| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
9. ஸமாத³பகத்தே²ரஅபதா³னவண்ணனா
9. Samādapakattheraapadānavaṇṇanā
நக³ரே ப³ந்து⁴மதியாதிஆதி³கங் ஆயஸ்மதோ ஸமாத³பகத்தே²ரஸ்ஸ அபதா³னங். அயம்பி தே²ரோ புரிமபு³த்³தா⁴னங் ஸந்திகே கதகுஸலஸம்பா⁴ரோ அனேகேஸு ப⁴வேஸு விவட்டூபனிஸ்ஸயானி புஞ்ஞானி உபசினந்தோ விபஸ்ஸிஸ்ஸ ப⁴க³வதோ காலே குலகே³ஹே நிப்³ப³த்தோ வுத்³தி⁴மன்வாய க⁴ராவாஸங் ஸண்ட²பெத்வா புஞ்ஞானி கரொந்தோ வஸமானோ ஸத்³தோ⁴ பஸன்னோ ப³ஹூ உபாஸகே ஸன்னிபாதெத்வா க³ணஜெட்ட²கோ ஹுத்வா ‘‘மாளகங் கரிஸ்ஸாமா’’தி தே ஸப்³பே³ ஸமாத³பெத்வா ஏகங் மாளகங் ஸமங் காரெத்வா பண்ட³ரபுலினங் ஓகிரித்வா ப⁴க³வதோ நிய்யாதே³ஸி. ஸோ தேன புஞ்ஞேன தே³வலோகே உப்பன்னோ ச² காமாவசரஸம்பத்தியோ அனுப⁴வித்வா மனுஸ்ஸேஸு ச சக்கவத்திஆதி³ஸம்பத்தியோ அனுப⁴வித்வா இமஸ்மிங் பு³த்³து⁴ப்பாதே³ குலகே³ஹே நிப்³ப³த்தோ விஞ்ஞுதங் பத்தோ ப⁴க³வதி பஸன்னோ த⁴ம்மங் ஸுத்வா பஸன்னமானஸோ ஸத்³தா⁴ஜாதோ பப்³ப³ஜித்வா ஸீலஸம்பன்னோ வத்தஸம்பன்னோ நசிரஸ்ஸேவ அரஹத்தங் பாபுணி.
Nagare bandhumatiyātiādikaṃ āyasmato samādapakattherassa apadānaṃ. Ayampi thero purimabuddhānaṃ santike katakusalasambhāro anekesu bhavesu vivaṭṭūpanissayāni puññāni upacinanto vipassissa bhagavato kāle kulagehe nibbatto vuddhimanvāya gharāvāsaṃ saṇṭhapetvā puññāni karonto vasamāno saddho pasanno bahū upāsake sannipātetvā gaṇajeṭṭhako hutvā ‘‘māḷakaṃ karissāmā’’ti te sabbe samādapetvā ekaṃ māḷakaṃ samaṃ kāretvā paṇḍarapulinaṃ okiritvā bhagavato niyyādesi. So tena puññena devaloke uppanno cha kāmāvacarasampattiyo anubhavitvā manussesu ca cakkavattiādisampattiyo anubhavitvā imasmiṃ buddhuppāde kulagehe nibbatto viññutaṃ patto bhagavati pasanno dhammaṃ sutvā pasannamānaso saddhājāto pabbajitvā sīlasampanno vattasampanno nacirasseva arahattaṃ pāpuṇi.
44. ஸோ அபரபா⁴கே³ அத்தனோ கதகுஸலங் ஸரித்வா ஸஞ்ஜாதஸோமனஸ்ஸோ புப்³ப³சரிதாபதா³னங் பகாஸெந்தோ நக³ரே ப³ந்து⁴மதியாதிஆதி³மாஹ. தத்த² ப³ந்த⁴ந்தி ஞாதிகொ³த்தாதி³வஸேன ஏகஸம்ப³ந்தா⁴ ஹொந்தி ஸகலனக³ரவாஸினோதி ப³ந்தூ⁴, ப³ந்தூ⁴ ஏதஸ்மிங் விஜ்ஜந்தீதி ப³ந்து⁴மதீ, தஸ்ஸா ப³ந்து⁴மதியா நாம நக³ரே மஹாபூக³க³ணோ உபாஸகஸமூஹோ அஹோஸீதி அத்தோ². மாளங் கஸ்ஸாம ஸங்க⁴ஸ்ஸாதி எத்த² மாதி க³ண்ஹாதி ஸம்பத்தஸம்பத்தஜனானங் சித்தந்தி மாளங், அத² வா ஸம்பத்தயதிக³ணானங் சித்தஸ்ஸ விவேககரணே அலந்தி மாளங், மாளமேவ மாளகங், பி⁴க்கு²ஸங்க⁴ஸ்ஸ பா²ஸுவிஹாரத்தா²ய மாளகங் கரிஸ்ஸாமாதி அத்தோ². ஸேஸங் பாகடமேவாதி.
44. So aparabhāge attano katakusalaṃ saritvā sañjātasomanasso pubbacaritāpadānaṃ pakāsento nagare bandhumatiyātiādimāha. Tattha bandhanti ñātigottādivasena ekasambandhā honti sakalanagaravāsinoti bandhū, bandhū etasmiṃ vijjantīti bandhumatī, tassā bandhumatiyā nāma nagare mahāpūgagaṇo upāsakasamūho ahosīti attho. Māḷaṃ kassāma saṅghassāti ettha māti gaṇhāti sampattasampattajanānaṃ cittanti māḷaṃ, atha vā sampattayatigaṇānaṃ cittassa vivekakaraṇe alanti māḷaṃ, māḷameva māḷakaṃ, bhikkhusaṅghassa phāsuvihāratthāya māḷakaṃ karissāmāti attho. Sesaṃ pākaṭamevāti.
ஸமாத³பகத்தே²ரஅபதா³னவண்ணனா ஸமத்தா.
Samādapakattheraapadānavaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi / 9. ஸமாத³பகத்தே²ரஅபதா³னங் • 9. Samādapakattheraapadānaṃ
