| Library / Tipiṭaka / ཏིཔིཊཀ • Tipiṭaka / པཊིསམྦྷིདཱམགྒཔཱལི༹ • Paṭisambhidāmaggapāḷi |
༣. སམཱདྷིབྷཱཝནཱམཡཉཱཎནིདྡེསོ
3. Samādhibhāvanāmayañāṇaniddeso
༤༣. ཀཐཾ སཾཝརིཏྭཱ སམཱདཧནེ པཉྙཱ སམཱདྷིབྷཱཝནཱམཡེ ཉཱཎཾ? ཨེཀོ སམཱདྷི – ཙིཏྟསྶ ཨེཀགྒཏཱ། དྭེ སམཱདྷཱི – ལོཀིཡོ སམཱདྷི, ལོཀུཏྟརོ སམཱདྷི། ཏཡོ སམཱདྷཱི – སཝིཏཀྐསཝིཙཱརོ སམཱདྷི, ཨཝིཏཀྐཝིཙཱརམཏྟོ སམཱདྷི, ཨཝིཏཀྐཨཝིཙཱརོ སམཱདྷི། ཙཏྟཱརོ སམཱདྷཱི – ཧཱནབྷཱགིཡོ སམཱདྷི, ཋིཏིབྷཱགིཡོ སམཱདྷི, ཝིསེསབྷཱགིཡོ སམཱདྷི, ནིབྦེདྷབྷཱགིཡོ སམཱདྷི། པཉྩ སམཱདྷཱི – པཱིཏིཕརཎཏཱ, སུཁཕརཎཏཱ, ཙེཏོཕརཎཏཱ, ཨཱལོཀཕརཎཏཱ, པཙྩཝེཀྑཎཱནིམིཏྟཾ 1།
43. Kathaṃ saṃvaritvā samādahane paññā samādhibhāvanāmaye ñāṇaṃ? Eko samādhi – cittassa ekaggatā. Dve samādhī – lokiyo samādhi, lokuttaro samādhi. Tayo samādhī – savitakkasavicāro samādhi, avitakkavicāramatto samādhi, avitakkaavicāro samādhi. Cattāro samādhī – hānabhāgiyo samādhi, ṭhitibhāgiyo samādhi, visesabhāgiyo samādhi, nibbedhabhāgiyo samādhi. Pañca samādhī – pītipharaṇatā, sukhapharaṇatā, cetopharaṇatā, ālokapharaṇatā, paccavekkhaṇānimittaṃ 2.
ཚ སམཱདྷཱི – བུདྡྷཱནུསྶཏིཝསེན ཙིཏྟསྶ ཨེཀགྒཏཱ ཨཝིཀྑེཔོ སམཱདྷི, དྷམྨཱནུསྶཏིཝསེན ཙིཏྟསྶ ཨེཀགྒཏཱ ཨཝིཀྑེཔོ སམཱདྷི, སངྒྷཱནུསྶཏིཝསེན ཙིཏྟསྶ ཨེཀགྒཏཱ ཨཝིཀྑེཔོ སམཱདྷི, སཱིལཱནུསྶཏིཝསེན ཙིཏྟསྶ ཨེཀགྒཏཱ ཨཝིཀྑེཔོ སམཱདྷི, ཙཱགཱནུསྶཏིཝསེན ཙིཏྟསྶ ཨེཀགྒཏཱ ཨཝིཀྑེཔོ སམཱདྷི, དེཝཏཱནུསྶཏིཝསེན ཙིཏྟསྶ ཨེཀགྒཏཱ ཨཝིཀྑེཔོ སམཱདྷི། སཏྟ སམཱདྷཱི – སམཱདྷིཀུསལཏཱ, སམཱདྷིསྶ སམཱཔཏྟིཀུསལཏཱ, སམཱདྷིསྶ ཋིཏིཀུསལཏཱ, སམཱདྷིསྶ ཝུཊྛཱནཀུསལཏཱ , སམཱདྷིསྶ ཀལླཏཱཀུསལཏཱ 3, སམཱདྷིསྶ གོཙརཀུསལཏཱ, སམཱདྷིསྶ ཨབྷིནཱིཧཱརཀུསལཏཱ། ཨཊྛ སམཱདྷཱི – པཐཝཱིཀསིཎཝསེན ཙིཏྟསྶ ཨེཀགྒཏཱ ཨཝིཀྑེཔོ སམཱདྷི, ཨཱཔོཀསིཎཝསེན…པེ॰… ཏེཛོཀསིཎཝསེན… ཝཱཡོཀསིཎཝསེན… ནཱིལཀསིཎཝསེན… པཱིཏཀསིཎཝསེན… ལོཧིཏཀསིཎཝསེན… ཨོདཱཏཀསིཎཝསེན ཙིཏྟསྶ ཨེཀགྒཏཱ ཨཝིཀྑེཔོ སམཱདྷི། ནཝ སམཱདྷཱི – རཱུཔཱཝཙརོ སམཱདྷི ཨཏྠི ཧཱིནོ, ཨཏྠི མཛ྄ཛྷོམོ, ཨཏྠི པཎཱིཏོ; ཨརཱུཔཱཝཙརོ སམཱདྷི ཨཏྠི ཧཱིནོ, ཨཏྠི མཛ྄ཛྷོམོ, ཨཏྠི པཎཱིཏོ; སུཉྙཏོ སམཱདྷི, ཨནིམིཏྟོ སམཱདྷི, ཨཔྤཎིཧིཏོ སམཱདྷི། དས སམཱདྷཱི – ཨུདྡྷུམཱཏཀསཉྙཱཝསེན ཙིཏྟསྶ ཨེཀགྒཏཱ ཨཝིཀྑེཔོ སམཱདྷི, ཝིནཱིལཀསཉྙཱཝསེན…པེ॰… ཝིཔུབྦཀསཉྙཱཝསེན… ཝིཙྪིདྡཀསཉྙཱཝསེན… ཝིཀྑཱཡིཏཀསཉྙཱཝསེན… ཝིཀྑིཏྟཀསཉྙཱཝསེན… ཧཏཝིཀྑིཏྟཀསཉྙཱཝསེན… ལོཧིཏཀསཉྙཱཝསེན… པུལ༹ཝཀསཉྙཱཝསེན 4 … ཨཊྛིཀསཉྙཱཝསེན ཙིཏྟསྶ ཨེཀགྒཏཱ ཨཝིཀྑེཔོ སམཱདྷི། ཨིམེ པཉྩཔཉྙཱས སམཱདྷི།
Cha samādhī – buddhānussativasena cittassa ekaggatā avikkhepo samādhi, dhammānussativasena cittassa ekaggatā avikkhepo samādhi, saṅghānussativasena cittassa ekaggatā avikkhepo samādhi, sīlānussativasena cittassa ekaggatā avikkhepo samādhi, cāgānussativasena cittassa ekaggatā avikkhepo samādhi, devatānussativasena cittassa ekaggatā avikkhepo samādhi. Satta samādhī – samādhikusalatā, samādhissa samāpattikusalatā, samādhissa ṭhitikusalatā, samādhissa vuṭṭhānakusalatā , samādhissa kallatākusalatā 5, samādhissa gocarakusalatā, samādhissa abhinīhārakusalatā. Aṭṭha samādhī – pathavīkasiṇavasena cittassa ekaggatā avikkhepo samādhi, āpokasiṇavasena…pe… tejokasiṇavasena… vāyokasiṇavasena… nīlakasiṇavasena… pītakasiṇavasena… lohitakasiṇavasena… odātakasiṇavasena cittassa ekaggatā avikkhepo samādhi. Nava samādhī – rūpāvacaro samādhi atthi hīno, atthi majjhomo, atthi paṇīto; arūpāvacaro samādhi atthi hīno, atthi majjhomo, atthi paṇīto; suññato samādhi, animitto samādhi, appaṇihito samādhi. Dasa samādhī – uddhumātakasaññāvasena cittassa ekaggatā avikkhepo samādhi, vinīlakasaññāvasena…pe… vipubbakasaññāvasena… vicchiddakasaññāvasena… vikkhāyitakasaññāvasena… vikkhittakasaññāvasena… hatavikkhittakasaññāvasena… lohitakasaññāvasena… puḷavakasaññāvasena 6 … aṭṭhikasaññāvasena cittassa ekaggatā avikkhepo samādhi. Ime pañcapaññāsa samādhi.
༤༤. ཨཔི ཙ, པཉྩཝཱིསཏི སམཱདྷིསྶ སམཱདྷིཊྛཱ – པརིགྒཧཊྛེན སམཱདྷི, པརིཝཱརཊྛེན སམཱདྷི, པརིཔཱུརཊྛེན སམཱདྷི, ཨེཀགྒཊྛེན སམཱདྷི, ཨཝིཀྑེཔཊྛེན སམཱདྷི, ཨཝིསཱརཊྛེན སམཱདྷི, ཨནཱཝིལཊྛེན སམཱདྷི, ཨནིཉྫནཊྛེན སམཱདྷི, ཝིམུཏྟཊྛེན སམཱདྷི, ཨེཀཏྟུཔཊྛཱནཝསེན ཙིཏྟསྶ ཋིཏཏྟཱ སམཱདྷི, སམཾ ཨེསཏཱིཏི སམཱདྷི, ཝིསམཾ ནེསཏཱིཏི སམཱདྷི, སམཾ ཨེསིཏཏྟཱ སམཱདྷི, ཝིསམཾ ནེསིཏཏྟཱ སམཱདྷི, སམཾ ཨཱདིཡཏཱིཏི སམཱདྷི, ཝིསམཾ ནཱདིཡཏཱིཏི སམཱདྷི, སམཾ ཨཱདིནྣཏྟཱ སམཱདྷི, ཝིསམཾ ཨནཱདིནྣཏྟཱ སམཱདྷི, སམཾ པཊིཔཛྫཏཱིཏི སམཱདྷི, ཝིསམཾ ནཔྤཊིཔཛྫཏཱིཏི སམཱདྷི, སམཾ པཊིཔནྣཏྟཱ སམཱདྷི, ཝིསམཾ ནཔྤཊིཔནྣཏྟཱ སམཱདྷི, སམཾ ཛྷཱཡཏཱིཏི སམཱདྷི, ཝིསམཾ ཛྷཱཔེཏཱིཏི སམཱདྷི, སམཾ ཛྷཱཏཏྟཱ སམཱདྷི, ཝིསམཾ ཛྷཱཔིཏཏྟཱ སམཱདྷི, སམོ ཙ ཧིཏོ ཙ སུཁོ ཙཱཏི སམཱདྷི། ཨིམེ པཉྩཝཱིསཏི སམཱདྷིསྶ སམཱདྷིཊྛཱ། ཏཾ ཉཱཏཊྛེན ཉཱཎཾ, པཛཱནནཊྛེན པཉྙཱ། ཏེན ཝུཙྩཏི – ‘‘སཾཝརིཏྭཱ སམཱདཧནེ པཉྙཱ སམཱདྷིབྷཱཝནཱམཡེ ཉཱཎཾ’’།
44. Api ca, pañcavīsati samādhissa samādhiṭṭhā – pariggahaṭṭhena samādhi, parivāraṭṭhena samādhi, paripūraṭṭhena samādhi, ekaggaṭṭhena samādhi, avikkhepaṭṭhena samādhi, avisāraṭṭhena samādhi, anāvilaṭṭhena samādhi, aniñjanaṭṭhena samādhi, vimuttaṭṭhena samādhi, ekattupaṭṭhānavasena cittassa ṭhitattā samādhi, samaṃ esatīti samādhi, visamaṃ nesatīti samādhi, samaṃ esitattā samādhi, visamaṃ nesitattā samādhi, samaṃ ādiyatīti samādhi, visamaṃ nādiyatīti samādhi, samaṃ ādinnattā samādhi, visamaṃ anādinnattā samādhi, samaṃ paṭipajjatīti samādhi, visamaṃ nappaṭipajjatīti samādhi, samaṃ paṭipannattā samādhi, visamaṃ nappaṭipannattā samādhi, samaṃ jhāyatīti samādhi, visamaṃ jhāpetīti samādhi, samaṃ jhātattā samādhi, visamaṃ jhāpitattā samādhi, samo ca hito ca sukho cāti samādhi. Ime pañcavīsati samādhissa samādhiṭṭhā. Taṃ ñātaṭṭhena ñāṇaṃ, pajānanaṭṭhena paññā. Tena vuccati – ‘‘saṃvaritvā samādahane paññā samādhibhāvanāmaye ñāṇaṃ’’.
སམཱདྷིབྷཱཝནཱམཡཉཱཎནིདྡེསོ ཏཏིཡོ།
Samādhibhāvanāmayañāṇaniddeso tatiyo.
Footnotes:
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཁུདྡཀནིཀཱཡ (ཨཊྛཀཐཱ) • Khuddakanikāya (aṭṭhakathā) / པཊིསམྦྷིདཱམགྒ-ཨཊྛཀཐཱ • Paṭisambhidāmagga-aṭṭhakathā / ༣. སམཱདྷིབྷཱཝནཱམཡཉཱཎནིདྡེསཝཎྞནཱ • 3. Samādhibhāvanāmayañāṇaniddesavaṇṇanā
