| Library / Tipiṭaka / ਤਿਪਿਟਕ • Tipiṭaka / ਪਟਿਸਮ੍ਭਿਦਾਮਗ੍ਗ-ਅਟ੍ਠਕਥਾ • Paṭisambhidāmagga-aṭṭhakathā |
੩੭. ਸਲ੍ਲੇਖਟ੍ਠਞਾਣਨਿਦ੍ਦੇਸવਣ੍ਣਨਾ
37. Sallekhaṭṭhañāṇaniddesavaṇṇanā
੮੮. ਸਲ੍ਲੇਖਟ੍ਠਞਾਣਨਿਦ੍ਦੇਸੇ ਰਾਗੋ ਪੁਥੂਤਿ ਰਾਗੋ વਿਸੁਂ, ਲੋਕੁਤ੍ਤਰੇਹਿ ਅਸਮ੍ਮਿਸ੍ਸੋਤਿ ਅਤ੍ਥੋ। ਏਸ ਨਯੋ ਸੇਸੇਸੁ। ਰਾਗੋਤਿ ਰਞ੍ਜਨਟ੍ਠੇਨ। ਦੋਸੋਤਿ ਦੁਸ੍ਸਨਟ੍ਠੇਨ। ਮੋਹੋਤਿ ਮੁਯ੍ਹਨਟ੍ਠੇਨ। ਰਞ੍ਜਨਲਕ੍ਖਣੋ ਰਾਗੋ, ਦੁਸ੍ਸਨਲਕ੍ਖਣੋ ਦੋਸੋ, ਮੁਯ੍ਹਨਲਕ੍ਖਣੋ ਮੋਹੋਤਿ ਇਮੇ ਤਯੋ ਸੀਸਕਿਲੇਸੇ વਤ੍વਾ ਇਦਾਨਿ ਪਭੇਦਤੋ ਦਸ੍ਸੇਨ੍ਤੋ ਕੋਧੋਤਿਆਦਿਮਾਹ। ਤਤ੍ਥ ਕੁਜ੍ਝਨਲਕ੍ਖਣੋ ਕੋਧੋਤਿ ਇਧ ਸਤ੍ਤવਤ੍ਥੁਕੋ ਅਧਿਪ੍ਪੇਤੋ। ਉਪਨਨ੍ਧਨਲਕ੍ਖਣੋ ਉਪਨਾਹੋ, ਦਲ਼੍ਹਭਾવਪ੍ਪਤ੍ਤੋ ਕੋਧੋਯੇવ। ਪਰਗੁਣਮਕ੍ਖਨਲਕ੍ਖਣੋ ਮਕ੍ਖੋ, ਪਰਗੁਣਪੁਞ੍ਛਨਨ੍ਤਿ ਅਤ੍ਥੋ। ਯੁਗਗ੍ਗਾਹਲਕ੍ਖਣੋ ਪਲ਼ਾਸੋ, ਯੁਗਗ੍ਗਾਹવਸੇਨ ਪਰਗੁਣਦਸ੍ਸਨਨ੍ਤਿ ਅਤ੍ਥੋ। ਪਰਸਮ੍ਪਤ੍ਤਿਖੀਯਨਲਕ੍ਖਣਾ ਇਸ੍ਸਾ, ਉਸੂਯਨਾਤਿ ਅਤ੍ਥੋ । ਅਤ੍ਤਸਮ੍ਪਤ੍ਤਿਨਿਗੂਹਨਲਕ੍ਖਣਂ ਮਚ੍ਛਰਿਯਂ, ‘‘ਮਯ੍ਹਂ ਅਚ੍ਛਰਿਯਂ ਮਾ ਪਰਸ੍ਸ ਹੋਤੂ’’ਤਿ ਅਤ੍ਥੋ। ਅਤ੍ਤਨਾ ਕਤਪਾਪਪਟਿਚ੍ਛਾਦਨਲਕ੍ਖਣਾ ਮਾਯਾ, ਪਟਿਚ੍ਛਾਦਨਟ੍ਠੇਨ ਮਾਯਾ વਿਯਾਤਿ ਅਤ੍ਥੋ। ਅਤ੍ਤਨੋ ਅવਿਜ੍ਜਮਾਨਗੁਣਪ੍ਪਕਾਸਨਲਕ੍ਖਣਂ ਸਾਠੇਯ੍ਯਂ, ਸਠਭਾવੋਤਿ ਅਤ੍ਥੋ। ਚਿਤ੍ਤਸ੍ਸ ਉਦ੍ਧੁਮਾਤਭਾવਲਕ੍ਖਣੋ ਥਮ੍ਭੋ, ਥਦ੍ਧਭਾવੋਤਿ ਅਤ੍ਥੋ। ਕਰਣੁਤ੍ਤਰਿਯਲਕ੍ਖਣੋ ਸਾਰਮ੍ਭੋ। ਉਨ੍ਨਤਿਲਕ੍ਖਣੋ ਮਾਨੋ। ਅਬ੍ਭੁਨ੍ਨਤਿਲਕ੍ਖਣੋ ਅਤਿਮਾਨੋ। ਮਤ੍ਤਭਾવਲਕ੍ਖਣੋ ਮਦੋ। ਪਞ੍ਚਸੁ ਕਾਮਗੁਣੇਸੁ ਚਿਤ੍ਤવੋਸਗ੍ਗਲਕ੍ਖਣੋ ਪਮਾਦੋ।
88. Sallekhaṭṭhañāṇaniddese rāgo puthūti rāgo visuṃ, lokuttarehi asammissoti attho. Esa nayo sesesu. Rāgoti rañjanaṭṭhena. Dosoti dussanaṭṭhena. Mohoti muyhanaṭṭhena. Rañjanalakkhaṇo rāgo, dussanalakkhaṇo doso, muyhanalakkhaṇo mohoti ime tayo sīsakilese vatvā idāni pabhedato dassento kodhotiādimāha. Tattha kujjhanalakkhaṇo kodhoti idha sattavatthuko adhippeto. Upanandhanalakkhaṇo upanāho, daḷhabhāvappatto kodhoyeva. Paraguṇamakkhanalakkhaṇo makkho, paraguṇapuñchananti attho. Yugaggāhalakkhaṇo paḷāso, yugaggāhavasena paraguṇadassananti attho. Parasampattikhīyanalakkhaṇā issā, usūyanāti attho . Attasampattinigūhanalakkhaṇaṃ macchariyaṃ, ‘‘mayhaṃ acchariyaṃ mā parassa hotū’’ti attho. Attanā katapāpapaṭicchādanalakkhaṇā māyā, paṭicchādanaṭṭhena māyā viyāti attho. Attano avijjamānaguṇappakāsanalakkhaṇaṃ sāṭheyyaṃ, saṭhabhāvoti attho. Cittassa uddhumātabhāvalakkhaṇo thambho, thaddhabhāvoti attho. Karaṇuttariyalakkhaṇo sārambho. Unnatilakkhaṇo māno. Abbhunnatilakkhaṇo atimāno. Mattabhāvalakkhaṇo mado. Pañcasu kāmaguṇesu cittavosaggalakkhaṇo pamādo.
ਏવਂ વਿਸੁਂ વਿਸੁਂ ਕਿਲੇਸવਸੇਨ ਪੁਥੂ ਦਸ੍ਸੇਤ੍વਾ વੁਤ੍ਤਕਿਲੇਸੇ ਚ ਅવੁਤ੍ਤੇ ਚ ਅਞ੍ਞੇ ਸਬ੍ਬਸਙ੍ਗਾਹਿਕવਸੇਨ ਦਸ੍ਸੇਤੁਂ ਸਬ੍ਬੇ ਕਿਲੇਸਾਤਿਆਦਿਮਾਹ। ਤਤ੍ਥ ਦਿਟ੍ਠਧਮ੍ਮਸਮ੍ਪਰਾਯੇਸੁ ਸਤ੍ਤੇ ਕਿਲੇਸੇਨ੍ਤਿ ਉਪਤਾਪੇਨ੍ਤਿ વਿਬਾਧੇਨ੍ਤੀਤਿ ਕਿਲੇਸਾ। ਅਕੁਸਲਕਮ੍ਮਪਥਸਙ੍ਗਹਿਤਾ ਚ ਅਸਙ੍ਗਹਿਤਾ ਚ। ਦੁਟ੍ਠੁ ਚਰਿਤਾ, ਦੁਟ੍ਠਾ વਾ ਚਰਿਤਾਤਿ ਦੁਚ੍ਚਰਿਤਾ। ਤੇ ਪਨ ਕਾਯਦੁਚ੍ਚਰਿਤਂ વਚੀਦੁਚ੍ਚਰਿਤਂ ਮਨੋਦੁਚ੍ਚਰਿਤਨ੍ਤਿ ਤਿਪ੍ਪਕਾਰਾ। વਿਪਾਕਂ ਅਭਿਸਙ੍ਖਰੋਨ੍ਤੀਤਿ ਅਭਿਸਙ੍ਖਾਰਾ। ਤੇਪਿ ਪੁਞ੍ਞਾਭਿਸਙ੍ਖਾਰੋ ਅਪੁਞ੍ਞਾਭਿਸਙ੍ਖਾਰੋ ਆਨੇਞ੍ਜਾਭਿਸਙ੍ਖਾਰੋਤਿ ਤਿਪ੍ਪਕਾਰਾ। વਿਪਾਕવਸੇਨ ਭવਂ ਗਚ੍ਛਨ੍ਤੀਤਿਭવਗਾਮਿਨੋ , ਭવਗਾਮਿਨੋ ਕਮ੍ਮਾ ਭવਗਾਮਿਕਮ੍ਮਾ। ਇਮਿਨਾ ਅਭਿਸਙ੍ਖਾਰਭਾવੇਪਿ ਸਤਿ ਅવੇਦਨੀਯਾਨਿ ਕਮ੍ਮਾਨਿ ਪਟਿਕ੍ਖਿਤ੍ਤਾਨਿ ਹੋਨ੍ਤੀਤਿ ਅਯਂ વਿਸੇਸੋ। ‘‘ਦੁਚ੍ਚਰਿਤਾ’’ਤਿ ਚ ‘‘ਕਮ੍ਮਾ’’ਤਿ ਚ ਲਿਙ੍ਗવਿਪਲ੍ਲਾਸੋ ਕਤੋ। ਨਾਨਤ੍ਤੇਕਤ੍ਤਨ੍ਤਿ ਏਤ੍ਥ ਉਦ੍ਦੇਸੇ ਏਕਤ੍ਤਸਦ੍ਦਸ੍ਸ ਅਭਾવੇਪਿ ਨਾਨਤ੍ਤੇਕਤ੍ਤਾਨਂ ਅਞ੍ਞਮਞ੍ਞਾਪੇਕ੍ਖਤ੍ਤਾ ਏਕਤ੍ਤਮ੍ਪਿ ਨਿਦ੍ਦਿਸਿਤੁਕਾਮੇਨ ‘‘ਨਾਨਤ੍ਤੇਕਤ੍ਤ’’ਨ੍ਤਿ ਉਦ੍ਦੇਸੋ ਕਤੋ। ਨਾਨਤ੍ਤਸਲ੍ਲੇਖਕੇ ਏਕਤ੍ਤੇ ਦਸ੍ਸਿਤੇ ਸਲ੍ਲੇਖਞਾਣਂ ਸੁਖੇਨ ਦਸ੍ਸੀਯਤੀਤਿ। ਨਾਨਤ੍ਤਨ੍ਤਿ ਅਨવਟ੍ਠਿਤਤ੍ਤਾ ਸਪਰਿਪ੍ਫਨ੍ਦਤ੍ਤਾ ਚ ਨਾਨਾਸਭਾવੋ। ਏਕਤ੍ਤਨ੍ਤਿ ਅવਟ੍ਠਿਤਤ੍ਤਾ ਅਪਰਿਪ੍ਫਨ੍ਦਤ੍ਤਾ ਚ ਏਕਸਭਾવੋ।
Evaṃ visuṃ visuṃ kilesavasena puthū dassetvā vuttakilese ca avutte ca aññe sabbasaṅgāhikavasena dassetuṃ sabbe kilesātiādimāha. Tattha diṭṭhadhammasamparāyesu satte kilesenti upatāpenti vibādhentīti kilesā. Akusalakammapathasaṅgahitā ca asaṅgahitā ca. Duṭṭhu caritā, duṭṭhā vā caritāti duccaritā. Te pana kāyaduccaritaṃ vacīduccaritaṃ manoduccaritanti tippakārā. Vipākaṃ abhisaṅkharontīti abhisaṅkhārā. Tepi puññābhisaṅkhāro apuññābhisaṅkhāro āneñjābhisaṅkhāroti tippakārā. Vipākavasena bhavaṃ gacchantītibhavagāmino , bhavagāmino kammā bhavagāmikammā. Iminā abhisaṅkhārabhāvepi sati avedanīyāni kammāni paṭikkhittāni hontīti ayaṃ viseso. ‘‘Duccaritā’’ti ca ‘‘kammā’’ti ca liṅgavipallāso kato. Nānattekattanti ettha uddese ekattasaddassa abhāvepi nānattekattānaṃ aññamaññāpekkhattā ekattampi niddisitukāmena ‘‘nānattekatta’’nti uddeso kato. Nānattasallekhake ekatte dassite sallekhañāṇaṃ sukhena dassīyatīti. Nānattanti anavaṭṭhitattā saparipphandattā ca nānāsabhāvo. Ekattanti avaṭṭhitattā aparipphandattā ca ekasabhāvo.
ਚਰਣਤੇਜੋਤਿ ਚਰਨ੍ਤਿ ਤੇਨ ਅਗਤਂ ਦਿਸਂ ਨਿਬ੍ਬਾਨਂ ਗਚ੍ਛਨ੍ਤੀਤਿ ਚਰਣਂ। ਕਿਂ ਤਂ? ਸੀਲਂ। ਤਦੇવ ਪਟਿਪਕ੍ਖਤਾਪਨਟ੍ਠੇਨ ਤੇਜੋ। ਗੁਣਤੇਜੋਤਿ ਸੀਲੇਨ ਲਦ੍ਧਪਤਿਟ੍ਠੋ ਸਮਾਧਿਤੇਜੋ। ਪਞ੍ਞਾਤੇਜੋਤਿ ਸਮਾਧਿਨਾ ਲਦ੍ਧਪਤਿਟ੍ਠੋ વਿਪਸ੍ਸਨਾਤੇਜੋ। ਪੁਞ੍ਞਤੇਜੋਤਿ વਿਪਸ੍ਸਨਾਹਿ ਲਦ੍ਧਪਤਿਟ੍ਠੋ ਅਰਿਯਮਗ੍ਗਕੁਸਲਤੇਜੋ। ਧਮ੍ਮਤੇਜੋਤਿ ਚਤੁਨ੍ਨਂ ਤੇਜਾਨਂ ਪਤਿਟ੍ਠਾਭੂਤੋ ਬੁਦ੍ਧવਚਨਤੇਜੋ। ਚਰਣਤੇਜੇਨ ਤੇਜਿਤਤ੍ਤਾਤਿ ਸੀਲਤੇਜੇਨ ਤਿਖਿਣੀਕਤਤ੍ਤਾ। ਦੁਸ੍ਸੀਲ੍ਯਤੇਜਨ੍ਤਿ ਦੁਸ੍ਸੀਲਭਾવਸਙ੍ਖਾਤਂ ਤੇਜਂ। ਤਮ੍ਪਿ ਹਿ ਸਨ੍ਤਾਨਂ ਤਾਪਨਤੋ ਤੇਜੋ ਨਾਮ। ਪਰਿਯਾਦਿਯਤੀਤਿ ਖੇਪੇਤਿ। ਅਗੁਣਤੇਜਨ੍ਤਿ ਸਮਾਧਿਸ੍ਸ ਪਟਿਪਕ੍ਖਂ વਿਕ੍ਖੇਪਤੇਜਂ। ਦੁਪ੍ਪਞ੍ਞਤੇਜਨ੍ਤਿ વਿਪਸ੍ਸਨਾਞਾਣਪਟਿਪਕ੍ਖਂ ਮੋਹਤੇਜਂ। ਅਪੁਞ੍ਞਤੇਜਨ੍ਤਿ ਤਂਤਂਮਗ੍ਗવਜ੍ਝਕਿਲੇਸਪ੍ਪਹਾਨੇਨ ਕਿਲੇਸਸਹਾਯਂ ਅਕੁਸਲਕਮ੍ਮਤੇਜਂ। ਨ ਕੇવਲਞ੍ਹੇਤਂ ਅਪੁਞ੍ਞਮੇવ ਖੇਪੇਤਿ, ‘‘ਅਤ੍ਥਿ, ਭਿਕ੍ਖવੇ, ਕਮ੍ਮਂ ਅਕਣ੍ਹਂ ਅਸੁਕ੍ਕਂ ਅਕਣ੍ਹਅਸੁਕ੍ਕવਿਪਾਕਂ ਕਮ੍ਮਂ ਕਮ੍ਮਕ੍ਖਯਾਯ ਸਂવਤ੍ਤਤੀ’’ਤਿ (ਅ॰ ਨਿ॰ ੪.੨੩੩; ਦੀ॰ ਨਿ॰ ੩.੩੧੨; ਮ॰ ਨਿ॰ ੨.੧੮) વਚਨਤੋ ਕੁਸਲਕਮ੍ਮਮ੍ਪਿ ਖੇਪੇਤਿਯੇવ। ਪੁਞ੍ਞਤੇਜਪਟਿਪਕ੍ਖવਸੇਨ ਅਪੁਞ੍ਞਤੇਜਮੇવ વੁਤ੍ਤਂ। ਅਧਮ੍ਮਤੇਜਨ੍ਤਿ ਨਾਨਾਤਿਤ੍ਥਿਯਾਨਂ ਸਮਯવਚਨਤੇਜਂ। ਇਮਸ੍ਸ ਞਾਣਸ੍ਸ ਉਦ੍ਦੇਸવਣ੍ਣਨਾਯਂ વੁਤ੍ਤੇ ਦੁਤਿਯੇ ਅਤ੍ਥવਿਕਪ੍ਪੇ ਰਾਗਾਦਯੋ ਏਕੂਨવੀਸਤਿ ਪੁਥੁ ਦੁਸ੍ਸੀਲ੍ਯਤੇਜਾ ਹੋਨ੍ਤਿ। ‘‘ਅਭਿਸਙ੍ਖਾਰਾ, ਭવਗਾਮਿਕਮ੍ਮਾ’’ਤਿ ਏਤ੍ਥ ਅਪੁਞ੍ਞਾਭਿਸਙ੍ਖਾਰਾ ਅਕੁਸਲਕਮ੍ਮਞ੍ਚ ਅਪੁਞ੍ਞਤੇਜਾ ਹੋਨ੍ਤਿ, ਆਨੇਞ੍ਜਾਭਿਸਙ੍ਖਾਰਾਨਿ ਲੋਕਿਯਕੁਸਲਕਮ੍ਮਾਨਿ ਪੁਞ੍ਞਤੇਜੇਨੇવ ਖੇਪਨੀਯਤੋ ਅਪੁਞ੍ਞਤੇਜਪਕ੍ਖਿਕਾવ ਹੋਨ੍ਤਿ। ਕਾਮਚ੍ਛਨ੍ਦਾਦਯੋ ਪਞ੍ਚਦਸ ਨਾਨਤ੍ਤਾ ਅਗੁਣਤੇਜਾ ਹੋਨ੍ਤਿ, ਨਿਚ੍ਚਸਞ੍ਞਾਦਯੋ ਅਟ੍ਠਾਰਸ ਨਾਨਤ੍ਤਾ ਦੁਪ੍ਪਞ੍ਞਤੇਜਾ ਹੋਨ੍ਤਿ, ਚਤੁਮਗ੍ਗવਜ੍ਝਾ ਚਤ੍ਤਾਰੋ ਨਾਨਤ੍ਤਾ ਅਪੁਞ੍ਞਤੇਜਾ ਹੋਨ੍ਤਿ। ਸੋਤਾਪਤ੍ਤਿਮਗ੍ਗવਜ੍ਝਨਾਨਤ੍ਤੇਨ ਅਧਮ੍ਮਤੇਜੋ ਸਙ੍ਗਹੇਤਬ੍ਬੋ।
Caraṇatejoti caranti tena agataṃ disaṃ nibbānaṃ gacchantīti caraṇaṃ. Kiṃ taṃ? Sīlaṃ. Tadeva paṭipakkhatāpanaṭṭhena tejo. Guṇatejoti sīlena laddhapatiṭṭho samādhitejo. Paññātejoti samādhinā laddhapatiṭṭho vipassanātejo. Puññatejoti vipassanāhi laddhapatiṭṭho ariyamaggakusalatejo. Dhammatejoti catunnaṃ tejānaṃ patiṭṭhābhūto buddhavacanatejo. Caraṇatejena tejitattāti sīlatejena tikhiṇīkatattā. Dussīlyatejanti dussīlabhāvasaṅkhātaṃ tejaṃ. Tampi hi santānaṃ tāpanato tejo nāma. Pariyādiyatīti khepeti. Aguṇatejanti samādhissa paṭipakkhaṃ vikkhepatejaṃ. Duppaññatejanti vipassanāñāṇapaṭipakkhaṃ mohatejaṃ. Apuññatejanti taṃtaṃmaggavajjhakilesappahānena kilesasahāyaṃ akusalakammatejaṃ. Na kevalañhetaṃ apuññameva khepeti, ‘‘atthi, bhikkhave, kammaṃ akaṇhaṃ asukkaṃ akaṇhaasukkavipākaṃ kammaṃ kammakkhayāya saṃvattatī’’ti (a. ni. 4.233; dī. ni. 3.312; ma. ni. 2.18) vacanato kusalakammampi khepetiyeva. Puññatejapaṭipakkhavasena apuññatejameva vuttaṃ. Adhammatejanti nānātitthiyānaṃ samayavacanatejaṃ. Imassa ñāṇassa uddesavaṇṇanāyaṃ vutte dutiye atthavikappe rāgādayo ekūnavīsati puthu dussīlyatejā honti. ‘‘Abhisaṅkhārā, bhavagāmikammā’’ti ettha apuññābhisaṅkhārā akusalakammañca apuññatejā honti, āneñjābhisaṅkhārāni lokiyakusalakammāni puññatejeneva khepanīyato apuññatejapakkhikāva honti. Kāmacchandādayo pañcadasa nānattā aguṇatejā honti, niccasaññādayo aṭṭhārasa nānattā duppaññatejā honti, catumaggavajjhā cattāro nānattā apuññatejā honti. Sotāpattimaggavajjhanānattena adhammatejo saṅgahetabbo.
ਨਿਦ੍ਦੇਸੇ ਸਲ੍ਲੇਖਪਟਿਪਕ੍ਖੇਨ ਅਸਲ੍ਲੇਖੇਨ ਸਲ੍ਲੇਖਂ ਦਸ੍ਸੇਤੁਕਾਮੇਨ ਅਸਲ੍ਲੇਖਪੁਬ੍ਬਕੋ ਸਲ੍ਲੇਖੋ ਨਿਦ੍ਦਿਟ੍ਠੋ। ਨੇਕ੍ਖਮ੍ਮਾਦਯੋ ਸਤ੍ਤਤਿਂਸ ਏਕਤ੍ਤਧਮ੍ਮਾવ ਪਚ੍ਚਨੀਕਾਨਂ ਸਲ੍ਲਿਖਨਤੋ ‘‘ਸਲ੍ਲੇਖੋ’’ਤਿ વੁਤ੍ਤਾ। ਤਸ੍ਮਿਂ ਨੇਕ੍ਖਮ੍ਮਾਦਿਕੇ ਸਤ੍ਤਤਿਂਸਪਭੇਦੇ ਸਲ੍ਲੇਖੇ ਞਾਣਂ ਸਲ੍ਲੇਖਟ੍ਠੇ ਞਾਣਨ੍ਤਿ।
Niddese sallekhapaṭipakkhena asallekhena sallekhaṃ dassetukāmena asallekhapubbako sallekho niddiṭṭho. Nekkhammādayo sattatiṃsa ekattadhammāva paccanīkānaṃ sallikhanato ‘‘sallekho’’ti vuttā. Tasmiṃ nekkhammādike sattatiṃsapabhede sallekhe ñāṇaṃ sallekhaṭṭhe ñāṇanti.
ਸਲ੍ਲੇਖਟ੍ਠਞਾਣਨਿਦ੍ਦੇਸવਣ੍ਣਨਾ ਨਿਟ੍ਠਿਤਾ।
Sallekhaṭṭhañāṇaniddesavaṇṇanā niṭṭhitā.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਖੁਦ੍ਦਕਨਿਕਾਯ • Khuddakanikāya / ਪਟਿਸਮ੍ਭਿਦਾਮਗ੍ਗਪਾਲ਼ਿ • Paṭisambhidāmaggapāḷi / ੩੭. ਸਲ੍ਲੇਖਟ੍ਠਞਾਣਨਿਦ੍ਦੇਸੋ • 37. Sallekhaṭṭhañāṇaniddeso
