| Library / Tipiṭaka / ཏིཔིཊཀ • Tipiṭaka / མིལིནྡཔཉྷཔཱལི༹ • Milindapañhapāḷi |
༡༤. སམཱདྷིཔཉྷོ
14. Samādhipañho
༡༤. རཱཛཱ ཨཱཧ ‘‘བྷནྟེ ནཱགསེན, ཀིཾལཀྑཎོ སམཱདྷཱི’’ཏི? ‘‘པམུཁལཀྑཎོ, མཧཱརཱཛ, སམཱདྷི, ཡེ ཀེཙི ཀུསལཱ དྷམྨཱ, སབྦེ ཏེ སམཱདྷིཔམུཁཱ ཧོནྟི སམཱདྷིནིནྣཱ སམཱདྷིཔོཎཱ སམཱདྷིཔབྦྷཱརཱ’’ཏི།
14. Rājā āha ‘‘bhante nāgasena, kiṃlakkhaṇo samādhī’’ti? ‘‘Pamukhalakkhaṇo, mahārāja, samādhi, ye keci kusalā dhammā, sabbe te samādhipamukhā honti samādhininnā samādhipoṇā samādhipabbhārā’’ti.
‘‘ཨོཔམྨཾ ཀརོཧཱི’’ཏི། ‘‘ཡཐཱ, མཧཱརཱཛ, ཀཱུཊཱགཱརསྶ ཡཱ ཡཱཙི གོཔཱནསིཡོ, སབྦཱ ཏཱ ཀཱུཊངྒམཱ ཧོནྟི ཀཱུཊནིནྣཱ ཀཱུཊསམོསརཎཱ, ཀཱུཊཾ ཏཱསཾ ཨགྒམཀྑཱཡཏི། ཨེཝམེཝ ཁོ, མཧཱརཱཛ, ཡེ ཀེཙི ཀུསལཱ དྷམྨཱ, སབྦེ ཏེ སམཱདྷིཔམུཁཱ ཧོནྟི སམཱདྷིནིནྣཱ སམཱདྷིཔོཎཱ སམཱདྷིཔབྦྷཱརཱཏི།
‘‘Opammaṃ karohī’’ti. ‘‘Yathā, mahārāja, kūṭāgārassa yā yāci gopānasiyo, sabbā tā kūṭaṅgamā honti kūṭaninnā kūṭasamosaraṇā, kūṭaṃ tāsaṃ aggamakkhāyati. Evameva kho, mahārāja, ye keci kusalā dhammā, sabbe te samādhipamukhā honti samādhininnā samādhipoṇā samādhipabbhārāti.
‘‘བྷིཡྻོ ཨོཔམྨཾ ཀརོཧཱི’’ཏི། ‘‘ཡཐཱ, མཧཱརཱཛ, ཀོཙི རཱཛཱ ཙཏུརངྒིནིཡཱ སེནཱཡ སདྡྷིཾ སངྒཱམཾ ཨོཏརེཡྻ, སབྦཱཝ སེནཱ ཧཏྠཱི ཙ ཨསྶཱ ཙ རཐཱ ཙ པཏྟཱི ཙ ཏཔྤམུཁཱ 1 བྷཝེཡྻུཾ ཏནྣིནྣཱ ཏཔྤོཎཱ ཏཔྤབྦྷཱརཱ ཏཾ ཡེཝ ཨནུཔརིཡཱཡེཡྻུཾ། ཨེཝམེཝ ཁོ, མཧཱརཱཛ, ཡེ ཀེཙི ཀུསལཱ དྷམྨཱ, སབྦེ ཏེ སམཱདྷིཔམུཁཱ ཧོནྟི སམཱདྷིནིནྣཱ སམཱདྷིཔོཎཱ སམཱདྷིཔབྦྷཱརཱ། ཨེཝཾ ཁོ, མཧཱརཱཛ, པམུཁལཀྑཎོ སམཱདྷི། བྷཱསིཏམྤེཏཾ, མཧཱརཱཛ, བྷགཝཏཱ – ‘‘སམཱདྷིཾ, བྷིཀྑཝེ, བྷཱཝེཐ, སམཱཧིཏོ, བྷིཀྑཝེ, བྷིཀྑུ ཡཐཱབྷཱུཏཾ པཛཱནཱཏཱི’’ཏི།
‘‘Bhiyyo opammaṃ karohī’’ti. ‘‘Yathā, mahārāja, koci rājā caturaṅginiyā senāya saddhiṃ saṅgāmaṃ otareyya, sabbāva senā hatthī ca assā ca rathā ca pattī ca tappamukhā 2 bhaveyyuṃ tanninnā tappoṇā tappabbhārā taṃ yeva anupariyāyeyyuṃ. Evameva kho, mahārāja, ye keci kusalā dhammā, sabbe te samādhipamukhā honti samādhininnā samādhipoṇā samādhipabbhārā. Evaṃ kho, mahārāja, pamukhalakkhaṇo samādhi. Bhāsitampetaṃ, mahārāja, bhagavatā – ‘‘samādhiṃ, bhikkhave, bhāvetha, samāhito, bhikkhave, bhikkhu yathābhūtaṃ pajānātī’’ti.
‘‘ཀལློསི, བྷནྟེ ནཱགསེནཱ’’ཏི།
‘‘Kallosi, bhante nāgasenā’’ti.
སམཱདྷིཔཉྷོ ཙུདྡསམོ།
Samādhipañho cuddasamo.
Footnotes:
