| Library / Tipiṭaka / তিপিটক • Tipiṭaka / পটিসম্ভিদামগ্গপাল়ি • Paṭisambhidāmaggapāḷi |
৩. সমাধিভাৰনামযঞাণনিদ্দেসো
3. Samādhibhāvanāmayañāṇaniddeso
৪৩. কথং সংৰরিত্ৰা সমাদহনে পঞ্ঞা সমাধিভাৰনামযে ঞাণং? একো সমাধি – চিত্তস্স একগ্গতা। দ্ৰে সমাধী – লোকিযো সমাধি, লোকুত্তরো সমাধি। তযো সমাধী – সৰিতক্কসৰিচারো সমাধি, অৰিতক্কৰিচারমত্তো সমাধি, অৰিতক্কঅৰিচারো সমাধি। চত্তারো সমাধী – হানভাগিযো সমাধি, ঠিতিভাগিযো সমাধি, ৰিসেসভাগিযো সমাধি, নিব্বেধভাগিযো সমাধি। পঞ্চ সমাধী – পীতিফরণতা, সুখফরণতা, চেতোফরণতা, আলোকফরণতা, পচ্চৰেক্খণানিমিত্তং 1।
43. Kathaṃ saṃvaritvā samādahane paññā samādhibhāvanāmaye ñāṇaṃ? Eko samādhi – cittassa ekaggatā. Dve samādhī – lokiyo samādhi, lokuttaro samādhi. Tayo samādhī – savitakkasavicāro samādhi, avitakkavicāramatto samādhi, avitakkaavicāro samādhi. Cattāro samādhī – hānabhāgiyo samādhi, ṭhitibhāgiyo samādhi, visesabhāgiyo samādhi, nibbedhabhāgiyo samādhi. Pañca samādhī – pītipharaṇatā, sukhapharaṇatā, cetopharaṇatā, ālokapharaṇatā, paccavekkhaṇānimittaṃ 2.
ছ সমাধী – বুদ্ধানুস্সতিৰসেন চিত্তস্স একগ্গতা অৰিক্খেপো সমাধি, ধম্মানুস্সতিৰসেন চিত্তস্স একগ্গতা অৰিক্খেপো সমাধি, সঙ্ঘানুস্সতিৰসেন চিত্তস্স একগ্গতা অৰিক্খেপো সমাধি, সীলানুস্সতিৰসেন চিত্তস্স একগ্গতা অৰিক্খেপো সমাধি, চাগানুস্সতিৰসেন চিত্তস্স একগ্গতা অৰিক্খেপো সমাধি, দেৰতানুস্সতিৰসেন চিত্তস্স একগ্গতা অৰিক্খেপো সমাধি। সত্ত সমাধী – সমাধিকুসলতা, সমাধিস্স সমাপত্তিকুসলতা, সমাধিস্স ঠিতিকুসলতা, সমাধিস্স ৰুট্ঠানকুসলতা , সমাধিস্স কল্লতাকুসলতা 3, সমাধিস্স গোচরকুসলতা, সমাধিস্স অভিনীহারকুসলতা। অট্ঠ সমাধী – পথৰীকসিণৰসেন চিত্তস্স একগ্গতা অৰিক্খেপো সমাধি, আপোকসিণৰসেন…পে॰… তেজোকসিণৰসেন… ৰাযোকসিণৰসেন… নীলকসিণৰসেন… পীতকসিণৰসেন… লোহিতকসিণৰসেন… ওদাতকসিণৰসেন চিত্তস্স একগ্গতা অৰিক্খেপো সমাধি। নৰ সমাধী – রূপাৰচরো সমাধি অত্থি হীনো, অত্থি মজ্ঝোমো, অত্থি পণীতো; অরূপাৰচরো সমাধি অত্থি হীনো, অত্থি মজ্ঝোমো, অত্থি পণীতো; সুঞ্ঞতো সমাধি, অনিমিত্তো সমাধি, অপ্পণিহিতো সমাধি। দস সমাধী – উদ্ধুমাতকসঞ্ঞাৰসেন চিত্তস্স একগ্গতা অৰিক্খেপো সমাধি, ৰিনীলকসঞ্ঞাৰসেন…পে॰… ৰিপুব্বকসঞ্ঞাৰসেন… ৰিচ্ছিদ্দকসঞ্ঞাৰসেন… ৰিক্খাযিতকসঞ্ঞাৰসেন… ৰিক্খিত্তকসঞ্ঞাৰসেন… হতৰিক্খিত্তকসঞ্ঞাৰসেন… লোহিতকসঞ্ঞাৰসেন… পুল়ৰকসঞ্ঞাৰসেন 4 … অট্ঠিকসঞ্ঞাৰসেন চিত্তস্স একগ্গতা অৰিক্খেপো সমাধি। ইমে পঞ্চপঞ্ঞাস সমাধি।
Cha samādhī – buddhānussativasena cittassa ekaggatā avikkhepo samādhi, dhammānussativasena cittassa ekaggatā avikkhepo samādhi, saṅghānussativasena cittassa ekaggatā avikkhepo samādhi, sīlānussativasena cittassa ekaggatā avikkhepo samādhi, cāgānussativasena cittassa ekaggatā avikkhepo samādhi, devatānussativasena cittassa ekaggatā avikkhepo samādhi. Satta samādhī – samādhikusalatā, samādhissa samāpattikusalatā, samādhissa ṭhitikusalatā, samādhissa vuṭṭhānakusalatā , samādhissa kallatākusalatā 5, samādhissa gocarakusalatā, samādhissa abhinīhārakusalatā. Aṭṭha samādhī – pathavīkasiṇavasena cittassa ekaggatā avikkhepo samādhi, āpokasiṇavasena…pe… tejokasiṇavasena… vāyokasiṇavasena… nīlakasiṇavasena… pītakasiṇavasena… lohitakasiṇavasena… odātakasiṇavasena cittassa ekaggatā avikkhepo samādhi. Nava samādhī – rūpāvacaro samādhi atthi hīno, atthi majjhomo, atthi paṇīto; arūpāvacaro samādhi atthi hīno, atthi majjhomo, atthi paṇīto; suññato samādhi, animitto samādhi, appaṇihito samādhi. Dasa samādhī – uddhumātakasaññāvasena cittassa ekaggatā avikkhepo samādhi, vinīlakasaññāvasena…pe… vipubbakasaññāvasena… vicchiddakasaññāvasena… vikkhāyitakasaññāvasena… vikkhittakasaññāvasena… hatavikkhittakasaññāvasena… lohitakasaññāvasena… puḷavakasaññāvasena 6 … aṭṭhikasaññāvasena cittassa ekaggatā avikkhepo samādhi. Ime pañcapaññāsa samādhi.
৪৪. অপি চ, পঞ্চৰীসতি সমাধিস্স সমাধিট্ঠা – পরিগ্গহট্ঠেন সমাধি, পরিৰারট্ঠেন সমাধি, পরিপূরট্ঠেন সমাধি, একগ্গট্ঠেন সমাধি, অৰিক্খেপট্ঠেন সমাধি, অৰিসারট্ঠেন সমাধি, অনাৰিলট্ঠেন সমাধি, অনিঞ্জনট্ঠেন সমাধি, ৰিমুত্তট্ঠেন সমাধি, একত্তুপট্ঠানৰসেন চিত্তস্স ঠিতত্তা সমাধি, সমং এসতীতি সমাধি, ৰিসমং নেসতীতি সমাধি, সমং এসিতত্তা সমাধি, ৰিসমং নেসিতত্তা সমাধি, সমং আদিযতীতি সমাধি, ৰিসমং নাদিযতীতি সমাধি, সমং আদিন্নত্তা সমাধি, ৰিসমং অনাদিন্নত্তা সমাধি, সমং পটিপজ্জতীতি সমাধি, ৰিসমং নপ্পটিপজ্জতীতি সমাধি, সমং পটিপন্নত্তা সমাধি, ৰিসমং নপ্পটিপন্নত্তা সমাধি, সমং ঝাযতীতি সমাধি, ৰিসমং ঝাপেতীতি সমাধি, সমং ঝাতত্তা সমাধি, ৰিসমং ঝাপিতত্তা সমাধি, সমো চ হিতো চ সুখো চাতি সমাধি। ইমে পঞ্চৰীসতি সমাধিস্স সমাধিট্ঠা। তং ঞাতট্ঠেন ঞাণং, পজাননট্ঠেন পঞ্ঞা। তেন ৰুচ্চতি – ‘‘সংৰরিত্ৰা সমাদহনে পঞ্ঞা সমাধিভাৰনামযে ঞাণং’’।
44. Api ca, pañcavīsati samādhissa samādhiṭṭhā – pariggahaṭṭhena samādhi, parivāraṭṭhena samādhi, paripūraṭṭhena samādhi, ekaggaṭṭhena samādhi, avikkhepaṭṭhena samādhi, avisāraṭṭhena samādhi, anāvilaṭṭhena samādhi, aniñjanaṭṭhena samādhi, vimuttaṭṭhena samādhi, ekattupaṭṭhānavasena cittassa ṭhitattā samādhi, samaṃ esatīti samādhi, visamaṃ nesatīti samādhi, samaṃ esitattā samādhi, visamaṃ nesitattā samādhi, samaṃ ādiyatīti samādhi, visamaṃ nādiyatīti samādhi, samaṃ ādinnattā samādhi, visamaṃ anādinnattā samādhi, samaṃ paṭipajjatīti samādhi, visamaṃ nappaṭipajjatīti samādhi, samaṃ paṭipannattā samādhi, visamaṃ nappaṭipannattā samādhi, samaṃ jhāyatīti samādhi, visamaṃ jhāpetīti samādhi, samaṃ jhātattā samādhi, visamaṃ jhāpitattā samādhi, samo ca hito ca sukho cāti samādhi. Ime pañcavīsati samādhissa samādhiṭṭhā. Taṃ ñātaṭṭhena ñāṇaṃ, pajānanaṭṭhena paññā. Tena vuccati – ‘‘saṃvaritvā samādahane paññā samādhibhāvanāmaye ñāṇaṃ’’.
সমাধিভাৰনামযঞাণনিদ্দেসো ততিযো।
Samādhibhāvanāmayañāṇaniddeso tatiyo.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / পটিসম্ভিদামগ্গ-অট্ঠকথা • Paṭisambhidāmagga-aṭṭhakathā / ৩. সমাধিভাৰনামযঞাণনিদ্দেসৰণ্ণনা • 3. Samādhibhāvanāmayañāṇaniddesavaṇṇanā
