| Library / Tipiṭaka / ತಿಪಿಟಕ • Tipiṭaka / ಪಟಿಸಮ್ಭಿದಾಮಗ್ಗಪಾಳಿ • Paṭisambhidāmaggapāḷi |
೩೭. ಸಲ್ಲೇಖಟ್ಠಞಾಣನಿದ್ದೇಸೋ
37. Sallekhaṭṭhañāṇaniddeso
೮೮. ಕಥಂ ಪುಥುನಾನತ್ತೇಕತ್ತತೇಜಪರಿಯಾದಾನೇ ಪಞ್ಞಾ ಸಲ್ಲೇಖಟ್ಠೇ 1 ಞಾಣಂ? ಪುಥೂತಿ – ರಾಗೋ ಪುಥು, ದೋಸೋ ಪುಥು, ಮೋಹೋ ಪುಥು, ಕೋಧೋ…ಪೇ॰… ಉಪನಾಹೋ… ಮಕ್ಖೋ… ಪಳಾಸೋ… ಇಸ್ಸಾ… ಮಚ್ಛರಿಯಂ… ಮಾಯಾ… ಸಾಠೇಯ್ಯಂ… ಥಮ್ಭೋ… ಸಾರಮ್ಭೋ… ಮಾನೋ… ಅತಿಮಾನೋ… ಮದೋ… ಪಮಾದೋ… ಸಬ್ಬೇ ಕಿಲೇಸಾ… ಸಬ್ಬೇ ದುಚ್ಚರಿತಾ… ಸಬ್ಬೇ ಅಭಿಸಙ್ಖಾರಾ… ಸಬ್ಬೇ ಭವಗಾಮಿಕಮ್ಮಾ।
88. Kathaṃ puthunānattekattatejapariyādāne paññā sallekhaṭṭhe 2 ñāṇaṃ? Puthūti – rāgo puthu, doso puthu, moho puthu, kodho…pe… upanāho… makkho… paḷāso… issā… macchariyaṃ… māyā… sāṭheyyaṃ… thambho… sārambho… māno… atimāno… mado… pamādo… sabbe kilesā… sabbe duccaritā… sabbe abhisaṅkhārā… sabbe bhavagāmikammā.
ನಾನತ್ತೇಕತ್ತನ್ತಿ ಕಾಮಚ್ಛನ್ದೋ ನಾನತ್ತಂ, ನೇಕ್ಖಮ್ಮಂ ಏಕತ್ತಂ। ಬ್ಯಾಪಾದೋ ನಾನತ್ತಂ, ಅಬ್ಯಾಪಾದೋ ಏಕತ್ತಂ। ಥಿನಮಿದ್ಧಂ ನಾನತ್ತಂ, ಆಲೋಕಸಞ್ಞಾ ಏಕತ್ತಂ। ಉದ್ಧಚ್ಚಂ ನಾನತ್ತಂ, ಅವಿಕ್ಖೇಪೋ ಏಕತ್ತಂ। ವಿಚಿಕಿಚ್ಛಾ ನಾನತ್ತಂ, ಧಮ್ಮವವತ್ಥಾನಂ ಏಕತ್ತಂ। ಅವಿಜ್ಜಾ ನಾನತ್ತಂ, ಞಾಣಂ ಏಕತ್ತಂ। ಅರತಿ ನಾನತ್ತಂ, ಪಾಮೋಜ್ಜಂ ಏಕತ್ತಂ। ನೀವರಣಾ ನಾನತ್ತಂ, ಪಠಮಂ ಝಾನಂ ಏಕತ್ತಂ…ಪೇ॰… ಸಬ್ಬೇ ಕಿಲೇಸಾ ನಾನತ್ತಂ, ಅರಹತ್ತಮಗ್ಗೋ ಏಕತ್ತಂ।
Nānattekattanti kāmacchando nānattaṃ, nekkhammaṃ ekattaṃ. Byāpādo nānattaṃ, abyāpādo ekattaṃ. Thinamiddhaṃ nānattaṃ, ālokasaññā ekattaṃ. Uddhaccaṃ nānattaṃ, avikkhepo ekattaṃ. Vicikicchā nānattaṃ, dhammavavatthānaṃ ekattaṃ. Avijjā nānattaṃ, ñāṇaṃ ekattaṃ. Arati nānattaṃ, pāmojjaṃ ekattaṃ. Nīvaraṇā nānattaṃ, paṭhamaṃ jhānaṃ ekattaṃ…pe… sabbe kilesā nānattaṃ, arahattamaggo ekattaṃ.
ತೇಜೋತಿ ಪಞ್ಚ ತೇಜಾ – ಚರಣತೇಜೋ, ಗುಣತೇಜೋ, ಪಞ್ಞಾತೇಜೋ, ಪುಞ್ಞತೇಜೋ, ಧಮ್ಮತೇಜೋ। ಚರಣತೇಜೇನ ತೇಜಿತತ್ತಾ ದುಸ್ಸೀಲ್ಯತೇಜಂ ಪರಿಯಾದಿಯತಿ। ಗುಣತೇಜೇನ ತೇಜಿತತ್ತಾ ಅಗುಣತೇಜಂ ಪರಿಯಾದಿಯತಿ। ಪಞ್ಞಾತೇಜೇನ ತೇಜಿತತ್ತಾ ದುಪ್ಪಞ್ಞತೇಜಂ ಪರಿಯಾದಿಯತಿ। ಪುಞ್ಞತೇಜೇನ ತೇಜಿತತ್ತಾ ಅಪುಞ್ಞತೇಜಂ ಪರಿಯಾದಿಯತಿ। ಧಮ್ಮತೇಜೇನ ತೇಜಿತತ್ತಾ ಅಧಮ್ಮತೇಜಂ ಪರಿಯಾದಿಯತಿ।
Tejoti pañca tejā – caraṇatejo, guṇatejo, paññātejo, puññatejo, dhammatejo. Caraṇatejena tejitattā dussīlyatejaṃ pariyādiyati. Guṇatejena tejitattā aguṇatejaṃ pariyādiyati. Paññātejena tejitattā duppaññatejaṃ pariyādiyati. Puññatejena tejitattā apuññatejaṃ pariyādiyati. Dhammatejena tejitattā adhammatejaṃ pariyādiyati.
ಸಲ್ಲೇಖೋತಿ ಕಾಮಚ್ಛನ್ದೋ ಅಸಲ್ಲೇಖೋ, ನೇಕ್ಖಮ್ಮಂ ಸಲ್ಲೇಖೋ । ಬ್ಯಾಪಾದೋ ಅಸಲ್ಲೇಖೋ, ಅಬ್ಯಾಪಾದೋ ಸಲ್ಲೇಖೋ। ಥಿನಮಿದ್ಧಂ ಅಸಲ್ಲೇಖೋ, ಆಲೋಕಸಞ್ಞಾ ಸಲ್ಲೇಖೋ। ಉದ್ಧಚ್ಚಂ ಅಸಲ್ಲೇಖೋ, ಅವಿಕ್ಖೇಪೋ ಸಲ್ಲೇಖೋ। ವಿಚಿಕಿಚ್ಛಾ ಅಸಲ್ಲೇಖೋ, ಧಮ್ಮವವತ್ಥಾನಂ ಸಲ್ಲೇಖೋ। ಅವಿಜ್ಜಾ ಅಸಲ್ಲೇಖೋ, ಞಾಣಂ ಸಲ್ಲೇಖೋ। ಅರತಿ ಅಸಲ್ಲೇಖೋ, ಪಾಮೋಜ್ಜಂ ಸಲ್ಲೇಖೋ। ನೀವರಣಾ ಅಸಲ್ಲೇಖೋ, ಪಠಮಂ ಝಾನಂ ಸಲ್ಲೇಖೋ…ಪೇ॰… ಸಬ್ಬಕಿಲೇಸಾ ಅಸಲ್ಲೇಖೋ, ಅರಹತ್ತಮಗ್ಗೋ ಸಲ್ಲೇಖೋ। ತಂ ಞಾತಟ್ಠೇನ ಞಾಣಂ, ಪಜಾನನಟ್ಠೇನ ಪಞ್ಞಾ। ತೇನ ವುಚ್ಚತಿ – ‘‘ಪುಥುನಾನತ್ತತೇಜಪರಿಯಾದಾನೇ ಪಞ್ಞಾ ಸಲ್ಲೇಖಟ್ಠೇ ಞಾಣಂ’’।
Sallekhoti kāmacchando asallekho, nekkhammaṃ sallekho . Byāpādo asallekho, abyāpādo sallekho. Thinamiddhaṃ asallekho, ālokasaññā sallekho. Uddhaccaṃ asallekho, avikkhepo sallekho. Vicikicchā asallekho, dhammavavatthānaṃ sallekho. Avijjā asallekho, ñāṇaṃ sallekho. Arati asallekho, pāmojjaṃ sallekho. Nīvaraṇā asallekho, paṭhamaṃ jhānaṃ sallekho…pe… sabbakilesā asallekho, arahattamaggo sallekho. Taṃ ñātaṭṭhena ñāṇaṃ, pajānanaṭṭhena paññā. Tena vuccati – ‘‘puthunānattatejapariyādāne paññā sallekhaṭṭhe ñāṇaṃ’’.
ಸಲ್ಲೇಖಟ್ಠಞಾಣನಿದ್ದೇಸೋ ಸತ್ತತಿಂಸತಿಮೋ।
Sallekhaṭṭhañāṇaniddeso sattatiṃsatimo.
Footnotes:
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಖುದ್ದಕನಿಕಾಯ (ಅಟ್ಠಕಥಾ) • Khuddakanikāya (aṭṭhakathā) / ಪಟಿಸಮ್ಭಿದಾಮಗ್ಗ-ಅಟ್ಠಕಥಾ • Paṭisambhidāmagga-aṭṭhakathā / ೩೭. ಸಲ್ಲೇಖಟ್ಠಞಾಣನಿದ್ದೇಸವಣ್ಣನಾ • 37. Sallekhaṭṭhañāṇaniddesavaṇṇanā
