| Library / Tipiṭaka / തിപിടക • Tipiṭaka / പടിസമ്ഭിദാമഗ്ഗപാളി • Paṭisambhidāmaggapāḷi |
൩൭. സല്ലേഖട്ഠഞാണനിദ്ദേസോ
37. Sallekhaṭṭhañāṇaniddeso
൮൮. കഥം പുഥുനാനത്തേകത്തതേജപരിയാദാനേ പഞ്ഞാ സല്ലേഖട്ഠേ 1 ഞാണം? പുഥൂതി – രാഗോ പുഥു, ദോസോ പുഥു, മോഹോ പുഥു, കോധോ…പേ॰… ഉപനാഹോ… മക്ഖോ… പളാസോ… ഇസ്സാ… മച്ഛരിയം… മായാ… സാഠേയ്യം… ഥമ്ഭോ… സാരമ്ഭോ… മാനോ… അതിമാനോ… മദോ… പമാദോ… സബ്ബേ കിലേസാ… സബ്ബേ ദുച്ചരിതാ… സബ്ബേ അഭിസങ്ഖാരാ… സബ്ബേ ഭവഗാമികമ്മാ.
88. Kathaṃ puthunānattekattatejapariyādāne paññā sallekhaṭṭhe 2 ñāṇaṃ? Puthūti – rāgo puthu, doso puthu, moho puthu, kodho…pe… upanāho… makkho… paḷāso… issā… macchariyaṃ… māyā… sāṭheyyaṃ… thambho… sārambho… māno… atimāno… mado… pamādo… sabbe kilesā… sabbe duccaritā… sabbe abhisaṅkhārā… sabbe bhavagāmikammā.
നാനത്തേകത്തന്തി കാമച്ഛന്ദോ നാനത്തം, നേക്ഖമ്മം ഏകത്തം. ബ്യാപാദോ നാനത്തം, അബ്യാപാദോ ഏകത്തം. ഥിനമിദ്ധം നാനത്തം, ആലോകസഞ്ഞാ ഏകത്തം. ഉദ്ധച്ചം നാനത്തം, അവിക്ഖേപോ ഏകത്തം. വിചികിച്ഛാ നാനത്തം, ധമ്മവവത്ഥാനം ഏകത്തം. അവിജ്ജാ നാനത്തം, ഞാണം ഏകത്തം. അരതി നാനത്തം, പാമോജ്ജം ഏകത്തം. നീവരണാ നാനത്തം, പഠമം ഝാനം ഏകത്തം…പേ॰… സബ്ബേ കിലേസാ നാനത്തം, അരഹത്തമഗ്ഗോ ഏകത്തം.
Nānattekattanti kāmacchando nānattaṃ, nekkhammaṃ ekattaṃ. Byāpādo nānattaṃ, abyāpādo ekattaṃ. Thinamiddhaṃ nānattaṃ, ālokasaññā ekattaṃ. Uddhaccaṃ nānattaṃ, avikkhepo ekattaṃ. Vicikicchā nānattaṃ, dhammavavatthānaṃ ekattaṃ. Avijjā nānattaṃ, ñāṇaṃ ekattaṃ. Arati nānattaṃ, pāmojjaṃ ekattaṃ. Nīvaraṇā nānattaṃ, paṭhamaṃ jhānaṃ ekattaṃ…pe… sabbe kilesā nānattaṃ, arahattamaggo ekattaṃ.
തേജോതി പഞ്ച തേജാ – ചരണതേജോ, ഗുണതേജോ, പഞ്ഞാതേജോ, പുഞ്ഞതേജോ, ധമ്മതേജോ. ചരണതേജേന തേജിതത്താ ദുസ്സീല്യതേജം പരിയാദിയതി. ഗുണതേജേന തേജിതത്താ അഗുണതേജം പരിയാദിയതി. പഞ്ഞാതേജേന തേജിതത്താ ദുപ്പഞ്ഞതേജം പരിയാദിയതി. പുഞ്ഞതേജേന തേജിതത്താ അപുഞ്ഞതേജം പരിയാദിയതി. ധമ്മതേജേന തേജിതത്താ അധമ്മതേജം പരിയാദിയതി.
Tejoti pañca tejā – caraṇatejo, guṇatejo, paññātejo, puññatejo, dhammatejo. Caraṇatejena tejitattā dussīlyatejaṃ pariyādiyati. Guṇatejena tejitattā aguṇatejaṃ pariyādiyati. Paññātejena tejitattā duppaññatejaṃ pariyādiyati. Puññatejena tejitattā apuññatejaṃ pariyādiyati. Dhammatejena tejitattā adhammatejaṃ pariyādiyati.
സല്ലേഖോതി കാമച്ഛന്ദോ അസല്ലേഖോ, നേക്ഖമ്മം സല്ലേഖോ . ബ്യാപാദോ അസല്ലേഖോ, അബ്യാപാദോ സല്ലേഖോ. ഥിനമിദ്ധം അസല്ലേഖോ, ആലോകസഞ്ഞാ സല്ലേഖോ. ഉദ്ധച്ചം അസല്ലേഖോ, അവിക്ഖേപോ സല്ലേഖോ. വിചികിച്ഛാ അസല്ലേഖോ, ധമ്മവവത്ഥാനം സല്ലേഖോ. അവിജ്ജാ അസല്ലേഖോ, ഞാണം സല്ലേഖോ. അരതി അസല്ലേഖോ, പാമോജ്ജം സല്ലേഖോ. നീവരണാ അസല്ലേഖോ, പഠമം ഝാനം സല്ലേഖോ…പേ॰… സബ്ബകിലേസാ അസല്ലേഖോ, അരഹത്തമഗ്ഗോ സല്ലേഖോ. തം ഞാതട്ഠേന ഞാണം, പജാനനട്ഠേന പഞ്ഞാ. തേന വുച്ചതി – ‘‘പുഥുനാനത്തതേജപരിയാദാനേ പഞ്ഞാ സല്ലേഖട്ഠേ ഞാണം’’.
Sallekhoti kāmacchando asallekho, nekkhammaṃ sallekho . Byāpādo asallekho, abyāpādo sallekho. Thinamiddhaṃ asallekho, ālokasaññā sallekho. Uddhaccaṃ asallekho, avikkhepo sallekho. Vicikicchā asallekho, dhammavavatthānaṃ sallekho. Avijjā asallekho, ñāṇaṃ sallekho. Arati asallekho, pāmojjaṃ sallekho. Nīvaraṇā asallekho, paṭhamaṃ jhānaṃ sallekho…pe… sabbakilesā asallekho, arahattamaggo sallekho. Taṃ ñātaṭṭhena ñāṇaṃ, pajānanaṭṭhena paññā. Tena vuccati – ‘‘puthunānattatejapariyādāne paññā sallekhaṭṭhe ñāṇaṃ’’.
സല്ലേഖട്ഠഞാണനിദ്ദേസോ സത്തതിംസതിമോ.
Sallekhaṭṭhañāṇaniddeso sattatiṃsatimo.
Footnotes:
Related texts:
അട്ഠകഥാ • Aṭṭhakathā / സുത്തപിടക (അട്ഠകഥാ) • Suttapiṭaka (aṭṭhakathā) / ഖുദ്ദകനികായ (അട്ഠകഥാ) • Khuddakanikāya (aṭṭhakathā) / പടിസമ്ഭിദാമഗ്ഗ-അട്ഠകഥാ • Paṭisambhidāmagga-aṭṭhakathā / ൩൭. സല്ലേഖട്ഠഞാണനിദ്ദേസവണ്ണനാ • 37. Sallekhaṭṭhañāṇaniddesavaṇṇanā
