| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
5. ரோஹிதஸ்ஸவக்³கோ³
5. Rohitassavaggo
1. ஸமாதி⁴பா⁴வனாஸுத்தவண்ணனா
1. Samādhibhāvanāsuttavaṇṇanā
41. பஞ்சமஸ்ஸ பட²மே தி³ட்ட²த⁴ம்மஸுக²விஹாராயாதி இமஸ்மிங்யேவ அத்தபா⁴வே ஸுக²விஹாரத்தா²ய, நிக்கிலேஸதாய நிராமிஸேன ஸுகே²ன விஹரணத்தா²யாதி அத்தோ². இமினா சத்தாரி ப²லஸமாபத்திஜ்ஜா²னானி கீ²ணாஸவஸ்ஸ ஆஸவக்க²யாதி⁴க³மதோ அபரபா⁴கே³ அதி⁴க³தரூபாரூபஜ்ஜா²னானி ச கதி²தானி. தி³ப்³ப³சக்கு²ஞாணத³ஸ்ஸனப்படிலாபா⁴யாதி தி³ப்³ப³சக்கு²ஞாணப்படிலாப⁴த்தா²ய. தி³ப்³ப³சக்கு²ஞாணஞ்ஹி ரூபக³தஸ்ஸ தி³ப்³ப³ஸ்ஸ இதரஸ்ஸ ச த³ஸ்ஸனட்டே²ன இத⁴ ‘‘ஞாணத³ஸ்ஸன’’ந்தி அதி⁴ப்பேதங். ஆலோகஸஞ்ஞங் மனஸி கரோதீதி தி³வா வா ரத்திங் வா ஸூரியதீ³பசந்த³மணிஉக்காவிஜ்ஜுலதாதீ³னங் ஆலோகோ தி³வா ரத்திஞ்ச உபலத்³தோ⁴, யதா²லத்³த⁴வஸேனேவ ஆலோகங் மனஸி கரோதி சித்தே ட²பேதி, ததா² ச நங் மனஸி கரோதி, யதா²ஸ்ஸ ஸுபா⁴விதாலோககஸிணஸ்ஸ விய கஸிணாலோகோ யதி²ச்ச²கங் யாவதி³ச்ச²கஞ்ச ஸோ ஆலோகோ ரத்தியங் உபதிட்ட²தி , யேன தத்த² தி³வாஸஞ்ஞங் ட²பேதி, தி³வா விய விக³ததி²னமித்³தோ⁴ ஹோதி. தேனாஹ ‘‘யதா² தி³வா ததா² ரத்தி’’ந்தி.
41. Pañcamassa paṭhame diṭṭhadhammasukhavihārāyāti imasmiṃyeva attabhāve sukhavihāratthāya, nikkilesatāya nirāmisena sukhena viharaṇatthāyāti attho. Iminā cattāri phalasamāpattijjhānāni khīṇāsavassa āsavakkhayādhigamato aparabhāge adhigatarūpārūpajjhānāni ca kathitāni. Dibbacakkhuñāṇadassanappaṭilābhāyāti dibbacakkhuñāṇappaṭilābhatthāya. Dibbacakkhuñāṇañhi rūpagatassa dibbassa itarassa ca dassanaṭṭhena idha ‘‘ñāṇadassana’’nti adhippetaṃ. Ālokasaññaṃ manasi karotīti divā vā rattiṃ vā sūriyadīpacandamaṇiukkāvijjulatādīnaṃ āloko divā rattiñca upaladdho, yathāladdhavaseneva ālokaṃ manasi karoti citte ṭhapeti, tathā ca naṃ manasi karoti, yathāssa subhāvitālokakasiṇassa viya kasiṇāloko yathicchakaṃ yāvadicchakañca so āloko rattiyaṃ upatiṭṭhati , yena tattha divāsaññaṃ ṭhapeti, divā viya vigatathinamiddho hoti. Tenāha ‘‘yathā divā tathā ratti’’nti.
யதா² தி³வா ஆலோகஸஞ்ஞா மனஸி கதா, ததே²வ நங் ரத்திம்பி மனஸி கரோதீதி யதா² தி³வா தி³ட்டோ² ஆலோகோ, ததே²வ தங் ரத்திங் மனஸி கரோதி. து³தியபதே³தி ‘‘யதா² ரத்திங் ததா² தி³வா’’தி இமஸ்மிங் வாக்யே. ஏஸ நயோதி இமினா யதா² ரத்தியங் சந்தா³லோகாதி³ ஆலோகோ தி³ட்டோ², ஏவமேவ ரத்திங் தி³ட்டா²காரேனேவ தி³வா தங் ஆலோகங் மனஸி கரோதி சித்தே ட²பேதீதி இமமத்த²ங் அதிதி³ஸதி. இதி விவடேன சேதஸாதி ஏவங் அபிஹிதேன சித்தேன, தி²னமித்³தா⁴பிதா⁴னேன அபிஹிதசித்தேனாதி வுத்தங் ஹோதி. அபரியோனத்³தே⁴னாதி ஸமந்ததோ அனத்³தே⁴ன அஸஞ்சா²தி³தேன. கிஞ்சாபீதிஆதி³னா அத்தனா வுத்தமேவத்த²ங் ஸமத்தே²தி. ஆலோகஸதி³ஸங் கதங் ‘‘யதா² தி³வா ததா² ரத்தி’’ந்திஆதி³னா.
Yathā divā ālokasaññā manasi katā, tatheva naṃ rattimpi manasi karotīti yathā divā diṭṭho āloko, tatheva taṃ rattiṃ manasi karoti. Dutiyapadeti ‘‘yathā rattiṃ tathā divā’’ti imasmiṃ vākye. Esa nayoti iminā yathā rattiyaṃ candālokādi āloko diṭṭho, evameva rattiṃ diṭṭhākāreneva divā taṃ ālokaṃ manasi karoti citte ṭhapetīti imamatthaṃ atidisati. Iti vivaṭena cetasāti evaṃ apihitena cittena, thinamiddhāpidhānena apihitacittenāti vuttaṃ hoti. Apariyonaddhenāti samantato anaddhena asañchāditena. Kiñcāpītiādinā attanā vuttamevatthaṃ samattheti. Ālokasadisaṃ kataṃ ‘‘yathā divā tathā ratti’’ntiādinā.
ஸத்தட்டா²னிகஸ்ஸாதி ‘‘அபி⁴க்கந்தே படிக்கந்தே ஸம்பஜானகாரீ ஹோதீ’’திஆதி³னா (தீ³॰ நி॰ 1.214; 2.376; ம॰ நி॰ 1.109) வுத்தஸ்ஸ ஸத்தட்டா²னிகஸ்ஸ ஸதிஸம்பஜஞ்ஞஸ்ஸ அத்தா²ய. பரிக்³க³ஹிதவத்தா²ரம்மணதாயாதி வத்து²னோ ஆரம்மணஸ்ஸ ச யாதா²வதோ விதி³தபா⁴வேன. யதா² ஹி ஸப்பங் பரியேஸந்தேன தஸ்ஸ ஆஸயே விதி³தே ஸோபி விதி³தோ க³ஹிதோ ஏவ ச ஹோதி மந்தாக³த³ப³லேன தஸ்ஸ க³ஹணஸ்ஸ ஸுகரத்தா, ஏவங் வேத³னாய ஆஸயபூ⁴தே வத்து²ம்ஹி ஆரம்மணே ச விதி³தே ஆதி³கம்மிகஸ்ஸபி வேத³னா விதி³தா க³ஹிதா ஏவ ஹோதி ஸலக்க²ணதோ ஸாமஞ்ஞலக்க²ணதோ ச தஸ்ஸா க³ஹணஸ்ஸ ஸுகரத்தா. பகே³வ பரிஞ்ஞாதவத்து²கஸ்ஸ கீ²ணாஸவஸ்ஸ. தஸ்ஸ ஹி உப்பாத³க்க²ணேபி டி²திக்க²ணேபி ப⁴ங்க³க்க²ணேபி வேத³னா விதி³தா பாகடா ஹொந்தி ‘‘தா வேத³னா ஏவங் உப்பஜ்ஜித்வா’’திஆதி³னா. ந கேவலஞ்ச வேத³னா ஏவ, இத⁴ வுத்தா ஸஞ்ஞாத³யோபி அவுத்தா சேதனாத³யோபி விதி³தாவ உப்பஜ்ஜந்தி சேவ திட்ட²ந்தி ச நிருஜ்ஜ²ந்தி ச. நித³ஸ்ஸனமத்தஞ்ஹேதங், யதி³த³ங் பாளியங் வேத³னாஸஞ்ஞாவிதக்கக்³க³ஹணங். தேன அனவஸேஸதோ ஸப்³ப³த⁴ம்மானம்பி உப்பாதா³தி³தோ விதி³தபா⁴வங் த³ஸ்ஸேதி.
Sattaṭṭhānikassāti ‘‘abhikkante paṭikkante sampajānakārī hotī’’tiādinā (dī. ni. 1.214; 2.376; ma. ni. 1.109) vuttassa sattaṭṭhānikassa satisampajaññassa atthāya. Pariggahitavatthārammaṇatāyāti vatthuno ārammaṇassa ca yāthāvato viditabhāvena. Yathā hi sappaṃ pariyesantena tassa āsaye vidite sopi vidito gahito eva ca hoti mantāgadabalena tassa gahaṇassa sukarattā, evaṃ vedanāya āsayabhūte vatthumhi ārammaṇe ca vidite ādikammikassapi vedanā viditā gahitā eva hoti salakkhaṇato sāmaññalakkhaṇato ca tassā gahaṇassa sukarattā. Pageva pariññātavatthukassa khīṇāsavassa. Tassa hi uppādakkhaṇepi ṭhitikkhaṇepi bhaṅgakkhaṇepi vedanā viditā pākaṭā honti ‘‘tā vedanā evaṃ uppajjitvā’’tiādinā. Na kevalañca vedanā eva, idha vuttā saññādayopi avuttā cetanādayopi viditāva uppajjanti ceva tiṭṭhanti ca nirujjhanti ca. Nidassanamattañhetaṃ, yadidaṃ pāḷiyaṃ vedanāsaññāvitakkaggahaṇaṃ. Tena anavasesato sabbadhammānampi uppādādito viditabhāvaṃ dasseti.
அபிச வேத³னாய உப்பாதோ³ விதி³தோ ஹோதி, உபட்டா²னங் விதி³தங் ஹோதி, அத்த²ங்க³மோ விதி³தோ ஹோதி. கத²ங் வேத³னாய உப்பாதோ³ விதி³தோ ஹோதி ? அவிஜ்ஜாஸமுத³யா வேத³னாஸமுத³யோ, தண்ஹாஸமுத³யா கம்மஸமுத³யோ, ப²ஸ்ஸஸமுத³யா வேத³னாஸமுத³யோதி நிப்³ப³த்திலக்க²ணங் பஸ்ஸந்தோபி வேத³னாக்க²ந்த⁴ஸ்ஸ ஸமுத³யங் பஸ்ஸதி. ஏவங் வேத³னாய உப்பாதோ³ விதி³தோ ஹோதி. கத²ங் வேத³னாய உபட்டா²னங் விதி³தங் ஹோதி? அனிச்சதோ மனஸிகரோதோ க²யதுபட்டா²னங் விதி³தங் ஹோதி, து³க்க²தோ மனஸிகரோதோ ப⁴யதுபட்டா²னங் விதி³தங் ஹோதி, அனத்ததோ மனஸிகரோதோ ஸுஞ்ஞதுபட்டா²னங் விதி³தங் ஹோதி. ஏவங் வேத³னாய உபட்டா²னங் விதி³தங் ஹோதி. இதி க²யதோ ப⁴யதோ ஸுஞ்ஞதோ ஜானாதி. கத²ங் வேத³னாய அத்த²ங்க³மோ விதி³தோ ஹோதி? அவிஜ்ஜானிரோதா⁴ வேத³னானிரோதோ⁴…பே॰… ஏவங் வேத³னாய அத்த²ங்க³மோ விதி³தோ ஹோதி. இமினாபி நயேனெத்த² அத்தோ² வேதி³தப்³போ³.
Apica vedanāya uppādo vidito hoti, upaṭṭhānaṃ viditaṃ hoti, atthaṅgamo vidito hoti. Kathaṃ vedanāya uppādo vidito hoti ? Avijjāsamudayā vedanāsamudayo, taṇhāsamudayā kammasamudayo, phassasamudayā vedanāsamudayoti nibbattilakkhaṇaṃ passantopi vedanākkhandhassa samudayaṃ passati. Evaṃ vedanāya uppādo vidito hoti. Kathaṃ vedanāya upaṭṭhānaṃ viditaṃ hoti? Aniccato manasikaroto khayatupaṭṭhānaṃ viditaṃ hoti, dukkhato manasikaroto bhayatupaṭṭhānaṃ viditaṃ hoti, anattato manasikaroto suññatupaṭṭhānaṃ viditaṃ hoti. Evaṃ vedanāya upaṭṭhānaṃ viditaṃ hoti. Iti khayato bhayato suññato jānāti. Kathaṃ vedanāya atthaṅgamo vidito hoti? Avijjānirodhā vedanānirodho…pe… evaṃ vedanāya atthaṅgamo vidito hoti. Imināpi nayenettha attho veditabbo.
இதி ரூபந்தி எத்த² இதிஸத்³தோ³ அனவஸேஸதோ ரூபஸ்ஸ ஸரூபனித³ஸ்ஸனத்தோ²தி தஸ்ஸ இத³ங் ரூபந்தி ஏதேன ஸாதா⁴ரணதோ ஸரூபனித³ஸ்ஸனமாஹ, எத்தகங் ரூபந்தி ஏதேன அனவஸேஸதோ, ந இதோ பரங் ரூபங் அத்தீ²தி தப்³பி³னிமுத்தஸ்ஸ அஞ்ஞஸ்ஸ அபா⁴வங். இதி வேத³னாதிஆதீ³ஸுபி அயங் வேத³னா, எத்தகா வேத³னா, இதோ பரங் வேத³னா நத்தி². அயங் ஸஞ்ஞா…பே॰… இமே ஸங்கா²ரா…பே॰… இத³ங் விஞ்ஞாணங், எத்தகங் விஞ்ஞாணங், இதோ பரங் விஞ்ஞாணங் நத்தீ²தி ஏவமத்தோ² த³ட்ட²ப்³போ³தி ஆஹ ‘‘வேத³னாதீ³ஸுபி ஏஸேவ நயோ’’தி.
Iti rūpanti ettha itisaddo anavasesato rūpassa sarūpanidassanatthoti tassa idaṃ rūpanti etena sādhāraṇato sarūpanidassanamāha, ettakaṃ rūpanti etena anavasesato, na ito paraṃ rūpaṃ atthīti tabbinimuttassa aññassa abhāvaṃ. Iti vedanātiādīsupi ayaṃ vedanā, ettakā vedanā, ito paraṃ vedanā natthi. Ayaṃ saññā…pe… ime saṅkhārā…pe… idaṃ viññāṇaṃ, ettakaṃ viññāṇaṃ, ito paraṃ viññāṇaṃ natthīti evamattho daṭṭhabboti āha ‘‘vedanādīsupi eseva nayo’’ti.
ஞாணேன ஜானித்வா பரோபரானி. பரோபரானீதி பரானி ச ஓபரானி ச. உத்தமாத⁴மானீதி பரத்தபா⁴வஸகத்தபா⁴வாதீ³னி உத்தமாத⁴மானி. சலிதந்தி தண்ஹாதி³ட்டி²விப்ப²ந்தி³தங். அனீகோ⁴தி ராகா³தி³ஈக⁴ரஹிதோ. அதாரி ஸோதி ஸோ ஏவரூபோ அரஹா ஜாதிஜரங் அதரி.
Ñāṇena jānitvā paroparāni. Paroparānīti parāni ca oparāni ca. Uttamādhamānīti parattabhāvasakattabhāvādīni uttamādhamāni. Calitanti taṇhādiṭṭhivipphanditaṃ. Anīghoti rāgādiīgharahito. Atāri soti so evarūpo arahā jātijaraṃ atari.
ஸமாதி⁴பா⁴வனாஸுத்தவண்ணனா நிட்டி²தா.
Samādhibhāvanāsuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 1. ஸமாதி⁴பா⁴வனாஸுத்தங் • 1. Samādhibhāvanāsuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 1. ஸமாதி⁴பா⁴வனாஸுத்தவண்ணனா • 1. Samādhibhāvanāsuttavaṇṇanā
