| Library / Tipiṭaka / တိပိဋက • Tipiṭaka / မိလိန္ဒပဉ္ဟပာဠိ • Milindapañhapāḷi |
၁၄. သမာဓိပဉ္ဟော
14. Samādhipañho
၁၄. ရာဇာ အာဟ ‘‘ဘန္တေ နာဂသေန, ကိံလက္ခဏော သမာဓီ’’တိ? ‘‘ပမုခလက္ခဏော, မဟာရာဇ, သမာဓိ, ယေ ကေစိ ကုသလာ ဓမ္မာ, သဗ္ဗေ တေ သမာဓိပမုခာ ဟောန္တိ သမာဓိနိန္နာ သမာဓိပောဏာ သမာဓိပဗ္ဘာရာ’’တိ။
14. Rājā āha ‘‘bhante nāgasena, kiṃlakkhaṇo samādhī’’ti? ‘‘Pamukhalakkhaṇo, mahārāja, samādhi, ye keci kusalā dhammā, sabbe te samādhipamukhā honti samādhininnā samādhipoṇā samādhipabbhārā’’ti.
‘‘ဩပမ္မံ ကရောဟီ’’တိ။ ‘‘ယထာ, မဟာရာဇ, ကူဋာဂာရသ္သ ယာ ယာစိ ဂောပာနသိယော, သဗ္ဗာ တာ ကူဋင္ဂမာ ဟောန္တိ ကူဋနိန္နာ ကူဋသမောသရဏာ, ကူဋံ တာသံ အဂ္ဂမက္ခာယတိ။ ဧဝမေဝ ခော, မဟာရာဇ, ယေ ကေစိ ကုသလာ ဓမ္မာ, သဗ္ဗေ တေ သမာဓိပမုခာ ဟောန္တိ သမာဓိနိန္နာ သမာဓိပောဏာ သမာဓိပဗ္ဘာရာတိ။
‘‘Opammaṃ karohī’’ti. ‘‘Yathā, mahārāja, kūṭāgārassa yā yāci gopānasiyo, sabbā tā kūṭaṅgamā honti kūṭaninnā kūṭasamosaraṇā, kūṭaṃ tāsaṃ aggamakkhāyati. Evameva kho, mahārāja, ye keci kusalā dhammā, sabbe te samādhipamukhā honti samādhininnā samādhipoṇā samādhipabbhārāti.
‘‘ဘိယ္ယော ဩပမ္မံ ကရောဟီ’’တိ။ ‘‘ယထာ, မဟာရာဇ, ကောစိ ရာဇာ စတုရင္ဂိနိယာ သေနာယ သဒ္ဓိံ သင္ဂာမံ ဩတရေယ္ယ, သဗ္ဗာဝ သေနာ ဟတ္ထီ စ အသ္သာ စ ရထာ စ ပတ္တီ စ တပ္ပမုခာ 1 ဘဝေယ္ယုံ တန္နိန္နာ တပ္ပောဏာ တပ္ပဗ္ဘာရာ တံ ယေဝ အနုပရိယာယေယ္ယုံ။ ဧဝမေဝ ခော, မဟာရာဇ, ယေ ကေစိ ကုသလာ ဓမ္မာ, သဗ္ဗေ တေ သမာဓိပမုခာ ဟောန္တိ သမာဓိနိန္နာ သမာဓိပောဏာ သမာဓိပဗ္ဘာရာ။ ဧဝံ ခော, မဟာရာဇ, ပမုခလက္ခဏော သမာဓိ။ ဘာသိတမ္ပေတံ, မဟာရာဇ, ဘဂဝတာ – ‘‘သမာဓိံ, ဘိက္ခဝေ, ဘာဝေထ, သမာဟိတော, ဘိက္ခဝေ, ဘိက္ခု ယထာဘူတံ ပဇာနာတီ’’တိ။
‘‘Bhiyyo opammaṃ karohī’’ti. ‘‘Yathā, mahārāja, koci rājā caturaṅginiyā senāya saddhiṃ saṅgāmaṃ otareyya, sabbāva senā hatthī ca assā ca rathā ca pattī ca tappamukhā 2 bhaveyyuṃ tanninnā tappoṇā tappabbhārā taṃ yeva anupariyāyeyyuṃ. Evameva kho, mahārāja, ye keci kusalā dhammā, sabbe te samādhipamukhā honti samādhininnā samādhipoṇā samādhipabbhārā. Evaṃ kho, mahārāja, pamukhalakkhaṇo samādhi. Bhāsitampetaṃ, mahārāja, bhagavatā – ‘‘samādhiṃ, bhikkhave, bhāvetha, samāhito, bhikkhave, bhikkhu yathābhūtaṃ pajānātī’’ti.
‘‘ကလ္လောသိ, ဘန္တေ နာဂသေနာ’’တိ။
‘‘Kallosi, bhante nāgasenā’’ti.
သမာဓိပဉ္ဟော စုဒ္ဒသမော။
Samādhipañho cuddasamo.
Footnotes:
