| Library / Tipiṭaka / တိပိဋက • Tipiṭaka / အပဒာန-အဋ္ဌကထာ • Apadāna-aṭṭhakathā |
၉. သမာဒပကတ္ထေရအပဒာနဝဏ္ဏနာ
9. Samādapakattheraapadānavaṇṇanā
နဂရေ ဗန္ဓုမတိယာတိအာဒိကံ အာယသ္မတော သမာဒပကတ္ထေရသ္သ အပဒာနံ။ အယမ္ပိ ထေရော ပုရိမဗုဒ္ဓာနံ သန္တိကေ ကတကုသလသမ္ဘာရော အနေကေသု ဘဝေသု ဝိဝဋ္ဋူပနိသ္သယာနိ ပုညာနိ ဥပစိနန္တော ဝိပသ္သိသ္သ ဘဂဝတော ကာလေ ကုလဂေဟေ နိဗ္ဗတ္တော ဝုဒ္ဓိမန္ဝာယ ဃရာဝာသံ သဏ္ဌပေတ္ဝာ ပုညာနိ ကရောန္တော ဝသမာနော သဒ္ဓော ပသန္နော ဗဟူ ဥပာသကေ သန္နိပာတေတ္ဝာ ဂဏဇေဋ္ဌကော ဟုတ္ဝာ ‘‘မာဠကံ ကရိသ္သာမာ’’တိ တေ သဗ္ဗေ သမာဒပေတ္ဝာ ဧကံ မာဠကံ သမံ ကာရေတ္ဝာ ပဏ္ဍရပုလိနံ ဩကိရိတ္ဝာ ဘဂဝတော နိယ္ယာဒေသိ။ သော တေန ပုညေန ဒေဝလောကေ ဥပ္ပန္နော ဆ ကာမာဝစရသမ္ပတ္တိယော အနုဘဝိတ္ဝာ မနုသ္သေသု စ စက္ကဝတ္တိအာဒိသမ္ပတ္တိယော အနုဘဝိတ္ဝာ ဣမသ္မိံ ဗုဒ္ဓုပ္ပာဒေ ကုလဂေဟေ နိဗ္ဗတ္တော ဝိညုတံ ပတ္တော ဘဂဝတိ ပသန္နော ဓမ္မံ သုတ္ဝာ ပသန္နမာနသော သဒ္ဓာဇာတော ပဗ္ဗဇိတ္ဝာ သီလသမ္ပန္နော ဝတ္တသမ္ပန္နော နစိရသ္သေဝ အရဟတ္တံ ပာပုဏိ။
Nagare bandhumatiyātiādikaṃ āyasmato samādapakattherassa apadānaṃ. Ayampi thero purimabuddhānaṃ santike katakusalasambhāro anekesu bhavesu vivaṭṭūpanissayāni puññāni upacinanto vipassissa bhagavato kāle kulagehe nibbatto vuddhimanvāya gharāvāsaṃ saṇṭhapetvā puññāni karonto vasamāno saddho pasanno bahū upāsake sannipātetvā gaṇajeṭṭhako hutvā ‘‘māḷakaṃ karissāmā’’ti te sabbe samādapetvā ekaṃ māḷakaṃ samaṃ kāretvā paṇḍarapulinaṃ okiritvā bhagavato niyyādesi. So tena puññena devaloke uppanno cha kāmāvacarasampattiyo anubhavitvā manussesu ca cakkavattiādisampattiyo anubhavitvā imasmiṃ buddhuppāde kulagehe nibbatto viññutaṃ patto bhagavati pasanno dhammaṃ sutvā pasannamānaso saddhājāto pabbajitvā sīlasampanno vattasampanno nacirasseva arahattaṃ pāpuṇi.
၄၄. သော အပရဘာဂေ အတ္တနော ကတကုသလံ သရိတ္ဝာ သဉ္ဇာတသောမနသ္သော ပုဗ္ဗစရိတာပဒာနံ ပကာသေန္တော နဂရေ ဗန္ဓုမတိယာတိအာဒိမာဟ။ တတ္ထ ဗန္ဓန္တိ ဉာတိဂောတ္တာဒိဝသေန ဧကသမ္ဗန္ဓာ ဟောန္တိ သကလနဂရဝာသိနောတိ ဗန္ဓူ, ဗန္ဓူ ဧတသ္မိံ ဝိဇ္ဇန္တီတိ ဗန္ဓုမတီ, တသ္သာ ဗန္ဓုမတိယာ နာမ နဂရေ မဟာပူဂဂဏော ဥပာသကသမူဟော အဟောသီတိ အတ္ထော။ မာဠံ ကသ္သာမ သင္ဃသ္သာတိ ဧတ္ထ မာတိ ဂဏ္ဟာတိ သမ္ပတ္တသမ္ပတ္တဇနာနံ စိတ္တန္တိ မာဠံ, အထ ဝာ သမ္ပတ္တယတိဂဏာနံ စိတ္တသ္သ ဝိဝေကကရဏေ အလန္တိ မာဠံ, မာဠမေဝ မာဠကံ, ဘိက္ခုသင္ဃသ္သ ဖာသုဝိဟာရတ္ထာယ မာဠကံ ကရိသ္သာမာတိ အတ္ထော။ သေသံ ပာကဋမေဝာတိ။
44. So aparabhāge attano katakusalaṃ saritvā sañjātasomanasso pubbacaritāpadānaṃ pakāsento nagare bandhumatiyātiādimāha. Tattha bandhanti ñātigottādivasena ekasambandhā honti sakalanagaravāsinoti bandhū, bandhū etasmiṃ vijjantīti bandhumatī, tassā bandhumatiyā nāma nagare mahāpūgagaṇo upāsakasamūho ahosīti attho. Māḷaṃ kassāma saṅghassāti ettha māti gaṇhāti sampattasampattajanānaṃ cittanti māḷaṃ, atha vā sampattayatigaṇānaṃ cittassa vivekakaraṇe alanti māḷaṃ, māḷameva māḷakaṃ, bhikkhusaṅghassa phāsuvihāratthāya māḷakaṃ karissāmāti attho. Sesaṃ pākaṭamevāti.
သမာဒပကတ္ထေရအပဒာနဝဏ္ဏနာ သမတ္တာ။
Samādapakattheraapadānavaṇṇanā samattā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / ခုဒ္ဒကနိကာယ • Khuddakanikāya / အပဒာနပာဠိ • Apadānapāḷi / ၉. သမာဒပကတ္ထေရအပဒာနံ • 9. Samādapakattheraapadānaṃ
