmā’ti sallekho karaṇīyo. ‘Pare assaddhā bhavissanti, mayamettha saddhā bhavissāmā’ti sallekho karaṇīyo. ‘Pare ahirikā bhavissanti, mayamettha hirimanā bhavissāmā’ti sallekho karaṇīyo. ‘Pare anottāpī 8 bhavissanti, mayamettha ottāpī bhavissāmā’ti sallekho karaṇīyo. ‘Pare appassutā bhavissanti, mayamettha bahussutā bhavissāmā’ti sallekho karaṇīyo. ‘Pare kusītā bhavissanti, mayamettha āraddhavīriyā bhavissāmā’ti sallekho karaṇīyo. ‘Pare muṭṭhassatī bhavissanti, mayamettha upaṭṭhitassatī bhavissāmā’ti sallekho karaṇīyo. ‘Pare duppaññā bhavissanti, mayamettha paññāsampannā bhavissāmā’ti sallekho karaṇīyo. ‘Pare sandiṭṭhiparāmāsī ādhānaggāhī duppaṭinissaggī bhavissanti, mayamettha asandiṭṭhiparāmāsī anādhānaggāhī suppaṭinissaggī bhavissāmā’ti sallekho karaṇīyo.
੮੪. ‘‘ਚਿਤ੍ਤੁਪ੍ਪਾਦਮ੍ਪਿ ਖੋ ਅਹਂ, ਚੁਨ੍ਦ, ਕੁਸਲੇਸੁ ਧਮ੍ਮੇਸੁ ਬਹੁਕਾਰਂ 9 વਦਾਮਿ, ਕੋ ਪਨ વਾਦੋ ਕਾਯੇਨ વਾਚਾਯ ਅਨੁવਿਧੀਯਨਾਸੁ! ਤਸ੍ਮਾਤਿਹ, ਚੁਨ੍ਦ, ‘ਪਰੇ વਿਹਿਂਸਕਾ ਭવਿਸ੍ਸਨ੍ਤਿ, ਮਯਮੇਤ੍ਥ ਅવਿਹਿਂਸਕਾ ਭવਿਸ੍ਸਾਮਾ’ਤਿ ਚਿਤ੍ਤਂ ਉਪ੍ਪਾਦੇਤਬ੍ਬਂ। ‘ਪਰੇ ਪਾਣਾਤਿਪਾਤੀ ਭવਿਸ੍ਸਨ੍ਤਿ, ਮਯਮੇਤ੍ਥ ਪਾਣਾਤਿਪਾਤਾ ਪਟਿવਿਰਤਾ ਭવਿਸ੍ਸਾਮਾ’ਤਿ ਚਿਤ੍ਤਂ ਉਪ੍ਪਾਦੇਤਬ੍ਬਂ…‘ਪਰੇ ਸਨ੍ਦਿਟ੍ਠਿਪਰਾਮਾਸੀ ਆਧਾਨਗ੍ਗਾਹੀ ਦੁਪ੍ਪਟਿਨਿਸ੍ਸਗ੍ਗੀ ਭવਿਸ੍ਸਨ੍ਤਿ, ਮਯਮੇਤ੍ਥ ਅਸਨ੍ਦਿਟ੍ਠਿਪਰਾਮਾਸੀ ਅਨਾਧਾਨਗ੍ਗਾਹੀ ਸੁਪ੍ਪਟਿਨਿਸ੍ਸਗ੍ਗੀ ਭવਿਸ੍ਸਾਮਾ’ਤਿ ਚਿਤ੍ਤਂ ਉਪ੍ਪਾਦੇਤਬ੍ਬਂ।
84. ‘‘Cittuppādampi kho ahaṃ, cunda, kusalesu dhammesu bahukāraṃ 10 vadāmi, ko pana vādo kāyena vācāya anuvidhīyanāsu! Tasmātiha, cunda, ‘pare vihiṃsakā bhavissanti, mayamettha avihiṃsakā bhavissāmā’ti cittaṃ uppādetabbaṃ. ‘Pare pāṇātipātī bhavissanti, mayamettha pāṇātipātā paṭiviratā bhavissāmā’ti cittaṃ uppādetabbaṃ…‘pare sandiṭṭhiparāmāsī ādhānaggāhī duppaṭinissaggī bhavissanti, mayamettha asandiṭṭhiparāmāsī anādhānaggāhī suppaṭinissaggī bhavissāmā’ti cittaṃ uppādetabbaṃ.
੮੫. ‘‘ਸੇਯ੍ਯਥਾਪਿ, ਚੁਨ੍ਦ, વਿਸਮੋ ਮਗ੍ਗੋ ਅਸ੍ਸ, ਤਸ੍ਸ 11 ਅਞ੍ਞੋ ਸਮੋ ਮਗ੍ਗੋ ਪਰਿਕ੍ਕਮਨਾਯ; ਸੇਯ੍ਯਥਾ વਾ ਪਨ, ਚੁਨ੍ਦ, વਿਸਮਂ ਤਿਤ੍ਥਂ ਅਸ੍ਸ, ਤਸ੍ਸ ਅਞ੍ਞਂ ਸਮਂ ਤਿਤ੍ਥਂ ਪਰਿਕ੍ਕਮਨਾਯ; ਏવਮੇવ ਖੋ, ਚੁਨ੍ਦ, વਿਹਿਂਸਕਸ੍ਸ ਪੁਰਿਸਪੁਗ੍ਗਲਸ੍ਸ ਅવਿਹਿਂਸਾ ਹੋਤਿ ਪਰਿਕ੍ਕਮਨਾਯ, ਪਾਣਾਤਿਪਾਤਿਸ੍ਸ ਪੁਰਿਸਪੁਗ੍ਗਲਸ੍ਸ ਪਾਣਾਤਿਪਾਤਾ વੇਰਮਣੀ ਹੋਤਿ ਪਰਿਕ੍ਕਮਨਾਯ, ਅਦਿਨ੍ਨਾਦਾਯਿਸ੍ਸ ਪੁਰਿਸਪੁਗ੍ਗਲਸ੍ਸ ਅਦਿਨ੍ਨਾਦਾਨਾ વੇਰਮਣੀ ਹੋਤਿ ਪਰਿਕ੍ਕਮਨਾਯ, ਅਬ੍ਰਹ੍ਮਚਾਰਿਸ੍ਸ ਪੁਰਿਸਪੁਗ੍ਗਲਸ੍ਸ ਅਬ੍ਰਹ੍ਮਚਰਿਯਾ વੇਰਮਣੀ ਹੋਤਿ ਪਰਿਕ੍ਕਮਨਾਯ , ਮੁਸਾવਾਦਿਸ੍ਸ ਪੁਰਿਸਪੁਗ੍ਗਲਸ੍ਸ ਮੁਸਾવਾਦਾ વੇਰਮਣੀ ਹੋਤਿ ਪਰਿਕ੍ਕਮਨਾਯ, ਪਿਸੁਣવਾਚਸ੍ਸ ਪੁਰਿਸਪੁਗ੍ਗਲਸ੍ਸ ਪਿਸੁਣਾਯ વਾਚਾਯ વੇਰਮਣੀ ਹੋਤਿ ਪਰਿਕ੍ਕਮਨਾਯ, ਫਰੁਸવਾਚਸ੍ਸ ਪੁਰਿਸਪੁਗ੍ਗਲਸ੍ਸ ਫਰੁਸਾਯ વਾਚਾਯ વੇਰਮਣੀ ਹੋਤਿ ਪਰਿਕ੍ਕਮਨਾਯ, ਸਮ੍ਫਪ੍ਪਲਾਪਿਸ੍ਸ ਪੁਰਿਸਪੁਗ੍ਗਲਸ੍ਸ ਸਮ੍ਫਪ੍ਪਲਾਪਾ વੇਰਮਣੀ ਹੋਤਿ ਪਰਿਕ੍ਕਮਨਾਯ, ਅਭਿਜ੍ਝਾਲੁਸ੍ਸ ਪੁਰਿਸਪੁਗ੍ਗਲਸ੍ਸ ਅਨਭਿਜ੍ਝਾ ਹੋਤਿ ਪਰਿਕ੍ਕਮਨਾਯ, ਬ੍ਯਾਪਨ੍ਨਚਿਤ੍ਤਸ੍ਸ ਪੁਰਿਸਪੁਗ੍ਗਲਸ੍ਸ ਅਬ੍ਯਾਪਾਦੋ ਹੋਤਿ ਪਰਿਕ੍ਕਮਨਾਯ, ਮਿਚ੍ਛਾਦਿਟ੍ਠਿਸ੍ਸ ਪੁਰਿਸਪੁਗ੍ਗਲਸ੍ਸ ਸਮ੍ਮਾਦਿਟ੍ਠਿ ਹੋਤਿ ਪਰਿਕ੍ਕਮਨਾਯ, ਮਿਚ੍ਛਾਸਙ੍ਕਪ੍ਪਸ੍ਸ ਪੁਰਿਸਪੁਗ੍ਗਲਸ੍ਸ ਸਮ੍ਮਾਸਙ੍ਕਪ੍ਪੋ ਹੋਤਿ ਪਰਿਕ੍ਕਮਨਾਯ, ਮਿਚ੍ਛਾવਾਚਸ੍ਸ ਪੁਰਿਸਪੁਗ੍ਗਲਸ੍ਸ ਸਮ੍ਮਾવਾਚਾ ਹੋਤਿ ਪਰਿਕ੍ਕਮਨਾਯ, ਮਿਚ੍ਛਾਕਮ੍ਮਨ੍ਤਸ੍ਸ ਪੁਰਿਸਪੁਗ੍ਗਲਸ੍ਸ ਸਮ੍ਮਾਕਮ੍ਮਨ੍ਤੋ ਹੋਤਿ ਪਰਿਕ੍ਕਮਨਾਯ, ਮਿਚ੍ਛਾਆਜੀવਸ੍ਸ ਪੁਰਿਸਪੁਗ੍ਗਲਸ੍ਸ ਸਮ੍ਮਾਆਜੀવੋ ਹੋਤਿ ਪਰਿਕ੍ਕਮਨਾਯ, ਮਿਚ੍ਛਾવਾਯਾਮਸ੍ਸ ਪੁਰਿਸਪੁਗ੍ਗਲਸ੍ਸ ਸਮ੍ਮਾવਾਯਾਮੋ ਹੋਤਿ ਪਰਿਕ੍ਕਮਨਾਯ, ਮਿਚ੍ਛਾਸਤਿਸ੍ਸ ਪੁਰਿਸਪੁਗ੍ਗਲਸ੍ਸ ਸਮ੍ਮਾਸਤਿ ਹੋਤਿ ਪਰਿਕ੍ਕਮਨਾਯ, ਮਿਚ੍ਛਾਸਮਾਧਿਸ੍ਸ ਪੁਰਿਸਪੁਗ੍ਗਲਸ੍ਸ ਸਮ੍ਮਾਸਮਾਧਿ ਹੋਤਿ ਪਰਿਕ੍ਕਮਨਾਯ, ਮਿਚ੍ਛਾਞਾਣਿਸ੍ਸ ਪੁਰਿਸਪੁਗ੍ਗਲਸ੍ਸ ਸਮ੍ਮਾਞਾਣਂ ਹੋਤਿ ਪਰਿਕ੍ਕਮਨਾਯ, ਮਿਚ੍ਛਾવਿਮੁਤ੍ਤਿਸ੍ਸ ਪੁਰਿਸਪੁਗ੍ਗਲਸ੍ਸ ਸਮ੍ਮਾવਿਮੁਤ੍ਤਿ ਹੋਤਿ ਪਰਿਕ੍ਕਮਨਾਯ।
85. ‘‘Seyyathāpi, cunda, visamo maggo assa, tassa 12 añño samo maggo parikkamanāya; seyyathā vā pana, cunda, visamaṃ titthaṃ assa, tassa aññaṃ samaṃ titthaṃ parikkamanāya; evameva kho, cunda, vihiṃsakassa purisapuggalassa avihiṃsā hoti parikkamanāya, pāṇātipātissa purisapuggalassa pāṇātipātā veramaṇī hoti parikkamanāya, adinnādāyissa purisapuggalassa adinnādānā veramaṇī hoti parikkamanāya, abrahmacārissa purisapuggalassa abrahmacariyā veramaṇī hoti parikkamanāya , musāvādissa purisapuggalassa musāvādā veramaṇī hoti parikkamanāya, pisuṇavācassa purisapuggalassa pisuṇāya vācāya veramaṇī hoti parikkamanāya, pharusavācassa purisapuggalassa pharusāya vācāya veramaṇī hoti parikkamanāya, samphappalāpissa purisapuggalassa samphappalāpā veramaṇī hoti parikkamanāya, abhijjhālussa purisapuggalassa anabhijjhā hoti parikkamanāya, byāpannacittassa purisapuggalassa abyāpādo hoti parikkamanāya, micchādiṭṭhissa purisapuggalassa sammādiṭṭhi hoti parikkamanāya, micchāsaṅkappassa purisapuggalassa sammāsaṅkappo hoti parikkamanāya, micchāvācassa purisapuggalassa sammāvācā hoti parikkamanāya, micchākammantassa purisapuggalassa sammākammanto hoti parikkamanāya, micchāājīvassa purisapuggalassa sammāājīvo hoti parikkamanāya, micchāvāyāmassa purisapuggalassa sammāvāyāmo hoti parikkamanāya, micchāsatissa purisapuggalassa sammāsati hoti parikkamanāya, micchāsamādhissa purisapuggalassa sammāsamādhi hoti parikkamanāya, micchāñāṇissa purisapuggalassa sammāñāṇaṃ hoti parikkamanāya, micchāvimuttissa purisapuggalassa sammāvimutti hoti parikkamanāya.
‘‘ਥੀਨਮਿਦ੍ਧਪਰਿਯੁਟ੍ਠਿਤਸ੍ਸ ਪੁਰਿਸਪੁਗ੍ਗਲਸ੍ਸ વਿਗਤਥਿਨਮਿਦ੍ਧਤਾ ਹੋਤਿ ਪਰਿਕ੍ਕਮਨਾਯ, ਉਦ੍ਧਤਸ੍ਸ ਪੁਰਿਸਪੁਗ੍ਗਲਸ੍ਸ ਅਨੁਦ੍ਧਚ੍ਚਂ ਹੋਤਿ ਪਰਿਕ੍ਕਮਨਾਯ, વਿਚਿਕਿਚ੍ਛਿਸ੍ਸ ਪੁਰਿਸਪੁਗ੍ਗਲਸ੍ਸ ਤਿਣ੍ਣવਿਚਿਕਿਚ੍ਛਤਾ ਹੋਤਿ ਪਰਿਕ੍ਕਮਨਾਯ, ਕੋਧਨਸ੍ਸ ਪੁਰਿਸਪੁਗ੍ਗਲਸ੍ਸ ਅਕ੍ਕੋਧੋ ਹੋਤਿ ਪਰਿਕ੍ਕਮਨਾਯ, ਉਪਨਾਹਿਸ੍ਸ ਪੁਰਿਸਪੁਗ੍ਗਲਸ੍ਸ ਅਨੁਪਨਾਹੋ ਹੋਤਿ ਪਰਿਕ੍ਕਮਨਾਯ, ਮਕ੍ਖਿਸ੍ਸ ਪੁਰਿਸਪੁਗ੍ਗਲਸ੍ਸ ਅਮਕ੍ਖੋ ਹੋਤਿ ਪਰਿਕ੍ਕਮਨਾਯ, ਪਲ਼ਾਸਿਸ੍ਸ ਪੁਰਿਸਪੁਗ੍ਗਲਸ੍ਸ ਅਪਲ਼ਾਸੋ ਹੋਤਿ ਪਰਿਕ੍ਕਮਨਾਯ , ਇਸ੍ਸੁਕਿਸ੍ਸ ਪੁਰਿਸਪੁਗ੍ਗਲਸ੍ਸ ਅਨਿਸ੍ਸੁਕਿਤਾ ਹੋਤਿ ਪਰਿਕ੍ਕਮਨਾਯ, ਮਚ੍ਛਰਿਸ੍ਸ ਪੁਰਿਸਪੁਗ੍ਗਲਸ੍ਸ ਅਮਚ੍ਛਰਿਯਂ ਹੋਤਿ ਪਰਿਕ੍ਕਮਨਾਯ, ਸਠਸ੍ਸ ਪੁਰਿਸਪੁਗ੍ਗਲਸ੍ਸ ਅਸਾਠੇਯ੍ਯਂ ਹੋਤਿ ਪਰਿਕ੍ਕਮਨਾਯ, ਮਾਯਾવਿਸ੍ਸ ਪੁਰਿਸਪੁਗ੍ਗਲਸ੍ਸ ਅਮਾਯਾ 13 ਹੋਤਿ ਪਰਿਕ੍ਕਮਨਾਯ, ਥਦ੍ਧਸ੍ਸ ਪੁਰਿਸਪੁਗ੍ਗਲਸ੍ਸ ਅਤ੍ਥਦ੍ਧਿਯਂ ਹੋਤਿ ਪਰਿਕ੍ਕਮਨਾਯ, ਅਤਿਮਾਨਿਸ੍ਸ ਪੁਰਿਸਪੁਗ੍ਗਲਸ੍ਸ ਅਨਤਿਮਾਨੋ ਹੋਤਿ ਪਰਿਕ੍ਕਮਨਾਯ, ਦੁਬ੍ਬਚਸ੍ਸ ਪੁਰਿਸਪੁਗ੍ਗਲਸ੍ਸ ਸੋવਚਸ੍ਸਤਾ ਹੋਤਿ ਪਰਿਕ੍ਕਮਨਾਯ, ਪਾਪਮਿਤ੍ਤਸ੍ਸ ਪੁਰਿਸਪੁਗ੍ਗਲਸ੍ਸ ਕਲ੍ਯਾਣਮਿਤ੍ਤਤਾ ਹੋਤਿ ਪਰਿਕ੍ਕਮਨਾਯ, ਪਮਤ੍ਤਸ੍ਸ ਪੁਰਿਸਪੁਗ੍ਗਲਸ੍ਸ ਅਪ੍ਪਮਾਦੋ ਹੋਤਿ ਪਰਿਕ੍ਕਮਨਾਯ, ਅਸ੍ਸਦ੍ਧਸ੍ਸ ਪੁਰਿਸਪੁਗ੍ਗਲਸ੍ਸ ਸਦ੍ਧਾ ਹੋਤਿ ਪਰਿਕ੍ਕਮਨਾਯ, ਅਹਿਰਿਕਸ੍ਸ ਪੁਰਿਸਪੁਗ੍ਗਲਸ੍ਸ ਹਿਰੀ ਹੋਤਿ ਪਰਿਕ੍ਕਮਨਾਯ, ਅਨੋਤ੍ਤਾਪਿਸ੍ਸ ਪੁਰਿਸਪੁਗ੍ਗਲਸ੍ਸ ਓਤ੍ਤਪ੍ਪਂ ਹੋਤਿ ਪਰਿਕ੍ਕਮਨਾਯ, ਅਪ੍ਪਸ੍ਸੁਤਸ੍ਸ ਪੁਰਿਸਪੁਗ੍ਗਲਸ੍ਸ ਬਾਹੁਸਚ੍ਚਂ ਹੋਤਿ ਪਰਿਕ੍ਕਮਨਾਯ, ਕੁਸੀਤਸ੍ਸ ਪੁਰਿਸਪੁਗ੍ਗਲਸ੍ਸ વੀਰਿਯਾਰਮ੍ਭੋ ਹੋਤਿ ਪਰਿਕ੍ਕਮਨਾਯ, ਮੁਟ੍ਠਸ੍ਸਤਿਸ੍ਸ ਪੁਰਿਸਪੁਗ੍ਗਲਸ੍ਸ ਉਪਟ੍ਠਿਤਸ੍ਸਤਿਤਾ ਹੋਤਿ ਪਰਿਕ੍ਕਮਨਾਯ, ਦੁਪ੍ਪਞ੍ਞਸ੍ਸ ਪੁਰਿਸਪੁਗ੍ਗਲਸ੍ਸ ਪਞ੍ਞਾਸਮ੍ਪਦਾ ਹੋਤਿ ਪਰਿਕ੍ਕਮਨਾਯ , ਸਨ੍ਦਿਟ੍ਠਿਪਰਾਮਾਸਿ-ਆਧਾਨਗ੍ਗਾਹਿ-ਦੁਪ੍ਪਟਿਨਿਸ੍ਸਗ੍ਗਿਸ੍ਸ ਪੁਰਿਸਪੁਗ੍ਗਲਸ੍ਸ ਅਸਨ੍ਦਿਟ੍ਠਿਪਰਾਮਾਸਿਅਨਾਧਾਨਗ੍ਗਾਹਿ-ਸੁਪ੍ਪਟਿਨਿਸ੍ਸਗ੍ਗਿਤਾ ਹੋਤਿ ਪਰਿਕ੍ਕਮਨਾਯ।
‘‘Thīnamiddhapariyuṭṭhitassa purisapuggalassa vigatathinamiddhatā hoti parikkamanāya, uddhatassa purisapuggalassa anuddhaccaṃ hoti parikkamanāya, vicikicchissa purisapuggalassa tiṇṇavicikicchatā hoti parikkamanāya, kodhanassa purisapuggalassa akkodho hoti parikkamanāya, upanāhissa purisapuggalassa anupanāho hoti parikkamanāya, makkhissa purisapuggalassa amakkho hoti parikkamanāya, paḷāsissa purisapuggalassa apaḷāso hoti parikkamanāya , issukissa purisapuggalassa anissukitā hoti parikkamanāya, maccharissa purisapuggalassa amacchariyaṃ hoti parikkamanāya, saṭhassa purisapuggalassa asāṭheyyaṃ hoti parikkamanāya, māyāvissa purisapuggalassa amāyā 14 hoti parikkamanāya, thaddhassa purisapuggalassa atthaddhiyaṃ hoti parikkamanāya, atimānissa purisapuggalassa anatimāno hoti parikkamanāya, dubbacassa purisapuggalassa sovacassatā hoti parikkamanāya, pāpamittassa purisapuggalassa kalyāṇamittatā hoti parikkamanāya, pamattassa purisapuggalassa appamādo hoti parikkamanāya, assaddhassa purisapuggalassa saddhā hoti parikkamanāya, ahirikassa purisapuggalassa hirī hoti parikkamanāya, anottāpissa purisapuggalassa ottappaṃ hoti parikkamanāya, appassutassa purisapuggalassa bāhusaccaṃ hoti parikkamanāya, kusītassa purisapuggalassa vīriyārambho hoti parikkamanāya, muṭṭhassatissa purisapuggalassa upaṭṭhitassatitā hoti parikkamanāya, duppaññassa purisapuggalassa paññāsampadā hoti parikkamanāya , sandiṭṭhiparāmāsi-ādhānaggāhi-duppaṭinissaggissa purisapuggalassa asandiṭṭhiparāmāsianādhānaggāhi-suppaṭinissaggitā hoti parikkamanāya.
੮੬. ‘‘ਸੇਯ੍ਯਥਾਪਿ, ਚੁਨ੍ਦ, ਯੇ ਕੇਚਿ ਅਕੁਸਲਾ ਧਮ੍ਮਾ ਸਬ੍ਬੇ ਤੇ ਅਧੋਭਾਗਙ੍ਗਮਨੀਯਾ 15, ਯੇ ਕੇਚਿ ਕੁਸਲਾ ਧਮ੍ਮਾ ਸਬ੍ਬੇ ਤੇ ਉਪਰਿਭਾਗਙ੍ਗਮਨੀਯਾ 16, ਏવਮੇવ ਖੋ, ਚੁਨ੍ਦ, વਿਹਿਂਸਕਸ੍ਸ ਪੁਰਿਸਪੁਗ੍ਗਲਸ੍ਸ ਅવਿਹਿਂਸਾ ਹੋਤਿ ਉਪਰਿਭਾਗਾਯ 17, ਪਾਣਾਤਿਪਾਤਿਸ੍ਸ ਪੁਰਿਸਪੁਗ੍ਗਲਸ੍ਸ ਪਾਣਾਤਿਪਾਤਾ વੇਰਮਣੀ ਹੋਤਿ ਉਪਰਿਭਾਗਾਯ…ਪੇ॰… ਸਨ੍ਦਿਟ੍ਠਿਪਰਾਮਾਸਿ-ਆਧਾਨਗ੍ਗਾਹਿ-ਦੁਪ੍ਪਟਿਨਿਸ੍ਸਗ੍ਗਿਸ੍ਸ ਪੁਰਿਸਪੁਗ੍ਗਲਸ੍ਸ ਅਸਨ੍ਦਿਟ੍ਠਿਪਰਾਮਾਸਿ-ਅਨਾਧਾਨਗ੍ਗਾਹਿ-ਸੁਪ੍ਪਟਿਨਿਸ੍ਸਗ੍ਗਿਤਾ ਹੋਤਿ ਉਪਰਿਭਾਗਾਯ।
86. ‘‘Seyyathāpi, cunda, ye keci akusalā dhammā sabbe te adhobhāgaṅgamanīyā 18, ye keci kusalā dhammā sabbe te uparibhāgaṅgamanīyā 19, evameva kho, cunda, vihiṃsakassa purisapuggalassa avihiṃsā hoti uparibhāgāya 20, pāṇātipātissa purisapuggalassa pāṇātipātā veramaṇī hoti uparibhāgāya…pe… sandiṭṭhiparāmāsi-ādhānaggāhi-duppaṭinissaggissa purisapuggalassa asandiṭṭhiparāmāsi-anādhānaggāhi-suppaṭinissaggitā hoti uparibhāgāya.
੮੭. ‘‘ਸੋ વਤ, ਚੁਨ੍ਦ, ਅਤ੍ਤਨਾ ਪਲਿਪਪਲਿਪਨ੍ਨੋ ਪਰਂ ਪਲਿਪਪਲਿਪਨ੍ਨਂ ਉਦ੍ਧਰਿਸ੍ਸਤੀਤਿ ਨੇਤਂ ਠਾਨਂ વਿਜ੍ਜਤਿ। ਸੋ વਤ, ਚੁਨ੍ਦ, ਅਤ੍ਤਨਾ ਅਪਲਿਪਪਲਿਪਨ੍ਨੋ ਪਰਂ ਪਲਿਪਪਲਿਪਨ੍ਨਂ ਉਦ੍ਧਰਿਸ੍ਸਤੀਤਿ ਠਾਨਮੇਤਂ વਿਜ੍ਜਤਿ। ਸੋ વਤ, ਚੁਨ੍ਦ, ਅਤ੍ਤਨਾ ਅਦਨ੍ਤੋ ਅવਿਨੀਤੋ ਅਪਰਿਨਿਬ੍ਬੁਤੋ ਪਰਂ ਦਮੇਸ੍ਸਤਿ વਿਨੇਸ੍ਸਤਿ ਪਰਿਨਿਬ੍ਬਾਪੇਸ੍ਸਤੀਤਿ ਨੇਤਂ ਠਾਨਂ વਿਜ੍ਜਤਿ। ਸੋ વਤ , ਚੁਨ੍ਦ, ਅਤ੍ਤਨਾ ਦਨ੍ਤੋ વਿਨੀਤੋ ਪਰਿਨਿਬ੍ਬੁਤੋ ਪਰਂ ਦਮੇਸ੍ਸਤਿ વਿਨੇਸ੍ਸਤਿ ਪਰਿਨਿਬ੍ਬਾਪੇਸ੍ਸਤੀਤਿ ਠਾਨਮੇਤਂ વਿਜ੍ਜਤਿ। ਏવਮੇવ ਖੋ, ਚੁਨ੍ਦ, વਿਹਿਂਸਕਸ੍ਸ ਪੁਰਿਸਪੁਗ੍ਗਲਸ੍ਸ ਅવਿਹਿਂਸਾ ਹੋਤਿ ਪਰਿਨਿਬ੍ਬਾਨਾਯ, ਪਾਣਾਤਿਪਾਤਿਸ੍ਸ ਪੁਰਿਸਪੁਗ੍ਗਲਸ੍ਸ ਪਾਣਾਤਿਪਾਤਾ વੇਰਮਣੀ ਹੋਤਿ ਪਰਿਨਿਬ੍ਬਾਨਾਯ। ਅਦਿਨ੍ਨਾਦਾਯਿਸ੍ਸ ਪੁਰਿਸਪੁਗ੍ਗਲਸ੍ਸ ਅਦਿਨ੍ਨਾਦਾਨਾ વੇਰਮਣੀ ਹੋਤਿ ਪਰਿਨਿਬ੍ਬਾਨਾਯ। ਅਬ੍ਰਹ੍ਮਚਾਰਿਸ੍ਸ ਪੁਰਿਸਪੁਗ੍ਗਲਸ੍ਸ ਅਬ੍ਰਹ੍ਮਚਰਿਯਾ વੇਰਮਣੀ ਹੋਤਿ ਪਰਿਨਿਬ੍ਬਾਨਾਯ। ਮੁਸਾવਾਦਿਸ੍ਸ ਪੁਰਿਸਪੁਗ੍ਗਲਸ੍ਸ ਮੁਸਾવਾਦਾ વੇਰਮਣੀ ਹੋਤਿ ਪਰਿਨਿਬ੍ਬਾਨਾਯ। ਪਿਸੁਣવਾਚਸ੍ਸ ਪੁਰਿਸਪੁਗ੍ਗਲਸ੍ਸ ਪਿਸੁਣਾਯ વਾਚਾਯ વੇਰਮਣੀ ਹੋਤਿ ਪਰਿਨਿਬ੍ਬਾਨਾਯ। ਫਰੁਸવਾਚਸ੍ਸ ਪੁਰਿਸਪੁਗ੍ਗਲਸ੍ਸ ਫਰੁਸਾਯ વਾਚਾਯ વੇਰਮਣੀ ਹੋਤਿ ਪਰਿਨਿਬ੍ਬਾਨਾਯ। ਸਮ੍ਫਪ੍ਪਲਾਪਿਸ੍ਸ ਪੁਰਿਸਪੁਗ੍ਗਲਸ੍ਸ ਸਮ੍ਫਪ੍ਪਲਾਪਾ વੇਰਮਣੀ ਹੋਤਿ ਪਰਿਨਿਬ੍ਬਾਨਾਯ। ਅਭਿਜ੍ਝਾਲੁਸ੍ਸ ਪੁਰਿਸਪੁਗ੍ਗਲਸ੍ਸ ਅਨਭਿਜ੍ਝਾ ਹੋਤਿ ਪਰਿਨਿਬ੍ਬਾਨਾਯ। ਬ੍ਯਾਪਨ੍ਨਚਿਤ੍ਤਸ੍ਸ ਪੁਰਿਸਪੁਗ੍ਗਲਸ੍ਸ ਅਬ੍ਯਾਪਾਦੋ ਹੋਤਿ ਪਰਿਨਿਬ੍ਬਾਨਾਯ। ਮਿਚ੍ਛਾਦਿਟ੍ਠਿਸ੍ਸ ਪੁਰਿਸਪੁਗ੍ਗਲਸ੍ਸ ਸਮ੍ਮਾਦਿਟ੍ਠਿ ਹੋਤਿ ਪਰਿਨਿਬ੍ਬਾਨਾਯ। ਮਿਚ੍ਛਾਸਙ੍ਕਪ੍ਪਸ੍ਸ ਪੁਰਿਸਪੁਗ੍ਗਲਸ੍ਸ ਸਮ੍ਮਾਸਙ੍ਕਪ੍ਪੋ ਹੋਤਿ ਪਰਿਨਿਬ੍ਬਾਨਾਯ। ਮਿਚ੍ਛਾવਾਚਸ੍ਸ ਪੁਰਿਸਪੁਗ੍ਗਲਸ੍ਸ ਸਮ੍ਮਾવਾਚਾ ਹੋਤਿ ਪਰਿਨਿਬ੍ਬਾਨਾਯ। ਮਿਚ੍ਛਾਕਮ੍ਮਨ੍ਤਸ੍ਸ ਪੁਰਿਸਪੁਗ੍ਗਲਸ੍ਸ ਸਮ੍ਮਾਕਮ੍ਮਨ੍ਤੋ ਹੋਤਿ ਪਰਿਨਿਬ੍ਬਾਨਾਯ। ਮਿਚ੍ਛਾਆਜੀવਸ੍ਸ ਪੁਰਿਸਪੁਗ੍ਗਲਸ੍ਸ ਸਮ੍ਮਾਆਜੀવੋ ਹੋਤਿ ਪਰਿਨਿਬ੍ਬਾਨਾਯ। ਮਿਚ੍ਛਾવਾਯਾਮਸ੍ਸ ਪੁਰਿਸਪੁਗ੍ਗਲਸ੍ਸ ਸਮ੍ਮਾવਾਯਾਮੋ ਹੋਤਿ ਪਰਿਨਿਬ੍ਬਾਨਾਯ। ਮਿਚ੍ਛਾਸਤਿਸ੍ਸ ਪੁਰਿਸਪੁਗ੍ਗਲਸ੍ਸ ਸਮ੍ਮਾਸਤਿ ਹੋਤਿ ਪਰਿਨਿਬ੍ਬਾਨਾਯ। ਮਿਚ੍ਛਾਸਮਾਧਿਸ੍ਸ ਪੁਰਿਸਪੁਗ੍ਗਲਸ੍ਸ ਸਮ੍ਮਾਸਮਾਧਿ ਹੋਤਿ ਪਰਿਨਿਬ੍ਬਾਨਾਯ। ਮਿਚ੍ਛਾਞਾਣਿਸ੍ਸ ਪੁਰਿਸਪੁਗ੍ਗਲਸ੍ਸ ਸਮ੍ਮਾਞਾਣਂ ਹੋਤਿ ਪਰਿਨਿਬ੍ਬਾਨਾਯ। ਮਿਚ੍ਛਾવਿਮੁਤ੍ਤਿਸ੍ਸ ਪੁਰਿਸਪੁਗ੍ਗਲਸ੍ਸ ਸਮ੍ਮਾવਿਮੁਤ੍ਤਿ ਹੋਤਿ ਪਰਿਨਿਬ੍ਬਾਨਾਯ।
87. ‘‘So vata, cunda, attanā palipapalipanno paraṃ palipapalipannaṃ uddharissatīti netaṃ ṭhānaṃ vijjati. So vata, cunda, attanā apalipapalipanno paraṃ palipapalipannaṃ uddharissatīti ṭhānametaṃ vijjati. So vata, cunda, attanā adanto avinīto aparinibbuto paraṃ damessati vinessati parinibbāpessatīti netaṃ ṭhānaṃ vijjati. So vata , cunda, attanā danto vinīto parinibbuto paraṃ damessati vinessati parinibbāpessatīti ṭhānametaṃ vijjati. Evameva kho, cunda, vihiṃsakassa purisapuggalassa avihiṃsā hoti parinibbānāya, pāṇātipātissa purisapuggalassa pāṇātipātā veramaṇī hoti parinibbānāya. Adinnādāyissa purisapuggalassa adinnādānā veramaṇī hoti parinibbānāya. Abrahmacārissa purisapuggalassa abrahmacariyā veramaṇī hoti parinibbānāya. Musāvādissa purisapuggalassa musāvādā veramaṇī hoti parinibbānāya. Pisuṇavācassa purisapuggalassa pisuṇāya vācāya veramaṇī hoti parinibbānāya. Pharusavācassa purisapuggalassa pharusāya vācāya veramaṇī hoti parinibbānāya. Samphappalāpissa purisapuggalassa samphappalāpā veramaṇī hoti parinibbānāya. Abhijjhālussa purisapuggalassa anabhijjhā hoti parinibbānāya. Byāpannacittassa purisapuggalassa abyāpādo hoti parinibbānāya. Micchādiṭṭhissa purisapuggalassa sammādiṭṭhi hoti parinibbānāya. Micchāsaṅkappassa purisapuggalassa sammāsaṅkappo hoti parinibbānāya. Micchāvācassa purisapuggalassa sammāvācā hoti parinibbānāya. Micchākammantassa purisapuggalassa sammākammanto hoti parinibbānāya. Micchāājīvassa purisapuggalassa sammāājīvo hoti parinibbānāya. Micchāvāyāmassa purisapuggalassa sammāvāyāmo hoti parinibbānāya. Micchāsatissa purisapuggalassa sammāsati hoti parinibbānāya. Micchāsamādhissa purisapuggalassa sammāsamādhi hoti parinibbānāya. Micchāñāṇissa purisapuggalassa sammāñāṇaṃ hoti parinibbānāya. Micchāvimuttissa purisapuggalassa sammāvimutti hoti parinibbānāya.
‘‘ਥੀਨਮਿਦ੍ਧਪਰਿਯੁਟ੍ਠਿਤਸ੍ਸ ਪੁਰਿਸਪੁਗ੍ਗਲਸ੍ਸ વਿਗਤਥਿਨਮਿਦ੍ਧਤਾ ਹੋਤਿ ਪਰਿਨਿਬ੍ਬਾਨਾਯ। ਉਦ੍ਧਤਸ੍ਸ ਪੁਰਿਸਪੁਗ੍ਗਲਸ੍ਸ ਅਨੁਦ੍ਧਚ੍ਚਂ ਹੋਤਿ ਪਰਿਨਿਬ੍ਬਾਨਾਯ। વਿਚਿਕਿਚ੍ਛਿਸ੍ਸ ਪੁਰਿਸਪੁਗ੍ਗਲਸ੍ਸ ਤਿਣ੍ਣવਿਚਿਕਿਚ੍ਛਤਾ ਹੋਤਿ ਪਰਿਨਿਬ੍ਬਾਨਾਯ। ਕੋਧਨਸ੍ਸ ਪੁਰਿਸਪੁਗ੍ਗਲਸ੍ਸ ਅਕ੍ਕੋਧੋ ਹੋਤਿ ਪਰਿਨਿਬ੍ਬਾਨਾਯ। ਉਪਨਾਹਿਸ੍ਸ ਪੁਰਿਸਪੁਗ੍ਗਲਸ੍ਸ ਅਨੁਪਨਾਹੋ ਹੋਤਿ ਪਰਿਨਿਬ੍ਬਾਨਾਯ। ਮਕ੍ਖਿਸ੍ਸ ਪੁਰਿਸਪੁਗ੍ਗਲਸ੍ਸ ਅਮਕ੍ਖੋ ਹੋਤਿ ਪਰਿਨਿਬ੍ਬਾਨਾਯ। ਪਲ਼ਾਸਿਸ੍ਸ ਪੁਰਿਸਪੁਗ੍ਗਲਸ੍ਸ ਅਪਲ਼ਾਸੋ ਹੋਤਿ ਪਰਿਨਿਬ੍ਬਾਨਾਯ। ਇਸ੍ਸੁਕਿਸ੍ਸ ਪੁਰਿਸਪੁਗ੍ਗਲਸ੍ਸ ਅਨਿਸ੍ਸੁਕਿਤਾ ਹੋਤਿ ਪਰਿਨਿਬ੍ਬਾਨਾਯ। ਮਚ੍ਛਰਿਸ੍ਸ ਪੁਰਿਸਪੁਗ੍ਗਲਸ੍ਸ ਅਮਚ੍ਛਰਿਯਂ ਹੋਤਿ ਪਰਿਨਿਬ੍ਬਾਨਾਯ। ਸਠਸ੍ਸ ਪੁਰਿਸਪੁਗ੍ਗਲਸ੍ਸ ਅਸਾਠੇਯ੍ਯਂ ਹੋਤਿ ਪਰਿਨਿਬ੍ਬਾਨਾਯ। ਮਾਯਾવਿਸ੍ਸ ਪੁਰਿਸਪੁਗ੍ਗਲਸ੍ਸ ਅਮਾਯਾ ਹੋਤਿ ਪਰਿਨਿਬ੍ਬਾਨਾਯ। ਥਦ੍ਧਸ੍ਸ ਪੁਰਿਸਪੁਗ੍ਗਲਸ੍ਸ ਅਤ੍ਥਦ੍ਧਿਯਂ ਹੋਤਿ ਪਰਿਨਿਬ੍ਬਾਨਾਯ। ਅਤਿਮਾਨਿਸ੍ਸ ਪੁਰਿਸਪੁਗ੍ਗਲਸ੍ਸ ਅਨਤਿਮਾਨੋ ਹੋਤਿ ਪਰਿਨਿਬ੍ਬਾਨਾਯ। ਦੁਬ੍ਬਚਸ੍ਸ ਪੁਰਿਸਪੁਗ੍ਗਲਸ੍ਸ ਸੋવਚਸ੍ਸਤਾ ਹੋਤਿ ਪਰਿਨਿਬ੍ਬਾਨਾਯ। ਪਾਪਮਿਤ੍ਤਸ੍ਸ ਪੁਰਿਸਪੁਗ੍ਗਲਸ੍ਸ ਕਲ੍ਯਾਣਮਿਤ੍ਤਤਾ ਹੋਤਿ ਪਰਿਨਿਬ੍ਬਾਨਾਯ। ਪਮਤ੍ਤਸ੍ਸ ਪੁਰਿਸਪੁਗ੍ਗਲਸ੍ਸ ਅਪ੍ਪਮਾਦੋ ਹੋਤਿ ਪਰਿਨਿਬ੍ਬਾਨਾਯ। ਅਸ੍ਸਦ੍ਧਸ੍ਸ ਪੁਰਿਸਪੁਗ੍ਗਲਸ੍ਸ ਸਦ੍ਧਾ ਹੋਤਿ ਪਰਿਨਿਬ੍ਬਾਨਾਯ। ਅਹਿਰਿਕਸ੍ਸ ਪੁਰਿਸਪੁਗ੍ਗਲਸ੍ਸ ਹਿਰੀ ਹੋਤਿ ਪਰਿਨਿਬ੍ਬਾਨਾਯ। ਅਨੋਤ੍ਤਾਪਿਸ੍ਸ ਪੁਰਿਸਪੁਗ੍ਗਲਸ੍ਸ ਓਤ੍ਤਪ੍ਪਂ ਹੋਤਿ ਪਰਿਨਿਬ੍ਬਾਨਾਯ। ਅਪ੍ਪਸ੍ਸੁਤਸ੍ਸ ਪੁਰਿਸਪੁਗ੍ਗਲਸ੍ਸ ਬਾਹੁਸਚ੍ਚਂ ਹੋਤਿ ਪਰਿਨਿਬ੍ਬਾਨਾਯ। ਕੁਸੀਤਸ੍ਸ ਪੁਰਿਸਪੁਗ੍ਗਲਸ੍ਸ વੀਰਿਯਾਰਮ੍ਭੋ ਹੋਤਿ ਪਰਿਨਿਬ੍ਬਾਨਾਯ। ਮੁਟ੍ਠਸ੍ਸਤਿਸ੍ਸ ਪੁਰਿਸਪੁਗ੍ਗਲਸ੍ਸ ਉਪਟ੍ਠਿਤਸ੍ਸਤਿਤਾ ਹੋਤਿ ਪਰਿਨਿਬ੍ਬਾਨਾਯ। ਦੁਪ੍ਪਞ੍ਞਸ੍ਸ ਪੁਰਿਸਪੁਗ੍ਗਲਸ੍ਸ ਪਞ੍ਞਾਸਮ੍ਪਦਾ ਹੋਤਿ ਪਰਿਨਿਬ੍ਬਾਨਾਯ। ਸਨ੍ਦਿਟ੍ਠਿਪਰਾਮਾਸਿ-ਆਧਾਨਗ੍ਗਾਹਿ-ਦੁਪ੍ਪਟਿਨਿਸ੍ਸਗ੍ਗਿਸ੍ਸ ਪੁਰਿਸਪੁਗ੍ਗਲਸ੍ਸ ਅਸਨ੍ਦਿਟ੍ਠਿਪਰਾਮਾਸਿ-ਅਨਾਧਾਨਗ੍ਗਾਹਿ-ਸੁਪ੍ਪਟਿਨਿਸ੍ਸਗ੍ਗਿਤਾ ਹੋਤਿ ਪਰਿਨਿਬ੍ਬਾਨਾਯ।
‘‘Thīnamiddhapariyuṭṭhitassa purisapuggalassa vigatathinamiddhatā hoti parinibbānāya. Uddhatassa purisapuggalassa anuddhaccaṃ hoti parinibbānāya. Vicikicchissa purisapuggalassa tiṇṇavicikicchatā hoti parinibbānāya. Kodhanassa purisapuggalassa akkodho hoti parinibbānāya. Upanāhissa purisapuggalassa anupanāho hoti parinibbānāya. Makkhissa purisapuggalassa amakkho hoti parinibbānāya. Paḷāsissa purisapuggalassa apaḷāso hoti parinibbānāya. Issukissa purisapuggalassa anissukitā hoti parinibbānāya. Maccharissa purisapuggalassa amacchariyaṃ hoti parinibbānāya. Saṭhassa purisapuggalassa asāṭheyyaṃ hoti parinibbānāya. Māyāvissa purisapuggalassa amāyā hoti parinibbānāya. Thaddhassa purisapuggalassa atthaddhiyaṃ hoti parinibbānāya. Atimānissa purisapuggalassa anatimāno hoti parinibbānāya. Dubbacassa purisapuggalassa sovacassatā hoti parinibbānāya. Pāpamittassa purisapuggalassa kalyāṇamittatā hoti parinibbānāya. Pamattassa purisapuggalassa appamādo hoti parinibbānāya. Assaddhassa purisapuggalassa saddhā hoti parinibbānāya. Ahirikassa purisapuggalassa hirī hoti parinibbānāya. Anottāpissa purisapuggalassa ottappaṃ hoti parinibbānāya. Appassutassa purisapuggalassa bāhusaccaṃ hoti parinibbānāya. Kusītassa purisapuggalassa vīriyārambho hoti parinibbānāya. Muṭṭhassatissa purisapuggalassa upaṭṭhitassatitā hoti parinibbānāya. Duppaññassa purisapuggalassa paññāsampadā hoti parinibbānāya. Sandiṭṭhiparāmāsi-ādhānaggāhi-duppaṭinissaggissa purisapuggalassa asandiṭṭhiparāmāsi-anādhānaggāhi-suppaṭinissaggitā hoti parinibbānāya.
੮੮. ‘‘ਇਤਿ ਖੋ, ਚੁਨ੍ਦ, ਦੇਸਿਤੋ ਮਯਾ ਸਲ੍ਲੇਖਪਰਿਯਾਯੋ, ਦੇਸਿਤੋ ਚਿਤ੍ਤੁਪ੍ਪਾਦਪਰਿਯਾਯੋ, ਦੇਸਿਤੋ ਪਰਿਕ੍ਕਮਨਪਰਿਯਾਯੋ, ਦੇਸਿਤੋ ਉਪਰਿਭਾਗਪਰਿਯਾਯੋ, ਦੇਸਿਤੋ ਪਰਿਨਿਬ੍ਬਾਨਪਰਿਯਾਯੋ। ਯਂ ਖੋ, ਚੁਨ੍ਦ, ਸਤ੍ਥਾਰਾ ਕਰਣੀਯਂ ਸਾવਕਾਨਂ ਹਿਤੇਸਿਨਾ ਅਨੁਕਮ੍ਪਕੇਨ ਅਨੁਕਮ੍ਪਂ ਉਪਾਦਾਯ, ਕਤਂ વੋ ਤਂ ਮਯਾ। ‘ਏਤਾਨਿ, ਚੁਨ੍ਦ, ਰੁਕ੍ਖਮੂਲਾਨਿ, ਏਤਾਨਿ ਸੁਞ੍ਞਾਗਾਰਾਨਿ, ਝਾਯਥ, ਚੁਨ੍ਦ, ਮਾ ਪਮਾਦਤ੍ਥ, ਮਾ ਪਚ੍ਛਾવਿਪ੍ਪਟਿਸਾਰਿਨੋ ਅਹੁવਤ੍ਥ’ – ਅਯਂ ਖੋ ਅਮ੍ਹਾਕਂ ਅਨੁਸਾਸਨੀ’’ਤਿ।
88. ‘‘Iti kho, cunda, desito mayā sallekhapariyāyo, desito cittuppādapariyāyo, desito parikkamanapariyāyo, desito uparibhāgapariyāyo, desito parinibbānapariyāyo. Yaṃ kho, cunda, satthārā karaṇīyaṃ sāvakānaṃ hitesinā anukampakena anukampaṃ upādāya, kataṃ vo taṃ mayā. ‘Etāni, cunda, rukkhamūlāni, etāni suññāgārāni, jhāyatha, cunda, mā pamādattha, mā pacchāvippaṭisārino ahuvattha’ – ayaṃ kho amhākaṃ anusāsanī’’ti.
ਇਦਮવੋਚ ਭਗવਾ। ਅਤ੍ਤਮਨੋ ਆਯਸ੍ਮਾ ਮਹਾਚੁਨ੍ਦੋ ਭਗવਤੋ ਭਾਸਿਤਂ ਅਭਿਨਨ੍ਦੀਤਿ।
Idamavoca bhagavā. Attamano āyasmā mahācundo bhagavato bhāsitaṃ abhinandīti.
ਚਤੁਤ੍ਤਾਲੀਸਪਦਾ વੁਤ੍ਤਾ, ਸਨ੍ਧਯੋ ਪਞ੍ਚ ਦੇਸਿਤਾ।
Catuttālīsapadā vuttā, sandhayo pañca desitā;
ਸਲ੍ਲੇਖੋ ਨਾਮ ਸੁਤ੍ਤਨ੍ਤੋ, ਗਮ੍ਭੀਰੋ ਸਾਗਰੂਪਮੋਤਿ॥
Sallekho nāma suttanto, gambhīro sāgarūpamoti.
ਸਲ੍ਲੇਖਸੁਤ੍ਤਂ ਨਿਟ੍ਠਿਤਂ ਅਟ੍ਠਮਂ।
Sallekhasuttaṃ niṭṭhitaṃ aṭṭhamaṃ.
Footnotes:
Related texts:
ਅਟ੍ਠਕਥਾ • Aṭṭhakathā / ਸੁਤ੍ਤਪਿਟਕ (ਅਟ੍ਠਕਥਾ) • Suttapiṭaka (aṭṭhakathā) / ਮਜ੍ਝਿਮਨਿਕਾਯ (ਅਟ੍ਠਕਥਾ) • Majjhimanikāya (aṭṭhakathā) / ੮. ਸਲ੍ਲੇਖਸੁਤ੍ਤવਣ੍ਣਨਾ • 8. Sallekhasuttavaṇṇanā
ਟੀਕਾ • Tīkā / ਸੁਤ੍ਤਪਿਟਕ (ਟੀਕਾ) • Suttapiṭaka (ṭīkā) / ਮਜ੍ਝਿਮਨਿਕਾਯ (ਟੀਕਾ) • Majjhimanikāya (ṭīkā) / ੮. ਸਲ੍ਲੇਖਸੁਤ੍ਤવਣ੍ਣਨਾ • 8. Sallekhasuttavaṇṇanā
