| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) |
5. රොහිතස්‌සවග්‌ගො
5. Rohitassavaggo
1. සමාධිභාවනාසුත්‌තවණ්‌ණනා
1. Samādhibhāvanāsuttavaṇṇanā
41. පඤ්‌චමස්‌ස පඨමෙ ඤාණදස්‌සනප්‌පටිලාභායාති දිබ්‌බචක්‌ඛුඤාණදස්‌සනස්‌ස පටිලාභාය. දිවාසඤ්‌ඤං අධිට්‌ඨාතීති දිවාති එවං සඤ්‌ඤං අධිට්‌ඨාති. යථා දිවා තථා රත්‌තින්‌ති යථා දිවා ආලොකසඤ්‌ඤා මනසි කතා, තථෙව තං රත්‌තිම්‌පි මනසි කරොති. දුතියපදෙපි එසෙව නයො. සප්‌පභාසන්‌ති දිබ්‌බචක්‌ඛුඤාණොභාසෙන සහොභාසං. කිඤ්‌චාපි ආලොකසදිසං කතං, අත්‌ථො පනෙත්‌ථ න එවං සල්‌ලක්‌ඛෙතබ්‌බො. දිබ්‌බචක්‌ඛුඤාණාලොකො හි ඉධාධිප්‌පෙතො.
41. Pañcamassa paṭhame ñāṇadassanappaṭilābhāyāti dibbacakkhuñāṇadassanassa paṭilābhāya. Divāsaññaṃ adhiṭṭhātīti divāti evaṃ saññaṃ adhiṭṭhāti. Yathā divā tathā rattinti yathā divā ālokasaññā manasi katā, tatheva taṃ rattimpi manasi karoti. Dutiyapadepi eseva nayo. Sappabhāsanti dibbacakkhuñāṇobhāsena sahobhāsaṃ. Kiñcāpi ālokasadisaṃ kataṃ, attho panettha na evaṃ sallakkhetabbo. Dibbacakkhuñāṇāloko hi idhādhippeto.
විදිතාති පාකටා හුත්‌වා. කථං පන වෙදනා විදිතා උප්‌පජ්‌ජන්‌ති, විදිතා අබ්‌භත්‌ථං ගච්‌ඡන්‌තීති? ඉධ භික්‌ඛු වත්‌ථුං පරිග්‌ගණ්‌හාති, ආරම්‌මණං පරිග්‌ගණ්‌හාති. තස්‌ස පරිග්‌ගහිතවත්‌ථාරම්‌මණතාය තා වෙදනා ‘‘එවං උප්‌පජ්‌ජිත්‌වා එවං ඨත්‌වා එවං නිරුජ්‌ඣන්‌තී’’ති විදිතා උප්‌පජ්‌ජන්‌ති, විදිතා තිට්‌ඨන්‌ති, විදිතා අබ්‌භත්‌ථං ගච්‌ඡන්‌ති නාම. සඤ්‌ඤාවිතක්‌කෙසුපි එසෙව නයො.
Viditāti pākaṭā hutvā. Kathaṃ pana vedanā viditā uppajjanti, viditā abbhatthaṃ gacchantīti? Idha bhikkhu vatthuṃ pariggaṇhāti, ārammaṇaṃ pariggaṇhāti. Tassa pariggahitavatthārammaṇatāya tā vedanā ‘‘evaṃ uppajjitvā evaṃ ṭhatvā evaṃ nirujjhantī’’ti viditā uppajjanti, viditā tiṭṭhanti, viditā abbhatthaṃ gacchanti nāma. Saññāvitakkesupi eseva nayo.
උදයබ්‌බයානුපස්‌සීති උදයඤ්‌ච වයඤ්‌ච පස්‌සන්‌තො. ඉති රූපන්‌ති එවං රූපං එත්‌තකං රූපං න ඉතො පරං රූපං අත්‌ථීති. ඉති රූපස්‌ස සමුදයොති එවං රූපස්‌ස උප්‌පාදො. අත්‌ථඞ්‌ගමොති පන භෙදො අධිප්‌පෙතො. වෙදනාදීසුපි එසෙව නයො. ඉදඤ්‌ච පන මෙතං, භික්‌ඛවෙ, සන්‌ධාය භාසිතන්‌ති, භික්‌ඛවෙ, යං මයා එතං පුණ්‌ණකපඤ්‌හෙ ‘‘සඞ්‌ඛාය ලොකස්‌මි’’න්‌තිආදි භාසිතං, තං ඉදං ඵලසමාපත්‌තිං සන්‌ධාය භාසිතන්‌ති අත්‌ථො.
Udayabbayānupassīti udayañca vayañca passanto. Iti rūpanti evaṃ rūpaṃ ettakaṃ rūpaṃ na ito paraṃ rūpaṃ atthīti. Iti rūpassa samudayoti evaṃ rūpassa uppādo. Atthaṅgamoti pana bhedo adhippeto. Vedanādīsupi eseva nayo. Idañca pana metaṃ, bhikkhave, sandhāya bhāsitanti, bhikkhave, yaṃ mayā etaṃ puṇṇakapañhe ‘‘saṅkhāya lokasmi’’ntiādi bhāsitaṃ, taṃ idaṃ phalasamāpattiṃ sandhāya bhāsitanti attho.
තත්‌ථ සඞ්‌ඛායාති ඤාණෙන ජානිත්‌වා. ලොකස්‌මින්‌ති සත්‌තලොකෙ. පරොපරානීති උච්‌චාවචානි උත්‌තමාධමානි. ඉඤ්‌ජිතන්‌ති චලිතං. නත්‌ථි කුහිඤ්‌චි ලොකෙති ලොකස්‌මිං කත්‌ථචි එකක්‌ඛන්‌ධෙපි එකායතනෙපි එකධාතුයාපි එකාරම්‌මණෙපි නත්‌ථි. සන්‌තොති පච්‌චනීකකිලෙසවූපසමෙන සන්‌තො. විධූමොති කොධධූමෙන විගතධූමො. එවමෙත්‌ථ සුත්‌තන්‌තෙ මග්‌ගෙකග්‌ගතම්‌පි කථෙත්‌වා ගාථාය ඵලසමාපත්‌තියෙව කථිතාති.
Tattha saṅkhāyāti ñāṇena jānitvā. Lokasminti sattaloke. Paroparānīti uccāvacāni uttamādhamāni. Iñjitanti calitaṃ. Natthi kuhiñci loketi lokasmiṃ katthaci ekakkhandhepi ekāyatanepi ekadhātuyāpi ekārammaṇepi natthi. Santoti paccanīkakilesavūpasamena santo. Vidhūmoti kodhadhūmena vigatadhūmo. Evamettha suttante maggekaggatampi kathetvā gāthāya phalasamāpattiyeva kathitāti.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / අඞ්‌ගුත්‌තරනිකාය • Aṅguttaranikāya / 1. සමාධිභාවනාසුත්‌තං • 1. Samādhibhāvanāsuttaṃ
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 1. සමාධිභාවනාසුත්‌තවණ්‌ණනා • 1. Samādhibhāvanāsuttavaṇṇanā
