Library / Tipiṭaka / ཏིཔིཊཀ • Tipiṭaka / སཾཡུཏྟནིཀཱཡ • Saṃyuttanikāya

    ༡༣. ཛྷཱནསཾཡུཏྟཾ

    13. Jhānasaṃyuttaṃ

    ༡. སམཱདྷིམཱུལཀསམཱཔཏྟིསུཏྟཾ

    1. Samādhimūlakasamāpattisuttaṃ

    ༦༦༢. སཱཝཏྠིནིདཱནཾ ། ‘‘ཙཏྟཱརོམེ, བྷིཀྑཝེ, ཛྷཱཡཱི། ཀཏམེ ཙཏྟཱརོ? ཨིདྷ , བྷིཀྑཝེ, ཨེཀཙྩོ ཛྷཱཡཱི སམཱདྷིསྨིཾ སམཱདྷིཀུསལོ ཧོཏི, ན སམཱདྷིསྨིཾ སམཱཔཏྟིཀུསལོ། ཨིདྷ པན, བྷིཀྑཝེ, ཨེཀཙྩོ ཛྷཱཡཱི སམཱདྷིསྨིཾ སམཱཔཏྟིཀུསལོ ཧོཏི, ན སམཱདྷིསྨིཾ སམཱདྷིཀུསལོ། ཨིདྷ པན, བྷིཀྑཝེ, ཨེཀཙྩོ ཛྷཱཡཱི ནེཝ སམཱདྷིསྨིཾ སམཱདྷིཀུསལོ ཧོཏི, ན ཙ སམཱདྷིསྨིཾ སམཱཔཏྟིཀུསལོ། ཨིདྷ པན, བྷིཀྑཝེ, ཨེཀཙྩོ ཛྷཱཡཱི སམཱདྷིསྨིཾ སམཱདྷིཀུསལོ ཙ ཧོཏི, སམཱདྷིསྨིཾ སམཱཔཏྟིཀུསལོ ཙ། ཏཏྲ, བྷིཀྑཝེ, ཡྭཱཡཾ ཛྷཱཡཱི སམཱདྷིསྨིཾ སམཱདྷིཀུསལོ ཙ ཧོཏི སམཱདྷིསྨིཾ སམཱཔཏྟིཀུསལོ ཙ ཨཡཾ ཨིམེསཾ ཙཏུནྣཾ ཛྷཱཡཱིནཾ ཨགྒོ ཙ སེཊྛོ ཙ མོཀྑོ 1 ཙ ཨུཏྟམོ ཙ པཝརོ ཙ། སེཡྻཐཱཔི, བྷིཀྑཝེ, གཝཱ ཁཱིརཾ, ཁཱིརམྷཱ དདྷི, དདྷིམྷཱ ནཝནཱིཏཾ, ནཝནཱིཏམྷཱ སཔྤི, སཔྤིམྷཱ སཔྤིམཎྜོ ཏཏྲ ཨགྒམཀྑཱཡཏི; ཨེཝམེཝ ཁོ, བྷིཀྑཝེ, ཡྭཱཡཾ ཛྷཱཡཱི སམཱདྷིསྨིཾ སམཱདྷིཀུསལོ ཙ ཧོཏི སམཱདྷིསྨིཾ སམཱཔཏྟིཀུསལོ ཙ ཨཡཾ ཨིམེསཾ ཙཏུནྣཾ ཛྷཱཡཱིནཾ ཨགྒོ ཙ སེཊྛོ ཙ མོཀྑོ ཙ ཨུཏྟམོ ཙ པཝརོ ཙཱ’’ཏི། པཋམཾ།

    662. Sāvatthinidānaṃ . ‘‘Cattārome, bhikkhave, jhāyī. Katame cattāro? Idha , bhikkhave, ekacco jhāyī samādhismiṃ samādhikusalo hoti, na samādhismiṃ samāpattikusalo. Idha pana, bhikkhave, ekacco jhāyī samādhismiṃ samāpattikusalo hoti, na samādhismiṃ samādhikusalo. Idha pana, bhikkhave, ekacco jhāyī neva samādhismiṃ samādhikusalo hoti, na ca samādhismiṃ samāpattikusalo. Idha pana, bhikkhave, ekacco jhāyī samādhismiṃ samādhikusalo ca hoti, samādhismiṃ samāpattikusalo ca. Tatra, bhikkhave, yvāyaṃ jhāyī samādhismiṃ samādhikusalo ca hoti samādhismiṃ samāpattikusalo ca ayaṃ imesaṃ catunnaṃ jhāyīnaṃ aggo ca seṭṭho ca mokkho 2 ca uttamo ca pavaro ca. Seyyathāpi, bhikkhave, gavā khīraṃ, khīramhā dadhi, dadhimhā navanītaṃ, navanītamhā sappi, sappimhā sappimaṇḍo tatra aggamakkhāyati; evameva kho, bhikkhave, yvāyaṃ jhāyī samādhismiṃ samādhikusalo ca hoti samādhismiṃ samāpattikusalo ca ayaṃ imesaṃ catunnaṃ jhāyīnaṃ aggo ca seṭṭho ca mokkho ca uttamo ca pavaro cā’’ti. Paṭhamaṃ.




    Next: ༢. སམཱདྷིམཱུལཀཋིཏིསུཏྟཾ • 2. Samādhimūlakaṭhitisuttaṃ




    Footnotes:
    1. པཱམོཀྑོ (སྱཱ॰ ཀཾ॰) ཨེཝམུཔརིཔི
    2. pāmokkho (syā. kaṃ.) evamuparipi



    Related texts:



    ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / སཾཡུཏྟནིཀཱཡ (ཨཊྛཀཐཱ) • Saṃyuttanikāya (aṭṭhakathā) / ༡. སམཱདྷིམཱུལཀསམཱཔཏྟིསུཏྟཝཎྞནཱ • 1. Samādhimūlakasamāpattisuttavaṇṇanā

    ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / སཾཡུཏྟནིཀཱཡ (ཊཱིཀཱ) • Saṃyuttanikāya (ṭīkā) / ༡. སམཱདྷིམཱུལཀསམཱཔཏྟིསུཏྟཝཎྞནཱ • 1. Samādhimūlakasamāpattisuttavaṇṇanā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact