| Library / Tipiṭaka / တိပိဋက • Tipiṭaka / ပဋိသမ္ဘိဒာမဂ္ဂပာဠိ • Paṭisambhidāmaggapāḷi |
၃၇. သလ္လေခဋ္ဌဉာဏနိဒ္ဒေသော
37. Sallekhaṭṭhañāṇaniddeso
၈၈. ကထံ ပုထုနာနတ္တေကတ္တတေဇပရိယာဒာနေ ပညာ သလ္လေခဋ္ဌေ 1 ဉာဏံ? ပုထူတိ – ရာဂော ပုထု, ဒောသော ပုထု, မောဟော ပုထု, ကောဓော။ပေ.။ ဥပနာဟော။ မက္ခော။ ပဠာသော။ ဣသ္သာ။ မစ္ဆရိယံ။ မာယာ။ သာဌေယ္ယံ။ ထမ္ဘော။ သာရမ္ဘော။ မာနော။ အတိမာနော။ မဒော။ ပမာဒော။ သဗ္ဗေ ကိလေသာ။ သဗ္ဗေ ဒုစ္စရိတာ။ သဗ္ဗေ အဘိသင္ခာရာ။ သဗ္ဗေ ဘဝဂာမိကမ္မာ။
88. Kathaṃ puthunānattekattatejapariyādāne paññā sallekhaṭṭhe 2 ñāṇaṃ? Puthūti – rāgo puthu, doso puthu, moho puthu, kodho…pe… upanāho… makkho… paḷāso… issā… macchariyaṃ… māyā… sāṭheyyaṃ… thambho… sārambho… māno… atimāno… mado… pamādo… sabbe kilesā… sabbe duccaritā… sabbe abhisaṅkhārā… sabbe bhavagāmikammā.
နာနတ္တေကတ္တန္တိ ကာမစ္ဆန္ဒော နာနတ္တံ, နေက္ခမ္မံ ဧကတ္တံ။ ဗ္ယာပာဒော နာနတ္တံ, အဗ္ယာပာဒော ဧကတ္တံ။ ထိနမိဒ္ဓံ နာနတ္တံ, အာလောကသညာ ဧကတ္တံ။ ဥဒ္ဓစ္စံ နာနတ္တံ, အဝိက္ခေပော ဧကတ္တံ။ ဝိစိကိစ္ဆာ နာနတ္တံ, ဓမ္မဝဝတ္ထာနံ ဧကတ္တံ။ အဝိဇ္ဇာ နာနတ္တံ, ဉာဏံ ဧကတ္တံ။ အရတိ နာနတ္တံ, ပာမောဇ္ဇံ ဧကတ္တံ။ နီဝရဏာ နာနတ္တံ, ပဌမံ ဈာနံ ဧကတ္တံ။ပေ.။ သဗ္ဗေ ကိလေသာ နာနတ္တံ, အရဟတ္တမဂ္ဂော ဧကတ္တံ။
Nānattekattanti kāmacchando nānattaṃ, nekkhammaṃ ekattaṃ. Byāpādo nānattaṃ, abyāpādo ekattaṃ. Thinamiddhaṃ nānattaṃ, ālokasaññā ekattaṃ. Uddhaccaṃ nānattaṃ, avikkhepo ekattaṃ. Vicikicchā nānattaṃ, dhammavavatthānaṃ ekattaṃ. Avijjā nānattaṃ, ñāṇaṃ ekattaṃ. Arati nānattaṃ, pāmojjaṃ ekattaṃ. Nīvaraṇā nānattaṃ, paṭhamaṃ jhānaṃ ekattaṃ…pe… sabbe kilesā nānattaṃ, arahattamaggo ekattaṃ.
တေဇောတိ ပဉ္စ တေဇာ – စရဏတေဇော, ဂုဏတေဇော, ပညာတေဇော, ပုညတေဇော, ဓမ္မတေဇော။ စရဏတေဇေန တေဇိတတ္တာ ဒုသ္သီလ္ယတေဇံ ပရိယာဒိယတိ။ ဂုဏတေဇေန တေဇိတတ္တာ အဂုဏတေဇံ ပရိယာဒိယတိ။ ပညာတေဇေန တေဇိတတ္တာ ဒုပ္ပညတေဇံ ပရိယာဒိယတိ။ ပုညတေဇေန တေဇိတတ္တာ အပုညတေဇံ ပရိယာဒိယတိ။ ဓမ္မတေဇေန တေဇိတတ္တာ အဓမ္မတေဇံ ပရိယာဒိယတိ။
Tejoti pañca tejā – caraṇatejo, guṇatejo, paññātejo, puññatejo, dhammatejo. Caraṇatejena tejitattā dussīlyatejaṃ pariyādiyati. Guṇatejena tejitattā aguṇatejaṃ pariyādiyati. Paññātejena tejitattā duppaññatejaṃ pariyādiyati. Puññatejena tejitattā apuññatejaṃ pariyādiyati. Dhammatejena tejitattā adhammatejaṃ pariyādiyati.
သလ္လေခောတိ ကာမစ္ဆန္ဒော အသလ္လေခော, နေက္ခမ္မံ သလ္လေခော ။ ဗ္ယာပာဒော အသလ္လေခော, အဗ္ယာပာဒော သလ္လေခော။ ထိနမိဒ္ဓံ အသလ္လေခော, အာလောကသညာ သလ္လေခော။ ဥဒ္ဓစ္စံ အသလ္လေခော, အဝိက္ခေပော သလ္လေခော။ ဝိစိကိစ္ဆာ အသလ္လေခော, ဓမ္မဝဝတ္ထာနံ သလ္လေခော။ အဝိဇ္ဇာ အသလ္လေခော, ဉာဏံ သလ္လေခော။ အရတိ အသလ္လေခော, ပာမောဇ္ဇံ သလ္လေခော။ နီဝရဏာ အသလ္လေခော, ပဌမံ ဈာနံ သလ္လေခော။ပေ.။ သဗ္ဗကိလေသာ အသလ္လေခော, အရဟတ္တမဂ္ဂော သလ္လေခော။ တံ ဉာတဋ္ဌေန ဉာဏံ, ပဇာနနဋ္ဌေန ပညာ။ တေန ဝုစ္စတိ – ‘‘ပုထုနာနတ္တတေဇပရိယာဒာနေ ပညာ သလ္လေခဋ္ဌေ ဉာဏံ’’။
Sallekhoti kāmacchando asallekho, nekkhammaṃ sallekho . Byāpādo asallekho, abyāpādo sallekho. Thinamiddhaṃ asallekho, ālokasaññā sallekho. Uddhaccaṃ asallekho, avikkhepo sallekho. Vicikicchā asallekho, dhammavavatthānaṃ sallekho. Avijjā asallekho, ñāṇaṃ sallekho. Arati asallekho, pāmojjaṃ sallekho. Nīvaraṇā asallekho, paṭhamaṃ jhānaṃ sallekho…pe… sabbakilesā asallekho, arahattamaggo sallekho. Taṃ ñātaṭṭhena ñāṇaṃ, pajānanaṭṭhena paññā. Tena vuccati – ‘‘puthunānattatejapariyādāne paññā sallekhaṭṭhe ñāṇaṃ’’.
သလ္လေခဋ္ဌဉာဏနိဒ္ဒေသော သတ္တတိံသတိမော။
Sallekhaṭṭhañāṇaniddeso sattatiṃsatimo.
Footnotes:
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / ခုဒ္ဒကနိကာယ (အဋ္ဌကထာ) • Khuddakanikāya (aṭṭhakathā) / ပဋိသမ္ဘိဒာမဂ္ဂ-အဋ္ဌကထာ • Paṭisambhidāmagga-aṭṭhakathā / ၃၇. သလ္လေခဋ္ဌဉာဏနိဒ္ဒေသဝဏ္ဏနာ • 37. Sallekhaṭṭhañāṇaniddesavaṇṇanā
