| Library / Tipiṭaka / ತಿಪಿಟಕ • Tipiṭaka / ಅಙ್ಗುತ್ತರನಿಕಾಯ (ಅಟ್ಠಕಥಾ) • Aṅguttaranikāya (aṭṭhakathā) |
೫. ರೋಹಿತಸ್ಸವಗ್ಗೋ
5. Rohitassavaggo
೧. ಸಮಾಧಿಭಾವನಾಸುತ್ತವಣ್ಣನಾ
1. Samādhibhāvanāsuttavaṇṇanā
೪೧. ಪಞ್ಚಮಸ್ಸ ಪಠಮೇ ಞಾಣದಸ್ಸನಪ್ಪಟಿಲಾಭಾಯಾತಿ ದಿಬ್ಬಚಕ್ಖುಞಾಣದಸ್ಸನಸ್ಸ ಪಟಿಲಾಭಾಯ। ದಿವಾಸಞ್ಞಂ ಅಧಿಟ್ಠಾತೀತಿ ದಿವಾತಿ ಏವಂ ಸಞ್ಞಂ ಅಧಿಟ್ಠಾತಿ। ಯಥಾ ದಿವಾ ತಥಾ ರತ್ತಿನ್ತಿ ಯಥಾ ದಿವಾ ಆಲೋಕಸಞ್ಞಾ ಮನಸಿ ಕತಾ, ತಥೇವ ತಂ ರತ್ತಿಮ್ಪಿ ಮನಸಿ ಕರೋತಿ। ದುತಿಯಪದೇಪಿ ಏಸೇವ ನಯೋ। ಸಪ್ಪಭಾಸನ್ತಿ ದಿಬ್ಬಚಕ್ಖುಞಾಣೋಭಾಸೇನ ಸಹೋಭಾಸಂ। ಕಿಞ್ಚಾಪಿ ಆಲೋಕಸದಿಸಂ ಕತಂ, ಅತ್ಥೋ ಪನೇತ್ಥ ನ ಏವಂ ಸಲ್ಲಕ್ಖೇತಬ್ಬೋ। ದಿಬ್ಬಚಕ್ಖುಞಾಣಾಲೋಕೋ ಹಿ ಇಧಾಧಿಪ್ಪೇತೋ।
41. Pañcamassa paṭhame ñāṇadassanappaṭilābhāyāti dibbacakkhuñāṇadassanassa paṭilābhāya. Divāsaññaṃ adhiṭṭhātīti divāti evaṃ saññaṃ adhiṭṭhāti. Yathā divā tathā rattinti yathā divā ālokasaññā manasi katā, tatheva taṃ rattimpi manasi karoti. Dutiyapadepi eseva nayo. Sappabhāsanti dibbacakkhuñāṇobhāsena sahobhāsaṃ. Kiñcāpi ālokasadisaṃ kataṃ, attho panettha na evaṃ sallakkhetabbo. Dibbacakkhuñāṇāloko hi idhādhippeto.
ವಿದಿತಾತಿ ಪಾಕಟಾ ಹುತ್ವಾ। ಕಥಂ ಪನ ವೇದನಾ ವಿದಿತಾ ಉಪ್ಪಜ್ಜನ್ತಿ, ವಿದಿತಾ ಅಬ್ಭತ್ಥಂ ಗಚ್ಛನ್ತೀತಿ? ಇಧ ಭಿಕ್ಖು ವತ್ಥುಂ ಪರಿಗ್ಗಣ್ಹಾತಿ, ಆರಮ್ಮಣಂ ಪರಿಗ್ಗಣ್ಹಾತಿ। ತಸ್ಸ ಪರಿಗ್ಗಹಿತವತ್ಥಾರಮ್ಮಣತಾಯ ತಾ ವೇದನಾ ‘‘ಏವಂ ಉಪ್ಪಜ್ಜಿತ್ವಾ ಏವಂ ಠತ್ವಾ ಏವಂ ನಿರುಜ್ಝನ್ತೀ’’ತಿ ವಿದಿತಾ ಉಪ್ಪಜ್ಜನ್ತಿ, ವಿದಿತಾ ತಿಟ್ಠನ್ತಿ, ವಿದಿತಾ ಅಬ್ಭತ್ಥಂ ಗಚ್ಛನ್ತಿ ನಾಮ। ಸಞ್ಞಾವಿತಕ್ಕೇಸುಪಿ ಏಸೇವ ನಯೋ।
Viditāti pākaṭā hutvā. Kathaṃ pana vedanā viditā uppajjanti, viditā abbhatthaṃ gacchantīti? Idha bhikkhu vatthuṃ pariggaṇhāti, ārammaṇaṃ pariggaṇhāti. Tassa pariggahitavatthārammaṇatāya tā vedanā ‘‘evaṃ uppajjitvā evaṃ ṭhatvā evaṃ nirujjhantī’’ti viditā uppajjanti, viditā tiṭṭhanti, viditā abbhatthaṃ gacchanti nāma. Saññāvitakkesupi eseva nayo.
ಉದಯಬ್ಬಯಾನುಪಸ್ಸೀತಿ ಉದಯಞ್ಚ ವಯಞ್ಚ ಪಸ್ಸನ್ತೋ। ಇತಿ ರೂಪನ್ತಿ ಏವಂ ರೂಪಂ ಏತ್ತಕಂ ರೂಪಂ ನ ಇತೋ ಪರಂ ರೂಪಂ ಅತ್ಥೀತಿ। ಇತಿ ರೂಪಸ್ಸ ಸಮುದಯೋತಿ ಏವಂ ರೂಪಸ್ಸ ಉಪ್ಪಾದೋ। ಅತ್ಥಙ್ಗಮೋತಿ ಪನ ಭೇದೋ ಅಧಿಪ್ಪೇತೋ। ವೇದನಾದೀಸುಪಿ ಏಸೇವ ನಯೋ। ಇದಞ್ಚ ಪನ ಮೇತಂ, ಭಿಕ್ಖವೇ, ಸನ್ಧಾಯ ಭಾಸಿತನ್ತಿ, ಭಿಕ್ಖವೇ, ಯಂ ಮಯಾ ಏತಂ ಪುಣ್ಣಕಪಞ್ಹೇ ‘‘ಸಙ್ಖಾಯ ಲೋಕಸ್ಮಿ’’ನ್ತಿಆದಿ ಭಾಸಿತಂ, ತಂ ಇದಂ ಫಲಸಮಾಪತ್ತಿಂ ಸನ್ಧಾಯ ಭಾಸಿತನ್ತಿ ಅತ್ಥೋ।
Udayabbayānupassīti udayañca vayañca passanto. Iti rūpanti evaṃ rūpaṃ ettakaṃ rūpaṃ na ito paraṃ rūpaṃ atthīti. Iti rūpassa samudayoti evaṃ rūpassa uppādo. Atthaṅgamoti pana bhedo adhippeto. Vedanādīsupi eseva nayo. Idañca pana metaṃ, bhikkhave, sandhāya bhāsitanti, bhikkhave, yaṃ mayā etaṃ puṇṇakapañhe ‘‘saṅkhāya lokasmi’’ntiādi bhāsitaṃ, taṃ idaṃ phalasamāpattiṃ sandhāya bhāsitanti attho.
ತತ್ಥ ಸಙ್ಖಾಯಾತಿ ಞಾಣೇನ ಜಾನಿತ್ವಾ। ಲೋಕಸ್ಮಿನ್ತಿ ಸತ್ತಲೋಕೇ। ಪರೋಪರಾನೀತಿ ಉಚ್ಚಾವಚಾನಿ ಉತ್ತಮಾಧಮಾನಿ। ಇಞ್ಜಿತನ್ತಿ ಚಲಿತಂ। ನತ್ಥಿ ಕುಹಿಞ್ಚಿ ಲೋಕೇತಿ ಲೋಕಸ್ಮಿಂ ಕತ್ಥಚಿ ಏಕಕ್ಖನ್ಧೇಪಿ ಏಕಾಯತನೇಪಿ ಏಕಧಾತುಯಾಪಿ ಏಕಾರಮ್ಮಣೇಪಿ ನತ್ಥಿ। ಸನ್ತೋತಿ ಪಚ್ಚನೀಕಕಿಲೇಸವೂಪಸಮೇನ ಸನ್ತೋ। ವಿಧೂಮೋತಿ ಕೋಧಧೂಮೇನ ವಿಗತಧೂಮೋ। ಏವಮೇತ್ಥ ಸುತ್ತನ್ತೇ ಮಗ್ಗೇಕಗ್ಗತಮ್ಪಿ ಕಥೇತ್ವಾ ಗಾಥಾಯ ಫಲಸಮಾಪತ್ತಿಯೇವ ಕಥಿತಾತಿ।
Tattha saṅkhāyāti ñāṇena jānitvā. Lokasminti sattaloke. Paroparānīti uccāvacāni uttamādhamāni. Iñjitanti calitaṃ. Natthi kuhiñci loketi lokasmiṃ katthaci ekakkhandhepi ekāyatanepi ekadhātuyāpi ekārammaṇepi natthi. Santoti paccanīkakilesavūpasamena santo. Vidhūmoti kodhadhūmena vigatadhūmo. Evamettha suttante maggekaggatampi kathetvā gāthāya phalasamāpattiyeva kathitāti.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಅಙ್ಗುತ್ತರನಿಕಾಯ • Aṅguttaranikāya / ೧. ಸಮಾಧಿಭಾವನಾಸುತ್ತಂ • 1. Samādhibhāvanāsuttaṃ
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಅಙ್ಗುತ್ತರನಿಕಾಯ (ಟೀಕಾ) • Aṅguttaranikāya (ṭīkā) / ೧. ಸಮಾಧಿಭಾವನಾಸುತ್ತವಣ್ಣನಾ • 1. Samādhibhāvanāsuttavaṇṇanā
