| Library / Tipiṭaka / তিপিটক • Tipiṭaka / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) |
৫. রোহিতস্সৰগ্গো
5. Rohitassavaggo
১. সমাধিভাৰনাসুত্তৰণ্ণনা
1. Samādhibhāvanāsuttavaṇṇanā
৪১. পঞ্চমস্স পঠমে ঞাণদস্সনপ্পটিলাভাযাতি দিব্বচক্খুঞাণদস্সনস্স পটিলাভায। দিৰাসঞ্ঞং অধিট্ঠাতীতি দিৰাতি এৰং সঞ্ঞং অধিট্ঠাতি। যথা দিৰা তথা রত্তিন্তি যথা দিৰা আলোকসঞ্ঞা মনসি কতা, তথেৰ তং রত্তিম্পি মনসি করোতি। দুতিযপদেপি এসেৰ নযো। সপ্পভাসন্তি দিব্বচক্খুঞাণোভাসেন সহোভাসং। কিঞ্চাপি আলোকসদিসং কতং, অত্থো পনেত্থ ন এৰং সল্লক্খেতব্বো। দিব্বচক্খুঞাণালোকো হি ইধাধিপ্পেতো।
41. Pañcamassa paṭhame ñāṇadassanappaṭilābhāyāti dibbacakkhuñāṇadassanassa paṭilābhāya. Divāsaññaṃ adhiṭṭhātīti divāti evaṃ saññaṃ adhiṭṭhāti. Yathā divā tathā rattinti yathā divā ālokasaññā manasi katā, tatheva taṃ rattimpi manasi karoti. Dutiyapadepi eseva nayo. Sappabhāsanti dibbacakkhuñāṇobhāsena sahobhāsaṃ. Kiñcāpi ālokasadisaṃ kataṃ, attho panettha na evaṃ sallakkhetabbo. Dibbacakkhuñāṇāloko hi idhādhippeto.
ৰিদিতাতি পাকটা হুত্ৰা। কথং পন ৰেদনা ৰিদিতা উপ্পজ্জন্তি, ৰিদিতা অব্ভত্থং গচ্ছন্তীতি? ইধ ভিক্খু ৰত্থুং পরিগ্গণ্হাতি, আরম্মণং পরিগ্গণ্হাতি। তস্স পরিগ্গহিতৰত্থারম্মণতায তা ৰেদনা ‘‘এৰং উপ্পজ্জিত্ৰা এৰং ঠত্ৰা এৰং নিরুজ্ঝন্তী’’তি ৰিদিতা উপ্পজ্জন্তি, ৰিদিতা তিট্ঠন্তি, ৰিদিতা অব্ভত্থং গচ্ছন্তি নাম। সঞ্ঞাৰিতক্কেসুপি এসেৰ নযো।
Viditāti pākaṭā hutvā. Kathaṃ pana vedanā viditā uppajjanti, viditā abbhatthaṃ gacchantīti? Idha bhikkhu vatthuṃ pariggaṇhāti, ārammaṇaṃ pariggaṇhāti. Tassa pariggahitavatthārammaṇatāya tā vedanā ‘‘evaṃ uppajjitvā evaṃ ṭhatvā evaṃ nirujjhantī’’ti viditā uppajjanti, viditā tiṭṭhanti, viditā abbhatthaṃ gacchanti nāma. Saññāvitakkesupi eseva nayo.
উদযব্বযানুপস্সীতি উদযঞ্চ ৰযঞ্চ পস্সন্তো। ইতি রূপন্তি এৰং রূপং এত্তকং রূপং ন ইতো পরং রূপং অত্থীতি। ইতি রূপস্স সমুদযোতি এৰং রূপস্স উপ্পাদো। অত্থঙ্গমোতি পন ভেদো অধিপ্পেতো। ৰেদনাদীসুপি এসেৰ নযো। ইদঞ্চ পন মেতং, ভিক্খৰে, সন্ধায ভাসিতন্তি, ভিক্খৰে, যং মযা এতং পুণ্ণকপঞ্হে ‘‘সঙ্খায লোকস্মি’’ন্তিআদি ভাসিতং, তং ইদং ফলসমাপত্তিং সন্ধায ভাসিতন্তি অত্থো।
Udayabbayānupassīti udayañca vayañca passanto. Iti rūpanti evaṃ rūpaṃ ettakaṃ rūpaṃ na ito paraṃ rūpaṃ atthīti. Iti rūpassa samudayoti evaṃ rūpassa uppādo. Atthaṅgamoti pana bhedo adhippeto. Vedanādīsupi eseva nayo. Idañca pana metaṃ, bhikkhave, sandhāya bhāsitanti, bhikkhave, yaṃ mayā etaṃ puṇṇakapañhe ‘‘saṅkhāya lokasmi’’ntiādi bhāsitaṃ, taṃ idaṃ phalasamāpattiṃ sandhāya bhāsitanti attho.
তত্থ সঙ্খাযাতি ঞাণেন জানিত্ৰা। লোকস্মিন্তি সত্তলোকে। পরোপরানীতি উচ্চাৰচানি উত্তমাধমানি। ইঞ্জিতন্তি চলিতং। নত্থি কুহিঞ্চি লোকেতি লোকস্মিং কত্থচি একক্খন্ধেপি একাযতনেপি একধাতুযাপি একারম্মণেপি নত্থি। সন্তোতি পচ্চনীককিলেসৰূপসমেন সন্তো। ৰিধূমোতি কোধধূমেন ৰিগতধূমো। এৰমেত্থ সুত্তন্তে মগ্গেকগ্গতম্পি কথেত্ৰা গাথায ফলসমাপত্তিযেৰ কথিতাতি।
Tattha saṅkhāyāti ñāṇena jānitvā. Lokasminti sattaloke. Paroparānīti uccāvacāni uttamādhamāni. Iñjitanti calitaṃ. Natthi kuhiñci loketi lokasmiṃ katthaci ekakkhandhepi ekāyatanepi ekadhātuyāpi ekārammaṇepi natthi. Santoti paccanīkakilesavūpasamena santo. Vidhūmoti kodhadhūmena vigatadhūmo. Evamettha suttante maggekaggatampi kathetvā gāthāya phalasamāpattiyeva kathitāti.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / অঙ্গুত্তরনিকায • Aṅguttaranikāya / ১. সমাধিভাৰনাসুত্তং • 1. Samādhibhāvanāsuttaṃ
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ১. সমাধিভাৰনাসুত্তৰণ্ণনা • 1. Samādhibhāvanāsuttavaṇṇanā
