| Library / Tipiṭaka / ਤਿਪਿਟਕ • Tipiṭaka / ਪਟਿਸਮ੍ਭਿਦਾਮਗ੍ਗਪਾਲ਼ਿ • Paṭisambhidāmaggapāḷi |
੩੭. ਸਲ੍ਲੇਖਟ੍ਠਞਾਣਨਿਦ੍ਦੇਸੋ
37. Sallekhaṭṭhañāṇaniddeso
੮੮. ਕਥਂ ਪੁਥੁਨਾਨਤ੍ਤੇਕਤ੍ਤਤੇਜਪਰਿਯਾਦਾਨੇ ਪਞ੍ਞਾ ਸਲ੍ਲੇਖਟ੍ਠੇ 1 ਞਾਣਂ? ਪੁਥੂਤਿ – ਰਾਗੋ ਪੁਥੁ, ਦੋਸੋ ਪੁਥੁ, ਮੋਹੋ ਪੁਥੁ, ਕੋਧੋ…ਪੇ॰… ਉਪਨਾਹੋ… ਮਕ੍ਖੋ… ਪਲ਼ਾਸੋ… ਇਸ੍ਸਾ… ਮਚ੍ਛਰਿਯਂ… ਮਾਯਾ… ਸਾਠੇਯ੍ਯਂ… ਥਮ੍ਭੋ… ਸਾਰਮ੍ਭੋ… ਮਾਨੋ… ਅਤਿਮਾਨੋ… ਮਦੋ… ਪਮਾਦੋ… ਸਬ੍ਬੇ ਕਿਲੇਸਾ… ਸਬ੍ਬੇ ਦੁਚ੍ਚਰਿਤਾ… ਸਬ੍ਬੇ ਅਭਿਸਙ੍ਖਾਰਾ… ਸਬ੍ਬੇ ਭવਗਾਮਿਕਮ੍ਮਾ।
88. Kathaṃ puthunānattekattatejapariyādāne paññā sallekhaṭṭhe 2 ñāṇaṃ? Puthūti – rāgo puthu, doso puthu, moho puthu, kodho…pe… upanāho… makkho… paḷāso… issā… macchariyaṃ… māyā… sāṭheyyaṃ… thambho… sārambho… māno… atimāno… mado… pamādo… sabbe kilesā… sabbe duccaritā… sabbe abhisaṅkhārā… sabbe bhavagāmikammā.
ਨਾਨਤ੍ਤੇਕਤ੍ਤਨ੍ਤਿ ਕਾਮਚ੍ਛਨ੍ਦੋ ਨਾਨਤ੍ਤਂ, ਨੇਕ੍ਖਮ੍ਮਂ ਏਕਤ੍ਤਂ। ਬ੍ਯਾਪਾਦੋ ਨਾਨਤ੍ਤਂ, ਅਬ੍ਯਾਪਾਦੋ ਏਕਤ੍ਤਂ। ਥਿਨਮਿਦ੍ਧਂ ਨਾਨਤ੍ਤਂ, ਆਲੋਕਸਞ੍ਞਾ ਏਕਤ੍ਤਂ। ਉਦ੍ਧਚ੍ਚਂ ਨਾਨਤ੍ਤਂ, ਅવਿਕ੍ਖੇਪੋ ਏਕਤ੍ਤਂ। વਿਚਿਕਿਚ੍ਛਾ ਨਾਨਤ੍ਤਂ, ਧਮ੍ਮવવਤ੍ਥਾਨਂ ਏਕਤ੍ਤਂ। ਅવਿਜ੍ਜਾ ਨਾਨਤ੍ਤਂ, ਞਾਣਂ ਏਕਤ੍ਤਂ। ਅਰਤਿ ਨਾਨਤ੍ਤਂ, ਪਾਮੋਜ੍ਜਂ ਏਕਤ੍ਤਂ। ਨੀવਰਣਾ ਨਾਨਤ੍ਤਂ, ਪਠਮਂ ਝਾਨਂ ਏਕਤ੍ਤਂ…ਪੇ॰… ਸਬ੍ਬੇ ਕਿਲੇਸਾ ਨਾਨਤ੍ਤਂ, ਅਰਹਤ੍ਤਮਗ੍ਗੋ ਏਕਤ੍ਤਂ।
Nānattekattanti kāmacchando nānattaṃ, nekkhammaṃ ekattaṃ. Byāpādo nānattaṃ, abyāpādo ekattaṃ. Thinamiddhaṃ nānattaṃ, ālokasaññā ekattaṃ. Uddhaccaṃ nānattaṃ, avikkhepo ekattaṃ. Vicikicchā nānattaṃ, dhammavavatthānaṃ ekattaṃ. Avijjā nānattaṃ, ñāṇaṃ ekattaṃ. Arati nānattaṃ, pāmojjaṃ ekattaṃ. Nīvaraṇā nānattaṃ, paṭhamaṃ jhānaṃ ekattaṃ…pe… sabbe kilesā nānattaṃ, arahattamaggo ekattaṃ.
ਤੇਜੋਤਿ ਪਞ੍ਚ ਤੇਜਾ – ਚਰਣਤੇਜੋ, ਗੁਣਤੇਜੋ, ਪਞ੍ਞਾਤੇਜੋ, ਪੁਞ੍ਞਤੇਜੋ, ਧਮ੍ਮਤੇਜੋ। ਚਰਣਤੇਜੇਨ ਤੇਜਿਤਤ੍ਤਾ ਦੁਸ੍ਸੀਲ੍ਯਤੇਜਂ ਪਰਿਯਾਦਿਯਤਿ। ਗੁਣਤੇਜੇਨ ਤੇਜਿਤਤ੍ਤਾ ਅਗੁਣਤੇਜਂ ਪਰਿਯਾਦਿਯਤਿ। ਪਞ੍ਞਾਤੇਜੇਨ ਤੇਜਿਤਤ੍ਤਾ ਦੁਪ੍ਪਞ੍ਞਤੇਜਂ ਪਰਿਯਾਦਿਯਤਿ। ਪੁਞ੍ਞਤੇਜੇਨ ਤੇਜਿਤਤ੍ਤਾ ਅਪੁਞ੍ਞਤੇਜਂ ਪਰਿਯਾਦਿਯਤਿ। ਧਮ੍ਮਤੇਜੇਨ ਤੇਜਿਤਤ੍ਤਾ ਅਧਮ੍ਮਤੇਜਂ ਪਰਿਯਾਦਿਯਤਿ।
Tejoti pañca tejā – caraṇatejo, guṇatejo, paññātejo, puññatejo, dhammatejo. Caraṇatejena tejitattā dussīlyatejaṃ pariyādiyati. Guṇatejena tejitattā aguṇatejaṃ pariyādiyati. Paññātejena tejitattā duppaññatejaṃ pariyādiyati. Puññatejena tejitattā apuññatejaṃ pariyādiyati. Dhammatejena tejitattā adhammatejaṃ pariyādiyati.
ਸਲ੍ਲੇਖੋਤਿ ਕਾਮਚ੍ਛਨ੍ਦੋ ਅਸਲ੍ਲੇਖੋ, ਨੇਕ੍ਖਮ੍ਮਂ ਸਲ੍ਲੇਖੋ । ਬ੍ਯਾਪਾਦੋ ਅਸਲ੍ਲੇਖੋ, ਅਬ੍ਯਾਪਾਦੋ ਸਲ੍ਲੇਖੋ। ਥਿਨਮਿਦ੍ਧਂ ਅਸਲ੍ਲੇਖੋ, ਆਲੋਕਸਞ੍ਞਾ ਸਲ੍ਲੇਖੋ। ਉਦ੍ਧਚ੍ਚਂ ਅਸਲ੍ਲੇਖੋ, ਅવਿਕ੍ਖੇਪੋ ਸਲ੍ਲੇਖੋ। વਿਚਿਕਿਚ੍ਛਾ ਅਸਲ੍ਲੇਖੋ, ਧਮ੍ਮવવਤ੍ਥਾਨਂ ਸਲ੍ਲੇਖੋ। ਅવਿਜ੍ਜਾ ਅਸਲ੍ਲੇਖੋ, ਞਾਣਂ ਸਲ੍ਲੇਖੋ। ਅਰਤਿ ਅਸਲ੍ਲੇਖੋ, ਪਾਮੋਜ੍ਜਂ ਸਲ੍ਲੇਖੋ। ਨੀવਰਣਾ ਅਸਲ੍ਲੇਖੋ, ਪਠਮਂ ਝਾਨਂ ਸਲ੍ਲੇਖੋ…ਪੇ॰… ਸਬ੍ਬਕਿਲੇਸਾ ਅਸਲ੍ਲੇਖੋ, ਅਰਹਤ੍ਤਮਗ੍ਗੋ ਸਲ੍ਲੇਖੋ। ਤਂ ਞਾਤਟ੍ਠੇਨ ਞਾਣਂ, ਪਜਾਨਨਟ੍ਠੇਨ ਪਞ੍ਞਾ। ਤੇਨ વੁਚ੍ਚਤਿ – ‘‘ਪੁਥੁਨਾਨਤ੍ਤਤੇਜਪਰਿਯਾਦਾਨੇ ਪਞ੍ਞਾ ਸਲ੍ਲੇਖਟ੍ਠੇ ਞਾਣਂ’’।
Sallekhoti kāmacchando asallekho, nekkhammaṃ sallekho . Byāpādo asallekho, abyāpādo sallekho. Thinamiddhaṃ asallekho, ālokasaññā sallekho. Uddhaccaṃ asallekho, avikkhepo sallekho. Vicikicchā asallekho, dhammavavatthānaṃ sallekho. Avijjā asallekho, ñāṇaṃ sallekho. Arati asallekho, pāmojjaṃ sallekho. Nīvaraṇā asallekho, paṭhamaṃ jhānaṃ sallekho…pe… sabbakilesā asallekho, arahattamaggo sallekho. Taṃ ñātaṭṭhena ñāṇaṃ, pajānanaṭṭhena paññā. Tena vuccati – ‘‘puthunānattatejapariyādāne paññā sallekhaṭṭhe ñāṇaṃ’’.
ਸਲ੍ਲੇਖਟ੍ਠਞਾਣਨਿਦ੍ਦੇਸੋ ਸਤ੍ਤਤਿਂਸਤਿਮੋ।
Sallekhaṭṭhañāṇaniddeso sattatiṃsatimo.
Footnotes:
Related texts:
ਅਟ੍ਠਕਥਾ • Aṭṭhakathā / ਸੁਤ੍ਤਪਿਟਕ (ਅਟ੍ਠਕਥਾ) • Suttapiṭaka (aṭṭhakathā) / ਖੁਦ੍ਦਕਨਿਕਾਯ (ਅਟ੍ਠਕਥਾ) • Khuddakanikāya (aṭṭhakathā) / ਪਟਿਸਮ੍ਭਿਦਾਮਗ੍ਗ-ਅਟ੍ਠਕਥਾ • Paṭisambhidāmagga-aṭṭhakathā / ੩੭. ਸਲ੍ਲੇਖਟ੍ਠਞਾਣਨਿਦ੍ਦੇਸવਣ੍ਣਨਾ • 37. Sallekhaṭṭhañāṇaniddesavaṇṇanā
