Library / Tipiṭaka / တိပိဋက • Tipiṭaka / ကထာဝတ္ထုပာဠိ • Kathāvatthupāḷi

    ၁၁. ဧကာဒသမဝဂ္ဂော

    11. Ekādasamavaggo

    (၁၁၃) ၈. သမာဓိကထာ

    (113) 8. Samādhikathā

    ၆၂၅. စိတ္တသန္တတိ သမာဓီတိ? အာမန္တာ။ အတီတာ စိတ္တသန္တတိ သမာဓီတိ? န ဟေဝံ ဝတ္တဗ္ဗေ ။ပေ.။ စိတ္တသန္တတိ သမာဓီတိ? အာမန္တာ။ အနာဂတာ စိတ္တသန္တတိ သမာဓီတိ? န ဟေဝံ ဝတ္တဗ္ဗေ။ပေ.။ စိတ္တသန္တတိ သမာဓီတိ? အာမန္တာ။ နနု အတီတံ နိရုဒ္ဓံ အနာဂတံ အဇာတန္တိ? အာမန္တာ။ ဟဉ္စိ အတီတံ နိရုဒ္ဓံ အနာဂတံ အဇာတံ, နော စ ဝတ ရေ ဝတ္တဗ္ဗေ – ‘‘စိတ္တသန္တတိ သမာဓီ’’တိ။

    625. Cittasantati samādhīti? Āmantā. Atītā cittasantati samādhīti? Na hevaṃ vattabbe …pe… cittasantati samādhīti? Āmantā. Anāgatā cittasantati samādhīti? Na hevaṃ vattabbe…pe… cittasantati samādhīti? Āmantā. Nanu atītaṃ niruddhaṃ anāgataṃ ajātanti? Āmantā. Hañci atītaṃ niruddhaṃ anāgataṃ ajātaṃ, no ca vata re vattabbe – ‘‘cittasantati samādhī’’ti.

    ၆၂၆. ဧကစိတ္တက္ခဏိကော သမာဓီတိ? အာမန္တာ။ စက္ခုဝိညာဏသမင္ဂီ သမာပန္နောတိ? န ဟေဝံ ဝတ္တဗ္ဗေ။ပေ.။ သောတဝိညာဏသမင္ဂီ။ပေ.။ ဃာနဝိညာဏသမင္ဂီ။ ဇိဝ္ဟာဝိညာဏသမင္ဂီ။ ကာယဝိညာဏသမင္ဂီ။ပေ.။ အကုသလစိတ္တသမင္ဂီ ။ပေ.။ ရာဂသဟဂတစိတ္တသမင္ဂီ။ပေ.။ ဒောသသဟဂတစိတ္တသမင္ဂီ။ပေ.။ မောဟသဟဂတစိတ္တသမင္ဂီ။ပေ.။ အနောတ္တပ္ပသဟဂတစိတ္တသမင္ဂီ သမာပန္နောတိ? န ဟေဝံ ဝတ္တဗ္ဗေ။ပေ.။။

    626. Ekacittakkhaṇiko samādhīti? Āmantā. Cakkhuviññāṇasamaṅgī samāpannoti? Na hevaṃ vattabbe…pe… sotaviññāṇasamaṅgī…pe… ghānaviññāṇasamaṅgī… jivhāviññāṇasamaṅgī… kāyaviññāṇasamaṅgī…pe… akusalacittasamaṅgī …pe… rāgasahagatacittasamaṅgī…pe… dosasahagatacittasamaṅgī…pe… mohasahagatacittasamaṅgī…pe… anottappasahagatacittasamaṅgī samāpannoti? Na hevaṃ vattabbe…pe….

    စိတ္တသန္တတိ သမာဓီတိ? အာမန္တာ။ အကုသလစိတ္တသန္တတိ သမာဓီတိ? န ဟေဝံ ဝတ္တဗ္ဗေ။ပေ.။ ရာဂသဟဂတာ။ပေ.။ ဒောသသဟဂတာ။ပေ.။ မောဟသဟဂတာ။ပေ.။ အနောတ္တပ္ပသဟဂတာ စိတ္တသန္တတိ သမာဓီတိ? န ဟေဝံ ဝတ္တဗ္ဗေ။ပေ.။။

    Cittasantati samādhīti? Āmantā. Akusalacittasantati samādhīti? Na hevaṃ vattabbe…pe… rāgasahagatā…pe… dosasahagatā…pe… mohasahagatā…pe… anottappasahagatā cittasantati samādhīti? Na hevaṃ vattabbe…pe….

    န ဝတ္တဗ္ဗံ – ‘‘စိတ္တသန္တတိ သမာဓီ’’တိ? အာမန္တာ။ နနု ဝုတ္တံ ဘဂဝတာ – ‘‘အဟံ ခော, အာဝုသော နိဂဏ္ဌာ, ပဟောမိ အနိဉ္ဇမာနော ကာယေန, အဘာသမာနော ဝာစံ, သတ္တ ရတ္တိန္ဒိဝာနိ 1 ဧကန္တသုခံ ပဋိသံဝေဒီ ဝိဟရိတု’’န္တိ 2! အတ္ထေဝ သုတ္တန္တောတိ? အာမန္တာ။ တေန ဟိ စိတ္တသန္တတိ သမာဓီတိ။

    Na vattabbaṃ – ‘‘cittasantati samādhī’’ti? Āmantā. Nanu vuttaṃ bhagavatā – ‘‘ahaṃ kho, āvuso nigaṇṭhā, pahomi aniñjamāno kāyena, abhāsamāno vācaṃ, satta rattindivāni 3 ekantasukhaṃ paṭisaṃvedī viharitu’’nti 4! Attheva suttantoti? Āmantā. Tena hi cittasantati samādhīti.

    သမာဓိကထာ နိဋ္ဌိတာ။

    Samādhikathā niṭṭhitā.




    Next: (၁၁၄) ၉. ဓမ္မဋ္ဌိတတာကထာ • (114) 9. Dhammaṭṭhitatākathā




    Footnotes:
    1. ရတ္တိဒိဝာနိ (က.)
    2. မ. နိ. ၁.၁၈၀
    3. rattidivāni (ka.)
    4. ma. ni. 1.180



    Related texts:



    အဋ္ဌကထာ • Aṭṭhakathā / အဘိဓမ္မပိဋက (အဋ္ဌကထာ) • Abhidhammapiṭaka (aṭṭhakathā) / ပဉ္စပကရဏ-အဋ္ဌကထာ • Pañcapakaraṇa-aṭṭhakathā / ၈. သမာဓိကထာဝဏ္ဏနာ • 8. Samādhikathāvaṇṇanā

    ဋီကာ • Tīkā / အဘိဓမ္မပိဋက (ဋီကာ) • Abhidhammapiṭaka (ṭīkā) / ပဉ္စပကရဏ-မူလဋီကာ • Pañcapakaraṇa-mūlaṭīkā / ၈. သမာဓိကထာဝဏ္ဏနာ • 8. Samādhikathāvaṇṇanā

    ဋီကာ • Tīkā / အဘိဓမ္မပိဋက (ဋီကာ) • Abhidhammapiṭaka (ṭīkā) / ပဉ္စပကရဏ-အနုဋီကာ • Pañcapakaraṇa-anuṭīkā / ၈. သမာဓိကထာဝဏ္ဏနာ • 8. Samādhikathāvaṇṇanā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact