| Library / Tipiṭaka / ਤਿਪਿਟਕ • Tipiṭaka / ਮਿਲਿਨ੍ਦਪਞ੍ਹਪਾਲ਼ਿ • Milindapañhapāḷi |
੧੪. ਸਮਾਧਿਪਞ੍ਹੋ
14. Samādhipañho
੧੪. ਰਾਜਾ ਆਹ ‘‘ਭਨ੍ਤੇ ਨਾਗਸੇਨ, ਕਿਂਲਕ੍ਖਣੋ ਸਮਾਧੀ’’ਤਿ? ‘‘ਪਮੁਖਲਕ੍ਖਣੋ, ਮਹਾਰਾਜ, ਸਮਾਧਿ, ਯੇ ਕੇਚਿ ਕੁਸਲਾ ਧਮ੍ਮਾ, ਸਬ੍ਬੇ ਤੇ ਸਮਾਧਿਪਮੁਖਾ ਹੋਨ੍ਤਿ ਸਮਾਧਿਨਿਨ੍ਨਾ ਸਮਾਧਿਪੋਣਾ ਸਮਾਧਿਪਬ੍ਭਾਰਾ’’ਤਿ।
14. Rājā āha ‘‘bhante nāgasena, kiṃlakkhaṇo samādhī’’ti? ‘‘Pamukhalakkhaṇo, mahārāja, samādhi, ye keci kusalā dhammā, sabbe te samādhipamukhā honti samādhininnā samādhipoṇā samādhipabbhārā’’ti.
‘‘ਓਪਮ੍ਮਂ ਕਰੋਹੀ’’ਤਿ। ‘‘ਯਥਾ, ਮਹਾਰਾਜ, ਕੂਟਾਗਾਰਸ੍ਸ ਯਾ ਯਾਚਿ ਗੋਪਾਨਸਿਯੋ, ਸਬ੍ਬਾ ਤਾ ਕੂਟਙ੍ਗਮਾ ਹੋਨ੍ਤਿ ਕੂਟਨਿਨ੍ਨਾ ਕੂਟਸਮੋਸਰਣਾ, ਕੂਟਂ ਤਾਸਂ ਅਗ੍ਗਮਕ੍ਖਾਯਤਿ। ਏવਮੇવ ਖੋ, ਮਹਾਰਾਜ, ਯੇ ਕੇਚਿ ਕੁਸਲਾ ਧਮ੍ਮਾ, ਸਬ੍ਬੇ ਤੇ ਸਮਾਧਿਪਮੁਖਾ ਹੋਨ੍ਤਿ ਸਮਾਧਿਨਿਨ੍ਨਾ ਸਮਾਧਿਪੋਣਾ ਸਮਾਧਿਪਬ੍ਭਾਰਾਤਿ।
‘‘Opammaṃ karohī’’ti. ‘‘Yathā, mahārāja, kūṭāgārassa yā yāci gopānasiyo, sabbā tā kūṭaṅgamā honti kūṭaninnā kūṭasamosaraṇā, kūṭaṃ tāsaṃ aggamakkhāyati. Evameva kho, mahārāja, ye keci kusalā dhammā, sabbe te samādhipamukhā honti samādhininnā samādhipoṇā samādhipabbhārāti.
‘‘ਭਿਯ੍ਯੋ ਓਪਮ੍ਮਂ ਕਰੋਹੀ’’ਤਿ। ‘‘ਯਥਾ, ਮਹਾਰਾਜ, ਕੋਚਿ ਰਾਜਾ ਚਤੁਰਙ੍ਗਿਨਿਯਾ ਸੇਨਾਯ ਸਦ੍ਧਿਂ ਸਙ੍ਗਾਮਂ ਓਤਰੇਯ੍ਯ, ਸਬ੍ਬਾવ ਸੇਨਾ ਹਤ੍ਥੀ ਚ ਅਸ੍ਸਾ ਚ ਰਥਾ ਚ ਪਤ੍ਤੀ ਚ ਤਪ੍ਪਮੁਖਾ 1 ਭવੇਯ੍ਯੁਂ ਤਨ੍ਨਿਨ੍ਨਾ ਤਪ੍ਪੋਣਾ ਤਪ੍ਪਬ੍ਭਾਰਾ ਤਂ ਯੇવ ਅਨੁਪਰਿਯਾਯੇਯ੍ਯੁਂ। ਏવਮੇવ ਖੋ, ਮਹਾਰਾਜ, ਯੇ ਕੇਚਿ ਕੁਸਲਾ ਧਮ੍ਮਾ, ਸਬ੍ਬੇ ਤੇ ਸਮਾਧਿਪਮੁਖਾ ਹੋਨ੍ਤਿ ਸਮਾਧਿਨਿਨ੍ਨਾ ਸਮਾਧਿਪੋਣਾ ਸਮਾਧਿਪਬ੍ਭਾਰਾ। ਏવਂ ਖੋ, ਮਹਾਰਾਜ, ਪਮੁਖਲਕ੍ਖਣੋ ਸਮਾਧਿ। ਭਾਸਿਤਮ੍ਪੇਤਂ, ਮਹਾਰਾਜ, ਭਗવਤਾ – ‘‘ਸਮਾਧਿਂ, ਭਿਕ੍ਖવੇ, ਭਾવੇਥ, ਸਮਾਹਿਤੋ, ਭਿਕ੍ਖવੇ, ਭਿਕ੍ਖੁ ਯਥਾਭੂਤਂ ਪਜਾਨਾਤੀ’’ਤਿ।
‘‘Bhiyyo opammaṃ karohī’’ti. ‘‘Yathā, mahārāja, koci rājā caturaṅginiyā senāya saddhiṃ saṅgāmaṃ otareyya, sabbāva senā hatthī ca assā ca rathā ca pattī ca tappamukhā 2 bhaveyyuṃ tanninnā tappoṇā tappabbhārā taṃ yeva anupariyāyeyyuṃ. Evameva kho, mahārāja, ye keci kusalā dhammā, sabbe te samādhipamukhā honti samādhininnā samādhipoṇā samādhipabbhārā. Evaṃ kho, mahārāja, pamukhalakkhaṇo samādhi. Bhāsitampetaṃ, mahārāja, bhagavatā – ‘‘samādhiṃ, bhikkhave, bhāvetha, samāhito, bhikkhave, bhikkhu yathābhūtaṃ pajānātī’’ti.
‘‘ਕਲ੍ਲੋਸਿ, ਭਨ੍ਤੇ ਨਾਗਸੇਨਾ’’ਤਿ।
‘‘Kallosi, bhante nāgasenā’’ti.
ਸਮਾਧਿਪਞ੍ਹੋ ਚੁਦ੍ਦਸਮੋ।
Samādhipañho cuddasamo.
Footnotes:
