Library / Tipiṭaka / តិបិដក • Tipiṭaka / កថាវត្ថុបាឡិ • Kathāvatthupāḷi

    ១១. ឯកាទសមវគ្គោ

    11. Ekādasamavaggo

    (១១៣) ៨. សមាធិកថា

    (113) 8. Samādhikathā

    ៦២៥. ចិត្តសន្តតិ សមាធីតិ? អាមន្តា។ អតីតា ចិត្តសន្តតិ សមាធីតិ? ន ហេវំ វត្តព្ពេ …បេ.… ចិត្តសន្តតិ សមាធីតិ? អាមន្តា។ អនាគតា ចិត្តសន្តតិ សមាធីតិ? ន ហេវំ វត្តព្ពេ…បេ.… ចិត្តសន្តតិ សមាធីតិ? អាមន្តា។ ននុ អតីតំ និរុទ្ធំ អនាគតំ អជាតន្តិ? អាមន្តា។ ហញ្ចិ អតីតំ និរុទ្ធំ អនាគតំ អជាតំ, នោ ច វត រេ វត្តព្ពេ – ‘‘ចិត្តសន្តតិ សមាធី’’តិ។

    625. Cittasantati samādhīti? Āmantā. Atītā cittasantati samādhīti? Na hevaṃ vattabbe …pe… cittasantati samādhīti? Āmantā. Anāgatā cittasantati samādhīti? Na hevaṃ vattabbe…pe… cittasantati samādhīti? Āmantā. Nanu atītaṃ niruddhaṃ anāgataṃ ajātanti? Āmantā. Hañci atītaṃ niruddhaṃ anāgataṃ ajātaṃ, no ca vata re vattabbe – ‘‘cittasantati samādhī’’ti.

    ៦២៦. ឯកចិត្តក្ខណិកោ សមាធីតិ? អាមន្តា។ ចក្ខុវិញ្ញាណសមង្គី សមាបន្នោតិ? ន ហេវំ វត្តព្ពេ…បេ.… សោតវិញ្ញាណសមង្គី…បេ.… ឃានវិញ្ញាណសមង្គី… ជិវ្ហាវិញ្ញាណសមង្គី… កាយវិញ្ញាណសមង្គី…បេ.… អកុសលចិត្តសមង្គី …បេ.… រាគសហគតចិត្តសមង្គី…បេ.… ទោសសហគតចិត្តសមង្គី…បេ.… មោហសហគតចិត្តសមង្គី…បេ.… អនោត្តប្បសហគតចិត្តសមង្គី សមាបន្នោតិ? ន ហេវំ វត្តព្ពេ…បេ.…។

    626. Ekacittakkhaṇiko samādhīti? Āmantā. Cakkhuviññāṇasamaṅgī samāpannoti? Na hevaṃ vattabbe…pe… sotaviññāṇasamaṅgī…pe… ghānaviññāṇasamaṅgī… jivhāviññāṇasamaṅgī… kāyaviññāṇasamaṅgī…pe… akusalacittasamaṅgī …pe… rāgasahagatacittasamaṅgī…pe… dosasahagatacittasamaṅgī…pe… mohasahagatacittasamaṅgī…pe… anottappasahagatacittasamaṅgī samāpannoti? Na hevaṃ vattabbe…pe….

    ចិត្តសន្តតិ សមាធីតិ? អាមន្តា។ អកុសលចិត្តសន្តតិ សមាធីតិ? ន ហេវំ វត្តព្ពេ…បេ.… រាគសហគតា…បេ.… ទោសសហគតា…បេ.… មោហសហគតា…បេ.… អនោត្តប្បសហគតា ចិត្តសន្តតិ សមាធីតិ? ន ហេវំ វត្តព្ពេ…បេ.…។

    Cittasantati samādhīti? Āmantā. Akusalacittasantati samādhīti? Na hevaṃ vattabbe…pe… rāgasahagatā…pe… dosasahagatā…pe… mohasahagatā…pe… anottappasahagatā cittasantati samādhīti? Na hevaṃ vattabbe…pe….

    ន វត្តព្ពំ – ‘‘ចិត្តសន្តតិ សមាធី’’តិ? អាមន្តា។ ននុ វុត្តំ ភគវតា – ‘‘អហំ ខោ, អាវុសោ និគណ្ឋា, បហោមិ អនិញ្ជមានោ កាយេន, អភាសមានោ វាចំ, សត្ត រត្តិន្ទិវានិ 1 ឯកន្តសុខំ បដិសំវេទី វិហរិតុ’’ន្តិ 2! អត្ថេវ សុត្តន្តោតិ? អាមន្តា។ តេន ហិ ចិត្តសន្តតិ សមាធីតិ។

    Na vattabbaṃ – ‘‘cittasantati samādhī’’ti? Āmantā. Nanu vuttaṃ bhagavatā – ‘‘ahaṃ kho, āvuso nigaṇṭhā, pahomi aniñjamāno kāyena, abhāsamāno vācaṃ, satta rattindivāni 3 ekantasukhaṃ paṭisaṃvedī viharitu’’nti 4! Attheva suttantoti? Āmantā. Tena hi cittasantati samādhīti.

    សមាធិកថា និដ្ឋិតា។

    Samādhikathā niṭṭhitā.




    Next: (១១៤) ៩. ធម្មដ្ឋិតតាកថា • (114) 9. Dhammaṭṭhitatākathā




    Footnotes:
    1. រត្តិទិវានិ (ក.)
    2. ម. និ. ១.១៨០
    3. rattidivāni (ka.)
    4. ma. ni. 1.180



    Related texts:



    អដ្ឋកថា • Aṭṭhakathā / អភិធម្មបិដក (អដ្ឋកថា) • Abhidhammapiṭaka (aṭṭhakathā) / បញ្ចបករណ-អដ្ឋកថា • Pañcapakaraṇa-aṭṭhakathā / ៨. សមាធិកថាវណ្ណនា • 8. Samādhikathāvaṇṇanā

    ដីកា • Tīkā / អភិធម្មបិដក (ដីកា) • Abhidhammapiṭaka (ṭīkā) / បញ្ចបករណ-មូលដីកា • Pañcapakaraṇa-mūlaṭīkā / ៨. សមាធិកថាវណ្ណនា • 8. Samādhikathāvaṇṇanā

    ដីកា • Tīkā / អភិធម្មបិដក (ដីកា) • Abhidhammapiṭaka (ṭīkā) / បញ្ចបករណ-អនុដីកា • Pañcapakaraṇa-anuṭīkā / ៨. សមាធិកថាវណ្ណនា • 8. Samādhikathāvaṇṇanā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact