| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
7. ஸமாதி⁴ஸுத்தவண்ணனா
7. Samādhisuttavaṇṇanā
27. ஸத்தமே ஸப்³ப³ஸோ கிலேஸது³க்க²த³ரத²பரிளாஹானங் விக³தத்தா ஸாதிஸயமெத்த² ஸுக²ந்தி வுத்தங் ‘‘அப்பிதப்பிதக்க²ணே ஸுக²த்தா பச்சுப்பன்னஸுகோ²’’தி. புரிமஸ்ஸ புரிமஸ்ஸ வஸேன பச்சி²மங் பச்சி²மங் லத்³தா⁴ஸேவனதாய ஸந்தபணீததரபா⁴வப்பத்தங் ஹோதீதி ஆஹ ‘‘புரிமோ…பே॰… ஸுக²விபாகோ’’தி. கிலேஸப்படிப்பஸ்ஸத்³தி⁴யாதி கிலேஸானங் படிப்பஸ்ஸம்ப⁴னேன லத்³த⁴த்தா. ‘‘கிலேஸப்படிப்பஸ்ஸத்³தி⁴பா⁴வந்தி கிலேஸானங் படிப்பஸ்ஸம்ப⁴னபா⁴வங். லத்³த⁴த்தா பத்தத்தா தப்³பா⁴வங் உபக³தத்தா. லோகியஸமாதி⁴ஸ்ஸ பச்சனீகானி நீவரணபட²மஜ்ஜா²னநிகந்திஆதீ³னி நிக்³க³ஹேதப்³பா³னி, அஞ்ஞே கிலேஸா வாரேதப்³பா³. இமஸ்ஸ பன அரஹத்தஸமாதி⁴ஸ்ஸ படிப்பஸ்ஸத்³த⁴ஸப்³ப³கிலேஸத்தா ந நிக்³க³ஹேதப்³ப³ங் வாரேதப்³ப³ஞ்ச அத்தீ²தி மக்³கா³னந்தரங் ஸமாபத்திக்க²ணே ச அப்பயோகே³ன அதி⁴க³தத்தா அப்பிதத்தா ச அபரிஹானிவஸேன வா அப்பிதத்தா ந ஸஸங்கா²ரனிக்³க³ய்ஹவாரிதக³தோ. ஸதிவேபுல்லப்பத்தத்தாதி ஏதேன அப்பவத்தமானாயபி ஸதியா ஸதிப³ஹுலதாய ஸதோ ஏவ நாமாதி த³ஸ்ஸேதி. யதா²பரிச்சி²ன்னகாலவஸேனாதி ஏதேன பரிச்சி²ன்னஸ்ஸதியா ஸதோதி த³ஸ்ஸேதி. ஸேஸேஸூதி ஞாணேஸு.
27. Sattame sabbaso kilesadukkhadarathapariḷāhānaṃ vigatattā sātisayamettha sukhanti vuttaṃ ‘‘appitappitakkhaṇe sukhattā paccuppannasukho’’ti. Purimassa purimassa vasena pacchimaṃ pacchimaṃ laddhāsevanatāya santapaṇītatarabhāvappattaṃ hotīti āha ‘‘purimo…pe… sukhavipāko’’ti. Kilesappaṭippassaddhiyāti kilesānaṃ paṭippassambhanena laddhattā. ‘‘Kilesappaṭippassaddhibhāvanti kilesānaṃ paṭippassambhanabhāvaṃ. Laddhattā pattattā tabbhāvaṃ upagatattā. Lokiyasamādhissa paccanīkāni nīvaraṇapaṭhamajjhānanikantiādīni niggahetabbāni, aññe kilesā vāretabbā. Imassa pana arahattasamādhissa paṭippassaddhasabbakilesattā na niggahetabbaṃ vāretabbañca atthīti maggānantaraṃ samāpattikkhaṇe ca appayogena adhigatattā appitattā ca aparihānivasena vā appitattā na sasaṅkhāraniggayhavāritagato. Sativepullappattattāti etena appavattamānāyapi satiyā satibahulatāya sato eva nāmāti dasseti. Yathāparicchinnakālavasenāti etena paricchinnassatiyā satoti dasseti. Sesesūti ñāṇesu.
ஸமாதி⁴ஸுத்தவண்ணனா நிட்டி²தா.
Samādhisuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 7. ஸமாதி⁴ஸுத்தங் • 7. Samādhisuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 7. ஸமாதி⁴ஸுத்தவண்ணனா • 7. Samādhisuttavaṇṇanā
