| Library / Tipiṭaka / திபிடக • Tipiṭaka / படிஸம்பி⁴தா³மக்³க³-அட்ட²கதா² • Paṭisambhidāmagga-aṭṭhakathā |
37. ஸல்லேக²ட்ட²ஞாணனித்³தே³ஸவண்ணனா
37. Sallekhaṭṭhañāṇaniddesavaṇṇanā
88. ஸல்லேக²ட்ட²ஞாணனித்³தே³ஸே ராகோ³ புதூ²தி ராகோ³ விஸுங், லோகுத்தரேஹி அஸம்மிஸ்ஸோதி அத்தோ². ஏஸ நயோ ஸேஸேஸு. ராகோ³தி ரஞ்ஜனட்டே²ன. தோ³ஸோதி து³ஸ்ஸனட்டே²ன. மோஹோதி முய்ஹனட்டே²ன. ரஞ்ஜனலக்க²ணோ ராகோ³, து³ஸ்ஸனலக்க²ணோ தோ³ஸோ, முய்ஹனலக்க²ணோ மோஹோதி இமே தயோ ஸீஸகிலேஸே வத்வா இதா³னி பபே⁴த³தோ த³ஸ்ஸெந்தோ கோதோ⁴திஆதி³மாஹ. தத்த² குஜ்ஜ²னலக்க²ணோ கோதோ⁴தி இத⁴ ஸத்தவத்து²கோ அதி⁴ப்பேதோ. உபனந்த⁴னலக்க²ணோ உபனாஹோ, த³ள்ஹபா⁴வப்பத்தோ கோதோ⁴யேவ. பரகு³ணமக்க²னலக்க²ணோ மக்கோ², பரகு³ணபுஞ்ச²னந்தி அத்தோ². யுக³க்³கா³ஹலக்க²ணோ பளாஸோ, யுக³க்³கா³ஹவஸேன பரகு³ணத³ஸ்ஸனந்தி அத்தோ². பரஸம்பத்திகீ²யனலக்க²ணா இஸ்ஸா, உஸூயனாதி அத்தோ² . அத்தஸம்பத்தினிகூ³ஹனலக்க²ணங் மச்ச²ரியங், ‘‘மய்ஹங் அச்ச²ரியங் மா பரஸ்ஸ ஹோதூ’’தி அத்தோ². அத்தனா கதபாபபடிச்சா²த³னலக்க²ணா மாயா, படிச்சா²த³னட்டே²ன மாயா வியாதி அத்தோ². அத்தனோ அவிஜ்ஜமானகு³ணப்பகாஸனலக்க²ணங் ஸாடெ²ய்யங், ஸட²பா⁴வோதி அத்தோ². சித்தஸ்ஸ உத்³து⁴மாதபா⁴வலக்க²ணோ த²ம்போ⁴, த²த்³த⁴பா⁴வோதி அத்தோ². கரணுத்தரியலக்க²ணோ ஸாரம்போ⁴. உன்னதிலக்க²ணோ மானோ. அப்³பு⁴ன்னதிலக்க²ணோ அதிமானோ. மத்தபா⁴வலக்க²ணோ மதோ³. பஞ்சஸு காமகு³ணேஸு சித்தவோஸக்³க³லக்க²ணோ பமாதோ³.
88. Sallekhaṭṭhañāṇaniddese rāgo puthūti rāgo visuṃ, lokuttarehi asammissoti attho. Esa nayo sesesu. Rāgoti rañjanaṭṭhena. Dosoti dussanaṭṭhena. Mohoti muyhanaṭṭhena. Rañjanalakkhaṇo rāgo, dussanalakkhaṇo doso, muyhanalakkhaṇo mohoti ime tayo sīsakilese vatvā idāni pabhedato dassento kodhotiādimāha. Tattha kujjhanalakkhaṇo kodhoti idha sattavatthuko adhippeto. Upanandhanalakkhaṇo upanāho, daḷhabhāvappatto kodhoyeva. Paraguṇamakkhanalakkhaṇo makkho, paraguṇapuñchananti attho. Yugaggāhalakkhaṇo paḷāso, yugaggāhavasena paraguṇadassananti attho. Parasampattikhīyanalakkhaṇā issā, usūyanāti attho . Attasampattinigūhanalakkhaṇaṃ macchariyaṃ, ‘‘mayhaṃ acchariyaṃ mā parassa hotū’’ti attho. Attanā katapāpapaṭicchādanalakkhaṇā māyā, paṭicchādanaṭṭhena māyā viyāti attho. Attano avijjamānaguṇappakāsanalakkhaṇaṃ sāṭheyyaṃ, saṭhabhāvoti attho. Cittassa uddhumātabhāvalakkhaṇo thambho, thaddhabhāvoti attho. Karaṇuttariyalakkhaṇo sārambho. Unnatilakkhaṇo māno. Abbhunnatilakkhaṇo atimāno. Mattabhāvalakkhaṇo mado. Pañcasu kāmaguṇesu cittavosaggalakkhaṇo pamādo.
ஏவங் விஸுங் விஸுங் கிலேஸவஸேன புதூ² த³ஸ்ஸெத்வா வுத்தகிலேஸே ச அவுத்தே ச அஞ்ஞே ஸப்³ப³ஸங்கா³ஹிகவஸேன த³ஸ்ஸேதுங் ஸப்³பே³ கிலேஸாதிஆதி³மாஹ. தத்த² தி³ட்ட²த⁴ம்மஸம்பராயேஸு ஸத்தே கிலேஸெந்தி உபதாபெந்தி விபா³தெ⁴ந்தீதி கிலேஸா. அகுஸலகம்மபத²ஸங்க³ஹிதா ச அஸங்க³ஹிதா ச. து³ட்டு² சரிதா, து³ட்டா² வா சரிதாதி து³ச்சரிதா. தே பன காயது³ச்சரிதங் வசீது³ச்சரிதங் மனோது³ச்சரிதந்தி திப்பகாரா. விபாகங் அபி⁴ஸங்க²ரொந்தீதி அபி⁴ஸங்கா²ரா. தேபி புஞ்ஞாபி⁴ஸங்கா²ரோ அபுஞ்ஞாபி⁴ஸங்கா²ரோ ஆனேஞ்ஜாபி⁴ஸங்கா²ரோதி திப்பகாரா. விபாகவஸேன ப⁴வங் க³ச்ச²ந்தீதிப⁴வகா³மினோ , ப⁴வகா³மினோ கம்மா ப⁴வகா³மிகம்மா. இமினா அபி⁴ஸங்கா²ரபா⁴வேபி ஸதி அவேத³னீயானி கம்மானி படிக்கி²த்தானி ஹொந்தீதி அயங் விஸேஸோ. ‘‘து³ச்சரிதா’’தி ச ‘‘கம்மா’’தி ச லிங்க³விபல்லாஸோ கதோ. நானத்தேகத்தந்தி எத்த² உத்³தே³ஸே ஏகத்தஸத்³த³ஸ்ஸ அபா⁴வேபி நானத்தேகத்தானங் அஞ்ஞமஞ்ஞாபெக்க²த்தா ஏகத்தம்பி நித்³தி³ஸிதுகாமேன ‘‘நானத்தேகத்த’’ந்தி உத்³தே³ஸோ கதோ. நானத்தஸல்லேக²கே ஏகத்தே த³ஸ்ஸிதே ஸல்லேக²ஞாணங் ஸுகே²ன த³ஸ்ஸீயதீதி. நானத்தந்தி அனவட்டி²தத்தா ஸபரிப்ப²ந்த³த்தா ச நானாஸபா⁴வோ. ஏகத்தந்தி அவட்டி²தத்தா அபரிப்ப²ந்த³த்தா ச ஏகஸபா⁴வோ.
Evaṃ visuṃ visuṃ kilesavasena puthū dassetvā vuttakilese ca avutte ca aññe sabbasaṅgāhikavasena dassetuṃ sabbe kilesātiādimāha. Tattha diṭṭhadhammasamparāyesu satte kilesenti upatāpenti vibādhentīti kilesā. Akusalakammapathasaṅgahitā ca asaṅgahitā ca. Duṭṭhu caritā, duṭṭhā vā caritāti duccaritā. Te pana kāyaduccaritaṃ vacīduccaritaṃ manoduccaritanti tippakārā. Vipākaṃ abhisaṅkharontīti abhisaṅkhārā. Tepi puññābhisaṅkhāro apuññābhisaṅkhāro āneñjābhisaṅkhāroti tippakārā. Vipākavasena bhavaṃ gacchantītibhavagāmino , bhavagāmino kammā bhavagāmikammā. Iminā abhisaṅkhārabhāvepi sati avedanīyāni kammāni paṭikkhittāni hontīti ayaṃ viseso. ‘‘Duccaritā’’ti ca ‘‘kammā’’ti ca liṅgavipallāso kato. Nānattekattanti ettha uddese ekattasaddassa abhāvepi nānattekattānaṃ aññamaññāpekkhattā ekattampi niddisitukāmena ‘‘nānattekatta’’nti uddeso kato. Nānattasallekhake ekatte dassite sallekhañāṇaṃ sukhena dassīyatīti. Nānattanti anavaṭṭhitattā saparipphandattā ca nānāsabhāvo. Ekattanti avaṭṭhitattā aparipphandattā ca ekasabhāvo.
சரணதேஜோதி சரந்தி தேன அக³தங் தி³ஸங் நிப்³பா³னங் க³ச்ச²ந்தீதி சரணங். கிங் தங்? ஸீலங். ததே³வ படிபக்க²தாபனட்டே²ன தேஜோ. கு³ணதேஜோதி ஸீலேன லத்³த⁴பதிட்டோ² ஸமாதி⁴தேஜோ. பஞ்ஞாதேஜோதி ஸமாதி⁴னா லத்³த⁴பதிட்டோ² விபஸ்ஸனாதேஜோ. புஞ்ஞதேஜோதி விபஸ்ஸனாஹி லத்³த⁴பதிட்டோ² அரியமக்³க³குஸலதேஜோ. த⁴ம்மதேஜோதி சதுன்னங் தேஜானங் பதிட்டா²பூ⁴தோ பு³த்³த⁴வசனதேஜோ. சரணதேஜேன தேஜிதத்தாதி ஸீலதேஜேன திகி²ணீகதத்தா. து³ஸ்ஸீல்யதேஜந்தி து³ஸ்ஸீலபா⁴வஸங்கா²தங் தேஜங். தம்பி ஹி ஸந்தானங் தாபனதோ தேஜோ நாம. பரியாதி³யதீதி கே²பேதி. அகு³ணதேஜந்தி ஸமாதி⁴ஸ்ஸ படிபக்க²ங் விக்கே²பதேஜங். து³ப்பஞ்ஞதேஜந்தி விபஸ்ஸனாஞாணபடிபக்க²ங் மோஹதேஜங். அபுஞ்ஞதேஜந்தி தங்தங்மக்³க³வஜ்ஜ²கிலேஸப்பஹானேன கிலேஸஸஹாயங் அகுஸலகம்மதேஜங். ந கேவலஞ்ஹேதங் அபுஞ்ஞமேவ கே²பேதி, ‘‘அத்தி², பி⁴க்க²வே, கம்மங் அகண்ஹங் அஸுக்கங் அகண்ஹஅஸுக்கவிபாகங் கம்மங் கம்மக்க²யாய ஸங்வத்ததீ’’தி (அ॰ நி॰ 4.233; தீ³॰ நி॰ 3.312; ம॰ நி॰ 2.18) வசனதோ குஸலகம்மம்பி கே²பேதியேவ. புஞ்ஞதேஜபடிபக்க²வஸேன அபுஞ்ஞதேஜமேவ வுத்தங். அத⁴ம்மதேஜந்தி நானாதித்தி²யானங் ஸமயவசனதேஜங். இமஸ்ஸ ஞாணஸ்ஸ உத்³தே³ஸவண்ணனாயங் வுத்தே து³தியே அத்த²விகப்பே ராகா³த³யோ ஏகூனவீஸதி புது² து³ஸ்ஸீல்யதேஜா ஹொந்தி. ‘‘அபி⁴ஸங்கா²ரா, ப⁴வகா³மிகம்மா’’தி எத்த² அபுஞ்ஞாபி⁴ஸங்கா²ரா அகுஸலகம்மஞ்ச அபுஞ்ஞதேஜா ஹொந்தி, ஆனேஞ்ஜாபி⁴ஸங்கா²ரானி லோகியகுஸலகம்மானி புஞ்ஞதேஜேனேவ கே²பனீயதோ அபுஞ்ஞதேஜபக்கி²காவ ஹொந்தி. காமச்ச²ந்தா³த³யோ பஞ்சத³ஸ நானத்தா அகு³ணதேஜா ஹொந்தி, நிச்சஸஞ்ஞாத³யோ அட்டா²ரஸ நானத்தா து³ப்பஞ்ஞதேஜா ஹொந்தி, சதுமக்³க³வஜ்ஜா² சத்தாரோ நானத்தா அபுஞ்ஞதேஜா ஹொந்தி. ஸோதாபத்திமக்³க³வஜ்ஜ²னானத்தேன அத⁴ம்மதேஜோ ஸங்க³ஹேதப்³போ³.
Caraṇatejoti caranti tena agataṃ disaṃ nibbānaṃ gacchantīti caraṇaṃ. Kiṃ taṃ? Sīlaṃ. Tadeva paṭipakkhatāpanaṭṭhena tejo. Guṇatejoti sīlena laddhapatiṭṭho samādhitejo. Paññātejoti samādhinā laddhapatiṭṭho vipassanātejo. Puññatejoti vipassanāhi laddhapatiṭṭho ariyamaggakusalatejo. Dhammatejoti catunnaṃ tejānaṃ patiṭṭhābhūto buddhavacanatejo. Caraṇatejena tejitattāti sīlatejena tikhiṇīkatattā. Dussīlyatejanti dussīlabhāvasaṅkhātaṃ tejaṃ. Tampi hi santānaṃ tāpanato tejo nāma. Pariyādiyatīti khepeti. Aguṇatejanti samādhissa paṭipakkhaṃ vikkhepatejaṃ. Duppaññatejanti vipassanāñāṇapaṭipakkhaṃ mohatejaṃ. Apuññatejanti taṃtaṃmaggavajjhakilesappahānena kilesasahāyaṃ akusalakammatejaṃ. Na kevalañhetaṃ apuññameva khepeti, ‘‘atthi, bhikkhave, kammaṃ akaṇhaṃ asukkaṃ akaṇhaasukkavipākaṃ kammaṃ kammakkhayāya saṃvattatī’’ti (a. ni. 4.233; dī. ni. 3.312; ma. ni. 2.18) vacanato kusalakammampi khepetiyeva. Puññatejapaṭipakkhavasena apuññatejameva vuttaṃ. Adhammatejanti nānātitthiyānaṃ samayavacanatejaṃ. Imassa ñāṇassa uddesavaṇṇanāyaṃ vutte dutiye atthavikappe rāgādayo ekūnavīsati puthu dussīlyatejā honti. ‘‘Abhisaṅkhārā, bhavagāmikammā’’ti ettha apuññābhisaṅkhārā akusalakammañca apuññatejā honti, āneñjābhisaṅkhārāni lokiyakusalakammāni puññatejeneva khepanīyato apuññatejapakkhikāva honti. Kāmacchandādayo pañcadasa nānattā aguṇatejā honti, niccasaññādayo aṭṭhārasa nānattā duppaññatejā honti, catumaggavajjhā cattāro nānattā apuññatejā honti. Sotāpattimaggavajjhanānattena adhammatejo saṅgahetabbo.
நித்³தே³ஸே ஸல்லேக²படிபக்கே²ன அஸல்லேகே²ன ஸல்லேக²ங் த³ஸ்ஸேதுகாமேன அஸல்லேக²புப்³ப³கோ ஸல்லேகோ² நித்³தி³ட்டோ². நெக்க²ம்மாத³யோ ஸத்ததிங்ஸ ஏகத்தத⁴ம்மாவ பச்சனீகானங் ஸல்லிக²னதோ ‘‘ஸல்லேகோ²’’தி வுத்தா. தஸ்மிங் நெக்க²ம்மாதி³கே ஸத்ததிங்ஸபபே⁴தே³ ஸல்லேகே² ஞாணங் ஸல்லேக²ட்டே² ஞாணந்தி.
Niddese sallekhapaṭipakkhena asallekhena sallekhaṃ dassetukāmena asallekhapubbako sallekho niddiṭṭho. Nekkhammādayo sattatiṃsa ekattadhammāva paccanīkānaṃ sallikhanato ‘‘sallekho’’ti vuttā. Tasmiṃ nekkhammādike sattatiṃsapabhede sallekhe ñāṇaṃ sallekhaṭṭhe ñāṇanti.
ஸல்லேக²ட்ட²ஞாணனித்³தே³ஸவண்ணனா நிட்டி²தா.
Sallekhaṭṭhañāṇaniddesavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / படிஸம்பி⁴தா³மக்³க³பாளி • Paṭisambhidāmaggapāḷi / 37. ஸல்லேக²ட்ட²ஞாணனித்³தே³ஸோ • 37. Sallekhaṭṭhañāṇaniddeso
