| Library / Tipiṭaka / තිපිටක • Tipiṭaka / අපදාන-අට්‌ඨකථා • Apadāna-aṭṭhakathā |
9. සමාදපකත්‌ථෙරඅපදානවණ්‌ණනා
9. Samādapakattheraapadānavaṇṇanā
නගරෙ බන්‌ධුමතියාතිආදිකං ආයස්‌මතො සමාදපකත්‌ථෙරස්‌ස අපදානං. අයම්‌පි ථෙරො පුරිමබුද්‌ධානං සන්‌තිකෙ කතකුසලසම්‌භාරො අනෙකෙසු භවෙසු විවට්‌ටූපනිස්‌සයානි පුඤ්‌ඤානි උපචිනන්‌තො විපස්‌සිස්‌ස භගවතො කාලෙ කුලගෙහෙ නිබ්‌බත්‌තො වුද්‌ධිමන්‌වාය ඝරාවාසං සණ්‌ඨපෙත්‌වා පුඤ්‌ඤානි කරොන්‌තො වසමානො සද්‌ධො පසන්‌නො බහූ උපාසකෙ සන්‌නිපාතෙත්‌වා ගණජෙට්‌ඨකො හුත්‌වා ‘‘මාළකං කරිස්‌සාමා’’ති තෙ සබ්‌බෙ සමාදපෙත්‌වා එකං මාළකං සමං කාරෙත්‌වා පණ්‌ඩරපුලිනං ඔකිරිත්‌වා භගවතො නිය්‍යාදෙසි. සො තෙන පුඤ්‌ඤෙන දෙවලොකෙ උප්‌පන්‌නො ඡ කාමාවචරසම්‌පත්‌තියො අනුභවිත්‌වා මනුස්‌සෙසු ච චක්‌කවත්‌තිආදිසම්‌පත්‌තියො අනුභවිත්‌වා ඉමස්‌මිං බුද්‌ධුප්‌පාදෙ කුලගෙහෙ නිබ්‌බත්‌තො විඤ්‌ඤුතං පත්‌තො භගවති පසන්‌නො ධම්‌මං සුත්‌වා පසන්‌නමානසො සද්‌ධාජාතො පබ්‌බජිත්‌වා සීලසම්‌පන්‌නො වත්‌තසම්‌පන්‌නො නචිරස්‌සෙව අරහත්‌තං පාපුණි.
Nagare bandhumatiyātiādikaṃ āyasmato samādapakattherassa apadānaṃ. Ayampi thero purimabuddhānaṃ santike katakusalasambhāro anekesu bhavesu vivaṭṭūpanissayāni puññāni upacinanto vipassissa bhagavato kāle kulagehe nibbatto vuddhimanvāya gharāvāsaṃ saṇṭhapetvā puññāni karonto vasamāno saddho pasanno bahū upāsake sannipātetvā gaṇajeṭṭhako hutvā ‘‘māḷakaṃ karissāmā’’ti te sabbe samādapetvā ekaṃ māḷakaṃ samaṃ kāretvā paṇḍarapulinaṃ okiritvā bhagavato niyyādesi. So tena puññena devaloke uppanno cha kāmāvacarasampattiyo anubhavitvā manussesu ca cakkavattiādisampattiyo anubhavitvā imasmiṃ buddhuppāde kulagehe nibbatto viññutaṃ patto bhagavati pasanno dhammaṃ sutvā pasannamānaso saddhājāto pabbajitvā sīlasampanno vattasampanno nacirasseva arahattaṃ pāpuṇi.
44. සො අපරභාගෙ අත්‌තනො කතකුසලං සරිත්‌වා සඤ්‌ජාතසොමනස්‌සො පුබ්‌බචරිතාපදානං පකාසෙන්‌තො නගරෙ බන්‌ධුමතියාතිආදිමාහ. තත්‌ථ බන්‌ධන්‌ති ඤාතිගොත්‌තාදිවසෙන එකසම්‌බන්‌ධා හොන්‌ති සකලනගරවාසිනොති බන්‌ධූ, බන්‌ධූ එතස්‌මිං විජ්‌ජන්‌තීති බන්‌ධුමතී, තස්‌සා බන්‌ධුමතියා නාම නගරෙ මහාපූගගණො උපාසකසමූහො අහොසීති අත්‌ථො. මාළං කස්‌සාම සඞ්‌ඝස්‌සාති එත්‌ථ මාති ගණ්‌හාති සම්‌පත්‌තසම්‌පත්‌තජනානං චිත්‌තන්‌ති මාළං, අථ වා සම්‌පත්‌තයතිගණානං චිත්‌තස්‌ස විවෙකකරණෙ අලන්‌ති මාළං, මාළමෙව මාළකං, භික්‌ඛුසඞ්‌ඝස්‌ස ඵාසුවිහාරත්‌ථාය මාළකං කරිස්‌සාමාති අත්‌ථො. සෙසං පාකටමෙවාති.
44. So aparabhāge attano katakusalaṃ saritvā sañjātasomanasso pubbacaritāpadānaṃ pakāsento nagare bandhumatiyātiādimāha. Tattha bandhanti ñātigottādivasena ekasambandhā honti sakalanagaravāsinoti bandhū, bandhū etasmiṃ vijjantīti bandhumatī, tassā bandhumatiyā nāma nagare mahāpūgagaṇo upāsakasamūho ahosīti attho. Māḷaṃ kassāma saṅghassāti ettha māti gaṇhāti sampattasampattajanānaṃ cittanti māḷaṃ, atha vā sampattayatigaṇānaṃ cittassa vivekakaraṇe alanti māḷaṃ, māḷameva māḷakaṃ, bhikkhusaṅghassa phāsuvihāratthāya māḷakaṃ karissāmāti attho. Sesaṃ pākaṭamevāti.
සමාදපකත්‌ථෙරඅපදානවණ්‌ණනා සමත්‌තා.
Samādapakattheraapadānavaṇṇanā samattā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / ඛුද්‌දකනිකාය • Khuddakanikāya / අපදානපාළි • Apadānapāḷi / 9. සමාදපකත්‌ථෙරඅපදානං • 9. Samādapakattheraapadānaṃ
