Library / Tipiṭaka / তিপিটক • Tipiṭaka / কথাৰত্থুপাল়ি • Kathāvatthupāḷi

    ১১. একাদসমৰগ্গো

    11. Ekādasamavaggo

    (১১৩) ৮. সমাধিকথা

    (113) 8. Samādhikathā

    ৬২৫. চিত্তসন্ততি সমাধীতি? আমন্তা। অতীতা চিত্তসন্ততি সমাধীতি? ন হেৰং ৰত্তব্বে …পে॰… চিত্তসন্ততি সমাধীতি? আমন্তা। অনাগতা চিত্তসন্ততি সমাধীতি? ন হেৰং ৰত্তব্বে…পে॰… চিত্তসন্ততি সমাধীতি? আমন্তা। ননু অতীতং নিরুদ্ধং অনাগতং অজাতন্তি? আমন্তা। হঞ্চি অতীতং নিরুদ্ধং অনাগতং অজাতং, নো চ ৰত রে ৰত্তব্বে – ‘‘চিত্তসন্ততি সমাধী’’তি।

    625. Cittasantati samādhīti? Āmantā. Atītā cittasantati samādhīti? Na hevaṃ vattabbe …pe… cittasantati samādhīti? Āmantā. Anāgatā cittasantati samādhīti? Na hevaṃ vattabbe…pe… cittasantati samādhīti? Āmantā. Nanu atītaṃ niruddhaṃ anāgataṃ ajātanti? Āmantā. Hañci atītaṃ niruddhaṃ anāgataṃ ajātaṃ, no ca vata re vattabbe – ‘‘cittasantati samādhī’’ti.

    ৬২৬. একচিত্তক্খণিকো সমাধীতি? আমন্তা। চক্খুৰিঞ্ঞাণসমঙ্গী সমাপন্নোতি? ন হেৰং ৰত্তব্বে…পে॰… সোতৰিঞ্ঞাণসমঙ্গী…পে॰… ঘানৰিঞ্ঞাণসমঙ্গী… জিৰ্হাৰিঞ্ঞাণসমঙ্গী… কাযৰিঞ্ঞাণসমঙ্গী…পে॰… অকুসলচিত্তসমঙ্গী …পে॰… রাগসহগতচিত্তসমঙ্গী…পে॰… দোসসহগতচিত্তসমঙ্গী…পে॰… মোহসহগতচিত্তসমঙ্গী…পে॰… অনোত্তপ্পসহগতচিত্তসমঙ্গী সমাপন্নোতি? ন হেৰং ৰত্তব্বে…পে॰…।

    626. Ekacittakkhaṇiko samādhīti? Āmantā. Cakkhuviññāṇasamaṅgī samāpannoti? Na hevaṃ vattabbe…pe… sotaviññāṇasamaṅgī…pe… ghānaviññāṇasamaṅgī… jivhāviññāṇasamaṅgī… kāyaviññāṇasamaṅgī…pe… akusalacittasamaṅgī …pe… rāgasahagatacittasamaṅgī…pe… dosasahagatacittasamaṅgī…pe… mohasahagatacittasamaṅgī…pe… anottappasahagatacittasamaṅgī samāpannoti? Na hevaṃ vattabbe…pe….

    চিত্তসন্ততি সমাধীতি? আমন্তা। অকুসলচিত্তসন্ততি সমাধীতি? ন হেৰং ৰত্তব্বে…পে॰… রাগসহগতা…পে॰… দোসসহগতা…পে॰… মোহসহগতা…পে॰… অনোত্তপ্পসহগতা চিত্তসন্ততি সমাধীতি? ন হেৰং ৰত্তব্বে…পে॰…।

    Cittasantati samādhīti? Āmantā. Akusalacittasantati samādhīti? Na hevaṃ vattabbe…pe… rāgasahagatā…pe… dosasahagatā…pe… mohasahagatā…pe… anottappasahagatā cittasantati samādhīti? Na hevaṃ vattabbe…pe….

    ন ৰত্তব্বং – ‘‘চিত্তসন্ততি সমাধী’’তি? আমন্তা। ননু ৰুত্তং ভগৰতা – ‘‘অহং খো, আৰুসো নিগণ্ঠা, পহোমি অনিঞ্জমানো কাযেন, অভাসমানো ৰাচং, সত্ত রত্তিন্দিৰানি 1 একন্তসুখং পটিসংৰেদী ৰিহরিতু’’ন্তি 2! অত্থেৰ সুত্তন্তোতি? আমন্তা। তেন হি চিত্তসন্ততি সমাধীতি।

    Na vattabbaṃ – ‘‘cittasantati samādhī’’ti? Āmantā. Nanu vuttaṃ bhagavatā – ‘‘ahaṃ kho, āvuso nigaṇṭhā, pahomi aniñjamāno kāyena, abhāsamāno vācaṃ, satta rattindivāni 3 ekantasukhaṃ paṭisaṃvedī viharitu’’nti 4! Attheva suttantoti? Āmantā. Tena hi cittasantati samādhīti.

    সমাধিকথা নিট্ঠিতা।

    Samādhikathā niṭṭhitā.




    Next: (১১৪) ৯. ধম্মট্ঠিততাকথা • (114) 9. Dhammaṭṭhitatākathā




    Footnotes:
    1. রত্তিদিৰানি (ক॰)
    2. ম॰ নি॰ ১.১৮০
    3. rattidivāni (ka.)
    4. ma. ni. 1.180



    Related texts:



    অট্ঠকথা • Aṭṭhakathā / অভিধম্মপিটক (অট্ঠকথা) • Abhidhammapiṭaka (aṭṭhakathā) / পঞ্চপকরণ-অট্ঠকথা • Pañcapakaraṇa-aṭṭhakathā / ৮. সমাধিকথাৰণ্ণনা • 8. Samādhikathāvaṇṇanā

    টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-মূলটীকা • Pañcapakaraṇa-mūlaṭīkā / ৮. সমাধিকথাৰণ্ণনা • 8. Samādhikathāvaṇṇanā

    টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-অনুটীকা • Pañcapakaraṇa-anuṭīkā / ৮. সমাধিকথাৰণ্ণনা • 8. Samādhikathāvaṇṇanā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact