| Library / Tipiṭaka / තිපිටක • Tipiṭaka / කථාවත්‌ථුපාළි • Kathāvatthupāḷi |
10. දසමවග්‌ගො
10. Dasamavaggo
(103) 9. සමාදානහෙතුකථා
(103) 9. Samādānahetukathā
598. සමාදානහෙතුකං සීලං වඩ්‌ඪතීති? ආමන්‌තා. සමාදානහෙතුකො ඵස්‌සො වඩ්‌ඪති, වෙදනා වඩ්‌ඪති, සඤ්‌ඤා වඩ්‌ඪති, චෙතනා වඩ්‌ඪති, චිත්‌තං වඩ්‌ඪති, සද්‌ධා වඩ්‌ඪති, වීරියං වඩ්‌ඪති, සති වඩ්‌ඪති, සමාධි වඩ්‌ඪති, පඤ්‌ඤා වඩ්‌ඪතීති? න හෙවං වත්‌තබ්‌බෙ…පෙ.….
598. Samādānahetukaṃ sīlaṃ vaḍḍhatīti? Āmantā. Samādānahetuko phasso vaḍḍhati, vedanā vaḍḍhati, saññā vaḍḍhati, cetanā vaḍḍhati, cittaṃ vaḍḍhati, saddhā vaḍḍhati, vīriyaṃ vaḍḍhati, sati vaḍḍhati, samādhi vaḍḍhati, paññā vaḍḍhatīti? Na hevaṃ vattabbe…pe….
සමාදානහෙතුකං සීලං වඩ්‌ඪතීති? ආමන්‌තා. ලතා විය වඩ්‌ඪති, මාලුවා විය වඩ්‌ඪති, රුක්‌ඛො විය වඩ්‌ඪති, තිණං විය වඩ්‌ඪති, මුඤ්‌ජපුඤ්‌ජො විය වඩ්‌ඪතීති? න හෙවං වත්‌තබ්‌බෙ…පෙ.….
Samādānahetukaṃ sīlaṃ vaḍḍhatīti? Āmantā. Latā viya vaḍḍhati, māluvā viya vaḍḍhati, rukkho viya vaḍḍhati, tiṇaṃ viya vaḍḍhati, muñjapuñjo viya vaḍḍhatīti? Na hevaṃ vattabbe…pe….
599. සමාදානහෙතුකං සීලං වඩ්‌ඪතීති? ආමන්‌තා. සීලං සමාදියිත්‌වා කාමවිතක්‌කං විතක්‌කෙන්‌තස්‌ස බ්‍යාපාදවිතක්‌කං විතක්‌කෙන්‌තස්‌ස විහිංසාවිතක්‌කං විතක්‌කෙන්‌තස්‌ස සීලං වඩ්‌ඪතීති? ආමන්‌තා. ද්‌වින්‌නං ඵස්‌සානං…පෙ.… ද්‌වින්‌නං චිත්‌තානං සමොධානං හොතීති? න හෙවං වත්‌තබ්‌බෙ…පෙ.… ද්‌වින්‌නං ඵස්‌සානං…පෙ.… ද්‌වින්‌නං චිත්‌තානං සමොධානං හොතීති ? ආමන්‌තා. කුසලාකුසලා සාවජ්‌ජානවජ්‌ජා හීනපණීතා කණ්‌හසුක්‌කසප්‌පටිභාගා ධම්‌මා සම්‌මුඛීභාවං ආගච්‌ඡන්‌තීති? න හෙවං වත්‌තබ්‌බෙ…පෙ.….
599. Samādānahetukaṃ sīlaṃ vaḍḍhatīti? Āmantā. Sīlaṃ samādiyitvā kāmavitakkaṃ vitakkentassa byāpādavitakkaṃ vitakkentassa vihiṃsāvitakkaṃ vitakkentassa sīlaṃ vaḍḍhatīti? Āmantā. Dvinnaṃ phassānaṃ…pe… dvinnaṃ cittānaṃ samodhānaṃ hotīti? Na hevaṃ vattabbe…pe… dvinnaṃ phassānaṃ…pe… dvinnaṃ cittānaṃ samodhānaṃ hotīti ? Āmantā. Kusalākusalā sāvajjānavajjā hīnapaṇītā kaṇhasukkasappaṭibhāgā dhammā sammukhībhāvaṃ āgacchantīti? Na hevaṃ vattabbe…pe….
කුසලාකුසලා සාවජ්‌ජානවජ්‌ජා හීනපණීතා කණ්‌හසුක්‌කසප්‌පටිභාගා ධම්‌මා සම්‌මුඛීභාවං ආගච්‌ඡන්‌තීති? ආමන්‌තා. නනු වුත්‌තං භගවතා – ‘‘චත්‌තාරිමානි, භික්‌ඛවෙ, සුවිදූරවිදූරානි! කතමානි චත්‌තාරි? නභඤ්‌ච, භික්‌ඛවෙ, පථවී ච – ඉදං පඨමං සුවිදූරවිදූරං…පෙ.… තස්‌මා සතං ධම්‌මො අසබ්‌භි ආරකා’’ති. අත්‌ථෙව සුත්‌තන්‌තොති? ආමන්‌තා . තෙන හි න වත්‌තබ්‌බං – ‘‘කුසලාකුසලා සාවජ්‌ජානවජ්‌ජා හීනපණීතා කණ්‌හසුක්‌කසප්‌පටිභාගා ධම්‌මා සම්‌මුඛීභාවං ආගච්‌ඡන්‌තී’’ති.
Kusalākusalā sāvajjānavajjā hīnapaṇītā kaṇhasukkasappaṭibhāgā dhammā sammukhībhāvaṃ āgacchantīti? Āmantā. Nanu vuttaṃ bhagavatā – ‘‘cattārimāni, bhikkhave, suvidūravidūrāni! Katamāni cattāri? Nabhañca, bhikkhave, pathavī ca – idaṃ paṭhamaṃ suvidūravidūraṃ…pe… tasmā sataṃ dhammo asabbhi ārakā’’ti. Attheva suttantoti? Āmantā . Tena hi na vattabbaṃ – ‘‘kusalākusalā sāvajjānavajjā hīnapaṇītā kaṇhasukkasappaṭibhāgā dhammā sammukhībhāvaṃ āgacchantī’’ti.
600. න වත්‌තබ්‌බං – ‘‘සමාදානහෙතුකං සීලං වඩ්‌ඪතී’’ති? ආමන්‌තා. නනු වුත්‌තං භගවතා – ‘‘ආරාමරොපා වනරොපා…පෙ.… ධම්‌මට්‌ඨා සීලසම්‌පන්‌නා තෙ ජනා සග්‌ගගාමිනො’’ති. අත්‌ථෙව සුත්‌තන්‌තොති? ආමන්‌තා. තෙන හි සමාදානහෙතුකං සීලං වඩ්‌ඪතීති.
600. Na vattabbaṃ – ‘‘samādānahetukaṃ sīlaṃ vaḍḍhatī’’ti? Āmantā. Nanu vuttaṃ bhagavatā – ‘‘ārāmaropā vanaropā…pe… dhammaṭṭhā sīlasampannā te janā saggagāmino’’ti. Attheva suttantoti? Āmantā. Tena hi samādānahetukaṃ sīlaṃ vaḍḍhatīti.
සමාදානහෙතුකථා නිට්‌ඨිතා.
Samādānahetukathā niṭṭhitā.
Related texts:
අට්‌ඨකථා • Aṭṭhakathā / අභිධම්‌මපිටක (අට්‌ඨකථා) • Abhidhammapiṭaka (aṭṭhakathā) / පඤ්‌චපකරණ-අට්‌ඨකථා • Pañcapakaraṇa-aṭṭhakathā / 9. සමාදානහෙතුකථාවණ්‌ණනා • 9. Samādānahetukathāvaṇṇanā
ටීකා • Tīkā / අභිධම්‌මපිටක (ටීකා) • Abhidhammapiṭaka (ṭīkā) / පඤ්‌චපකරණ-මූලටීකා • Pañcapakaraṇa-mūlaṭīkā / 9. සමාදානහෙතුකථාවණ්‌ණනා • 9. Samādānahetukathāvaṇṇanā
ටීකා • Tīkā / අභිධම්‌මපිටක (ටීකා) • Abhidhammapiṭaka (ṭīkā) / පඤ්‌චපකරණ-අනුටීකා • Pañcapakaraṇa-anuṭīkā / 9. සමාදානහෙතුකථාවණ්‌ණනා • 9. Samādānahetukathāvaṇṇanā
