| Library / Tipiṭaka / තිපිටක • Tipiṭaka / පටිසම්‌භිදාමග්‌ගපාළි • Paṭisambhidāmaggapāḷi |
37. සල්‌ලෙඛට්‌ඨඤාණනිද්‌දෙසො
37. Sallekhaṭṭhañāṇaniddeso
88. කථං පුථුනානත්‌තෙකත්‌තතෙජපරියාදානෙ පඤ්‌ඤා සල්‌ලෙඛට්‌ඨෙ 1 ඤාණං? පුථූති – රාගො පුථු, දොසො පුථු, මොහො පුථු, කොධො…පෙ.… උපනාහො… මක්‌ඛො… පළාසො… ඉස්‌සා… මච්‌ඡරියං… මායා… සාඨෙය්‍යං… ථම්‌භො… සාරම්‌භො… මානො… අතිමානො… මදො… පමාදො… සබ්‌බෙ කිලෙසා… සබ්‌බෙ දුච්‌චරිතා… සබ්‌බෙ අභිසඞ්‌ඛාරා… සබ්‌බෙ භවගාමිකම්‌මා.
88. Kathaṃ puthunānattekattatejapariyādāne paññā sallekhaṭṭhe 2 ñāṇaṃ? Puthūti – rāgo puthu, doso puthu, moho puthu, kodho…pe… upanāho… makkho… paḷāso… issā… macchariyaṃ… māyā… sāṭheyyaṃ… thambho… sārambho… māno… atimāno… mado… pamādo… sabbe kilesā… sabbe duccaritā… sabbe abhisaṅkhārā… sabbe bhavagāmikammā.
නානත්‌තෙකත්‌තන්‌ති කාමච්‌ඡන්‌දො නානත්‌තං, නෙක්‌ඛම්‌මං එකත්‌තං. බ්‍යාපාදො නානත්‌තං, අබ්‍යාපාදො එකත්‌තං. ථිනමිද්‌ධං නානත්‌තං, ආලොකසඤ්‌ඤා එකත්‌තං. උද්‌ධච්‌චං නානත්‌තං, අවික්‌ඛෙපො එකත්‌තං. විචිකිච්‌ඡා නානත්‌තං, ධම්‌මවවත්‌ථානං එකත්‌තං. අවිජ්‌ජා නානත්‌තං, ඤාණං එකත්‌තං. අරති නානත්‌තං, පාමොජ්‌ජං එකත්‌තං. නීවරණා නානත්‌තං, පඨමං ඣානං එකත්‌තං…පෙ.… සබ්‌බෙ කිලෙසා නානත්‌තං, අරහත්‌තමග්‌ගො එකත්‌තං.
Nānattekattanti kāmacchando nānattaṃ, nekkhammaṃ ekattaṃ. Byāpādo nānattaṃ, abyāpādo ekattaṃ. Thinamiddhaṃ nānattaṃ, ālokasaññā ekattaṃ. Uddhaccaṃ nānattaṃ, avikkhepo ekattaṃ. Vicikicchā nānattaṃ, dhammavavatthānaṃ ekattaṃ. Avijjā nānattaṃ, ñāṇaṃ ekattaṃ. Arati nānattaṃ, pāmojjaṃ ekattaṃ. Nīvaraṇā nānattaṃ, paṭhamaṃ jhānaṃ ekattaṃ…pe… sabbe kilesā nānattaṃ, arahattamaggo ekattaṃ.
තෙජොති පඤ්‌ච තෙජා – චරණතෙජො, ගුණතෙජො, පඤ්‌ඤාතෙජො, පුඤ්‌ඤතෙජො, ධම්‌මතෙජො. චරණතෙජෙන තෙජිතත්‌තා දුස්‌සීල්‍යතෙජං පරියාදියති. ගුණතෙජෙන තෙජිතත්‌තා අගුණතෙජං පරියාදියති. පඤ්‌ඤාතෙජෙන තෙජිතත්‌තා දුප්‌පඤ්‌ඤතෙජං පරියාදියති. පුඤ්‌ඤතෙජෙන තෙජිතත්‌තා අපුඤ්‌ඤතෙජං පරියාදියති. ධම්‌මතෙජෙන තෙජිතත්‌තා අධම්‌මතෙජං පරියාදියති.
Tejoti pañca tejā – caraṇatejo, guṇatejo, paññātejo, puññatejo, dhammatejo. Caraṇatejena tejitattā dussīlyatejaṃ pariyādiyati. Guṇatejena tejitattā aguṇatejaṃ pariyādiyati. Paññātejena tejitattā duppaññatejaṃ pariyādiyati. Puññatejena tejitattā apuññatejaṃ pariyādiyati. Dhammatejena tejitattā adhammatejaṃ pariyādiyati.
සල්‌ලෙඛොති කාමච්‌ඡන්‌දො අසල්‌ලෙඛො, නෙක්‌ඛම්‌මං සල්‌ලෙඛො . බ්‍යාපාදො අසල්‌ලෙඛො, අබ්‍යාපාදො සල්‌ලෙඛො. ථිනමිද්‌ධං අසල්‌ලෙඛො, ආලොකසඤ්‌ඤා සල්‌ලෙඛො. උද්‌ධච්‌චං අසල්‌ලෙඛො, අවික්‌ඛෙපො සල්‌ලෙඛො. විචිකිච්‌ඡා අසල්‌ලෙඛො, ධම්‌මවවත්‌ථානං සල්‌ලෙඛො. අවිජ්‌ජා අසල්‌ලෙඛො, ඤාණං සල්‌ලෙඛො. අරති අසල්‌ලෙඛො, පාමොජ්‌ජං සල්‌ලෙඛො. නීවරණා අසල්‌ලෙඛො, පඨමං ඣානං සල්‌ලෙඛො…පෙ.… සබ්‌බකිලෙසා අසල්‌ලෙඛො, අරහත්‌තමග්‌ගො සල්‌ලෙඛො. තං ඤාතට්‌ඨෙන ඤාණං, පජානනට්‌ඨෙන පඤ්‌ඤා. තෙන වුච්‌චති – ‘‘පුථුනානත්‌තතෙජපරියාදානෙ පඤ්‌ඤා සල්‌ලෙඛට්‌ඨෙ ඤාණං’’.
Sallekhoti kāmacchando asallekho, nekkhammaṃ sallekho . Byāpādo asallekho, abyāpādo sallekho. Thinamiddhaṃ asallekho, ālokasaññā sallekho. Uddhaccaṃ asallekho, avikkhepo sallekho. Vicikicchā asallekho, dhammavavatthānaṃ sallekho. Avijjā asallekho, ñāṇaṃ sallekho. Arati asallekho, pāmojjaṃ sallekho. Nīvaraṇā asallekho, paṭhamaṃ jhānaṃ sallekho…pe… sabbakilesā asallekho, arahattamaggo sallekho. Taṃ ñātaṭṭhena ñāṇaṃ, pajānanaṭṭhena paññā. Tena vuccati – ‘‘puthunānattatejapariyādāne paññā sallekhaṭṭhe ñāṇaṃ’’.
සල්‌ලෙඛට්‌ඨඤාණනිද්‌දෙසො සත්‌තතිංසතිමො.
Sallekhaṭṭhañāṇaniddeso sattatiṃsatimo.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / ඛුද්‌දකනිකාය (අට්‌ඨකථා) • Khuddakanikāya (aṭṭhakathā) / පටිසම්‌භිදාමග්‌ග-අට්‌ඨකථා • Paṭisambhidāmagga-aṭṭhakathā / 37. සල්‌ලෙඛට්‌ඨඤාණනිද්‌දෙසවණ්‌ණනා • 37. Sallekhaṭṭhañāṇaniddesavaṇṇanā
