| Library / Tipiṭaka / ཏིཔིཊཀ • Tipiṭaka / པཊིསམྦྷིདཱམགྒཔཱལི༹ • Paṭisambhidāmaggapāḷi |
༣༧. སལླེཁཊྛཉཱཎནིདྡེསོ
37. Sallekhaṭṭhañāṇaniddeso
༨༨. ཀཐཾ པུཐུནཱནཏྟེཀཏྟཏེཛཔརིཡཱདཱནེ པཉྙཱ སལླེཁཊྛེ 1 ཉཱཎཾ? པུཐཱུཏི – རཱགོ པུཐུ, དོསོ པུཐུ, མོཧོ པུཐུ, ཀོདྷོ…པེ॰… ཨུཔནཱཧོ… མཀྑོ… པལཱ༹སོ… ཨིསྶཱ… མཙྪརིཡཾ… མཱཡཱ… སཱཋེཡྻཾ… ཐམྦྷོ… སཱརམྦྷོ… མཱནོ… ཨཏིམཱནོ… མདོ… པམཱདོ… སབྦེ ཀིལེསཱ… སབྦེ དུཙྩརིཏཱ… སབྦེ ཨབྷིསངྑཱརཱ… སབྦེ བྷཝགཱམིཀམྨཱ།
88. Kathaṃ puthunānattekattatejapariyādāne paññā sallekhaṭṭhe 2 ñāṇaṃ? Puthūti – rāgo puthu, doso puthu, moho puthu, kodho…pe… upanāho… makkho… paḷāso… issā… macchariyaṃ… māyā… sāṭheyyaṃ… thambho… sārambho… māno… atimāno… mado… pamādo… sabbe kilesā… sabbe duccaritā… sabbe abhisaṅkhārā… sabbe bhavagāmikammā.
ནཱནཏྟེཀཏྟནྟི ཀཱམཙྪནྡོ ནཱནཏྟཾ, ནེཀྑམྨཾ ཨེཀཏྟཾ། བྱཱཔཱདོ ནཱནཏྟཾ, ཨབྱཱཔཱདོ ཨེཀཏྟཾ། ཐིནམིདྡྷཾ ནཱནཏྟཾ, ཨཱལོཀསཉྙཱ ཨེཀཏྟཾ། ཨུདྡྷཙྩཾ ནཱནཏྟཾ, ཨཝིཀྑེཔོ ཨེཀཏྟཾ། ཝིཙིཀིཙྪཱ ནཱནཏྟཾ, དྷམྨཝཝཏྠཱནཾ ཨེཀཏྟཾ། ཨཝིཛྫཱ ནཱནཏྟཾ, ཉཱཎཾ ཨེཀཏྟཾ། ཨརཏི ནཱནཏྟཾ, པཱམོཛྫཾ ཨེཀཏྟཾ། ནཱིཝརཎཱ ནཱནཏྟཾ, པཋམཾ ཛྷཱནཾ ཨེཀཏྟཾ…པེ॰… སབྦེ ཀིལེསཱ ནཱནཏྟཾ, ཨརཧཏྟམགྒོ ཨེཀཏྟཾ།
Nānattekattanti kāmacchando nānattaṃ, nekkhammaṃ ekattaṃ. Byāpādo nānattaṃ, abyāpādo ekattaṃ. Thinamiddhaṃ nānattaṃ, ālokasaññā ekattaṃ. Uddhaccaṃ nānattaṃ, avikkhepo ekattaṃ. Vicikicchā nānattaṃ, dhammavavatthānaṃ ekattaṃ. Avijjā nānattaṃ, ñāṇaṃ ekattaṃ. Arati nānattaṃ, pāmojjaṃ ekattaṃ. Nīvaraṇā nānattaṃ, paṭhamaṃ jhānaṃ ekattaṃ…pe… sabbe kilesā nānattaṃ, arahattamaggo ekattaṃ.
ཏེཛོཏི པཉྩ ཏེཛཱ – ཙརཎཏེཛོ, གུཎཏེཛོ, པཉྙཱཏེཛོ, པུཉྙཏེཛོ, དྷམྨཏེཛོ། ཙརཎཏེཛེན ཏེཛིཏཏྟཱ དུསྶཱིལྱཏེཛཾ པརིཡཱདིཡཏི། གུཎཏེཛེན ཏེཛིཏཏྟཱ ཨགུཎཏེཛཾ པརིཡཱདིཡཏི། པཉྙཱཏེཛེན ཏེཛིཏཏྟཱ དུཔྤཉྙཏེཛཾ པརིཡཱདིཡཏི། པུཉྙཏེཛེན ཏེཛིཏཏྟཱ ཨཔུཉྙཏེཛཾ པརིཡཱདིཡཏི། དྷམྨཏེཛེན ཏེཛིཏཏྟཱ ཨདྷམྨཏེཛཾ པརིཡཱདིཡཏི།
Tejoti pañca tejā – caraṇatejo, guṇatejo, paññātejo, puññatejo, dhammatejo. Caraṇatejena tejitattā dussīlyatejaṃ pariyādiyati. Guṇatejena tejitattā aguṇatejaṃ pariyādiyati. Paññātejena tejitattā duppaññatejaṃ pariyādiyati. Puññatejena tejitattā apuññatejaṃ pariyādiyati. Dhammatejena tejitattā adhammatejaṃ pariyādiyati.
སལླེཁོཏི ཀཱམཙྪནྡོ ཨསལླེཁོ, ནེཀྑམྨཾ སལླེཁོ ། བྱཱཔཱདོ ཨསལླེཁོ, ཨབྱཱཔཱདོ སལླེཁོ། ཐིནམིདྡྷཾ ཨསལླེཁོ, ཨཱལོཀསཉྙཱ སལླེཁོ། ཨུདྡྷཙྩཾ ཨསལླེཁོ, ཨཝིཀྑེཔོ སལླེཁོ། ཝིཙིཀིཙྪཱ ཨསལླེཁོ, དྷམྨཝཝཏྠཱནཾ སལླེཁོ། ཨཝིཛྫཱ ཨསལླེཁོ, ཉཱཎཾ སལླེཁོ། ཨརཏི ཨསལླེཁོ, པཱམོཛྫཾ སལླེཁོ། ནཱིཝརཎཱ ཨསལླེཁོ, པཋམཾ ཛྷཱནཾ སལླེཁོ…པེ॰… སབྦཀིལེསཱ ཨསལླེཁོ, ཨརཧཏྟམགྒོ སལླེཁོ། ཏཾ ཉཱཏཊྛེན ཉཱཎཾ, པཛཱནནཊྛེན པཉྙཱ། ཏེན ཝུཙྩཏི – ‘‘པུཐུནཱནཏྟཏེཛཔརིཡཱདཱནེ པཉྙཱ སལླེཁཊྛེ ཉཱཎཾ’’།
Sallekhoti kāmacchando asallekho, nekkhammaṃ sallekho . Byāpādo asallekho, abyāpādo sallekho. Thinamiddhaṃ asallekho, ālokasaññā sallekho. Uddhaccaṃ asallekho, avikkhepo sallekho. Vicikicchā asallekho, dhammavavatthānaṃ sallekho. Avijjā asallekho, ñāṇaṃ sallekho. Arati asallekho, pāmojjaṃ sallekho. Nīvaraṇā asallekho, paṭhamaṃ jhānaṃ sallekho…pe… sabbakilesā asallekho, arahattamaggo sallekho. Taṃ ñātaṭṭhena ñāṇaṃ, pajānanaṭṭhena paññā. Tena vuccati – ‘‘puthunānattatejapariyādāne paññā sallekhaṭṭhe ñāṇaṃ’’.
སལླེཁཊྛཉཱཎནིདྡེསོ སཏྟཏིཾསཏིམོ།
Sallekhaṭṭhañāṇaniddeso sattatiṃsatimo.
Footnotes:
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཁུདྡཀནིཀཱཡ (ཨཊྛཀཐཱ) • Khuddakanikāya (aṭṭhakathā) / པཊིསམྦྷིདཱམགྒ-ཨཊྛཀཐཱ • Paṭisambhidāmagga-aṭṭhakathā / ༣༧. སལླེཁཊྛཉཱཎནིདྡེསཝཎྞནཱ • 37. Sallekhaṭṭhañāṇaniddesavaṇṇanā
