| Library / Tipiṭaka / තිපිටක • Tipiṭaka / සංයුත්‌තනිකාය (ටීකා) • Saṃyuttanikāya (ṭīkā) |
13. ඣානසංයුත්‌තං
13. Jhānasaṃyuttaṃ
1. සමාධිමූලකසමාපත්‌තිසුත්‌තවණ්‌ණනා
1. Samādhimūlakasamāpattisuttavaṇṇanā
662. සමාධිකුසලොති සමාධිස්‌මිං කුසලො. තයිදං සමාධිකොසල්‌ලත්‌තං සහ ඣානඞ්‌ගයොගෙන චතුබ්‌බිධො ඣානසමාධි, තස්‌මා තං තං විභාගං ජානන්‌තස්‌ස සිද්‌ධං හොතීති ආහ – ‘‘පඨමං ඣාන’’න්‌තිආදි. තත්‌ථ විතක්‌කවිචාරපීතිසුඛෙකග්‌ගතාවසෙන පඨමං පඤ්‌චඞ්‌ගිකං, පීතිසුඛෙකග්‌ගතාවසෙන දුතියං තිවඞ්‌ගිකං, සුඛෙකග්‌ගතාවසෙන තතියං දුවඞ්‌ගිකං, උපෙක්‌ඛෙකග්‌ගතාවසෙන චතුත්‌ථං දුවඞ්‌ගිකමෙවාති එවං තස්‌මිං තස්‌මිං ඣානෙ තංතංඅඞ්‌ගානං වවත්‌ථානෙ කුසලො. සමාපත්‌තිකුසලොති සමාපජ්‌ජනෙ කුසලො. හාසෙත්‌වාති තොසෙත්‌වා. කල්‌ලං කත්‌වාති සමාධානස්‌ස පටිපක්‌ඛධම්‌මානං දූරීකරණෙන සහකාරීකාරණඤ්‌ච සමාධානෙන සමාපජ්‌ජනෙ චිත්‌තං සමත්‌ථං කත්‌වා. සෙසපදානීති සෙසා තයො කොට්‌ඨාසා. තතියාදීසු නයෙසු අකුසලොපි ඣානත්‌ථාය පටිපන්‌නත්‌තා ‘‘ඣායීතෙවා’’ති වුත්‌තො.
662.Samādhikusaloti samādhismiṃ kusalo. Tayidaṃ samādhikosallattaṃ saha jhānaṅgayogena catubbidho jhānasamādhi, tasmā taṃ taṃ vibhāgaṃ jānantassa siddhaṃ hotīti āha – ‘‘paṭhamaṃ jhāna’’ntiādi. Tattha vitakkavicārapītisukhekaggatāvasena paṭhamaṃ pañcaṅgikaṃ, pītisukhekaggatāvasena dutiyaṃ tivaṅgikaṃ, sukhekaggatāvasena tatiyaṃ duvaṅgikaṃ, upekkhekaggatāvasena catutthaṃ duvaṅgikamevāti evaṃ tasmiṃ tasmiṃ jhāne taṃtaṃaṅgānaṃ vavatthāne kusalo. Samāpattikusaloti samāpajjane kusalo. Hāsetvāti tosetvā. Kallaṃ katvāti samādhānassa paṭipakkhadhammānaṃ dūrīkaraṇena sahakārīkāraṇañca samādhānena samāpajjane cittaṃ samatthaṃ katvā. Sesapadānīti sesā tayo koṭṭhāsā. Tatiyādīsu nayesu akusalopi jhānatthāya paṭipannattā ‘‘jhāyītevā’’ti vutto.
සමාධිමූලකසමාපත්‌තිසුත්‌තවණ්‌ණනා නිට්‌ඨිතා.
Samādhimūlakasamāpattisuttavaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / සංයුත්‌තනිකාය • Saṃyuttanikāya / 1. සමාධිමූලකසමාපත්‌තිසුත්‌තං • 1. Samādhimūlakasamāpattisuttaṃ
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 1. සමාධිමූලකසමාපත්‌තිසුත්‌තවණ්‌ණනා • 1. Samādhimūlakasamāpattisuttavaṇṇanā
