| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
12. සච්‌චසංයුත්‌තං
12. Saccasaṃyuttaṃ
1. සමාධිවග්‌ගො
1. Samādhivaggo
1. සමාධිසුත්‌තං
1. Samādhisuttaṃ
1071. සාවත්‌ථිනිදානං . ‘‘සමාධිං, භික්‌ඛවෙ, භාවෙථ. සමාහිතො, භික්‌ඛවෙ, භික්‌ඛු යථාභූතං පජානාති. කිඤ්‌ච යථාභූතං පජානාති? ‘ඉදං දුක්‌ඛ’න්‌ති යථාභූතං පජානාති, ‘අයං දුක්‌ඛසමුදයො’ති යථාභූතං පජානාති, ‘අයං දුක්‌ඛනිරොධො’ති යථාභූතං පජානාති, ‘අයං දුක්‌ඛනිරොධගාමිනී පටිපදා’ති යථාභූතං පජානාති. සමාධිං, භික්‌ඛවෙ, භාවෙථ. සමාහිතො, භික්‌ඛවෙ, භික්‌ඛු යථාභූතං පජානාති’’.
1071. Sāvatthinidānaṃ . ‘‘Samādhiṃ, bhikkhave, bhāvetha. Samāhito, bhikkhave, bhikkhu yathābhūtaṃ pajānāti. Kiñca yathābhūtaṃ pajānāti? ‘Idaṃ dukkha’nti yathābhūtaṃ pajānāti, ‘ayaṃ dukkhasamudayo’ti yathābhūtaṃ pajānāti, ‘ayaṃ dukkhanirodho’ti yathābhūtaṃ pajānāti, ‘ayaṃ dukkhanirodhagāminī paṭipadā’ti yathābhūtaṃ pajānāti. Samādhiṃ, bhikkhave, bhāvetha. Samāhito, bhikkhave, bhikkhu yathābhūtaṃ pajānāti’’.
‘‘තස්‌මාතිහ, භික්‌ඛවෙ, ‘ඉදං දුක්‌ඛ’න්‌ති යොගො කරණීයො, ‘අයං දුක්‌ඛසමුදයො’ති යොගො කරණීයො, ‘අයං දුක්‌ඛනිරොධො’ති යොගො කරණීයො, ‘අයං දුක්‌ඛනිරොධගාමිනී පටිපදා’ති යොගො කරණීයො’’ති. පඨමං.
‘‘Tasmātiha, bhikkhave, ‘idaṃ dukkha’nti yogo karaṇīyo, ‘ayaṃ dukkhasamudayo’ti yogo karaṇīyo, ‘ayaṃ dukkhanirodho’ti yogo karaṇīyo, ‘ayaṃ dukkhanirodhagāminī paṭipadā’ti yogo karaṇīyo’’ti. Paṭhamaṃ.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 1. සමාධිසුත්‌තවණ්‌ණනා • 1. Samādhisuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 1. සමාධිසුත්‌තවණ්‌ණනා • 1. Samādhisuttavaṇṇanā
