| Library / Tipiṭaka / তিপিটক • Tipiṭaka / সংযুত্তনিকায (অট্ঠকথা) • Saṃyuttanikāya (aṭṭhakathā) |
১২. সচ্চসংযুত্তং
12. Saccasaṃyuttaṃ
১. সমাধিৰগ্গো
1. Samādhivaggo
১. সমাধিসুত্তৰণ্ণনা
1. Samādhisuttavaṇṇanā
১০৭১. সচ্চসংযুত্তস্স পঠমে সমাধিং, ভিক্খৰেতি তে কির ভিক্খূ চিত্তেকগ্গতায পরিহাযন্তি, অথ নেসং সত্থা – ‘‘এৰমেতে চিত্তেকগ্গতং লভিত্ৰা, কম্মট্ঠানং ৰড্ঢেত্ৰা, ৰিসেসং পাপুণিস্সন্তী’’তি ইমং দেসনং আরভি। তস্মাতিহ, ভিক্খৰে, ‘‘ইদং দুক্খ’’ন্তি যোগো করণীযোতি এত্থ যথাভূতাদিৰসেন কারণচ্ছেদো ৰেদিতব্বো। ইদঞ্হি ৰুত্তং হোতি – ভিক্খৰে, যস্মা সমাহিতো ভিক্খু চত্তারি সচ্চানি যথাভূতং পজানাতি, তস্মা তুম্হেহি চ সমাহিতেহি চতুন্নং সচ্চানং যথাভূতং পজাননত্থায ‘‘ইদং দুক্খ’’ন্তি যোগো করণীযো। তথা যস্মা চত্তারি সচ্চানি তথাগতস্সেৰ পাতুভাৰা পাকটানি হোন্তি, যস্মা চ তথাগতেন সুৰিভত্তানি, যস্মা চ তেসু অপরিমাণা ৰণ্ণা অপরিমাণানি পদব্যঞ্জনানি, যস্মা চ তেসং অপ্পটিৰিদ্ধত্তা ৰট্টং ৰড্ঢতি, তেসং পটিৰিদ্ধকালতো পট্ঠায ন ৰড্ঢতি, তস্মা ‘‘এৰং নো ৰট্টং ন ৰড্ঢিস্সতী’’তি তুম্হেহি ‘‘ইদং দুক্খ’’ন্তি যোগো করণীযো।
1071. Saccasaṃyuttassa paṭhame samādhiṃ, bhikkhaveti te kira bhikkhū cittekaggatāya parihāyanti, atha nesaṃ satthā – ‘‘evamete cittekaggataṃ labhitvā, kammaṭṭhānaṃ vaḍḍhetvā, visesaṃ pāpuṇissantī’’ti imaṃ desanaṃ ārabhi. Tasmātiha, bhikkhave, ‘‘idaṃ dukkha’’nti yogo karaṇīyoti ettha yathābhūtādivasena kāraṇacchedo veditabbo. Idañhi vuttaṃ hoti – bhikkhave, yasmā samāhito bhikkhu cattāri saccāni yathābhūtaṃ pajānāti, tasmā tumhehi ca samāhitehi catunnaṃ saccānaṃ yathābhūtaṃ pajānanatthāya ‘‘idaṃ dukkha’’nti yogo karaṇīyo. Tathā yasmā cattāri saccāni tathāgatasseva pātubhāvā pākaṭāni honti, yasmā ca tathāgatena suvibhattāni, yasmā ca tesu aparimāṇā vaṇṇā aparimāṇāni padabyañjanāni, yasmā ca tesaṃ appaṭividdhattā vaṭṭaṃ vaḍḍhati, tesaṃ paṭividdhakālato paṭṭhāya na vaḍḍhati, tasmā ‘‘evaṃ no vaṭṭaṃ na vaḍḍhissatī’’ti tumhehi ‘‘idaṃ dukkha’’nti yogo karaṇīyo.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ১. সমাধিসুত্তং • 1. Samādhisuttaṃ
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ১. সমাধিসুত্তৰণ্ণনা • 1. Samādhisuttavaṇṇanā
